Достапни линкови

Вести

Г20 формира фонд за справувањето со наредната пандемија

Илустрација
Илустрација

Министрите за здравство и финансии од Г20 стартуваа фонд од 1,4 милијарди долари за борба против наредната голема пандемија, во пресрет на собирот на лидерите на блокот на Самит на индонезискиот остров Бали.

„Г20 се согласува да изгради фонд за пандемија за да се спречи и подготви за пандемија. Донаторите од Г20, земји кои не се членки на Г20, како и филантропски организации дадоа придонес во средства. Но, тоа не е доволно“, рече претседателот на Индонезија Џоко Видодо во видеообраќање на денешната конференција за новинарите.

Тој наведе дека за борба против наредната глобална пандемија ќе бидат потребни 31 милијарди долари.

Главни донатори во фондот се Соединетите Американски Држави (САД), Велика Британија, Индија, Кина, Франција, Канада, Австралија и Јапонија.

САД во овој фонд вложија 450 милиони долари, скоро една третина од вкупниот износ. Американската министерка за финансии Џенет Јелен претходно изјави дека заедничкиот фонд е пример за она што Г20 може да го стори за решавање на глобалните проблеми.

Индонезија во еден момент беше епицентар на пандемијата со Ковид-19, кога бранот случаи на заразени со делта сојот ја погоди земјата кон средината на 2021 година. Индонезија произведе сопствена вакцина против вирусот, зашто земјите со пониски приходи станаа фрустрирани што развиените земји натрупуваа вакцини за своите граѓани.

Фондот од 24 земји се смета за еден од првите резултати од Самитот кој ќе биде одржан наредната недела, но на кој се очекува мал напредок околу прашањата поврзани со војната во Украина. Рускиот претседател Владимир Путин нема да присуствува.

види ги сите денешни вести

Израел се подготвува да ги евакуира цивилите од Рафа пред пред да го почне нападот што го вети

Раселени Палестинци ја проверуваат локацијата по израелски напад врз шаторскиот камп во Рафа, јужниот дел на Појасот Газа, на 22 април 2024 година.
Раселени Палестинци ја проверуваат локацијата по израелски напад врз шаторскиот камп во Рафа, јужниот дел на Појасот Газа, на 22 април 2024 година.

Израел набави десетици илјади шатори за палестинските цивили кои во следните недели планира да ги евакуира од Рафа, пред ветениот напад врз градот што го гледа како последен бастион на Хамас во Појасот Газа, соопштија денеска израелски извори.

На египетската граница, населението на Рафа се зголеми за дополнителни над еден милион Палестинци кои избегаа од шестмесечната израелска офанзива во другите делови на Појасот Газа.

Нивната судбина ги загрижува западните сили, но и Египет, кој ја отфрли можноста за какво било прифаќање на бегалците на Синај.

По неколкунеделни преговори со САД за мерките за заштита на цивилите, израелското Министерство за одбрана купи 40.000 шатори, секој со капацитет од 10 до 12 лица, за Палестинците да бидат преселени од Рафа, соопштија израелски владини извори.

Видео кое кружи на интернет покажува квадратни бели шатори кои се подигнати во Кан Јунис - град кој се наоѓа на пет километри од Рафа.

Ројтерс не можеше да го потврди ова, но доби снимки од сателитската компанија „Maxar“ на кои се прикажани повеќе шатори во Кан Јунис, каде што немаше ништо на 7 април.

Израелското Министерство за одбрана одби да даде каков било коментар.

Владини извори рекоа дека воениот кабинет на премиерот Бенјамин Нетанјаху планира да се состане во следните две недели за да ја одобри евакуацијата на цивили, што се очекува да потрае околу еден месец и се претпоставува дека тоа е првата фаза од чистењето во Рафа.

Кабинетот на Нетанјаху не даде веднаш коментар.

Иако таа не наведе детали за конкретни борбени планови, израелската армија се почесто испраќа сигнали дека е подготвена да тргне во Рафа.

„Хамас е силно погоден во северниот сектор. Силно е погоден и во центарот на Појасот Газа, а наскоро ќе биде тешко погоден и во Рафа, изјави во вторникот бригадниот генерал Ицик Коен - командант на 162-та дивизија која дејствува во Појасот Газа.

„Хамас треба да знае дека кога ИДФ (Израелските одбранбени сили) ќе влезат во Рафа, најдобро би било да ги кренат рацете за да се предадат. Рафа нема да биде како Рафа денес... Таму повеќе нема да има муниција. И таму нема да има заложници“, вели Коен.

Во средата армијата објави дека мобилизирала две резервни бригади за мисии во Појасот Газа.

Израел тврди дека Рафа е дом на четири недопрени борбени баталјони на Хамас - организација означена како терористичка од Соединетите Држави и Европската унија, која е засилена со илјадници борци од исламистички екстремистчки групи кои се повлекуваат.

Победата во војната во Појасот Газа започната по убиствата и киднапирањата од страна на Хамас на 7 октомври 2023 година, е невозможна без заземањето на Рафа, поразот на Хамас и враќањето на сите заложници, тврди Израел.

Хамас не коментира за своите распоредувања.

Во говорот во вторникот по повод 200-тиот ден од војната, портпаролот на вооруженото крило на Хамас, Абу Убаид, рече дека Израел постигнал само „понижување и пораз“ во кампањата која, според медицинските претставници на Хамас во Газа, убиени се повеќе од 34.000 Палестинци.

На 7 октомври Хамас уби 1.200 луѓе и киднапираше 253, според израелските податоци. Од тие заложници, 129 останаа во Појасот Газа, велат израелските власти. Повеќе од 260 израелски војници се убиени во копнени борби од 20 октомври, соопшти армијата.

Европскиот парламент го одобри Планот за раст за Западен Балкан

Зградата на Европскиот парламент.
Зградата на Европскиот парламент.

Европскиот парламент го изгласа Планот за раст за Западен Балкан, што е досега најамбициозниот финансиски пакет на Европската унија за регионот.

За овој пакет гласаа 517 европски пратеници, 56 беа против, а 30 беа воздржани.

Гласањето за пакетот се одржа само еден ден пред распуштањето на Европскиот парламент, бидејќи институциите влегуваат во изборен период, за претстојните избори за новиот состав на парламентот и за функционерите на институциите на ЕУ, кои ќе се одржат меѓу 6 и 9 јуни во сите земји-членки.

Според текстот за кој се договорија Европскиот совет и Европскиот парламент, земјите од регионот ќе треба да исполнат голем број на не толку лесни критериуми за да го искористат пакетот финансиска помош.

Меѓу нив се основните критериуми кои важат подеднакво за сите земји-членки, а се однесуваат на владеењето на правото, почитувањето на принципите на демократијата, институционалните реформи и преземањето на неопходните чекори за да се осигура дека средствата нема да се злоупотребат.

Покрај критериумите поврзани со реформите и владеењето на правото, постојат и критериуми од политичка природа.

За Косово и Србија постои „уште еден услов“ поврзан со напредокот во процесот на нормализација на односите.

Со Планот за раст за Западен Балкан, ЕУ има намера двојно да ја зголеми економијата на земјите од регионот во следните десет години.

Овој план беше предложен од Европската комисија во ноември 2023 година.

Станува збор за фонд од шест милијарди евра, од кои две милијарди се во форма на грантови, а останатите четири милијарди во форма на кредити со многу поволни рати.

Целта на ЕУ е со овој план да го стимулира економскиот раст во шесте земји од регионот, во исто време да го помогне реформскиот процес и со тоа да земјите да се подготват за влез во ЕУ што е можно поскоро.

Според предлогот, ќе се поедностави постапката за исплата на финансиски средства, но заострени се критериумите за нивно добивање.

До 13 часот одзивот на гласачи е 24,92 проценти

Прес конференција на Државната изборна комисија (ДИК), 24 април 2024 година
Прес конференција на Државната изборна комисија (ДИК), 24 април 2024 година

Гласањето на сите избирачки места се одвива мирно, а одзивот на гласачите до 13 часот, на првиот круг од претседателските избори изнесува 24,92 отсто, соопшти Државната изборна комисија (ДИК) на прес конференцијата во 13:30 часот.

Право на глас до 13:00 часот оствариле 417 170 граѓани.

Најголем одзив е забележан во општината Новаци (42,87) отсто, а најмал во општината Врапчиште (10,18) проценти.

До Комисијата пристигнале 140 приговори за заштита на избирачките права. Од нив Комисијата усвоила 16 и на истите им било овозможено правото да гласаат. Осум приговори се отфрлени како неуредни, а 9 се одбиени. Останатите се во процес на разгледување.

Во Северна Македонија се одржува прв круг претседателски избори на кои право на глас имаат 1.814.317 граѓани.

МВР: Мирен изборен ден со одредени нерегуларности

Портпарол на МВР, Тони Ангеловски
Портпарол на МВР, Тони Ангеловски

Од Министерството за внатрешни работи информираат дека изборниот ден се одвива мирно и без поголеми нарушувања на изборниот процес. Сепак како што изјави портпаролот на МВР, Тони Ангеловски, на некои места биле регистрирани одредени неправилности.

„Од отворањето на гласачките места досега имаме регистрирано две фотографирања на гласачко ливче, едно во Скопје, а едно во Штип. Покрај тоа, во Бучим, Радовишко, има едно лице што го покажало гласачкото ливче на набљудувач“, изјави Ангеловски.

За сите овие настани, како што вели тој, се преземаат мерки за расчистување на случаите.

„Покрај тоа, на територијата на општина Чаир се забележани летоци, кои биле оставени на паркирани возила, а исто така се испишани и два графита. На едно гласачко место во Скопје, покрај испишаниот графит, од страна на претседател на избирачки одбор е пријавено дека во 6.30 часот во ходникот е пронајдена димна бомба. Веднаш се преземени мерки и активности и на ова место гласањето се одвива непречено“, додава Ангеловски.

Од МВР апелираат граѓаните и учесниците на изборите, да се воздржат од какви било инциденти во текот на гласањето, па се до завршувањето.

Одзивот до 11:00 часот e 12,78 отсто

Илустрација од избирачко место на првиот круг од претседателските избори
Илустрација од избирачко место на првиот круг од претседателските избори

Одзивот на гласачите до 11:00 часот во првиот круг од претседателските избори е 12,78 отсто, соопшти Државната изборна комисија (ДИК). Според податоците на официјалната веб-страница на ДИК до 11 часот гласале 229 417 гласачи.

Овие проценки се врз основа на обработени 3416 избирачки места од вкупно 3508 во општините на територијата на целата држава.

Гласањето на претседателските избори - мирно и без проблеми
please wait

No media source currently available

0:00 0:02:34 0:00

Според истите податоци, поголема излезност е забележана во Демир Капија (24%) и Градско (20%), а помала во општините Боговиње (5%) и Маврово Ростуша (4,5%).

Претходно, на прес-конференцијата во 9:00 часот претседателот на ДИК, Александар Даштевски соопшти дека гласачките места биле отворени навреме, иако на некои избирачки места се појавиле технички проблеми, кои како што додаде, биле тековно решавани.

Во Северна Македонија денеска (14 април) се одржуваат претседателски избори на кои право на глас имаат 1.814.317 граѓани.

Кина го осуди одобрувањето на американскиот пакет воена помош за Тајван

Кинеско знаме, илустрација
Кинеско знаме, илустрација

Кина денеска го критикуваше одобрувањето на новиот пакет американска воена помош за Тајван, наведувајќи дека со тоа островот се става во „опасна ситуација“.

Американскиот Сенат синоќа одобри воена помош од 95 милијарди долари за Украина, Израел и Тајван по неколку месеци одложување и дебата за тоа колку САД треба да бидат вклучени во војни во странство.

Од тоа, осум милијарди долари беа наменети за Тајван, со цел да се спротивстави на кинеската закана од инвазија.

Кина смета дека Тајван, кој прогласи независност, е дел од нејзината територија и се закани дека таа позиција ќе ја брани со сила доколку е потребно.

Кинеската канцеларија во Тајван соопшти дека помошта „сериозно ги прекршува“ обврските на САД кон Кина и „испраќа погрешен сигнал до тајванските сепаратистички сили“.

ОН бараат истрага за масовните гробници откриени во две болници во Газа

Луѓето ги носат телата на Палестинците убиени за време на израелската воена офанзива и закопани во болницата Насер, во Кан Јунис во јужниот дел на Појасот Газа, 21 април 2024
Луѓето ги носат телата на Палестинците убиени за време на израелската воена офанзива и закопани во болницата Насер, во Кан Јунис во јужниот дел на Појасот Газа, 21 април 2024

Обединетите Нации повикаа на „јасна, транспарентна и веродостојна истрага“ за масовните гробници откриени во двете големи болници во разурнатата Газа, кои беа нападнати од израелски војници.

Веродостојните истражители мора да имаат пристап до локациите, им рече на новинарите портпаролот на ОН Стефан Дужарик, додавајќи дека повеќе новинари мора да можат безбедно да работат во Газа за да известуваат за фактите.

Претходно на 23 април, шефот за човекови права на ОН, Фолкер Турк, рече дека е „згрозен“ од уништувањето на медицинскиот центар Шифа во градот Газа и болницата Насер во јужниот град Кан Јунис, како и од пријавеното откривање на масовни гробници во и околу објектите откако Израелците заминаа.

Тој повика на независни и транспарентни истраги за смртните случаи, велејќи дека „со оглед на преовладувачката клима на неказнивост, ова треба да ги вклучи и меѓународните истражители“.

„Болниците имаат право на посебна заштита според меѓународното хуманитарно право. И намерното убивање на цивили, затвореници и други кои се „неспособни за борба“ е воено злосторство“, изјави Турк.

Портпаролот на американскиот Стејт департмент Ведант Пател во вторникот ги нарече извештаите за масовни гробници во болниците „неверојатно вознемирувачки“ и рече дека американските власти побарале информации од израелската влада.

Израелската војска соопшти дека нејзините сили ексхумирале тела претходно закопани од Палестинци како дел од потрагата по останките на заложниците земени од Хамас (организација која ЕУ и САД ја прогласија за терористичка) за време на нападот на 7 октомври со кој започна војната. Армијата соопшти дека телата биле прегледани со почит и оние тела кои не припаѓале на израелски заложници биле вратени на нивното место.

Израелската војска соопшти дека убила или притворила стотици милитанти заробени во два болнички комплекси, тврдења кои не може да се потврдат независно.

Палестинската цивилна одбрана во Појасот Газа во понеделникот (22 април) соопшти дека открила 283 тела од привремените гробишта во главната болница во Кан Јунис, која беше изградена кога израелските сили упаднаа во објектот минатиот месец. Според групата, тогаш луѓето не можеле да ги закопуваат мртвите на гробиштата и да копаат гробови во дворот на болницата.

Цивилната одбрана соопшти дека некои од телата на луѓето биле убиени за време на опсадата на болницата. Други беа убиени кога израелските сили упаднаа во болницата. Палестинските здравствени власти велат дека рациите на болниците го уништиле здравствениот сектор во Газа.

Останува отворено прашање за тоа кој би можел или треба да ја води истрагата.

За Обединетите Нации да спроведат истрага, ќе треба да го овласти едно од нивните главни тела, рече Дужарик.

„Мислам дека не е на некој да ги прејудицира резултатите или кој би го направил тоа. Мислам дека треба да биде истрага каде што има пристап и кредибилитет“, рече тој.

Главниот обвинител на Меѓународниот кривичен суд, Карим Кан, по посетата на Израел и на Западниот Брег во декември рече дека судската истрага за можни злосторства на милитантите на Хамас и израелските сили е „приоритет на мојата канцеларија“.

Во нападот на Хамас со кој започна војната, милитантите убиле околу 1200 луѓе, главно цивили, а зеле околу 250 заложници. Израел вели дека милитантите сè уште држат околу 100 заложници и останките на повеќе од 30 други.

Како одговор, израелската воздушна и копнена офанзива во Газа, чија цел беше елиминирање на Хамас, уби повеќе од 34 000 Палестинци, според локалните здравствени власти, од кои околу две третини се деца и жени. Офанзивата ги уништи двата најголеми града во Газа, создаде хуманитарна криза и предизвика околу 80 отсто од населението на територијата да избега во другите делови на опколената крајбрежна енклава.

Пожар во рафинерија за нафта во руски Смоленск

илустрација
илустрација

Украински беспилотни летала ги погодија објектите за гориво и енергија во руската област Смоленск, при што тие беа запалени, соопшти регионалниот шеф Василиј Анохин на каналот Телеграм.

„Нашиот регион повторно е нападнат од украински беспилотни летала“, напиша Анохин, додавајќи дека нема жртви и дека работниците за итна помош во областите Смоленск и Јарцево ги гаснат пожарите.

Телеграмскиот канал YE Astra објави видео снимено од очевидци на кое наводно се гледа голем пожар во рафинерија.

„Руските сили за противвоздушна одбрана се борат против воздушни цели, рече претставникот и ги повика жителите да останат смирени. Според ажурираните информации, како резултат на нападот со украински беспилотни летала, нема жртви или повредени на лице место“, рече Анохин.

„Во моментов спасувачките служби и службите за спроведување на законот ги отстрануваат последиците и ги утврдуваат сите околности на инцидентот“, додаде тој.

Претходно рускиот телеграмски канал SHOT, повикувајќи се на свои претплатници од локалното население, напиша дека еден или повеќе беспилотни летала погодиле складиште за нафта во селото Раздоро кај Смоленск, каде што биле видливи пожар и чад.

На крајот на минатата недела, гувернерот на регионот Смоленск исто така пријави пожар во зградата на комплексот за гориво и енергија по напад со дрон.

Вонредната ситуација се случила во населбата Кардимовски во централниот дел на регионот. Во кој конкретен објект, шефот на регионот не прецизираше. Во оваа област се наоѓа складиште за нафта Кардимово. Според РБЦ, тој припаѓа на ЛУКОИЛ-Центарнефтепродукт.

ДИК: До 9:00 часот гласале 3,85 отсто од граѓаните

илустрација
илустрација

Гласањето се одвива мирно и без пријавени неправилности на сите избирачки места, а започнато е на сите избирачки места, изјави претседателот на Државната изборна комисија, Александар Даштевски. На неколку места биле пријавени технички проблеми, за кои претседателот на ДИК вели дека се решаваат во од.

„Пристигнати се податоци за излезност на гласачите од 832 избирачки места од вкупно запишани 402 748 гласачи. На овие избирачки места гласале 15 487 односно 3,85 отсто од гласачите“, нагласи Даштевски.

До ДИК биле доставени 12 приговори за заштита на личното избирачко право кои се предмет на обработка.

Гласањето се одвива на 1480 гласачки места во 80 општини, а право на глас имаат 1.814.317 граѓани.

Амнести Интернешнал: Глобалните човекови права соочени со најсериозни закани

илустрација
илустрација

Човековите права ширум светот се соочуваат со најсериозните закани во последните неколку децении, соопшти Амнести интернешнал (АИ) во својот годишен извештај објавен денеска (24 април).

Организацијата ги истакна конфликтите во Газа и Украина, како и ширењето на авторитарните влади, кои му штетат на меѓународниот поредок со кршење на меѓународното право и игнорирање на основните права.

„Флагрантното непочитување на меѓународното право од страна на Израел се надополнува со неуспехот на неговите сојузници да го запрат невиденото крвопролевање во кое страдаат цивили во Газа, изјави генералната секретарка на АИ, Ањес Каламар.

„Покрај руската агресија против Украина, зголемениот број на вооружени конфликти и масовните прекршувања на човековите права, забележани, на пример, во Судан, Етиопија и Мјанмар, глобалниот поредок заснован на правила е во опасност да биде десеткуван“, додаде таа.

И демократиите не ги избегнаа критиките на АИ, а Каламар кажа дека „тоа што го видовме во 2023 година потврдува дека многу моќни држави ги напуштаат основните вредности на хуманоста и универзалноста содржани во Универзалната декларација за човекови права“.

Меѓу другото, во извештајот се критикува американското користење на ветото за да се парализира Советот за безбедност на ОН со месеци за резолуцијата за прекин на огнот во Газа.

Извештајот „исто така ги истакнува гротескните двојни стандарди на европските земји како Обединетото Кралство и Германија, со оглед на нивните основани протести против воените злосторства на Русија и Хамас, а истовремено ги поддржуваат дејствијата на израелските и американските власти во овој конфликт“, се наведува во соопштението на Амнести.

Војната во Украина беше уште еден клучен фактор што придонесе за падот на глобалното досие за човекови права.

Амнести ги наведува неселективните напади на руските сили „на населени области и цивилна инфраструктура за извоз на енергија и жито“.

„И руските и украинските сили користеа касетна муниција и покрај нејзината неселективна природа и постојаните ризици за цивилите“, се вели во извештајот.

Извештајот на Амнести интернешнел прикажува мрачна слика за алармантна репресија на човековите права и кршење на меѓународните правила, сето тоа во услови на продлабочување на глобалната нееднаквост, суперсили кои се борат за превласт и ескалација на климатската криза, истакна Каламар.

Вчитај повеќе

XS
SM
MD
LG