Вести
Москва нареди повлекување на војниците од десниот брег на реката Днепар во Херсон
Министерот за одбрана Сергеј Шојгу им нареди на руските војници да се повлечат од десниот брег на реката Днепар во делумно окупираната област Херсон во Украина, што е уште едно повлекување од руска страна во услови на голем број неуспеси на Москва на боиштата во источниот и југоисточниот дел на Украина.
Шојгу на состанокот со командантот на руските трупи во Украина, армискиот генерал Сергеј Суровикин, на 9 ноември рече дека повлекувањето мора да се спроведе што побрзо.
„Животите на рускиот воен персонал се секогаш приоритет за нас. Ние, исто така, мора да ги земеме предвид заканите наметнати врз цивилното население и да се погрижиме сите цивили кои избраа да заминат да можат да го сторат тоа. Исто така, треба да започнеме со повлекување на војниците и да ги преземе сите неопходни мерки за да се обезбеди преместување на воениот персонал, оружје и опрема на другата страна на Днепар“, рече Шојгу.
Путин прогласи воена состојба во регионите заземени од Москва
Официјални претставници на Москва воХерсон со недели велат дека ги евакуираат жителите на Херсон во „другите делови на Руската Федерација“.
Херсон го сметаат многу воени аналитичари како најважен од четирите делумно окупирани украински региони кои Русија ги прогласи како анектирани во септември.
Москва ги нарече претходните повлекувања на руските војници од областите блиску до главниот град на Украина Киев и источниот регион Харков како „гест на добра волја“ и „прегрупирање“.
види ги сите денешни вести
Во екот на тензиите, грузискиот парламент ја продолжува дебатата за законот за „странски агенти“
Грузискиот парламент остана во состојба на готовност по судирите во раните утрински часови на 1 мај меѓу полицијата и демонстрантите кои се противат на законот за странски агенти. Многумина веруваат дека овој закон го отсликува законот што го користи руската влада за да го поттисне несогласувањето во таа земја.
Предвидено е пратениците да продолжат да расправаат за законот за време на седницата на 1 мај и се очекува да гласаат на второ читање.
Во доцните часови на 30 април, грузиските безбедносни сили употребија солзавец и водени топови за да ги растераат илјадниците демонстранти.
Портпаролот на МВР на 1 мај соопшти дека се уапсени 63 лица, а шест полицајци биле повредени. Не е познато колку демонстранти се повредени.
За време на судирите се повредени пратениците Алеко Елисашвили и Леван Хабеишвили, изјави портпаролот на Министерството за внатрешни работи Александар Даракхвелидзе.
Хабеишвили, шефот на Обединетото национално движење (УНМ), пренесен е во болница, а на фотографиите се гледа дека има модринки и исеченици на главата и торзото. УНМ соопшти дека бил „киднапиран“ од полицијата и тврди дека тој му „помагал на повреден граѓанин“ кога бил приведен.
Новинар на грузискиот сервис на Радио Слободна Европа објави два инциденти во кои маскирано лице ги удира демонстрантите со тупаници по лицето.
Тоа беше последниот во серијата масовни протести во изминатите две недели против законите воведени од владејачката партија Грузиски сон.
Критичарите го нарекуваат предлог-законот „руски закон“, а претседателката Саломе Зурабишвили, која се огради од политиката на владејачката партија, вети дека ќе стави вето на законот доколку тој биде официјално одобрен во трето читање, како што се очекуваше.
Сепак, владата ги има потребните гласови за да се отфрли ветото. Пратениците ја завршија седницата на 30 април без гласање.
Леван Јоселијани, омбудсман на Грузија, рече дека извештаите за прекумерна употреба на сила од страна на службениците за спроведување на законот кружат на социјалните мрежи и ги повика демонстрантите „да не одат подалеку од организирање на мирни собири“.
Јоселиани предупреди дека употребата на секаков вид сила или специјални средства од страна на службениците за спроведување на законот „мора да исполни строг тест на неопходност и пропорционалност“.
„Не е дозволено да се користи бибер спреј на лицето“, рече тој, додавајќи дека за употреба на какви било посебни средства мора да и претходни предупредување.
На 30 април, меѓународниот хакерски колектив Анонимус изрази поддршка за демонстрантите и ја предупреди грузиската полиција дека „нападот врз демонстрантите ќе резултира со објавување информации за сите владини функционери“.
Во објава на социјалната мрежа X, порано позната како Твитер, групата се закани дека ќе ги хакира и објави базите на податоци и електронската поштата, потенцирајќи дека „ова е прво и единствено предупредување“.
Се урна дел од автопат во Кина, најмалку 19 загинати
Најмалку 19 лица загинаа на 1 мај кога се урна дел од автопатот во јужната кинеска провинција Гуангдонг, објави кинеската државна телевизија Си-Си-Ти-Ви.
Дел од патот долг 17,9 метри се срушил околу два часот наутро, објавија властите во главниот град Гуангдонг, Меижоу, пренесува АП.
„Околу 11:45 часот по локално време, 18 автомобили се пронајдени под урнатините (на патот). Властите потврдија 19 смртни случаи, а уште 30 лица се во болница, но нивните животи не се во опасност“, се вели во извештајот на Си-Си-Ти-Ви.
Изминативе денови во областа врнеа обилни дождови.
Најмалку три лица загинаа во руски напад во Одеса
Три лица загинаа, а три се повредени во руски ракетен напад врз украинското пристаниште Одеса рано утрово на 1 мај, изјави регионалниот гувернер Олех Кипер.
„Непријателот ја нападна Одеса со балистички проектили. Во нападот загинаа три лица, а тројца се повредени“, изјави градоначалникот на Одеса Генадиј Труханов на социјалната мрежа Телеграм.
Кипер додаде дека нападот ја оштетил цивилната инфраструктура во градот.
Русија во последниве денови постојано ја напаѓа Одеса, вклучувајќи го и нападот на 29 април со проектил „Искандр“.
Во тој напад загинаа пет цивили, соопштија официјални лица, а 23 се повредени.
Главниот воен командант на Украина, генерал-полковник Олександр Сирски, во неделата предупреди дека состојбата на истокот на земјата се влошила и дека Русија напаѓа „по целата линија на фронтот“.
Руската армија редовно ги напаѓа украинските региони со различни видови оружје - беспилотни летала, ракети и противвоздушни ракети.
И покрај доказите и сведочењата, Москва негира дека цел на нападите се цивили уште од почетокот на сеопфатната инвазија.
Светот го одбележува 1 Мај, меѓународниот ден на трудот
Меѓународниот ден на трудот, 1 Мај, денеска се одбележува ширум светот во знак на сеќавање на тој датум во 1886 година, кога работниците во Чикаго со штрајкови и протести ја започнаа својата борба за осумчасовен работен ден.
На првиот конгрес на Втората интернационала во 1889 година, беше одлучено следната година да се одржи голема манифестација со која ќе биде прославен 1 мај, како знак на сеќавање на протестите во Чикаго и како форма на борба за работничките права.
На вториот конгрес на Работничката интернационала е одлучено од 1890 година на 1 мај ширум светот да се одржуваат манифестации, демонстрации и штрајкови.
Како во повеќе метрополи ширум светот, така денеска и во Скопје, Сојузот на синдикати на Македонија организира протест на кој ги повикаа да им се приклучат сите работници во борбата и апелите до надлежните за порамноправни работнички права.
Конкурс за стипендија за новинарски фелоушип „Јиржи Динстбир“ за 2025 година
Стипендијата за новинарство „Јиржи Динстбир“ за 2025 година е отворена за апликанти - независни новинари од Западен Балкан. Целта на стипендијата е да им помогне на новинарите аспиранти од регионот да ја продолжат својата професија за поддршка на медиумскиот плурализам и независност.
Започна во 2014 година, стипендијата за новинарство „Јиржи Динстбир“ е инспирирана од придонесите на Јиржи Диенстбиер Сениор во полето на новинарството, надворешната политика и човековите права и има за цел да го продолжи наследството на Радио Слободна Европа (РСЕ) за промовирање поправедни и отворени општества преку новинарството. Стипендијата е заедничка иницијатива на Министерството за надворешни работи на Чешката Република и РСЕ, финансирана од Министерството.
Стипендијата е седуммесечна програма, која ги обучува стипендистите со врвни новинарски вештини и ги вклучува во секојдневните уреднички дебати и дискусии кои информираат за професионално и независно печат. Соработниците поминуваат шест месеци во седиштето на РСЕ во Прага, каде што се сместени во Балканскиот сервис за да добиваат дневна обука и менторство на работното место додека работат заедно со искусни професионалци на РСЕ. По Прага, соработниците го поминуваат последниот месец во локалното биро на РСЕ.
Главните компоненти на програмата се:
- професионално менторство заедно со искусни професионалци на РСЕ
- обука и развој на новинарски вештини на традиционални, мултимедијални и дигитални платформи
- учество во дневните уреднички дискусии кои афирмираат професионално и независно новинарство
- самостојна работа на личен проект
- разбирање на мисијата и практиката на професионална, слободна и независна медиумска компанија
Стипендијата содржи и работилници за новинарски практики и алатки, дискусии со владини претставници, граѓански лидери и регионални аналитичари, потоа посети на локални медиуми и новински агенции во Прага, како и можности за професионален развој во Чешката Република и во странство. Од стипендистите ќе се очекува да се претставуваат себеси и Стипендијата на англиски јазик на јавни настани и во дискусии во врска со слободата на медиумите во нивната земја.
Ќе биде обезбедена месечна стипендија во бирото и во Прага, домување, здравствено осигурување и аранжмани за патување до и од Прага.
За условите и за аплицирање кликнете ТУКА.
Временска прогноза – Променливо облачно и топло, попладне локален дожд
Времето денеска ќе биде променливо облачно и топло со слаб до умерен ветер од јужен правец. Попладне ќе има локална појава на краткотраен пороен дожд и ретки грмежи, соопшти Управата за хидрометеоролошки работи (УХМР).
Минималната температура ќе биде во интервал од 6 до 12, а максималната ќе се движи 20 до 27 степени.
Во Скопје променливо облачно и топло со слаб до умерен ветер од јужен правец. Попладне и кон крајот на денот во делови од котлината ќе има краткотраен пороен дожд и појава на ретки грмежи. Минималната температура ќе се спушти до 9, а максималната ќе достигне до 25 степени.
Во наредните денови следува период на променливо облачно време со повремени локални врнежи од дожд.
Во четврток и петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од четврток до сабота ќе биде во постепено опаѓање.
ОБСЕ:Грузискиот закон за „странски агенти“ негативно ќе влијае врз граѓанското општество
Организацијата за безбедност и соработка во Европа (ОБСЕ) предупредува дека нацрт-законот што владата на Грузија го турка во Парламентот, таканаречениот предлог-закон за „странски агенти“, ќе ги етикетира граѓанските организации и активистите за заштита на човековите права создавајќи атмосфера на „недоверба, страв и непријателство“.
Директорот на Канцеларијата за демократски институции и човекови права (ОДИХР) при ОБСЕ, на 30 април за грузиската служба на РСЕ изјави дека нацрт-законот, кој предизвика огромни протести во главниот град Тбилиси, ќе има „негативни последици за граѓанското општество.
„Доколку се одобри суштината и содржината на предлог-законот, влијанието врз граѓанското општество сепак ќе биде негативно“, додаде тој.
Грузискиот парламент требаше да гласа на 30 април за второто читање на контроверзниот нацрт-закон, за кој критичарите дома и во странство, велат дека го отсликува законодавството на Кремљ што се користи во Русија за да се замолчат критичарите и несогласувањата.
Десетици илјади луѓе веќе две недели излегуваат а улиците на Тбилиси во знак на протест против законот предложен од владејачката грузиска партија.
Соединетите Американски Држави, Велика Британија и Европската унија, кои на Грузија и доделија кандидатски статус во декември, сите го критикуваа законот. Официјални претставници на ЕУ рекоа дека тоа би можело да го запре напредокот на Грузија кон интеграција во блокот.
„Разбирам дека поголемиот дел од граѓанските организации во Грузија добиваат финансиска поддршка од меѓународни донаторски институции, (и навистина речиси сите поголеми организации доброволно ја откриваат листата на нивните донатори)“, рече Мекачи во писмената забелешка на прашањата на РСЕ.
Доколку биде усвоен, законот ќе бара од организациите и групите да се регистрираат како „странски агенти“ доколку добиваат повеќе од 20 проценти од финансирањето од странство.
„Овој предлог-закон, доколку биде усвоен, ќе го претвори огромното мнозинство од институциите на граѓанското општество преку ноќ во „странски агенти“ или „претставници на странски сили“, што е спротивно на духот на меѓународната соработка“, вели Мекачи.
Иако грузиската претседателка Саломе Зурабичвили вели дека ќе стави вето на законот доколку парламентот го усвои во трето читање, владејачката партија може да го отфрли ова со собирање 76 гласа. Потоа претседателот на парламентот може да го потпише во закон. За финалното читање на законот е предвидено да се расправа на 17 мај.
Шефот на МААЕ Гроси ќе го посети Иран
Шефот на Меѓународната агенција за атомска енергија Рафаел Гроси треба да го посети Иран за да учествува на нуклеарната конференција од 6 до 8 мај и да се сретне со иранските претставници, објави во вторникот иранската новинска агенција Мехр.
„Гроси ќе се сретне со ирански претставници во Техеран пред да учествува на Меѓународната конференција за нуклеарни науки и технологии што се одржува во Исфахан“, објави агенцијата.
Шефот на МААЕ во февруари најави дека планира посета на Техеран за да се справи со „одалечувањето“ во односите меѓу агенцијата и Иран.
Гроси тогаш изјави дека иако темпото на збогатување ураниум од страна на Иран е малку забавено од крајот на минатата година, сепак Иран сè уште збогатува со покачена стапка од околу 7 килограми ураниум месечно до 60% чистота.
Збогатувањето до 60% го приближува ураниумот до степенот на оружје и не е неопходен за комерцијална употреба во производството на нуклеарна енергија. Иран негира дека создава нуклеарно оружје, но ниту една друга држава не збогатила до тоа ниво без да произведе оружје.
Според договорот од 2015 година на Иран со светските сили, Техеран можеше да збогатува ураниум само до 3,67%. Откако тогашниот американски претседател Доналд Трамп ги повлече Соединетите држави од тој договор во 2018 година и повторно ги воведе санкциите, Иран многу ги надмина нуклеарните ограничувања од договорот.
Чешка ќе ја зголеми старосната граница за пензионирање
Зголемување на старосната граница за пензионирање и намалување на висината на пензиите за идните пензионери се дел од реформите кои ги донесе чешката влада. Целта на владините реформи е заштеда од милијарди долари буџетски средства.
Со овие реформи старосната граница се поместува за седум месеци, односно од 65 години на 65 години и седум месеци, а пензиите за идните пензионери се намалени за околу осум отсто во однос на сегашниот износ на пензиите, јавуваат новинските агенции.
Чешка се соочува со притисок врз нејзиниот фискален систем поради стареењето на населението, зголемувањето на животниот век и ниската стапка на наталитет.
„Промените ќе го спречат колапсот на пензискиот систем и ќе обезбедат достоинствени пензии за денешната млада генерација“, изјави чешкиот премиер Петр Фијала.
Реформата што ја воведе десноцентристичката чешка Влада има за цел да го одржи просечното време што граѓаните го поминуваат во пензија на околу 21 година, што значи дека во иднина, заедно со промената на животниот век, ќе се промени и возраста за пензионирање.
Србија најави унапредување на соработката со Кина
Српската Влада соопшти дека на седницата на 30 април ги усвоила актите потребни за унапредување на соработката со Кина.
„Донесени се документи од областа на образованието, науката, иновациите, технолошкиот развој, како и економско-техничката соработка во областа на инфраструктурата“, се наведува во владиното соопштение.
Кинескиот претседател Си Џинпинг ќе ја посети Србија на 7 и 8 мај.
Претседателот на Србија, Александар Вучиќ изјави дека за време на посетата на Си, Белград ќе „иницира проекти за забрзан технолошки развој во оние сфери во кои нема доволно знаење, од роботика, сателитска технологија, летечки автомобили до многу други работи“.
Последен пат Си Џинпинг беше во официјална посета на Србија во 2016 година. Сега доаѓа во Белград на годишнината од бомбардирањето на кинеската амбасада при интервенцијата на НАТО во СР Југославија.
Претседателот на Кина во Белград пристигнува на покана на Вучиќ. Шефот на кинеската дипломатија Ванг Ји изјави дека Пекинг со нетрпение ја очекува оваа посета, како уште една можност за зацврстување на „железното пријателство“ со Србија.
Мултимедија
Најпосетени
Што треба да знаете