Достапни линкови

Вести

Неуспешен обид за формирање нова влада на Црна Гора

средба на парламентарното мнозинство во Црна Гора

Парламентарното мнозинство во Црна Гора на прорускиот Демократски фронт, Демократите и движењето УРА на Дритан Абазовиќ не постигнаа договор за формирање на нова влада на чело со пратеникот Миодраг Лекиќ.

По средбата на претставниците на парламентарното мнозинство на 4 јануари, Лекиќ најави дека нема да има нова влада.

„Реков дека владата ќе биде сериозна или нема. Нема да има, а граѓаните нека протолкуваат кој бил сериозен“, рече Лекиќ по средбата на која се разговараше за составот на идната влада и датумот на кој требаше истата да биде избрана на седницата на Собранието. Лекиќ претходно најави дека новата влада ќе биде формирана до 20 јануари.

На 29 декември парламентарното мнозинство го прогласи Миодраг Лекиќ за мандатар, врз основа на контроверзните измени на Законот за претседател. Со тој закон парламентарното мнозинство се обиде да ја преземе надлежноста на претседателот на Црна Гора, Мило Ѓукановиќ, бидејќи тој одби да и додели мандат за состав на Влада на Лекиќ.

САД и Европската Унија, постојано апелираа до парламентарното мнозинство да не се обидува да формира влада врз основа на Законот за претседателот и предупредија дека таквата влада ќе има сомнителен легитимитет.

И покрај тоа, Миодраг Лекиќ инсистираше да се формира Влада.

Еден од лидерите на Демократскиот фронт, Андрија Мандиќ, по неуспешната средба изјави дека партиите кои ја сочинуваат актуелната техничка влада на Дритан Абазовиќ не се потпишале за закажување седница на која ќе се избира новата влада и шеф на парламентот.

„Не успеавме во она што го започнавме на 1 септември (по изборите во 2020 година). Со жалење констатирам дека вложивме многу енергија за да постигнеме договор“, рече Мандиќ.

Тој рече дека претседателката на Собранието Данијела Ѓуровиќ и претседателот на државата Мило Ѓукановиќ треба да се договорат за истовремено распишување претседателски и парламентарни избори.

Мандатот на Ѓукановиќ му истекува на пролет годинава. Партиите од парламентарното мнозинство во септември ја отфрлија иницијативата на претседателот на Црна Гора Мило Ѓукановиќ за распуштање на Собранието и распишување предвремени парламентарни избори со образложение дека ќе формираат нова влада.

види ги сите денешни вести

Вашингтон ја одобри продажбата на системот Химарс на Полска

ракетниот систем Химарс

САД објавија дека одобриле продажба на 18 ракетни системи Химарс на Полска, земја членка на НАТО што се граничи со Украина, за 10 милијарди долари. „Планираната продажба ќе ги подобри воените цели на Полска во однос на обновувањето на капацитетите, истовремено зајакнувајќи ја интероперабилноста со САД и другите сојузници“, соопшти американската Агенција за одбранбена безбедносна соработка.

Полска и другите сојузници на НАТО на источното крило се сè позагрижени од можна нова руска офанзива во Украина долж нивната граница како што се приближува првата годишнина од почетокот на руската инвазија. Стејт департментот соопшти дека продажбата ќе ги поддржи целите на надворешната политика и националната безбедност на САД преку зајакнување на одбранбените капацитети на сојузникот во НАТО.

Леброн Џејмс стана најдобар стрелец во НБА лигата

Леброн Џејмс

Американскиот кошаркарски великан Леброн Џејмс го постави рекордот на Националната кошаркарска асоцијација (НБА) најдобар стрелец во историјата на НБА, со вкупно 38.388. 38 годишниот Џејмс има просек од 27,2 поени по натпревар. Џејмс постигна рекордни 38.388 поени на 10,9 секунди до крајот на третата четвртина во мечот меѓу Оклахома и Лос Анџелес Лејкерс, по што следеше кратка церемонија. „Ви благодарам што ми дозволивте да бидам дел од нешто за што отсекогаш сум сонувал“, изјави кошаркарот на Лејкерс. Тој го постави рекордот во својата 20-та сезона во НБА, додека Карим Абдул-Џабар, кој присуствуваше на натпреварот во Лос Анџелес, е на второто место на вечната листа. Абдул-Џабар беше водечки стрелец во НБА од 5 април 1984 година, а пет години подоцна кариерата ја заврши со 38.387 поени.

Бајден во говорот за состојбата на Унијата вети дека ќе ја заштити земјата

Претседателот на САД Џо Бајден го одржува говорот за состојбата на Унијата на заедничката седница на Конгресот во Капитол

Американскиот претседател Џо Бајден во неговиот втор говор за состојбата на Унијата ја осуди руската инвазија на Украина и ја промовираше американската поддршка за владата во Киев. „Заедно го направивме она што Америка секогаш го прави најдобро. Водевме. Го обединивме НАТО. Изградивме глобална коалиција“, рече Бајден, ветувајќи дека ќе застане со Украина „колку што е потребно“. Конгресот одобри повеќе од 100 милијарди долари помош и воена помош за Украина и партнерските земји откако Русија ја нападна Украина на 24 февруари 2022 година.

Неколку републиканци - предводени од оние кои се најтесно поврзани со поранешниот претседател Доналд Трамп - се прашуваат дали Вашингтон треба да продолжи да испраќа толку многу пари на владата во Киев. Но, повеќето од партијата - вклучувајќи ги нејзините водачи и највисоките членови на комитетите за национална безбедност во Конгресот - очекуваат помошта да продолжи. Коментарите на Бајден за Украина беа дочекани со силен аплауз и овации и од републиканците и од демократите. Американскиот претседател Џо Бајден во своето обраќање за состојбата на нацијата рече и дека ќе соработува со големиот ривал Кина, но вети „дека ќе ја заштити земјата“.

„Посветен сум да работам со Кина каде што можеме да ги унапредиме американските интереси и да му користиме на светот“, рече Бајден. „Но, не правете грешка во врска со тоа: како што јасно кажавме минатата недела, ако Кина го загрози нашиот суверенитет, ние ќе дејствуваме за да ја заштитиме нашата земја“, рече Бајден. Пекинг негираше дека балонот бил шпионски уред.

Бројот на жртвите во земјотресот во Турција и Сирија надмина 7.200

Бројот на загинати од земјотресот во Турција и Сирија надмина 7.200

Бројот на загинати од земјотресот во Турција и Сирија надмина 7.200 и веројатно ќе се зголеми уште повеќе бидејќи леденото време и бројните последователни потреси ги попречуваат напорите за спасување и покрај огромната меѓународна помош. Во тек е трка да се најдат преживеани и да им се помогне на повредените. Земјотрес со јачина од 7,8 степени според Рихтеровата скала ги погоди југоисточна Турција и северна Сирија во понеделникот, проследен со бројни последователни потреси и уште еден силен земјотрес со јачина од 7,5 степени по Рихтер неколку часа подоцна.

Турската агенција за вонредни состојби објави дека вкупниот број на жртви во земјата надминал 5.400, а има околу 31.000 повредени. Во Сирија, областа погодена од земјотресот е поделена меѓу територијата која е контролирана од владата и територијата контролирана од опозицијата, која е опкружена од владините сили и се граничи со Турција. Бројот на загинати во областите под контрола на владата во Сирија се искачи на повеќе од 800, според Министерството за здравство, додека најмалку 1.000 луѓе загинале во бунтовничката енклава на северозапад, според Белите шлемови, организацијата за итна помош која води спасување. операции.

Претседателот Реџеп Таип Ердоган рече дека 13 милиони од 85 милиони жители на земјата се погодени од земјотресот и прогласи вонредна состојба во 10 провинции.

Времето денеска: сончево со умерена облачност

Сончево со мала до умерена облачност и со слаб до умерен ветер претежно од североисточен правец. Дневната температура ќе се движи од минус 6 до 7 степени. Во Скопје и околината слично време со дневна температура до 3 степени.

Пожар во американска фабрика за беспилотни летала во Летонија

Илустрација

Во фабрика за беспилотни летала во Летонија, која произведува беспилотни летала за војската на Украина и за сојузниците во НАТО денеска избувнал пожар.

Дваесетина полициски автомобили, девет противпожарни возила и пет возила на брза помош се упатиле на местото на пожарот во фабриката што ја води американската компанија „Еџ автономи“ на периферијата на Рига. Причината за пожарот не е позната и нема информации за повредени.

„Во зградата за производство се појави ризичен пожар, кој искри многу чад“, објави пожарникарската служба на Твитер, повикувајќи ги локалните жители да ги држат затворени вратите и прозорците.

Компанијата со седиште во Калифорнија, според нејзината веб-страница, произведува беспилотни авиони со долг дострел за разузнавачки, надзорни и извидувачки мисии.

Пет жртви во експлозија на гас во зграда во Русија

Зградата која се урнала како резултат на експлозијата на гас во Јефремов.

Најмалку пет лица загинаа денеска во експлозија на гас во зграда на пет ката во градот Јефремов, кој се наоѓа јужно од руската метропола Москва, соопштија локалните власти на регионот.

„Досега се спасени седум лица, за жал пет лица загинаа“, информираа од итната служба и оттаму додадоа дека спасувачките тимови продолжуваат да бараат преживеани или тела на местото на настанот.

Според властите, експлозијата уништила три нивоа од петкатница. Експлозиите на гас се релативно чести во Русија поради застарената инфраструктура и лошите безбедносни прописи околу употребата на гас.

МВР: Приведени неколку лица за оштетувањето на македонскиот клуб во Благоевград

Отворањето на македонскиот клуб во Благоевград.

Неколку лица се приведени за оштетувањето на македонскиот клуб „Никола Јонков Вапцаров“ во Благоевград, велат од МВР за РСЕ, откако, како што додаваат оттаму, министерот за внатрешни работи Оливер Спасовски вчера покренал иницијатива до неговиот бугарски колега Иван Демерџиев за расчистување на случајот.

Од МВР посочуваат и дека Демерџиев за епилогот денеска го известил министерот Спасовски.

Бугарскиот интернет портал „Нова бг“, претходно јави за случајот се приведени 4 лица и дека станува збор за две жени и двајца мажи и тие моментално се во притвор.

По полициската акција во Благоевград, како што јави медиумот, Демерџиев го информирал Спасовски.

Каменувањето се случи на 5 февруари и притоа беше предизвикана материјална штета. Според бугарските медиуми, кон клубот биле фрлани повеќе камења при што е искршено надворешното стакло.

Организацијата на Македонците во Бугарија ОМО Илинден Пирин бара од тамошната полиција да истражи случајот. Клубот беше отворен во октомври лани.

Нападот врз македонскиот клуб во Благоевград се случи еден ден по одбележувањето на 151 годишнина од раѓањето на македонскиот револуционер Гоце Делчев во црквата свети Спас во Скопје.

Одбележувањето помина под силно полициско обезбедување, но во мирна атмосфера. Сепак, тензично, беше на граничниот премин „Деве Баир“, кога бугарски државјани кои сакале да присуствуваат на одбележувањето на роденденот на Делчев во Скопје не беа пуштени да влезат на македонска територија поради пад на граничниот систем за контрола.

Министерство за внатрешни работи соопшти дека тројца бугарски државјани биле приведени поради нарушување на јавниот ред и мир и недолично однесување со полициските службеници на „Деве Баир“. На тројцата им беше изречена и парична казна во износ од 300 евра и мерка протерување од земјава и забрана за влез во државата за период од три години.

Украина ќе добие над 100 тенкови

Илустрација

Германскиот министер за одбрана Борис Писториус кој беше во ненадејна посета на Киев најави денеска дека Украина ќе добие повеќе од 100 борбени тенкови од постариот тип Леопард 1 од неколку европски земји.

„Бројот на тенкови е доволен за опремување на најмалку три баталјони“, рече Писториус без да ги именува земјите освен Германија кои ќе ги испратат тенковите Леопард 1.

Тие треба да бидат испорачани до првиот или вториот квартал на 2024 година. Писториус, кој ја презеде функцијата министер за одбрана пред помалку од три недели, се сретна со украинскиот претседател Володимир Зеленски и министерот за одбрана Олексеј Резников за време на неговата посета.

Германската влада минатата недела соопшти дека одобрила извоз на борбени тенкови Леопард 1 во Украина. Леопард 1 не се толку напредни како Леопард 2 што Германија и другите земји ветија дека ќе ги испратат во Украина минатиот месец, откако САД се согласија да испратат тенкови М1 Абрамс.

Украина побара од своите западни сојузници да и достави потешко оружје за да се спротивстави на руските трупи кои продолжуваат да вршат напади долж линиите на фронтот во источна Украина.

Борел: Дезинформациите се оружје на Русија за контрола и дестабилизација

Високиот претставник на Европската унија (ЕУ) за надворешна политика и безбедност, Жозеп Борел

Високиот претставник на Европската унија (ЕУ) за надворешна политика и безбедност, Жозеп Борел оцени дека Русија води агресивна војна на два фронта: на бојното поле и на информативниот простор и „се обидува да ги освои срцата и умовите на луѓето“.

„Битката против манипулациите со информациите и странското мешање е битка на нашето време. Тоа е битка која мора да ја добиеме“, рече Борел на конференцијата во Брисел.

Во своето излагање Борел оцени дека Русија со години инвестира во дезинформации и манипулации со информации и тоа многу повеќе отколку што прави ЕУ во борбата против дезинформациите.

Тој предупреди на „нов бран“ на дезинформации на фабрикувани слики, видеа и веб-страници кои се претставуваат како медиуми кои се шират, според Борел, „пет пати побрзо од светлината преку социјалните медиуми и сервиси за размена на пораки“.

Оценувајќи ги дезинформациите како оружје на Кремљ, шефот на европската дипломатија нагласи дека Москва на тој начин се обидува да ја контролира ситуацијата дома, но во исто време да ги дестабилизира другите.

„Русија изгради мрежи и инфраструктура за да измами, лаже и дестабилизира. Сакам да ги користам овие силни глаголи: измами, лаже и дестабилизира на индустриски начин. Да ја поткопа довербата во институциите“, подвлече во својот говор Борел.

Тој оцени дека тоа е голема закана за либералните демократии, кои се базираат на информации. Во рамки на конференцијата беше презентиран и извештај за закани од манипулации со странски информации и мешање.

Спасовски ќе ги награди полицајците кои беа на терен за чествувањето на роденденот на Делчев

Полицајци вршат проверка на граѓани за време на чествувањето на роденденот на Делчев на 4.02.2023.

Министерот за внатрешни работи Оливер Спасовски на неговиот Фејсбук профил најави дека сите полициски службеници кои во саботата се погрижиле за достојно чествување на 151 година од раѓањето на македонскиот револуционер Гоце Делчев, ќе бидат наградени со 10 проценти од основната компонента на платата на работникот.

Тој додава дека како министер за внатрешни работи го искористил правото што му го дава Колективниот договор на МВР и на денешната седница и предложил на Владата, која прифатила полицајците кои биле ангажирани на терен на 4 февруари да бидат наградени.

Основната компонента на плата ја сочинуваат: дел на плата за степен на образование, дел на плата за ниво и дел на плата за стаж.

Одбележувањето на 151-годишнината од раѓањето на Делчев во црквата свети Спас помина под силно полициско обезбедување, но во мирна атмосфера. Сепак, тензично, беше на граничниот премин „Деве Баир“, кога бугарски државјани кои сакале да присуствуваат на одбележувањето на роденденот на Делчев во Скопје не беа пуштени да влезат на македонска територија поради пад на граничниот систем за контрола.

Министерство за внатрешни работи соопшти дека тројца бугарски државјани биле приведени поради нарушување на јавниот ред и мир и недолично однесување со полициските службеници на „Деве Баир“. На тројцата им беше изречена и парична казна во износ од 300 евра и мерка протерување од земјава и забрана за влез во државата за период од три години.

Ѓукановиќ: Го поддржуваме европскиот пат на Косово

Претседателот на Црна Гора, Мило Ѓукановиќ и претседателката на Косово Вјоса Османи.

„Ги разбираме амбициите на Косово да стане членка на Советот на Европа, да добие статус на кандидат за Европската унија и тоа силно го поддржуваме“, изјави денеска претседателот на Црна Гора, Мило Ѓукановиќ по средбата со претседателката на Косово Вјоса Османи.

Ова е прва официјална посета на претседателката на Косово на Црна Гора, каде што престојува на покана на Ѓукановиќ, кој пред вилата Горица ја пречека со највисоки државни почести.

Османи истакна дека Црна Гора досега покажала јасна поддршка за Косово на сите полиња.

„Црна Гора и Косово се суверени држави и јасно посветени на патот кон членството во ЕУ. Ќе продолжиме да работиме со цел да ги решиме прашањата од нашето болно минато. Ќе продолжиме по патот на мирот и стабилноста“, рече Османи.

Таа му се заблагодари на Ѓукановиќ за поддршката, наведувајќи дека членството на Црна Гора во НАТО придонело за мир во целиот регион.

Ѓукановиќ рече дека Црна Гора внимателно следи се што се случува во преговорите меѓу Косово и Србија.

„Убедени сме дека може да се постигне одржлив договор, со решавање на тоа прашање значително би се решила стабилноста на овој регион“, порача Ѓукановиќ.

Владата на Црна Гора, предводена од Демократската партија на социјалистите на претседателот Ѓукановиќ, го призна Косово во октомври 2008 година, осум месеци по одлуката на Приштина да прогласи независност.

УНЕСКО нуди помош за оштетеното светско наследство во Турција и Сирија

Седиштето на УНЕСКО во Париз.

Организацијата на Обединетите нации за образование, култура и наука - УНЕСКО денеска соопшти дека е подготвена да обезбеди помош откако две места во Сирија и Турција кои се на листата на светско наследство беа оштетени од разорниот земјотрес кој ги погоди државите. Покрај штетите на стариот град Алепо, Сирија и на тврдината во југоисточниот турски град Дијарбекир, УНЕСКО соопшти дека може да бидат загрозени уште најмалку три други топоними.

„Нашата организација ќе обезбеди помош во рамките на својот мандат“, рече генералниот директор Одри Азулеј.

Во соопштението на УНЕСКО се наведува дека партнерските организации веќе извршиле првично истражување за штетите од земјотресот што се случи пред зори во понеделникот. Посебна загриженост беше изразена поради стариот град Алепо, кој од 2013 година се наоѓа на листата на загрозено светско наследство поради граѓанската војна во Сирија.

„Во цитаделата е забележана значителна штета. Урната е западната кула на стариот градски ѕид и ослабени се неколку објекти“, се наведува во соопштението.

Алепо се смета за еден од најстарите населени градови во светот, со пазари, џамии, сараи и јавни бањи. УНЕСКО, исто така, изрази жалење поради „рушењето на неколку згради“ на светското наследство на тврдината Дијарбакир и соседните градини Хевсел во Турција. Беше нагласено дека целата област била важен центар за римскиот, сасанидскиот, византискиот, исламскиот и отоманскиот период.

Бројот на загинати во големиот земјотрес што ги погоди Турција и Сирија денеска се искачи над 5.000, покажаа официјалните податоци, а спасувачките тимови сè уште трагаат по преживеани под урнатините.

Таравари: Се финализира договорот за влез на Алијанса за Албанците во Владата

Лидерот на Алијансата за Албанците, Арбен Таравари.

Лидерот на Алијансата за Албанците, Арбен Таравари денеска изјави дека се финализираат преговорите за вклучување на партијата во Владата.

„Ние сме на привршување и можам да кажам дека е постигнат голем дел од договорот, верувам дека денеска или утре договорот дефинитивно ќе биде финализиран и потоа ќе го објавиме јавно, секако и Владата и Алијанса за Албанци“, изјави Таравари.

Тој притоа не сакаше да открие кои ресори и директорски места ќе и припаднат на неговата партија како дел од владината коалиција.

„Мислам дека договорот треба целосно да се заврши и потоа да разговараме. Мислам дека би било некоректно да се каже нешто и ако се смени, затоа кога се ќе заврши, ќе ги изнесеме пред граѓаните“, додаде Таравари.

Премиерот Димитар Ковачевски на денешната прес-конференција во Владата посветена на стратешкиот дијалог со САД во однос на преговорите со Алијанса за Албанците изјави дека има добар прогрес во делот на програмските определби и кадровското екипирање.

„Се говори за преземање на одговорност во рамки на кадровскиот потенцијал на секој коалициски партнер, но и во делот на преземање одговорност во делот на учество во владиното мнозинство“, изјави Ковачевски, потенцирајќи дека целта на разговорите е проширување на европскиот капацитет на владината коалиција.

Ковачевски додаде дека во текот на денешниот и на утрешниот ден ќе имаат преговори со Алтернатива

„Се надевам дека ќе може да се постигне позитивен исход од тие разговори, со цел сите заедно да може да продолжиме со градење на коалиција што се залага за европска Македонија и ќе обезбеди влез на Северна Македонија во Европската унија до 2030 година“, порача Ковачевски.

Инаку, веќе неколку месеци траат најавите за можен влез на Алијанса за Албанците во Владата.

Владеење на правото и борбата против корупцијата приоритет на стратешкиот дијалог на Владата и САД

Премиерот Димитар Ковачевски

Премиерот Димитар Ковачевски на заедничката прес-конференција со шефот на дипломатијата Бујар Османи денеска изјави дека Владата на претходната седница го усвоила планот за активности што произлегуваат од Стратешкиот дијалог со САД.

„Со ова го потврдуваме силниот сигнал дека САД се наш стратешки партнер и тоа за нас како држава е од голема важност“, изјави премиерот.

Тој додаде дека од големо значење е што американската администрација ги преземала сите неопходни чекори за земјава што поскоро да ги заврши преговорите со ЕУ. Според Ковачевски, дијалогот со САД ги опфаќа и актуелните безбедносни состојби, како и соработката на двете земји како НАТО партнери.

Зајакнувањето на билатералните односи со САД, како што посочи премиерот, значат модерни закони, безусловно независна борба против корупцијата и криминалот, праведно и правично правосудство, но и правна и економска безбедност на нашата држава.

Османи рече дека првата област на интензивирана соработка е владеењето на правото и борбата против корупцијата.

„Утврдивме и посебно поглавје во планот на активности што се однесува на имплементацијата на антикорупциската политика. Предвидени се активности што имаат за цел поддршка на судските реформи, преку споделување на стручно знаење, а се со цел зголемување на кредибилитетот и довербата во судството“, рече Османи.

Тој додаде дека е предвидено и зајакнување на соработката во областа на одбраната, сојузништвото во рамките на НАТО и другите безбедносни сегменти.

Северна Македонија е прва од земјите од Западен Балкан која отвори стратешки дијалог со САД, кој претставува надградба на стратешкото партнерство меѓу двете земји и отвора ново поглавје во билатералните односи, како и конкретно врамување и дефинирање на соработката во периодот што следи.

Вчитај повеќе

XS
SM
MD
LG