Достапни линкови

Вести

Македонскиот културен центар во Благоевград ќе биде отворен до крајот на годинава

Душко Арсовски, портпарол на Владата на РСМ

Македонскиот културен центар во бугарскиот град Благоевград се планира да биде отворен до крајот на годината, а неговото име ќе се определи во комуникација со нашиот Институт за национална историја, информира владиниот портпарол Душко Арсовски на денешната прес-конференција во Владата.

„Премиерот Димитар Ковачевски минатата недела најави дека планира да го запознае својот бугарски колега Кирил Петков дека како Влада во текот на оваа година имаме намера да отвориме нов културен центар во Благоевград“, изјави Арсовски одговарајќи на новинарско прашање кога ќе биде отворен нашиот културен центар во Благоевград.

На прашање до каде се проверките на Владата за легитимноста на постоењето на бугарскиот клуб „Иван Михајлов“ во Битола, Арсовски посочи дека се собираат информации за начинот на кој е регистриран тој клуб.

„Очекуваме во најскоро време работите да бидат појасни за што јавноста ќе биде информирана. Тоа што е важно е дека се разгледуваат повеќе опции и институциите ќе постапат соодветно во овој случај“, додаде Арсовски.

Неодамнешното отворање на културниот центар „Ванчо Михајлов“ во Битола предизвика бурни реакции од македонската јавност. Критиките од македонската јавност во најголем дел се затоа што Михајлов е познат соработник на нацистите. На отворањето присуствуваа бугарскиот премиер Кирил Петков, шефицата на дипломатијата Теодора Генчовска и потпретседателката на Бугарија Илијана Јотова.

види ги сите денешни вести

Албанија им достави на Макрон и Шолц статут за формирање Заедница на општини со српско мнозинство на Косово

Албанскиот премиер Еди Рама

Албанскиот премиер Еди Рама на прес-конференција објави дека на 7 јуни им проследил Нацрт за Заедницата на општините со српско мнозинство во Косово, на францускиот претседател Емануел Макрон и на германскиот канцелар Олаф Шолц.

„Тука сум да ве информирам за еден досега непознат факт. Вчера на Макрон и Шолц им го препратив нацртот на Заедницата, за што го информирав и претседателот на Европскиот совет Шарл Мишел и американската страна“, рече Рама.

Тој додаде дека документот е доверлив и изрази уверување дека станува збор за „документ на највисоко меѓународно ниво кој ги зема предвид сите причини за создавање на Заедницата“ и дека таа ќе биде дел од Косово.

Премиерот на Албанија рече дека не се консултирал со премиерот на Косово Албин Курти за изработката на статутот за формирање на Заедницата и истакна дека е многу загрижен за ситуацијата во која се најде Косово.

Заедницата на општините со српско мнозинство беше договорена во 2013 година како дел од дијалогот меѓу Косово и Србија.

Две години подоцна, двете страни се договорија за принципите врз основа на кои треба да се формира, но Уставниот суд на Косово утврди дека некои од нив не се во согласност со законите на Косово. Сепак, беше заклучено дека може да се согласат со Уставот на Косово, но властите сепак одбија да ја формираат Унијата.

Потоа, на крајот на февруари, двете страни го прифатија Договорот за нормализација на односите врз основа на предлогот на ЕУ, а Анексот за негова имплементација беше договорен и во април.

Меѓу другото, овие документи предвидуваат дека српската заедница во Косово треба да добие одредено ниво на самоуправување, а европските и американските претставници потврдија дека таа всушност е Заедница на општини со српско мнозинство.

Потоа, на почетокот на мај, српската страна го претстави својот нацрт-статут за формирање на Заедницата, кој беше отфрлен од Косово, наведувајќи дека официјален Белград сака Република Српска (еден од ентитетите во Босна и Херцеговина).

Од друга страна, косовскиот премиер Албин Курти ја претстави својата „визија“ за обезбедување одредено ниво на самоуправување на Србите во Косово.

Инаку, формирањето на Заедницата е еден од условите Србите да се вратат во косовските институции кои ги напуштија во ноември минатата година.

Судскиот совет ги прифати оставките на Герасимовски и Радевска-Стефкова

Судски совет

Судскиот совет на денешната 444-та итна седница констатираше престанок на мандатот на членовите Мирјана Радевска-Стефкова и на Зоран Герасимовски, по нивното барање да си дадат оставка.

Врховната судијка Мирјана Радевска-Стефкова изјави дека од кога е член на советот имала определени моменти на разидување во однос на заземените ставови на оваа институција. Како пример таа ги издвои одбивањето на Судскиот Совет да ги достави списите до Врховниот суд како и првите постапки кои што биле водени од страна на Судскиот совет во однос на избор на судии во повисок суд.

„Потоа следуваше седницата во април кога дојде до разрешување на претседателот кое според мене е незаконито. Мене ми пречеше што таа одлука е дадена без образложение, затоа што сметам дека Судскиот совет сите свои одлуки треба да ги образложи, рече Радевска-Стефкова.

Апелацискиот судија Зоран Герасимовски истакна дека во Советот дошол со определена идеологија, но, како што рече, наишол на идеолошки несогласувања со дел од Советот.

„Имајќи ги предвид последните превирања, сметам дека треба да си поднесам оставка од проста причина што сметам дека поголем придонес ќе дадам како судија во Апелацискиот суд во време кога сите судови се пренатрупани со предмети, отколку како член на Судскиот совет, дополни тој.
На денешната, на Судскиот совет.

Апелациониот судија Зоран Герасимовски и врховната судијка Мирјана Радевска - Стефкова беа избрани за членови на Советот на непосредни избори, од редот на судиите.

Случувањата во Судскиот совет во последните месеци се тема на загриженост и од меѓународни и од домашни институции. Сериозни критики за правосудниот систем упати и холандскиот амбасадор во Скопје Дирк Јан Коп во интервју за Радио Слободна Европа каде посочи дека е ставен во „мирување “ голем проект финансиран од Холандија, осветен на зајакнување на ефикасноста, отчетноста и транспарентноста на Судскиот совет.


За помалку од пет месеци, две претседателки на Судскиот совет беа сменети, што предизвика сериозна загриженост за независноста на судството во Северна Македонија. И двете обвинија дека причина за нивната смена е политички интерес.

Финансирањето на членките централна тема на самитот на НАТО во Вилнус

Генералниот секретар на НАТО Јенс Столтенберг.

Генералниот секретар на НАТО Јенс Столтенберг и американската амбасадорка во Алијансата Џулијан Смит, на 7 јуни рекоа дека финансирањето ќе биде централна тема на самитот следниот месец во Вилнус, заедно со прашањето за проширувањето и безбедносните гаранции.

Смит и Столтенберг, кои учествуваа преку видео врска на конференцијата спонзорирана од Центарот за новата американска безбедност, рекоа дека земјите-членки ќе разговараат за прагот на трошоците за одбрана од два отсто од БДП и потребата да се признае тоа како минимум за земјите членки, пренесува редакцијата на Радио Слободна Европа на англиски јазик.

Смит вети дека ќе продолжи притисокот на САД за да обезбеди членките да издвојат најмалку два отсто од својот БДП за трошоците за одбраната, како што е договорено во ветувањето за инвестиции во одбраната (DIP) од 2014 година, кое ги повикува земјите да го исполнат прагот од два отсто до 2024 година.

Покрај тоа, Смит рече дека два проценти се минимумот, а не максимумот“ и дека идните планови на НАТО може да бараат дополнителни зголемувања.

Соединетите Држави „планираат да го применат DIP 2.0“ на самитот, рече Смит, со континуиран притисок врз сојузниците во НАТО да го исполнат и надминат прагот од два проценти во следните неколку години.

Лидерите на 31 земја на НАТО, кои треба да се соберат од 11 до 12 јули во главниот град на Литванија, се очекува да одржат и клучни разговори за иднината на НАТО, членството и проширувањето.

Украинскиот претседател Володимир Зеленски, кој врши притисок врз НАТО да дозволи пристапување на Украина, се очекува да присуствува на самитот. Тој претходно оваа недела рече дека Украина е „подготвена да се приклучи“ и дека алијансата треба да донесе одлука за членството на Украина на самитот.

За проширувањето на НАТО, Смит и Столтенберг јасно ставија до знаење дека постои широк опсег на потенцијални модели за континуирана помош на НАТО за Украина, но дека решението најверојатно ќе биде компромис помеѓу различните мислења меѓу сојузниците.

Столтенберг се согласи дека додека Украина не се приклучи на алијансата, ќе биде неопходна дискусија за безбедносните аранжмани, иако тој не даде детали.

Шефот на НАТО појасни дека сојузниците и Украина треба да ја донесат конечната одлука кога ќе и биде дозволено на Украина да се приклучи. Сепак, тој ја потврди крајната посветеност на НАТО Украина да стане членка по војната.

„Откако оваа војна ќе заврши, имаме рамка да спречиме понатамошни напади врз Украина“, рече тој.

Дополнителна област на фокус на самитот ќе биде посветеноста на ресурсите за сојузниците на НАТО.

Новата DIP и новите американски планови за регионална одбрана и одвраќање што се очекува да бидат на агендата на самитот ќе резултираат во „целосен нов свет“ за јасност и ниво на одговорност на сојузниците во НАТО, рече тој.

Официјални лица, исто така, ја истакнаа посветеноста на НАТО за победа на Украина.

Запрашан за очекуваната украинска контраофанзива, Столтенберг рече дека победата на Украина како независна, суверена нација е главен приоритет на НАТО, но не сакаше да каже повеќе за плановите на Украина за многу дискутираната контраофанзива, освен дека Украинците „имаат способност да ослободат територии под контрола на Русија“.

Руските трупи го бомбардираат Херсон, продолжуваат спасувачките операции од поплавите

Локалните жители шетаат по поплавена улица за време на евакуација од поплавеното подрачје по пробивањето на браната Нова Каховка, среде рускиот напад врз Украина, во Херсон, Украина, 7 јуни 2023 година.

Продолжуваат руските бомбардирања покрај реката Днепар, дедека спасувачките тимови во Украина ги продолжуваат напорите за спасување на илјадници луѓе заробени од катастрофалните поплави предизвикани од пукањето на браната на реката во јужна Украина. Покрај бомбардирањето што го извршија руските војници, опасност претставуваат и пловечките мини.

Олександр Прокудин, гувернер на јужната област Херсон, на 8 јуни изјави дека нивото на водата е речиси шест метри.

„Утринава просечниот водостој е 5,61 метар. Околу 600 квадратни километри се под вода, од кои 32 отсто се на десниот брег (под контрола на Украина) и 68 отсто на левиот брег (под контрола на Русија) “, рече Прокудин во видео порака.

Тој рече дека до 6 часот наутро по локално време, речиси 2.000 луѓе биле спасени од опасните области, од кои повеќето, 1.495, од областа Корабел во градот Херсон.

Регионот Херсон зафаќа 28.461 квадратни километри.

Руските сили продолжија да го гранатираат Херсон и неговата околина од другата страна на реката Днепар и покрај катастрофалните поплави предизвикани од уништувањето на браната Нова Каховка,изјави на 8 јуни Наталија Хуменјук, водач на Заедничкиот медиумски координативен центар на јужните одбранбени сили.

„Поради континуираното зголемување на нивото на водата, непријателот беше принуден да се повлече 5-15 километри од претходните позиции, а гранатирањето сега не е толку интензивно, но областа Бериславски (источно од градот Херсон) сè уште е цел на гранатирање“, рече Хуменјук за украинската телевизија.

Хуменјук, исто така, рече дека руските сили ги попречувале комуникациите во областа топрилика за време на наводната експлозија за да ја прикријат, и дека некои од нивните војници можеби биле оставени да се удават или останале изолирани на покривите. Нејзините тврдења не можеа да бидат независно проверени.

ЕУ се обидува да ги зајакне врските со Латинска Америка

илустрација

Европската Унија го објави планот за зајакнување на односите со Латинска Америка, додека таа се обидува да го зголеми своето влијание соочена со руската инвазија врз Украина.

Врските на ЕУ со регионот се отежнати поради неуспехот да се склучи сеопфатен трговски договор со групата од четири земји, Меркосур – Аргентина, Бразил, Уругвај и Парагвај, за кој преговорите траат веќе две децении.

Несогласувања имаше со клучни регионални сили како што е Бразили тоа за инвазијата на Москва врз Украина и последиците од таа војна.

„Некогаш ова партнерство се зема здраво за готово или пак се занемарува“, рече високиот претставник на ЕУ за надворешни политики и безбедност Жоезеп Борел.

Напорот за подобрување на односите со регионот е поттикнат од Шпанија, која го презема шестмесечното ротирачко претседавање со ЕУ следниот месец.

ЕУ ја гледа Латинска Америка како важен потенцијален извор на клучни суровини бидејќи Брисел се обидува да ја одвикне Европа од нејзината зависност од Кина.

Напорите за склучување трговски договор со групата Меркосур се во застој веќе 20 години, при што земјите од Латинска Америка се спротивставуваат на напорите на ЕУ да ги принуди да се усогласат со строгите еколошки и климатски барања на Унијата.

ЕУ во моментов е најголемиот странски инвеститор во Латинска Америка и Карибите.

Русија ја обвини Украина дека го кренала во воздух клучниот цевковод за амонијак

илустрација

Москва соопшти дека украинската „диверзантска“ група кренала во воздух дел од нафтоводот Толјати-Одеса што Русија го користела за извоз на амонијак пред почетокот на инвазијата во февруари 2022 година.

Нафтоводот долг 2 500 километри е дел од меѓународните преговори за да се дозволи извоз на жито од Украина во услови на конфликт со Русија.

Украинските власти ги обвинија руските сили дека пукале на цевковод за амонијак кај Масиутивка.

„Во понеделникот вечерта украинска диверзантско-извидувачка група го разнесе цевководот за амонијак Толјати-Одеса“ во близина на селото Масјутовка во североисточниот регион Харков“, соопшти руското Министерство за одбрана.

Министерството соопшти дека се ранети неколку цивили, додавајќи дека им била укажана неопходна медицинска помош.

Гасоводот престана да работи откако Москва испрати војници во Украина во февруари 2022 година.

Обновувањето на рускиот извоз на амонијак преку гасоводот е еден од условите на Москва за продолжување со договорот за извоз на жито, што овозможува безбедно поминување на украинските пратки.

Русија го обвини Западот дека го блокира нејзиниот извоз на вештачко ѓубриво, чија главна компонента е амонијакот.

Портпаролката на руското Министерство за надворешни работи Марија Захарова изјави дека Киев е „единствената земја која никогаш не била заинтересирана за заживување на гасоводот“. Таа го обвини Киев дека „им нанесува удар на напорите на ОН за борба против гладта во светот“ и рече дека доколку ќе бидат потребни еден до три месеци за да се санираат штетите, доколку тимовите можат да пристапат до локацијата.

Османи сака КФОР да остане во Косово додека државата не влезе во НАТО

Косовската претседателка Вјоса Османи

Во Косово може да се одржат нови избори во општините со мнозинско српско население, погодени од протестите, доколку 20 отсто од гласачите потпишат петиција со која бараат избори, јавија денеска косовските медиуми пренесувајќи делови од интервју на косовската претседателка Вјоса Османи за Ројтерс.

Османи вели дека верува оти петицијата е „најдемократскиот начин“ да се придвижи кон нови избори.

Според неа смената на градоначалниците со гласачка петиција ќе биде „нешто како референдум“ што ќе го отвори патот за второ гласање за избор на нови градоначалници.

Додека тензиите меѓу Србија и Косово се разгоруваат, НАТО ги зајакна своите мировни сили на северот на земјата. Османи изјави дека сака овие мировни трупи да останат додека Косово не биде примено во НАТО.

Таа изјави дека целиот овој процес може да се направи во рок од неколку месеци. Сепак, не е јасно дали локалните српски гласачи ќе учествуваат во петицијата, забележува агенцијата.

Османи вели дека пред да се распишат нови избори, на Косово ќе му требаат гаранции од меѓународната заедница дека Белград нема да се меша.

Пекинг негира дека управува со станици на тајната полиција во Британија

илустрација

Кина остро го негираше постоењето на тајни полициски станици во Обединетото Кралство, откако Лондон нареди да ги затвори.

Министерот за безбедност на Велика Британија Том Тугендхат изјави дека владата и рекла на кинеската амбасада да ги затвори станиците, откако групата за човечки права „Safeguard Defenders“ го објави извештајот за нивното постоење во Обединетото Кралство.

Според извештајот, станиците се отворени за давање на административни услуги, но истовремено се користени и за „надгледување и вознемирување на заедницата во дијаспората, а во некои случаи и за принудување на луѓето да се вратат во Кина надвор од легитимните канали“, рече Тугендхат.

Портпаролот на кинеското Министерство за надворешни работи, Ван Ванбин, во средата на редовниот брифинг за медиумите им рече на новинарите дека не постојат таканаречени станици на тајната полиција“.

„Кина апелира до Обединетото Кралство да ги почитува фактите, да престане да претерува, да ја клевети Кина и да престане да создава пречки во односите меѓу Кина и Велика Британија. Кина отсекогаш строго се придржувала до меѓународното право и го почитувала судскиот суверенитет на сите земји“, рече Ванг.

„Министерството за надворешни работи на Велика Британија „ја информираше кинеската амбасада дека сите активности кои се однесуваат на такви „полициски станици“ во Велика Британија се неприфатливи и не смеат да работат во каква било форма“, изјави Тугендхат.

Амбасадата на Пекинг во Обединетото Кралство го демантираше извештајот, предупредувајќи на „лажни обвинувања“ од медиумите, пишува агенцијата Франс прес.

Мајк Пенс ја објави кандидатурата за претседател

Поранешниот американски потпретседател Мајк Пенс

Поранешниот американски потпретседател Мајк Пенс, кој лојално му служеше на Доналд Трамп, но се сврте против него по нападот на Капитол во 2021 година, денеска официјално ја објави својата кандидатура за претседателска номинација на Републиканската партија за изборите во 2024 година.

„Секогаш ќе бидам горд на напредокот што го постигнавме заедно за посилна и попросперитетна Америка“, нагласи Пенс во видео пораката, критикувајќи го актуелниот демократски претседател Џо Бајден, но не го именуваше директно Трамп.

Многу ретко се случува поранешен потпретседател да се кандидира против претседателот за кој работел. Ова се случило само неколкупати во американската историја.

На Пенс му претстои тешка задача бидејќи има поддршка од само 5 отсто од републиканските гласачи, зад Трамп за 44 процентни поени, според анкетата на Ипсос за Ројтерс во мај.

Пенс, кој наполни 64 години, ќе се соочи со Трамп и најмалку десет други кандидати за претседателска номинација на Републиканската партија, што во суштина е битка меѓу двајцата фаворити, Трамп и гувернерот на Флорида, Рон Де Сантис.

Пенс им се приклучува на се поголемиот број републикански кандидати, меѓу кои се Трамп, гувернерот на Флорида, Рон Десантис, поранешниот гувернер на Њу Џерси, Крис Кристи, сенаторот Тим Скот и поранешната гувернерка на Јужна Каролина, Ники Хејли.

Судските и политички актери не се свесни колку ЕУ ја следи работата во владеење на правото

Шведската амбасадорка во Република Северна Македонија, Ами Ларсон Џаин

Се сомневам дека судските и политички актери се свесни колку одблизу ЕУ ја следи работата во областа на владеење на правото, порача шведската амбасадорка Ами Ларсон Џаин, нагласувајќи дека е неопходна искрена посветеност од сите засегнати страни во борбата против корупцијата и дека не постои скратен пат кон ЕУ.

„Шведска останува посветен партнер на Северна Македонија, на нејзиниот пат кон ЕУ“, изјави амбасадорката, на отворањето на дискусијата „Мониторинг на владеењето на правото за земјите-членки на ЕУ и кандидатите: Премостување на јазот“ што се одржа денеска во Скопје во организација на Институтот за европска политика (ЕПИ).

Борбата против корупцијата и останатите димензии од владеењето на правото, нагласи Џаин, се фундаментални вредности на членството во ЕУ, со кои почнува и завршува процесот на пристапување.

„Потребна е поструктурирана и системска борба против корупцијата во земјата. Законот за спречување на корупцијата и судирот на интереси се уште останува да биде целосно применет, како и Националната стратегија и акционен план. Друг клучен елемент за владеење на правото во Северна Македонија е да се обезбедат независноста, компетентноста и соодветни ресурси за судството“, изјави Џаин.

Зголемувањето на транспарентноста, според шведската амбасадорка, исто така, е особено важно, со акцент, како што кажа, на трошењето на јавните средства.

Според Џаин, геополитичката реалност даде импулс на процесот на проширување на исток, но и исто така и на Балканот и дека ЕУ моментумот е мошне значајна околност.

„Постои моментум за членството на вашата земја во ЕУ, со геополитичката реалност со руската агресија во Украина. Северна Македонија е целосно усогласена со заедничката надворешна и безбедносна политика на ЕУ. Заедно стоиме на правилната страна на историјата,“ изјави Џаин.

Мицкоски и Ковачевски разговарале за можноста од заедничка влада, но нема договор

Лидерт на ВМРО-ДПМНЕ, Христијан Мицкоски и премиерот Димитар Ковачевски на лидерска средба. Скопје, 07.06.2023

Лидерот на ВМРО-ДПМНЕ Христијан Мицкоски, по средбата со премиерот Димитар Ковачевски, изјави дека разговарале за варијанти во врска со уставните измени и за начините како тие да бидат изгласани во Парламентот, меѓу кои и за формирање заедничка влада.

„Понудата на Ковачевски е во парламентот да почне дискусија и да се изгласа со две третини потребата за промена на Уставот, а потоа да се формира широка влада, во која 5 ресори ќе бидат на ВМРО-ДПМНЕ, да поминат уставните измени, да почне процесот на преговори за членсво во ЕУ, да се затворат некои поглавја, а таа влада потоа да оди на избори.

Јас, пак предложив заедничка влада, без ДУИ, да го почнеме процесот, уставните измени да бидат изгласани, а да важат дури тогаш кога ќе почне ратификацијата на нашето членство во ЕУ во парламентите на земјите членки.

Очигледно е дека немаат 80 пратеници за да поминат уставните измени, тогаш логично е да одиме на избори, оти нема ниту една причина зошто оваа Влада да остане на власт“, изјави Мицкоски по средбата.

Каков исход ќе има лидерската меѓу Ковачевски и Мицкоски, што мислат новинарите?
please wait

No media source currently available

0:00 0:02:46 0:00

Меџити го повика Јовев да биде национален координатор за кардиохирургија, тој одби

Министерот за здравство Фатмир Меџити

Министерот за здравство Фатмир Меџити денеска упати повик до разрешениот директор на Универзитетската клиника за државна кардиохирургија, проф. д-р Сашко Јовев да биде негов национален советник за кардиохирургија.

„Буџетот што го наследив, беше многу дефицитарен. Имаме барање од Кардиохирургија, претходно во разговор со професорот и други колеги и со ребалансот на буџетот сум подготвен да побарам да се зголеми тој буџет, со цел Клиниката за кардиохирургија и програмата за трансплантација да функционираат подобро и да ги зголемиме позитивните резултати и да им излеземе во пресрет на пациентите“, рече министерот на денешниот брифинг со новинарите.

Тој нагласи дека Јовев ќе продолжи да биде вработен во Клиниката и ќе ја има неговата поддршка во понатамошното работење.

Професор д-р Сашко Јовев му одговори дека тоа е голема чест, но неговото место е на Клиниката за кардиохирургија, заедно со неговиот тим.

„Сметам дека моето место е на Клиниката за кардиохирургија, да го водам својот тим и заеднички да постигнуваме уште многу успеси“, изјави Јовев.

Јовев рече дека ќе продолжи со борбата, затоа што е сигурен дека министерот ќе ја поправи оваа грешка.

Меџити во понеделникот го разреши Јовев од должноста директорот на Универзитетската клиника за државна кардиохирургија, поради како што изјави вчера „утврдени нерегуларности во работењето“, нагласувајќи дека нема политика во неговото разрешување.

На брифингот со министерот стручни лица разјаснуваа дилеми околу разрешувањето на Јовев, што предизвика реакции во јавноста.

„Сегде ќе има инспекции, каде ќе има нерегуларности и индиции за злоупотреба, ние таму и ќе постапиме“, додаде Меџити.

Јовев не е единствениот разрешен директор, откога Меџити е на функција министер. Непосрдно по преземањето на функцијата Меџити ги смени директорите на клиниките за неврологија, онкологија, дерматологија, гинекологија и офтамологија

„Имаше промени во многу други здравствени установи, на медицински директори, организациски, некои си поднесоа самите оставка, а други беа разрешени, додаде Меџити, истакнувајќи дека и во иднина секаде ќе има инспекции и ќе се постапува според закон“, изјави Меџити.

Јовев од своја страна вчера побара преиспитување на одлуката за негово разрешување, истакнувајќи дека државната Клиника за кардиохирургија не се утврдени нерегуларности.

ИК на ВМРО-ДПМНЕ ја потврди позицијата против уставни измени под диктат

Тимчо Муцунски, потпретседател на ВМРО-ДПМНЕ

Уставни измени под диктат и под околности кои се поразителни за Македонија не смее да има, потврдија на денешната седница на Извршниот комитет (ИК) на ВМРО-ДПМНЕ. Седницата на ова тело се случи непосредно пред почетокот на лидерската средба помеѓу премиерот Димитар Ковачевски и лидерот на ВМРО-ДПМНЕ Христијан Мицкоски на која како што е најавено ќе се разговара за внесувањето на Бугарите во Уставот и европската иднина на земјата.

Потпретседателот на партијата, Тимчо Муцунски, рече дека е погрешна тезата дека на оваа лидерска средба се одлучува за интеграција или изолација на земјава. Она што се одлучува, според ВМРО-ДПМНЕ е дали ќе има уставни под диктат или ќе има одбрана на националното достоинство и државните интереси.

„Поаѓајќи од националните и државните интереси и запазувајќи го мислењето на огромното мнозинство на граѓани во државата, уставни измени под диктат и под околности кои се поразителни за Македонија не смее да има. Носењето на уставни измени во состојба кога е нападнат националниот и државен идентитет на македонскиот народ, кога се оспорува јазикот, историјата и културата не е никаков чекор напред, туку отворање на вратата за нови поразителни условувања и себеодрекување“,изјави Муцунски по седницата на ИК.


Тој додава дека Македонија токму поради лесните отстапки и штетните политики на власта, веќе е во изолација.

„На оваа лидерска средба се одлучува или за уставни измени и национални порази или за одбрана на националното достоинство и националните интереси“, додаде Муцунски.

Муцунски порача она што го бара ВМРО-ДПМНЕ е фер шанса каква што ја имаат и другите народи во Европа кога ѝ пристапувале на ЕУ. Тој е дециден дека по неуспехот на уставните измени, следниот чекор треба да бидат предвремени парламентарни избори.

Најмалку двајца убиени во престрелка во Вирџинија

Местото на нападот во Вирџинија, 6 јуни 2023

Најмалку две лица загинале, а неколку други се повредени во пукање за време на матурска забава во театарот „Алтриа“ во Ричмонд, главниот град на американската сојузна држава Вирџинија, пренесоа американските медиуми.

Полицијата потврди дека во престрелката загинале мажи на возраст од 18 и 36 години.

„Престрелката избувнала по 17 часот по локално време во кампусот на Универзитетот „Вирџинија Комонвелт“, каде се одржуваат локалните матурски церемонии, изјави привремениот шеф на полицијата во Ричмонд, Рик Едвардс и други официјални лица.

Според извештаите, еден маж е во критична состојба, додека други четворица се полесно повредени. Дополнително, во болница биле пренесени уште неколку лица, меѓу кои и деветгодишно девојче кое било удрено од автомобил за време на пукањето. Таа веќе е пуштена од болница.

Две лица се повредени како резултат на падот, додека тројца отишле во болница поради напади на вознемиреност, пренесе ABC.

Полицијата соопшти дека по пукањето приведени се две лица, но Мсеедниот осомничен бил пуштен на слобода бидејќи полицијата смета дека тој не бил вмешан во нападот.

Ковачевски и Мицкоски на средба за уставните измени

Лидерот на ВМРО-ДПМНЕ Христијан Мицкоски и премиерот Димитар Ковачевски

Вклучување на Бугарите во Преамбулата и иднината на земјата во контекст на евроинтеграциите ќе бидат главните теми за кои денеска ќе разговараат премиерот Димитар Ковачевски и лидерот на ВМРО-ДПМНЕ Христијан Мицкоски во Клубот на пратениците.

Ковачевски повикува опозициската партија да поддржи уставни измени, додека ВМРО-ДПМНЕ во деновите пред официјалните разговори го повтори ставот дека уставни измени под бугарски диктат нема да има.

Според владиното соопштение од понеделникот на средбата Ковачевски-Мицкоски ќе се разговара пред сѐ за одлуките кои треба да се донесат во Собранието со цел продолжување на европската интеграција на земјата, како и за пристапот на државата, институциите и сите политички чинители во насока на градење и одржување на добрососедски односи со сите наши соседи.

Од ВМРО-ДПМНЕ, пак, исто така соопштија дека ставот на партијата е оти уставни измени нема да има и ова Собрание нема легитимитет за таков чекор.

Мицкоски синоќа од трибина во Прилеп упати апел за национално единство и обединување, и рече дека, „не постои она што го велат од владата или уставни измени или изолација, туку единствено мора да има зачувување на идентитетот и фер шанса за влез во Европската Унија“.

Работната група на седница одржана пред десетина дена ја усвои Предлог-иницијативата за потребата од измени на Уставот со насоки за изменување и дополнување.

Уставните измени се потребни за да се продолжи европската интеграција на Северна Македонија. Но, за да се смени Уставот потребно е двотретинско мнозинство во 120-члениот Парламент, а засега мнозинството ги нема потребните гласови.

Вчитај повеќе

XS
SM
MD
LG