Вести
Курти им се заблагодари на Борел, Лајчак и Ескобар
Нормализација на односите мора да содржи во себе реципроцитет, како што имплицираат добрососедските односи, изјави денеска косовскиот премиер Алин Курти откако синоќа беше постигнат договор меѓу Косово и Србија за личните документи.
„ Граѓаните на република Косово со документите за лична идентификација кои ги издава нашата земја, ќе можат да ја преминат границата со Србија на сите гранични премини без никакви пречки, или дополнителни оптеретувања и одлагање,“ напиша на социјалната мрежа Фејсбук Курти.
Тој додава дека истото ќе се применува и за оние кои што доаѓаат од спротивна насока, односно за влезот во Косово на граница ќе биде доволно за Србите да покажат само лична карта.
Борел: Постигнат договор меѓу Србија и Косово за личните документи
Курти им се заблагодари на сите за поддршката и трпението, и посочи дека реципроцитетот кој е договорен е во духот на принципиелните разговори кои беа водени во Брисел.
Тој им се заблагодари на медијаторите комесарот на ЕУ за надворешна политики и безбедност Жозеп Борел, специјалниот претставник на ЕУ за дијалог Мирослав Лајчак и специјалниот претставник на САД за Западен Балкан Габриел Ескобар .
Вчера Борел соопшти дека е постигнат договор меѓу Србија и Косово околу спорното прашање за документи за лична идентификација при меѓугранично движење. Засега нерешено останува прашањето за регистарските таблички на возилата.
види ги сите денешни вести
Бојан Маричиќ е нов претседател на ДИК, изгласани измените во Кривичниот законик
Со 83 гласови „за“ Собранието го избра Бојан Маричиќ за претседател на Државната изборна комисија (ДИК). За потпретседател е избран Абдуш Демири, а за членови на Комисијата Александар Даштевски, Ангелчо Ристов, Светлана Карапетрова, Борис Кондарко и Дитмире Шеху.
Во продолжение на седницата за членови на Комисијата и заштита од дискриминација пратениците ги избраа Лимко Бејзароски и Наташа Ахмед. Претседателот на Собранието Африм Гаши соопшти дека кандидатката Џинан Ахмед се откажала од кандидатурата.
Собранието го донесе и Законот за изменување и дополнување на Кривичниот законик. Со предлог-измените пратениците предвидуваат построги казни за злоупотреба на службената положба и овластувања, но не ги враќаат на нивото што беа пред септември 2023 кога имаше намалување на санкциите.
Ваквите измени се поднесени во Собранието со потпис од девет пратеници од коалицијата на владејачката ВМРО-ДПМНЕ. Пратениците на Левица беа против законското решение со образложение дека се носи во интерес на функционерите од владејачкото мнозинство.
За делото „злоупотреба на службената положба“, чие намалување на казните во септември 2023 предизвика најмногу критики од домашната јавноста и од Европската Унија, во предлогот се предвидуваат поголеми затворски казни, но горната границата за нив останува. Тоа значи дека иако има заострување на казните, роковите за застарување на кривичното дело се пократки од тоа што беше пред септември 2023, кога немаше горна граница за дел од казните.
Пратениците не го прифатија предлог законот за изменување на Законот за енергетика поднесен од Левица со кој се бара укинување на Регулаторната комисија за енергетика (РКЕ), а нејзините надлежности да поминат во Министерството за енергетика.
Обвинителството оформи предмет по ревизорскиот извештај за Општина Охрид
Јавното обвинителство отвори предмет врз основа на извештајот на Државниот завод за ревизија за Општина Охрид, во кој беа констатирани сериозни неправилности, меѓу кои и нелегална изградба на хотели и на згради, недонесени урбанистички планови и пропусти во финансиското работење.
ДЗР вчера информираше дека Општина Охрид нема донесено урбанистички планови за 20 населени места, нема преземено мерки за отстранување на бесправно изградените објекти, особено во заштитените подрачја, поставувањето урбана опрема е без дозволи и платени комунални такси, а субвенционирањето на јавните претпријатија во вкупен износ од 36 505 илјади денари е без програма и претходно обезбедена согласност од Советот.
Според конечниот Извештај што го објави ДЗР, во дел од населените места се утврдени изведени градби и градежни активности на објекти за индивидуално домување и хотелски комплекс за кои не е платен надоместок за уредување градежно земјиште и не се издадени одобренија за градење.
Според ДЗР, за 11 населени места/села Советот на општината нема донесено урбанистички планови за село и урбанистички план вон населено место, а за 9 населени места донесени се решенија за одобрување на планска програма за изработка на урбанистички план, но истите сè уште не се донесени. Во дел од населените места ревизијата утврди изведени градби и градежни активности на објекти за индивидуално домување и хотелски комплекс, за кои не е платен надоместок за уредување на градежно земјиште и не се издадени одобренија за градење.
Ревизијата утврдила и дека не е донесен урбанистички план за крајбрежјето, а за Годишната програма за поставување урбана опрема за 2024 година, не е обезбедено позитивно мислење/согласност од Управата за заштита на културното наследство.
Од Општина Охрид вчера посочија дека ќе постапат согласно дадените препораки од Државниот завод за ревизија по Извештајот изготвен врз основа на ревизијата на финансиските извештаи заедно со ревизија на усогласеност на Општина Охрид за 2024 година.
„Општина Охрид ги прими забелешките од Државниот завод за ревизија по спроведената ревизија на финансиските извештаи и ревизијата на усогласеност за 2024 година. Веднаш се преземени активности за постапување согласно дадените препораки, преку утврдување на конкретни мерки и задолжувања на надлежните институции и одговорните лица“, истакнуваат од Општина Охрид за МИА.
Од Општината Охрид велат дека остануваат посветени на унапредување на финансиското работење, транспарентноста во согласност со законските процедури и важечките прописи.
Иран ги отфрла преговорите со САД поради воените „закани“
Иран денеска, 28 јануари ги отфрли преговорите со Соединетите Американски Држави поради упатените закани кон Исламската Република, и откако претседателот Доналд Трамп одби да ја исклучи можноста за воена интервенција поради смртоносното задушување на протестите.
Со оглед на тоа што американската поморска ударна група предводена од носач на авиони се крие во водите на Блискиот Исток, високите ирански претставници, исто така, се обратија до клучните арапски држави за да добијат поддршка.
Група за човекови права соопшти дека потврдила над 6200 смртни случаи, претежно демонстранти убиени од безбедносните сили, во бранот демонстрации што го потресоа клеричкото раководство од крајот на декември, но достигнаа врв на 8-9 јануари.
Активистите велат дека вистинскиот број на жртви може да биде многу пати поголем, бидејќи исклучувањето на интернетот сè уште ги комплицира напорите за потврдување на информациите за обемот на убиствата.
Трамп не ја исклучи воената акција против Иран како одговор на задушувањето, иако се чини дека ги држи своите опции отворени. Ударна група предводена од американскиот брод „Абрахам Линколн“ сега пристигна во водите на Блискиот Исток, соопшти Централната команда на САД, без да ја открие нејзината точна локација.
Аналитичарите велат дека опциите вклучуваат напади врз воени објекти или насочени напади врз раководството под ајатолахот Али Хамнеи во целосен обид да се сруши системот што владее со Иран од Исламската револуција во 1979 година, со која беше соборен шахот.
Но, министерот за надворешни работи Абас Арагчи рече дека „водењето дипломатија преку воена закана не може да биде ефикасно или корисно“.
„Ако сакаат преговорите да се оформат, тие сигурно мора да ги остават настрана заканите, прекумерните барања и покренувањето нелогични прашања“, рече тој во телевизиски коментари.
Арагчи рече дека во последните денови „немал контакт“ со американскиот претставник за Блискиот Исток, Стив Виткоф, и дека „Иран не барал преговори“.
По телефонскиот разговор во вторникот помеѓу иранскиот претседател Масуд Пезешкијан и де факто саудискиот лидер, крунскиот принц Мохамед бин Салман, Иран се обрати до други арапски држави сојузнички на САД во очигледен обид да добие поддршка.
Секретарот на Врховниот совет за национална безбедност на Иран, Али Лариџани, разговараше со катарскиот премиер, шеикот Мохамед бин Абдулрахман Ал Тани, кој е и министер за надворешни работи, соопштија двете страни.
Шеикот Мохамед ја нагласи поддршката на Катар за „сите напори насочени кон намалување на ескалацијата и постигнување мирни решенија на начин што ќе ја зајакне безбедноста и стабилноста во регионот“, соопшти катарското Министерство за надворешни работи.
Во меѓувреме, египетскиот министер за надворешни работи, Бадр Абделати, имаше одделни разговори и со Арагчи и со Виткоф, соопшти Каиро.
Абделати ја нагласи потребата од интензивирање на напорите за „намалување на тензиите и работа кон деескалација“ и создавање „неопходни услови за продолжување на дијалогот меѓу САД и Иран“, соопшти египетското Министерство за надворешни работи.
Во меѓувреме, во Техеран се појавија нови билборди на кои се гледа како Иран напаѓа американски носач на авиони, а исто така и слогани на Хамнеи како ги осудува САД, пренесуваат новинарите на АФП.
Комитетот за надворешни работи на ЕП го усвои извештајот за стратегијата за проширување на ЕУ
Членовите на Комитетот за надворешни работи на Европскиот парламент (АФЕТ) денеска со 44 гласа „за“ и 11 „против“ го усвоија извештајот за стратегијата за проширување на ЕУ на литванскиот либерален европратеник Петрас Ауштревичиус, пренесе МИА.
Во објаснувачката изјава на извештајот Ауштревичиус наведува дека руската воена агресија врз Украина и тековните значајни геополитички промени предизвикаа нова динамика во процесот на проширување на ЕУ.
„Со доделувањето на статусот земји кандидати за членство на Украина, Грузија и Молдавија, сега има десет држави што тргнаа на патот кон ЕУ. Од перспектива на ЕУ, проширувањето е геостратешка инвестиција во мир, безбедност, стабилност и просперитет. Иако очекувањата и напредокот на одделни земји кандидати се разликуваат, сите тие се оценуваат врз основа на фер и ригорозна условеност, принципот на сопствени заслуги и реверзибилност - вели Ауштревичиус.
Во предлог-извештајот се повторува дека проширувањето е од најголема стратешка важност за ЕУ во услови на руската агресија врз Украина и други заеднички геополитички предизвици, што бара долгорочна политичка демократска визија и храбри одлуки.
„Нерешените билатерални прашања меѓу земјите од ЕУ и земјите што не се членки на ЕУ треба да се решаваат билатерално и не смее да се користат како лост за блокирање на процесот на пристапување на кандидатите за членство“, се вели во извештајот.
Во него се нагласува и дека регионалната соработка е предуслов за пристапување во ЕУ и дека помирувањето, кое води кон добрососедски односи, е клучно за успешно пристапување во Унијата.
„Проширувањето е добитна опција и за сегашните и за идните земји членки, ја нагласува политичка итност од демонстрирање на посветеноста на ЕУ кон процесот на проширување, инсистира дека проширувањето на ЕУ ќе ја зајакне европската безбедност и уште еднаш нагласува дека иднината на Западен Балкан, на Украина и на Молдавија е во рамките на ЕУ“, се наведува во предлог-документот.
Меѓудругото, се посочува дека пристапувањето кон ЕУ мора да биде процес базиран на заслуги и дека секој кандидат мора да биде оценуван според сопствените заслуги во однос на исполнувањето на Копенхашките критериуми, усогласеноста со законодавството на ЕУ и исполнување на сите дополнителни услови утврдени во преговарачката рамка.
„Пристапот базиран на заслуги може да подразбира замрзнување на преговорите за пристапување во случај на назадување во однос на фундаменталните вредности, при што преговорите ќе продолжат дури кога ќе се постигне значителен напредок во реформите. Земјите што не се успешни во однос на демократското управување мора да се соочат со последици за да се обезбеди дека процесот на пристапување останува навистина базиран на заслуги“, се наведува во предлог-извештајот.
Во документот се посочува дека паралелно со подготовките на земјите кандидати за членство и ЕУ мора да ги спроведе потребните реформи за да се подготви за прием на нови членки, при што се предлага воведување гласање со квалификувано мнозинство во областите релевантни за процесот на пристапување, со укинување на консензусот при одлучување во меѓуфазите во преговарачкиот процес.
Во него се оценува дека претпристапната финансиска помош за Западен Балкан, Украина и Молдавија е клучна за нивна институционална и економска трансформација и се нагласува важноста на вклучувањето на земјите кандидатки во тековните и идните проекти на ЕУ за поврзување, транспорт, енергија и воена мобилност.
Документот сега треба да биде усвоен од страна на Европскиот парламент, најверојатно на следната пленарна сесија во Стразбур кон средината на февруари.
Студентите во блокада протестираа против „уривањето на универзитетската автономија“
Под слоганот „Знаењето е моќ“, илјадници луѓе протестираа пред седиштето на универзитетот во центарот на Белград, на повик на студентите во блокадата.
Тие повикаа на протест против колапсот на образовниот систем и автономијата на универзитетот, додека владата се обидува да воспостави „директна политичка контрола“ врз факултетите.
„Нема злоба, има моќ во знаењето“, порача Владан Ѓокиќ, ректор на Универзитетот во Белград, на сегашните и идните власти.
Обраќајќи и се на толпата, тој изјави дека ниедна влада „не се однесувала кон академската заедница на толку суров и злонамерен начин, само затоа што таа заедница не сакала да молчи“.
Тој зборуваше за притисоците со кои се соочуваат факултетите, од полициски рации, преку отпуштање на професори до економски притисоци.
Ректорот изјави дека тие одговараат на силата и омразата на овој режим со силата на образованието.
„Сакам да ги охрабрам членовите на академската заедница да се вклучат во одбраната на автономијата на универзитетот. Ги повикувам надлежните институции да ја обезбедат законски загарантираната автономија на универзитетот“, рече тој.
Владимир Ристиќ, отпуштениот директор и наставник по физичко образование во Омољица, рече дека наставниците се темел на опстанокот и напредокот на нацијата.
„Образованието постои за да ја направи личноста слободна и безбедна. Треба да ѝ овозможи на личноста да размислува, да избира и да учествува во општеството, а не да молчи“, рече тој.
Во повикот за состанокот, учениците во блокадата посочија на „притисок врз едукаторите, отпуштања и одмазда кон оние што ги поддржуваа учениците“ за време на повеќе од една година масовни протести, кои започнаа по смртта на 16 лица при падот на кровот на железничката станица во Нови Сад.
„Апсењата на ученици, средношколци и професори, како и нивниот прогон и притисоци, претставуваат најсурови форми на конфронтација со академската заедница“, е пораката на блокираните ученици на Инстаграм.
Протестот на 27 јануари беше организиран на државен и верски празник посветен на Свети Сава, кој се слави во училиштата во Србија како прослава.
По говорот на говорникот пред Ректоратот, насобраните луѓе се упатија низ централните улици на Белград до црквата „Свети Сава“, каде што пред затворените врати беше одбележана славата на училиштето и состанокот заврши.
На протестот му претходеа повици за бојкот на наставата на неколку белградски факултети, како што се Правниот, Филозофскиот и Политичкиот факултет, како знак на солидарност со студентите од Нови Сад.
Студентите на поголемиот дел од високообразовните институции во Нови Сад ја бојкотираа наставата, барајќи отпуштената професорка на Филозофскиот факултет, Јелана Клут, да биде вратена на работа.
Додека администрацијата на Универзитетот тврди дека нејзиното отпуштање е во согласност со правилата, студентите во блокадата тврдат дека професорката е отпуштена затоа што ги поддржувала во протестите.
Бојкотот на наставата во Нови Сад беше изгласан по полициската интервенција во таа институција на 21 јануари.
Трамп вели дека Иран сака да разговара, додека воените бродови на САД пристигнуваат на Блискиот Исток
Американска група носачи на авиони пристигна на Блискиот Исток на 27 јануари, во време кога растат тензиите околу можен напад врз Иран, по бруталното задушување на протестите за кое организациите за човекови права велат дека однело илјадници животи.
Во услови на немирите, иранската валута, ријалот падна на рекордно ниско ниво во однос на доларот, тргувајќи се на 1,5 милиони за еден долар на 27 јануари.
Американскиот претседател, Доналд Трамп изјави дека се „надева“ оти нема да биде потребна воена акција против Техеран, но истовремено испрати „армада“ во регионот.
Тој одби да ја исклучи можноста за воздушни напади како одговор на задушувањето на претежно мирните демонстранти, кои во изминатите недели излегоа на улиците барајќи мерки за запирање на забрзаната инфлација и слабеењето на националната валута.
Американската организација за човекови права ХРАНА, чии податоци Радио Слободна Европа редовно ги цитира откако започна насилното задушување на протестите во Иран на почетокот на овој месец, соопшти дека потврдениот број на загинати, вклучително и припадници на безбедносните сили, сега изнесува 6.126, додека бројот на жртви чии случаи сè уште се предмет на истрага изнесува 17.091.
Некои проценки од официјални лица, цитирани неофицијално од различни медиуми, се неколкукратно повисоки.
Американскиот претседател, Доналд Трамп изјави во интервју за Аксиос на 26 јануари дека ситуацијата со Иран е „променлива“, бидејќи испратил „голема армада“ во регионот, при што ударна група предводена од носачот на авиони УСС Абрахам Линколн (USS Abraham Lincoln) веќе се наоѓа во водите на Блискиот Исток, соопшти Американската централна команда.
Но, тој смета дека Техеран искрено сака да постигне договор.
„Тие сакаат да склучат договор. Тоа го знам. Се јавуваа во повеќе наврати. Сакаат да разговараат“, изјави тој, според цитатите.
Протестите започнаа на 28 декември на пазарите во главниот град Техеран, меѓу трговците незадоволни од лошите економски услови. Немирите брзо се проширија низ целата земја и прераснаа во демонстрации против властите поради влошувањето на животниот стандард и задушувањето на слободите.
Падот на ријалот во однос на доларот се случува во услови кога годишната стапка на инфлација изнесува 44,6 проценти, вклучувајќи речиси 90-процентно зголемување на цените на храната на годишно ниво.
Иранската економија со години се соочува со тешкотии под притисок на меѓународните санкции и последиците од 12-дневната војна со Израел во јуни минатата година.
Сведоштвата на очевидци и потврдените извештаи од организации за човекови права укажуваат дека насилното задушување на протестите го достигна својот врв на 8 и 9 јануари, кога безбедносните сили отворија оган со боева муниција врз демонстрантите.
Во услови на повеќенеделна блокада на интернетот, информациите за размерите на насилното задушување на протестите продолжуваат постепено да излегуваат на виделина.
Организацијата за следење на интернет-слободите NetBlocks соопшти во дневен извештај на 26 јануари дека блокадата сè уште трае, иако имало извештаи за ограничен пристап до интернет.
NetBlocks наведува дека ваквите „празнини“ се „затвораат со цел да се ограничи нивното заобиколување, додека одобрени сметки на режимот ја промовираат нарацијата на Исламската Република“.
Портпарол на иранската влада изјави на 27 јануари дека интернетот бил исклучен „за да се зачуваат човечки животи“, без да објасни што точно значат тие изјави.
И покрај тоа, нови снимки од задушувањето на протестите продолжуваат да се појавуваат на интернет, бидејќи Иранците се обидуваат да покажат колку брутална била репресијата.
ЕУ вложува 171 милион евра во инфраструктурата и приватниот сектор на Западен Балкан
Европската комисија најави поддршка во износ од 171 милион евра за поттикнување на развојот на инфраструктурата и растот на приватниот сектор во Западен Балкан.
Од овој износ, 94,7 милиони евра се наменети за инфраструктурни инвестиции, 76,3 милиони евра за поддршка на приватниот сектор, додека 2,9 милиони евра се определени за четири проекти за техничка помош во Албанија и Босна и Херцеговина.
Овие проекти се насочени кон подготовка на идни вложувања во секторите на енергетиката, водоснабдувањето, иновациите и истражувањата.
Средствата доделени за инфраструктурните проекти, според соопштението на Европската комисија, треба да мобилизираат вкупно 263 милиони евра инвестиции преку седум проекти во приоритетни сектори, вклучувајќи дигитализација, чиста енергија, човечки капитал, сообраќај и заштита на животната средина.
Проектите вклучуваат воведување широкопојасна инфраструктура во Албанија, унапредување на системот за пренос на електрична енергија во Северна Македонија, како и изградба и енергетски ефикасна обнова на образовни објекти во Северна Македонија и Црна Гора.
Како што наведуваат од Европската комисија, проектите ќе ги спроведуваат партнери од Западен Балкан во соработка со меѓународни финансиски институции.
„Вложувањето во нашите партнери на Западен Балкан е клучно за нивното приближување кон ЕУ. Повеќе од две години по усвојувањето на Планот за раст за Западен Балкан, работевме, вклучително и преку Инвестициската рамка за Западен Балкан, на претворање на обврските во конкретни дела. Од унапредување на инфраструктурата до зајакнување на развојот на бизнисот, овие вложувања создаваат реални можности за граѓаните и ја прават ЕУ опиплива реалност низ целиот регион“, соопшти европската комесарка за проширување, Марта Кос.
Новиот пакет на поддршка опфаќа инвестициски придонеси од повеќе извори на финансирање на ЕУ, вклучително и Инструментот за претпристапна помош (ИПА), билатерални донатори преку Инвестициската рамка за Западен Балкан, како и Инструментот за реформи и раст.
„Денешниот пакет за финансирање вклучува инвестициски проекти и проекти за техничка помош кои денес се одобрени, со што дополнително се зајакнува посветеноста на ЕУ на одржливиот раст и регионалната поврзаност во Западен Балкан“, наведува Европската комисија.
По одобрувањето од страна на Оперативниот одбор на Инвестициската рамка за Западен Балкан, проектите можат да преминат во фаза на имплементација.
Ова подразбира финализирање на потребните договори со партнерските институции и корисниците, започнување на подготвителни студии за активностите за техничка помош и завршување на процедурите неопходни за реализација на проектите од приватниот сектор.
По завршувањето на овие процеси, може да започне спроведувањето на поддржаните инвестиции.
Работниците утре на протест за повисоки плати
Сојузот на синдикати на Македонија денеска ( 27 јануари) ги повика сите оние кои не се задоволни од платата да се приклучат на утрешниот протест организиран против незголемувањето на минималната плата на 600 евра и на сите останати плати за 100 евра.
Аргументи има многу, изговори нема, 200 илјади луѓе живеат со плата под 30.000 денари, изјави денеска претседателот на ССМ Слободан Трендафилов.
Утрешниот протест, како што посочи, е поради „игнорантскиот однос на Владата и на работодавачите кои не се договорија за зголемување на сите палти за 100 евра преку зголемување на минималната плата на најмалку 600 евра“.
„28 јануари е денот кога работниците зборуваат. Колку гласно ќе зборуваат, зависи од вас. Утре вашето присуство на улица ќе зборува погласно од секоја дискусија што сте ја воделе во семејствата и на вашите работни места. Овој протест е за вашите плати затоа што истите не стигнуваат од 1-ви до 1-ви“, рече Трендафилов.
Од ССМ најавуваат дека следниот ден по завршување на протестот ќе излезат со информации и докази за институциите во кои се врши притисок врз работниците да не се приклучат на протестот.
Протестот почнува утре во 17 часот од пред зградата на ССМ и продолжува пред Собранието и Стопанската комора за да заврши пред Владата.
Доколку нема слух од другата страна, ССМ најавува блокади на таргетирани институции, организирање на генерален штрајк и собирање на 10.000 потписи со кои ќе се бараат законски измени за намалување на функционерските плати за 80 проценти и зголемување на сите плати преку зголемувањето на минималната плата на најмалку 600 евра.
Премиерот, Христијан Мицкоски пак, одговарајќи на новинарско прашање во врска со протестот, денеска најави дека минималната плата законски се зголемува во март. Тој додаде и дека „секојима право да протестира“.
„Во согласност со законот, минималната плата ќе биде зголемена во март, односно платите што ќе ги добијат работниците во април за март ќе бидат зголемени. Ние рековме дека ќе го поддржиме секое решение што синдикатите ќе го постигнат со работодавците во дипартитен дијалог“, истакна Мицкоски.
Нов бран руски напади убија четворица, прекин на струја во неколку области на Украина
Руски воздушни напади погодија неколку региони низ Украина, при што загинаа неколку луѓе и беше оштетен енергетски објект во јужниот пристанишен град Одеса, а беше прекината и електричната енергија во Харкив, додека земјата се бори со прекини во снабдувањето со електрична енергија и греењето поради длабокиот зимски мраз.
Шефот на воената администрација на регионот Одеса, Олех Кипер, изјави дека градот бил погоден од голем напад со беспилотни летала, при што еден маж загинал, а најмалку 23 лица, вклучувајќи деца и бремена жена, биле повредени. Тој додаде дека неколку станбени згради биле оштетени, предизвикувајќи големи пожари, додека црква во центарот на градот и градинка биле погодени.
„Брутален“ напад врз Одеса
Брачен пар на возраст од околу 40 години наводно бил убиен во Славјанск во источниот регион Донецк, додека во друг напад со беспилотни летала во јужниот регион Запорожје, 58-годишник бил убиен дома.
„Брутален напад со беспилотни летала врз Одеса. Секој таков руски напад ја еродира дипломатијата што сè уште е во тек и ги поткопува напорите на партнерите кои помагаат да се заврши оваа војна“, напиша украинскиот претседател Володимир Зеленски на X.
Украина, Русија и Соединетите Држави се подготвени да ги продолжат преговорите во Абу Даби подоцна оваа недела по она што официјалните лица го оценија како „конструктивни“ мировни разговори минатиот викенд, дури и кога војната не покажува знаци на смирување додека се приближува кон четвртата година од почетокот на инвазијата.
Во исто време, нема знаци дека Кремљ се повлекува од своите долгогодишни максималистички барања.
Русија се обидува да се пробие кон запад преку источна Украина за да добие што е можно повеќе територија за време на мировните преговори. Голем дел од нејзините придобивки се во регионот Донецк, иако го продолжи притисокот и во регионот Харкив.
Специјалниот претставник на рускиот претседател Владимир Путин, Кирил Дмитриев, на 27 јануари изјави дека повлекувањето на Украина од регионот Донбас - индустриското срце на Украина - е „патот кон мирот“.
Но, за огромното мнозинство Украинци, откажувањето од Донбас - од кој Русија моментално контролира околу 90 проценти - или од која било друга територија формално или трајно е надвор од прашање.
Невидени прекини во снабдувањето со енергија
Оваа зима беше мизерна за милиони Украинци кои страдаат од невидени прекини во снабдувањето со енергија предизвикани од немилосрдни и насочени руски напади со беспилотни летала и ракети, кои сериозно ја оштетија инфраструктурата за греење и електрична енергија низ целата земја.
Од најмалку 9 јануари, кога беше најлошиот руски напад во Новата година, екипите за итни случаи брзаа да го одржат чекорот со уништувањето предизвикано од руските напади. Оштетени трафостаници, урнати далноводи, пукнати цевки за греење и топла вода и исклучени фабрики.
Гувернерот на регионот Харкив, Олех Синиехубов, рече дека руските напади во текот на ноќта на 27 јануари го прекинале снабдувањето со електрична енергија за околу 80 проценти од градот Харкив и околните области.
По рускиот напад, NetBlocks, организација за надзор на дигитални права и следење на поврзаноста, пријави прекин на интернетот во Харкив.
Во западна Украина, инфраструктурен објект во регионот Лвив беше оштетен во руски напад, информираше регионалниот гувернер Максим Козицки.
Тој не го прецизираше типот на објектот што бил цел, но рече дека службите за итни случаи работат на местото на настанот.
Русија негира дека намерно таргетирала цивили во Украина и покрај широките докази за спротивното од почетокот на нејзината целосна инвазија во 2022 година.
Автобуските превозници ќе протестираат со камионџиите ако не се најде поволно решение
Асоцијацијата на автобуските превозници „Исток“ укажува дека новиот начин на евиденција во шенген-зоната ги отежнува нивното секојдневно работење и редовното одржување на секојдневните меѓународни линии за превоз на патници.
Од европските институции бара фер и применливо решение што ќе го земе предвид специфичниот карактер на професионалниот превоз на патници и стока.
Претседателот на Асоцијацијата „Исток“, Горан Трпковски вели дека се подготвени на заеднички протест со камионските превозници доколку не се донесе поволна одлука, која ќе обезбеди непречено функционирање на меѓународниот превоз и заштита на стопанството.
„Изразуваме длабока загриженост од начинот на кој Европската Унија го применува правилото за престој (90/180) во шенген-зоната, кое без исклучок се однесува и на професионалните возачи. Нашите компании со години вршат превоз на балкански тури што гравитираат низ земјите во регионот, вршат меѓународен превоз организиран од страна на тур-оператори и туристички агенции, а новиот начин на евиденција го отежнува нивното секојдневно работење, како и редовното одржување на секојдневните меѓународни линии за превоз на патници“, изјави Трпковски за агенцијата МИА.
Според него, ако се земе предвид статистичкиот податок дека на месечно ниво во 2025 година во нашата држава во просек престојувале по 100.000 туристи за кои нашите превозници и туристички агенции извршиле превоз на разни дестинации, „последиците од мерката на Европската Унија би биле поразителни“
Трпковски додава дека ограничувањето на движењето на возачите
„предизвикува последици и врз фирмите и граѓаните“, но вели и дека тоа „ќе доведе до длабоки економски последици, намалување на приходите во туризмот, затварање многу фирми и мали бизниси, губење работни места, намалена конкурентност на нашите компании за превоз, губење на странските партнери и огромен пад во стопанството со огромно нарушување на туристичките, економските и трговските текови“.
Нашата заложба, дополнува тој, е идентична со ставовите на членките на Асоцијацијата „Макам-транс“ и сме подготвени на заеднички протест доколку не се донесе поволна одлука, која ќе обезбеди непречено функционирање на меѓународниот превоз и заштита на стопанството.
Камионските превозници од државава и нивните колеги од Србија, Црна Гора и Босна и Херцеговина, вчера почнаа блокада на товарниот сообраќај на премините кон шенген-зоната барајќи да се промени правилото на ЕУ за електронска евиденција за престој во шенген-зоната во согласност со правилото 90/180 дена.
Од Асоцијацијата на здруженијата на работодавачите на превозните трговски друштва на Република Македонија „Макам-транс“, вчера на првиот ден од протестот изразија надеж дека ќе наидат на разбирање од страна на европските држави.
„Станува збор за професионална дејност - транспортна. Лицето работи во сопствената држава, возилото е регистрирано во сопствената држава и едноставно, може да се каже дека Европа на овој начин сака да нè спречи да работиме“, изјави Билјана Муратовска од „Макам-транс“.
Блокади на транспортерите: “Не“ за Шенген правилата за престој
Економска оправданост за тоа да се обезбедуваат по двајца возачи кога нема доволно возила, според Муратовска, воопшто не постои. Не е економски оправдано еден возач три месеци да седи дома и да прима минимална плата, додека другиот работи.
Посочи дека ова е огромна дискриминација кон патниот превоз затоа што со постојната регулатива Европската Унија го ослободила од броење денови за престој секој друг вид превоз - бродскиот, железничкиот и јавниот превоз.
Мицкоски побарал телефонски разговор со Фон дер Лајен за проблемот на превозниците
Премиерот, Христијан Мицкоски денеска (27 јануари) изјави дека очекува да се надмине овој проблем на македонските превозници.
Тој рече дека ова прашање е отворено уште од септември со Европската комисија и дека задолжен да разговара е министерот за надворешни работи и надворешна трговија Тимчо Муцунски, исто како што со ЕК досега се разговарало и за други проекти што се во интерес на граѓаните.
„Барем од она што е последна најава, очекувам ова да се реши. Јас вчера побарав телефонски разговор со претседателката на Европската комисија (Урсула фон дер Лајен), таа е службено отсутна во Индија. Очекувам деновиве да се слушнеме и повторно да ја отвориме оваа тема и заедно со колегите од регионот повторно да ја ставиме на маса. ЕУ си има шенген-механизам до кој се држи и ние сега бараме варијанта како да им излеземе во пресрет на транспортерите“, рече Мицкоски одговарајќи на новинарски прашања при работната посета на општина Гази Баба.