Достапни линкови

Вести

По 13 години почна ажурирањето на позитивната листа со лекови

илустрација
илустрација

Министерот за здравство Фатмир Меџити денеска информираше дека е донесен новиот Правилник за ставање лекови на позитивна листа, вклучувајќи ги тука и посебните договори што ќе овозможат достапност на иновативни лекови за нашите пациенти.

Меџити вели дека е формирана стручната комисија која го утврдува предлогот на листата на лекови на товар на Фондот за здравство осигурување.

Оваа комисија, наведе министерот, континуирано ќе работи на изменување и дополнување на Позитивната листа на лекови и верувам дека конечно после долг период ќе воспоставиме функционален систем со цел задоволување на потребите на пациентите со соодветни терапии.

„Грижата за пациентите е наш стратешки приоритет и во таа насока Министерството за здравство континуирано работи на надградување на прописите со кои се уредува областа на лековите,“ нагласи Меџити.

Комисијата е составена од експерти во оваа област, односно претставници од Министерството за здравство, Фондот за здравствено осигурување, Агенцијата за лекови и медицински средства, Институтот за претклиничка и клиничка фармакологија со токсикологија, како и од универзитетските клиники, кои се доктори-специјалисти од различни области на медицината и фармацијата, појасни министерот.

Меџити се надева дека фармацевтските компании веќе ја подготвуваат потребната документација за да одговорат на барањата на Правилникот и дека во блиска иднина ќе пристигнат и првите апликации.

Професорката Љубица Шутуркова изјави дека после 13 години повторно се има можност да се ревидира листата и се надева оти „ќе имаме поголема достапност во ограничените македонски ресурси за здравство што ги имаме“.

Министерот Меџити додаде дека нема рок во кој целосно би се обновила позитивната листа на лекови. Рече дека тоа е процес кој спонтано ќе се случува, а фармацевтските компании веќе можат да доставуваат апликации.

види ги сите денешни вести

Брнабиќ: Извештајот на ОБСЕ става крај на наводите за изборна кражба

Српската премиерка Ана Брнабиќ
Српската премиерка Ана Брнабиќ

Српската премиерка Ана Брнабиќ на 28 февруари изјави дека извештајот на Канцеларијата на ОБСЕ за демократски институции и човекови права (ОДИХР) за декемвриските избори во Србија „секако има негативни аспекти“.

„Најважно е што овој извештај по неколкумесечна нестабилност става крај на сите лаги и глупости за кражбата на изборите“, тврди Брнабиќ.

Извештајот на ОДИХР треба да биде објавен во текот на денот. Во Србија на 17 декември се одржаа вонредни парламентарни, покраински и локални избори во 65 градови и општини, меѓу кои и Белград.

Домашни и меѓународни набљудувачи оценија дека имало нерегуларности на изборите, а дел од опозицијата ја обвини владејачката Српска напредна партија (СНС) за изборна кражба. Државниот врв и СНС ги отфрлаат овие наводи.

Брнабиќ, на прес-конференцијата во врска со извештајот на ОДИХР најави дека Владата ќе продолжи да работи со оваа мисија и да ги спроведува нивните препораки.

„Дали се согласуваме со се во овој извештај, секако не, но продолжуваме да ги спроведуваме препораките“, рече таа.

Таа повтори дека Владата на Србија ја поканила мисијата на ОДИХР да ги набљудува локалните избори во Србија, кои треба да се одржат напролет.

Брнабиќ оцени дека извештајот на ОДИХР е „неспоредливо пообјективен“ од извештаите на некои други меѓународни институции.

„Секој ќе може да види дека нема докази или критики за она што се нарекува кражба на изборите“, тврди Брнабиќ.

Таа тврди дека препораките во извештајот се „многу поблаги отколку во многу земји од Европската Унија“, и затоа смета дека тоа „покажува дека изборите биле транспарентни, фер и во согласност со демократските норми“.

Осврнувајќи се на оценката дека во предизборната кампања била присутна целосната доминација на српскиот претседател Александар Вучиќ, премиерката рече дека таков наратив создала опозицијата.

„Опозицијата ја направи оваа кампања како референдум за тоа дали сте или не за Вучиќ. Се разбира дека тој доминираше, опозицијата направи таков наратив“, смета Брнабиќ.

Таа наведе и дека во извештајот „најпозитивно е оценета работата на Републичката изборна комисија (РИК).

Според неа, Србија имплементирала 54 препораки на ОДИХР во претходните седум години.

ОДИХР во прелиминарниот извештај на 18 декември објави дека изборите ги одбележале нерегуларности, злоупотреба на јавните средства, медиумска доминација на претседателот на државата Александар Вучиќ, негативна кампања и ширење страв.

На 8 февруари, Европскиот Парламент изгласа резолуција со која се бара меѓународна истрага за наводните нерегуларности за време на изборите одржани минатиот декември во Србија, како и суспензија на европските фондови, доколку се докаже дека властите биле директно вмешани во измама на гласачите.

За резолуцијата на Европскиот Парламент за ситуацијата во Србија по изборите гласаа 461 пратеник, против беа 53, а 43 беа воздржани.

Фон дер Лајен предага профитот од замрзнатите руски средства да оди за Украина

Претседателката на Европската Комисија, Урсула фон дер Лајен
Претседателката на Европската Комисија, Урсула фон дер Лајен

Европската Унија треба да размисли за користење на профитот од замрзнатите руски средства за купување воени материјали за Украина, изјави во среда (28 февруари) претседателката на Европската Комисија, Урсула фон дер Лајен.

„Време е да започнеме разговор за користење на неочекуваните профити од замрзнатите руски средства за заедничко купување воена опрема за Украина“, рече таа во говорот пред Европскиот Парламент во кој ја повика ЕУ да направи повеќе за одбранбената политика.

Фон дер Лајен додаде дека „не може да има посилен симбол и поголема употреба на тие пари од тоа да се направи Украина и цела Европа побезбедно место за живеење“.

Првата жена на ЕК рече дека опасноста од војна за ЕУ „можеби не е моментална, но не е невозможна“.

„Ризиците од војна не треба да се преувеличуваат, туку треба да се подготвите за нив, а тоа започнува со итната потреба за обнова, надополнување и модернизација на вооружените сили на земјите-членки“, рече шефицата на Европската Комисија.

Фон дер Лајен ја претстави новата индустриска стратегија за европска одбрана што ќе ја претстави Комисијата во наредните недели, велејќи дека една од нејзините главни цели ќе биде да се даде приоритет на заедничките набавки.

„Европа треба да се стреми да ја развие и произведе следната генерација на борбени оперативни способности. Ова значи турбо полнење на нашите одбранбени индустриски капацитети во следните пет години“, рече Фон дер Лајен.

Додаде дека поголемите европски одбранбени напори нема да ја намалат потребата од НАТО.

Украинските сили се повлекоа од уште две села на истокот

илустрација
илустрација

Украинската војска соопшти дека нејзините сили се повлекле од уште две села во близина на источниот украински град Авдијивка, кои беа заземени од руските сили претходно овој месец.

Украина претрпе нови загуби бидејќи нејзината армија продолжува да се бори со недостиг на опрема, особено муниција, јави украинскиот сервис на Радио Слободна Европа.

Украинските војници се повлекоа од Степова и Северна, кои се наоѓаат западно од Авдијивка, изјави во вторникот портпаролот на украинската армија Дмитро Лихови.

„Нашите сили се повлекоа од малите села Северна и Степова... тешки борби за Северна се водеа вчера вечерта и ноќе“, рече Лихови, додавајќи дека Русија претрпе значителни загуби во битката.

Украинските сили консолидираа нови одбранбени позиции западно од Авдијивка, рече тој.

Руското Министерство за одбрана соопшти дека ја зазело Северна и дека нејзините војници „зазеле поповолни линии и позиции“ и ги нападнале украинските војници и опрема во близина на Северна и Степова, како и друга населба Ласточкине, за која Киев во понеделникот објави дека неговите војници се повлекле од таму.

Командантот на југоисточниот сектор на Украина, Олександр Тарнавски, на Телеграм изјави дека во „секторот“ Авдијивка е „стабилизирана“ одбранбената линија во областите Тоненка, Орливка и Бердичи.

„Руските сили не успеаја во нивните обиди да напредуваат во две области на југ, вклучувајќи го и селото Роботин под контрола на Украина“, додаде Тарнавски.

Тие тврдења не можеа да се потврдат.

Американскиот Стејт департмент во вторникот објави дека ситуацијата на бојното поле во Украина е „исклучително сериозна“ бидејќи украинската армија нема доволно муниција за да ја одбие руската агресија.

Портпаролот на Стејт департментот Метју Милер рече дека украинските војници „продолжуваат храбро да се борат“ со оружјето и муницијата што ги имаат, но „мора да ги чуваат бидејќи американскиот Конгрес не дејствувал“.

Милер повторно го повика Конгресот да донесе закон со кој ќе се обезбеди воена помош од 61 милијарда долари за украинската војска.

Претседателот на републиканскиот дом Мајк Џонсон, сојузник на поранешниот претседател Доналд Трамп, одби да дозволи гласање за законот.

Американскиот претседател Џо Бајден и највисоките демократи се состанаа со Џонсон и други високи републикански членови на Конгресот во Белата куќа во вторникот (27 февруари) за повторно да побараат усвојување на закон што ќе дозволи помош за Украина.

Во соопштението на Белата куќа објавено по состанокот се вели дека Бајден „разговарал за тоа како Украина го загубила теренот на бојното поле во последните недели и е принудена да рационализира муниција и залихи поради неактивноста на Конгресот“.

Бајден повторно предупреди на тешките трошоци за одложување на помошта што Сенатот со големо мнозинство ја одобри пред речиси две недели.

Џонсон по состанокот рече дека пакетот од Сенатот „не прави ништо“ за обезбедување на границата меѓу САД и Мексико, што републиканците го побараа во замена за одобрување помош за Украина.

Бајден и Трамп победија на партиските избори во Мичиген

Доналд Трамп и Џо Бајден
Доналд Трамп и Џо Бајден

Актуелниот претседател на Америка, демократот Џо Бајден и републиканецот Доналд Трамп ги освоија партиските гласови во Мичиген за претседателска номинација од нивните партии.

Бајден го победи конгресменот од Минесота Дин Филипс, единствениот сериозен ривал во борбата за претседателската номинација на Демократската партија, објави Гласот на Америка.

Демократите, сепак, внимателно следеа колку гласови ќе добие опцијата „неопределени“ бидејќи Мичиген стана епицентар на незадоволството меѓу поддржувачите и членовите на Демократската партија кои се противат на позицијата на Бајден за војната меѓу Израел и Хамас, која САД и Европската Унија ја смета за терористичка организација.

Пред четири години, благодарение, меѓу другото, на победата од 54 000 гласови во Мичиген, која е една од државите во кои се водат изборните битки, Бајден го трасираше патот до победата и освојувањето на позицијата во Белата куќа.

Бројот на неопределени гласачки ливчиња надмина 10 000, што е приближно разликата со која Трамп го освои Мичиген во 2016 година. Тој број гласови како цел го поставија претставниците на неопределената опција од редовите на демократите на овие партиски избори.

Ова е петтаа убедлива победа на Трамп во борбата за републиканската номинација. Триумфот во Мичиген над противничката Ники Хејли, поранешена амбасадорка во Обединетите Нации, дојде откако тој победи и во нејзината родна држава Јужна Каролина.

Според проекциите на Едисон Рисрч, Бајден добил околу 79 отсто поддршка, а опцијата „неопределени“ добила 16 отсто. Трамп добил околу 64 отсто од поддршката наспроти 32 отсто подршка за Хејли.

За Бајден, големиот број „неопределени“ гласачи може да значи дека тој е во значителна неволја со делови од демократскиот електорат во државата што тешко може да си дозволи да ја изгуби во ноември.

Трамп досега имаше слаби резултати со гласачите во предградијата и со луѓе со факултетски дипломи и се соочува со дел од Републиканската партија која верува дека го прекршил законот во еден или повеќе од кривичните случаи кои се во тек против него.

И претставниците на Белата куќа и претставниците на кампањата на Бајден отпатуваа во Мичиген во последниве недели за да разговараат со лидерите на локалната арапска заедница за војната меѓу Израел и Хамас и за пристапот на Бајден кон конфликтот во Појасот Газа.

Сепак, локалните лидери, заедно со организаторите на кампањата за опцијата „неопределени“, не го променија својот став.

Силните напори на граѓаните кои ги охрабрија гласачите да бидат неодлучни како начин да се изрази противење на ставот на Бајден за војната во Газа, беше најзначајниот политички предизвик на Бајден во пратеничката група.

Зеленски во Тирана, Албанија поготвена за самитот за Украина

Тирана подготвена за самитот Украина-Југоисточна Европа, 27 февруари 2024 година
Тирана подготвена за самитот Украина-Југоисточна Европа, 27 февруари 2024 година

Во главниот град на Албанија, Тирана, денеска (28 февруари) се одржува самитот Украина-Југоисточна Европа, на кој меѓудругите ќе присуствува и украинскиот претседател Володомир Зеленски, кој пристигна во Тирана.

Ова е прва посета на Зеленски на Тирана, која доаѓа само неколку дена по втората годишнина откако Русија започна целосна инвазија на Украина.

Дел од украинската делегација ќе биде и министерот за надворешни работи Дмитро Кулеба.

На самитот ќе учествуваат и неколку лидери на земјите од Југоисточна Европа и еврокомесарот за проширување Оливер Вархеји.

Претседателката Вјоса Османи го претставува Косово на овој самит.

Како што е познато, на самитот ќе бидат присутни и албанскиот премиер Еди Рама, претседателот на Србија, Александар Вучиќ, претседателот и техничкиот премиер на Северна Македонија, Стево Пендаровски и Талат Џафери, претседателот на Црна Гора, Јаков Милатовиќ, премиерот на Хрватска, Андреј Пленковиќ, претседавачот со Советот на министри на Босна и Херцеговина, Борјана Кришто и претседателката на Молдавија, Маја Санду.

Премиерот Албин Курти, кој учествуваше на претходните самити поврзани со планот за раст на ЕУ, оваа недела престојува во Велика Британија.

Како што јавуваат медиумите, Тирана е под силни безбедносни мерки. За самитот се ангажирани речиси 1600 полицајци, вклучително и интервентни тимови и антитерористичката служба, уште 400 припадници на гардата ќе бидат на готовност, а антиексплозивни групи ќе ја следат ситуацијата.

Директорот на Одделот за јавен ред и безбедност на државната полиција на Албанија, Ребани Јакупи, на прес-конференција на 27 февруари најави дека од безбедносни причини и за олеснување на движењето на делегациите, некои патишта во Тирана ќе бидат затворени.

„Во овој контекст, Државната полиција, во соработка со Републиканската гарда и другите органи на прогонот, изработи детален план за мерки за обезбедување на јавниот ред пред, за време и по активностите што ќе се одвиваат во овие два дена“, рече тој.

Екипата на Радио Слободна Европа и ден пред почетокот на самитот забележа бројни полициски единици во близина на локациите каде што ќе се одвиваат активностите.

Инаку на самитот се очекува Зеленски да има повеќе билатерални средби, меѓу кои и со албанскиот премиер Еди Рама и со претседателот Бајрам Бегај.

По самитот на Украина и Југоисточна Европа, в четврток ќе се одржи самитот на Западен Балкан, на кој ќе се разговара за Планот за раст на тој регион. Се очекува и доаѓањето на претседателката на Европската Комисија, Урсула фон дер Лајен.

Продолжување на важноста на пасошите, избор на член на ДИК, законот за игри на среќа - на дневен ред во Собранието

илустрација
илустрација

Собранието денеска треба да ја започне 145-та седница на која на дневен ред, меѓу другите, се измените на Законот за патните исправи на државјаните на Република Северна Македонија, по итна постапка, предложен од ВМРО-ДПМНЕ, како и Предлог на закон за изменување на Законот за плата и други надоместоци на избрани и именувани лица во Република Македонија и Предлог на закон за изменување на Законот за пратениците, предлози на пратениците на СДСМ кои се однесуваат на функционерските плати.

На прашањето дали мнозинството во законодавниот дом ќе даде поддршка за продолжување на важноста на патните исправи, претседателот на македонското Собрание, Јован Митрески вчера одговори дека меѓународните договори не можат да се менуваат со друг закон.

„Според информациите што ги добивам е дека тој закон нема да ги реши проблемите и дека е спротивен на членот 118 од Уставот во смисла на тоа дека меѓународните договори дека се дел од внатрешниот правен промет и фактички дека не можат да се менуваат со друг закон, така да конечната одлука ќе биде соопштена во текот на денот“, изјави Митрески.

Опозициската ВМРО-ДПМНЕ минатата недела повика на поддршка од владеjачкото мнозинство за продолжување на важноста на патните исправи. Според нив, потребни се 15 пратеници од власта, кои заедно со пратениците на ВМРО-ДПМНЕ, ќе го изгласаат законот за продолжување на важноста на пасошите.

На дневен ред денска се и Закон за изменување и дополнување на Законот за игрите на среќа и за забавните игри, во трето читање и избор на член на Државната изборна комисија.

На седницата се очекува Абдуш Демири да биде избран за член на највисокото изборно тело во земјата. За тој да биде избран потребна е поддршка од повеќе од 80 пратеници.

Закон за изменување и дополнување на Законот за игрите на среќа и за забавните игри, трето читање е ставен повторно на дневен ред, откако претседателот Стево Пендаровски не го потпиша указот за него. За да се изгласа овој закон, на парламентарното мнозинство ќе му биде потребен 61 глас.

Соборени пет дрона на Хутите во Црвено Море

илустрација
илустрација

Американската војска соопшти дека нејзин авион, помогнат од воен брод, соборил пет офанзивни беспилотни летала во Црвеното Море, што биле лансирани од областите под контрола на јеменските бунтовници Хути.

Дроновите „претставуваа непосредна закана за трговските бродови и бродовите на американската морнарица и коалицијата во регионот“, се наведува во соопштението на американската Централна команда (Центком).

Хутите, кои го контролираат поголемиот дел од Јемен, почнаа да ги напаѓаат трговските бродови во Црвеното Море и Аденскиот Залив на 19 ноември во знак на протест против израелската воена операција во Газа.

САД и Велика Британија од минатиот месец почнаа со воздушни напади врз воените позиции на Хутите во Јемен, како што наведоа, заради намалување на способноста на бунтовниците да напаѓаат трговски бродови во Црвеното Море.

Стејт департмент: Не сакаме ескалација на тензиите меѓу Израел и Хезболах

илустрација
илустрација

САД не сакаат понатамошна ескалација на тензиите меѓу Израел и Хезболах, соопшти синоќа американскиот Стејт департмент, додавајќи дека Израел го уверил Вашингтон дека сака дипломатско решение.

Портпаролот на Стејт департментот, Метју Милер, на брифинг за медиумите изјави дека десетици илјади Израелци на северот на земјата се соочуваат со реална безбедносна закана која треба да се реши и дека Вашингтон се стреми кон дипломатско решение на ситуацијата.

„Не сакаме да видиме ниту една страна да го ескалира конфликтот на северот. Израелската влада јавно кажа и приватно не увери дека сака да стигне до дипломатски пат. Значи, тоа е она што ние ќе продолжиме да го следиме, а тоа на крајот ќе ја направи воената акција непотребна“, рече Милер.

Тој говореше откако Хезболах соопшти дека лансирала низа од проектили врз базата за воздушно набљудување на Израел вчера како одговор на нападот на Тел Авив на најдлабоката територија на Либан до сега. Нема извештаи за ракетни жртви веднаш по нападот.

Хезболах од 8 октомври речиси секојдневно разменува оган со Израел долж јужната граница на Либан, еден ден по крвавиот напад на Хамас врз јужен Израел што доведе до израелска копнена, воздушна и поморска офанзива на Појасот Газа.

Од октомври, околу 50 цивили се убиени во израелските напади во Либан, како и околу 200 борци на Хезболах.

Поранешен адвокат на Навални приведен во Москва

Људмила Навалнаја, мајка на покојниот руски опозициски лидер Алексеј Навални, и адвокатот Василиј Дубков пристигнуваат во регионалниот оддел на рускиот Истражен комитет во градот Салехард во регионот Јамал-Ненец, Русија, 17 февруари 2024 година.
Људмила Навалнаја, мајка на покојниот руски опозициски лидер Алексеј Навални, и адвокатот Василиј Дубков пристигнуваат во регионалниот оддел на рускиот Истражен комитет во градот Салехард во регионот Јамал-Ненец, Русија, 17 февруари 2024 година.

Руските медиуми на 27 февруари објавија дека полицијата во Москва го привела поранешниот адвокат на починатиот опозициски политичар Алексеј Навални, Василиј Дубков, под неодредени обвиненија. Тој бил одведен во полициската станица под обвиненија дека го нарушил јавниот ред и мир.

Дубков по пуштањето од полициската станица не ги коментираше околностите на инцидентот, но за изданието „Верстка“ изјави дека притворот го смета за попречување на адвокатските активности.

Дубков минатата недела ја придружуваше мајката на Навални, Људмила Навалнаја, во арктичкиот град Салехард, додека таа го бараше телото на нејзиниот син. Телото и беше предадено на 24 февруари.

Василиј Дубков е адвокат од Новосибирск. Тој повеќепати дејствувал како бранител во политички случаи и соработувал со иницијативата ОВД-Инфо, која обезбедува правна помош на приведените на политичките протести.

Тројцата поранешни адвокати на Навални, Вадим Кобзев, Игор Сергунин и Алексеј Липстер, беа уапсени во ноември под обвинение за екстремизам. Во средината на ноември, московскиот суд издаде налог за апсење на уште еден бранител на Навални, адвокатката Олга Михајлова, под обвинение за екстремизам.

Продолжена забраната за влез на руски туристи во Латвија до март 2025

Граница меѓу Латвија и Русија
Граница меѓу Латвија и Русија

Владата на Латвија (Летонија) на 27 февруари соопшти дека ја продолжила забраната за влез на руски државјани во балтичката земја до март 2025 година. Како причина ја наведуваат руската инвазија на Украина, за која тамошните власти велат дека „продолжува да претставува закана за внатрешната безбедност на Латвија“.

Во соопштението од Кабинетот на премиерката Евика Силина, се наведува дека влезот на руски државјани во Европската унија и Латвија како туристи ќе биде забранет до понатамошно известување, но на некои Руси ќе им биде дозволен влез, вклучително и оние со дозвола за престој, важечка во Латвија или во друга земја-членка на ЕУ или Руси чиј влез е поврзан со хуманитарни причини како што се политички десиденти.

Во септември 2022 година, Полска заедно со другите балтички земји - Естонија, Латвија и Литванија постигнаа заеднички договор за ограничување на бројот на руски државјани кои влегуваат во нивните земји за да се спречат евентуални безбедносни ризици по почетокот на војната во Украина.

Латвија, членка на ЕУ и НАТО што се граничи со Русија, е дом на значителен број припадници на етничкото руско малцинство, кое сочинува околу 25 отсто од вкупното население на земјата од 1,9 милиони жители. Балтичката земја порано беше популарно место за одмор, а нејзиниот главен град Рига, популарна викенд дестинација за руските туристи.

Вчитај повеќе

XS
SM
MD
LG