Вести
Киев: Путин може да одговара за воените злосторства во Украина
Украинската државна обвинителка Ирина Венедиктова изјави дека рускиот претседател Владимир Путин може да биде одговорен за обвиненијата за воени злосторства во Украина, откако ги призна достигнувањата на руската 64-та моторизирана бригада, вмешана во злосторствата во Буча и Ирпин. Во средината на април, Путин ѝ додели специјален елитен орден на бригадата за „масовно херојство и храброст“ откако нејзините војници беа издвоени од страна на интернет стручњаците и обвинителите како примарна сила во масакрот во Буча, каде што 403 тела беа пронајдени во масовни или импровизирани гробници.
Хјуман рајтс воч бара Русија да истражи убиство на цивили
Венедиктова рече и дека 600 руски политичари, воени лидери и медиумски фигури - пропагандни агенти - се осомничени дека му помагале на Путин во неговата „злосторничка агресија“ против Украина. Обвинителката рече дека нејзината канцеларија се повикува на Римскиот статут, основниот документ на Меѓународниот кривичен суд, за да се истражат и обвинат осомничените за воени злосторства. Руската влада негира дека цели на цивили.
види ги сите денешни вести
Санкциите против Русија би ја прекинале соработката со Србија, вели рускиот амбасадор во Белград
Важно е Србија и Русија да продолжат со „прагматична соработка во области од заеднички интерес, и покрај сложените околности“, изјави денеска, 5 март, српскиот претседател Александар Вучиќ по средбата со рускиот амбасадор во Србија, Александар Боцан-Харченко.
Пред средбата, рускиот амбасадор изјави дека Русија сака односите со Србија да продолжат да се развиваат и дека „најважно е што Србија не се приклучи на санкциите“.
Тој оцени дека соработката меѓу двете земји ќе заврши „сама по себе“ доколку Србија воведе санкции против Русија.
„Ако една земја се приклучи на санкциите, тогаш нема соработка - санкциите автоматски ја суспендираат. Тоа не зависи од желбите на Москва“, изјави Харченко за Радио Телевизија на Србија.
Од почетокот на руската инвазија на Украина, Србија, земја кандидат за членство во Европската Унија, ги одбива повиците од Брисел да се усогласи со надворешната политика на ЕУ и да воведе санкции против Русија.
Зборувајќи за економската соработка, Харчеко изјави дека трговијата меѓу двете земји е во опаѓање и нагласи дека ова е директна последица од западните санкции против Москва.
„Србија е опкружена со земји кои го поддржуваат режимот на санкции и затоа се соочуваме со тешкотии, првенствено во транспортот, логистиката и финансиите“, рече Бочан-Харченко.
Во последните четири години, како одговор на руската агресија врз Украина, Европската Унија започна со воведување санкции против Русија. Досега се воведени 19 пакети санкции.
„Неверојатно ниска цена“ на гасот како придонес кон пријателството
Бочан-Харченко, исто така, рече дека Србија има стабилно снабдување со гас иако „глобалниот пазар во моментов е многу нестабилен“.
„Денес има стабилен проток на гас по цена што е неверојатно ниска за Европа. Тоа е најдобриот придонес на нашата пријателска соработка“, рече Бочан-Харченко.
Иако во последните години се обидува да ја намали својата зависност, Србија главно се снабдува со гас од Русија.
Во текот на 2025 година, не успеа да обезбеди нов долгорочен договор за снабдување со гас со рускиот „Газпром“, додека краткорочниот договор постигнат во декември истекува на 31 март.
Официјалните власти во Србија постојано повторуваат дека договорот за снабдување со руски гас ќе биде продолжен, но потврда од Москва сè уште не е пристигната.
Дронови го погодија регионот Нахчиван во Азербејџан, во близина на границата со Иран, двајца повредени
Дронови лансирани од соседен Иран го погодија автономниот регион Нахчиван во Азербејџан, при што беа повредени две лица, според Министерството за надворешни работи на Азербејџан.
Еден дрон го погоди аеродромот Нахчиван на 5 март, оштетувајќи го објектот. Втор дрон слета во близина на училишна зграда во областа Шекерабад, соопшти министерството.
Азербејџанското Министерство за надворешни работи го осуди нападот, велејќи дека тоа само ќе ги зголеми тензиите во регионот поврзани со тековниот конфликт во кој се вклучени Иран, Израел и САД.
Амбасадорот на Иран во Азербејџан е повикан во министерството во Баку за да го објасни инцидентот.
„Азербејџан го задржува правото да одговори“, соопшти министерството.
Азербејџан е еден од главните снабдувачи со нафта на Израел, додека Израел е клучен партнер за одбрана на Баку со години.
Многумина во Азербејџан го гледаат Израел како сигурен сојузник кој снабдувал критична воена опрема за време на кампањата на земјата за враќање на контролата врз регионот Нагорно-Карабах од Ерменија.
И покрај трговските и одбранбените врски со Израел, азербејџанските власти постојано велат дека земјата нема да дозволи нејзината територија или воздушен простор да бидат користени од која било земја за започнување воени операции против соседен Иран или која било друга држава.
„Овој напад со беспилотни летала врз аеродромот во Нахчиван е или несреќа или знак дека има поголема ескалација во регионот“, изјави за РСЕ Рауф Миргадиров, независен аналитичар со седиште во Европа.
„Во моментов, Иран нема причина да го нападне Азербејџан, бидејќи ниту Азербејџан ниту Турција не се дел од војната“, додаде тој.
„Во Иран живеат милиони Азербејџанци, а Техеран не би сакал да ги провоцира.“
САД и Канада пресретнаа руски авиони кај Алјаска
Американските и канадските воени авиони полетаа со цел да пресретнат руски извидувачки авиони во близина на Алјаска и Канада, соопшти Северноамериканската команда за воздушна одбрана (НОРАД).
Два руски воени авиони ТУ-142 биле откриени и придружувани додека не ја напуштиле зоната за идентификација на воздушната одбрана (АДИЗ).
НОРАД соопшти дека авионите не влегле во суверениот воздушен простор на САД или Канада.
Во операцијата учествувале повеќе авиони, вклучувајќи два американски ловци Ф-22 и Ф-35, четири танкери за полнење гориво КЦ-135, еден авион за надзор Е-3 АВАКС и два канадски ловци ЦФ-18 плус еден танкер CC-150.
НОРАД соопшти дека ваквите инциденти со руски авиони се случуваат редовно и не се сметаат за директна закана.
Воените експерти рекоа дека овие упади често се користат за тестирање на воздушната одбрана на една земја.
Сличен инцидент се случи во февруари, кога беа пресретнати два руски бомбардери со долг дострел ТУ-95, два ловци СУ-35 и еден извидувачки авион.
АДИЗ се наоѓа надвор од суверениот воздушен простор и функционира како тампон. Сите авиони мора да се идентификуваат и да ги пријават своите координати, соопшти НОРАД, за да се помогне во обезбедувањето на националната безбедност.
Иран најавува брзо именување на нов врховен лидер
Иран соопшти дека се обидува брзо да назначи нов врховен водач откако ајатолахот Али Хамнеи беше убиен во американско-израелските напади за време на викендот.
„Сите се обидуваме“, рече Ахмад Хатами, член на Собранието на експерти за лидерство, кое е одговорно за избор на нов водач.
„Со Божја волја, водачот ќе биде назначен што е можно поскоро. Блиску сме, но ситуацијата е воена“, изјави тој за државната телевизија.
Претходно израелскиот министер за одбрана Израел Кац изјави дека секој ирански водач избран да го наследи Хамнеи „ќе биде сигурна цел за атентат“.
Хатами рече дека „дискрецијата е неопходна“ со оглед на оваа закана, додавајќи дека изборот на нов врховен водач е „неизбежен“.
Собранието на експерти има 88 членови кои се избираат на секои осум години.
Според иранските медиуми, американските и израелските напади во вторникот, 3 март, погодија зграда во светиот град Ком, која му припаѓа на Собранието.
Претходниот ден, главното седиште на телото во Техеран беше цел на напади, според новинската агенција Тасним.
Иран официјално започна со транзицијата на раководството во недела, еден ден по смртта на Хамнеи, кој го водеше Иран од 1989 година.
Иранскиот претседател Масуд Пезешкијан, тврдокорниот шеф на судството Голамхосеин Мохсени Еџеи и Алиреза Арафи - свештеник и член на Собранието на експерти - се привремени лидери.
Русија ја обвини Украина за експлозии на цистерни за гас во Либија
Русија ја обвини Украина дека користела поморски дронови за напад врз носач на течен природен гас покрај либискиот брег, што довело до негово потонување.
Либиските пристанишни власти соопштија дека носачот потонал по „ненадејни експлозии“ северно од пристаништето Сирт.
„Танкерот „Арктик Метагаз“ доживеал ненадејни експлозии проследени со масивен пожар, што на крајот довело до негово целосно потонување“ во вторник вечерта, соопштија властите.
„Уништувањето на бродот се случил во поморската област помеѓу Либија и Малта, во рамките на либиската зона за пребарување и спасување приближно 130 наутички милји (240 километри) северно од пристаништето Сирт“, додадоа властите.
Москва го обвини Киев за инцидентот, велејќи дека танкерот бил нападнат од дронови лансирани од Либија.
„Нападот врз него бил започнат од либискиот брег од страна на украински поморски дронови“, соопшти руското Министерство за транспорт.
Руското министерство соопшти дека носачот бил натоварен и на пат од северното руско пристаниште Мурманск.
Сите 30 членови на екипажот се спасени, соопштија малтешките и руските власти.
ДЗР: Плати без работа и спорни финансирања во Министерството за односи меѓу заедниците
Државниот завод за ревизија при ревизија во Министерството за односи меѓу заедниците за 2024 година констатирал кусоци на материјални средства, вклучувајќи 30 преносни компјутери, исплата на 61 процент на име плата на вработените без да се обезбедат податоци за нивното присуство на работа и точење нафтени деривати во возила за кои не може да се потврди дека се во сопственост на Министерството.
Како што соопшти ДЗР, евидентирани се неправилности во однос на објективноста на финансиските извештаи и усогласеноста со законската регулатива, упатства и воспоставените политики. Со извршената ревизија, утврдиле состојби кои укажуваат на слабости при начинот на евидентирање и користењето на средствата со кои располага Министерството за односи меѓу заедниците.
„Ревизорите утврдија нецелосно спроведен попис на средствата и обврските со состојба на 31.12.2024 година, при што 28 проценти од вкупните основни средства со сегашна вредност од 1.565 илјади денари, односно 25.360 евра, не се пронајдени при вршењето на годишниот попис на основни средства, а како резултат на невоспоставена пракса на издавање реверси за задолжување на вработените со опремата која им е доделена на користење, исто така 30 преносни компјутери не се пронајдени со пописот“, се вели во извештајот од Заводот за ревизија.
Со извршена ревизија на документацијата за реализација на Програмата за финансирање на активностите на здруженијата и фондациите за 2023 година, утврдена е состојба според која на 33 здруженија и фондации им се исплатени средства во износ од 19.800.000 денари, односно 320.900 евра.
Ревизорите наведуваат дека Програмата е донесена со задоцнување во октомври 2023 година, кога е објавен и јавниот повик за финансиска поддршка на здруженијата и фондациите, а не во рок од 30 дена по донесување на Буџетот како што е уредено со Кодексот на добри практики за финансиска поддршка на здруженијата на граѓани и фондации.
Радио Слободна Европа веќе пишуваше дека дел од луѓето кои добиле државни пари за невладини организации преку ова Министерство кога со него раковдеше Артан Груби, биле луѓе блиски до него и партијата ДУИ.
Некои од невладините кои ги добиле грантовите се вработени во администрација на централно или локално ниво, а некои се дел од институции каде што се политички назначени од владејачката партија ДУИ. При проверката на основачите на невладините организации РСЕ наиде на имиња на луѓе од Скопје, Тетово и Струга, кои во одредени временски периоди се поврзуваат со владејачката ДУИ.
Во одделението за соработка со здруженија и фондации во 2024 година во периодот на реализација на програмата, од девет предвидени работни места, не било пополнето ниту едно. Исто така, Комисијата за распределба на финансиски средства за финансирање на програмски активности на здруженија и фондации од буџетот на Министерството составена од 18 членови од повеќе државни институции, не обезбедила документација за извршеното бодирање на апликациите од страна на секој член на комисијата за 138 поднесени апликации опфатени со Предлог ранг листата.
Исто така здруженијата и фондациите кои се стекнале со правото на користење средства од Министерството, дел од документацијата ја доставиле на албански јазик, без превод на македонски јазик, што не е во согласност со одредбите на Законот за употреба на македонскиот јазик.
Во однос на реализација на договорите за јавни набавки ревизорите констатирале дека во известувачкиот период на име трошоци за нафтени деривати исплатени се средства во износ од 516 илјади денари, како што соопштуваат, без да се врши контрола на регистарските таблици и видот на набавеното гориво. Тоа значи дека било овозможено моторни возила кои не се во сопственост на Министерството или возила за кои нема податок за регистарски броеви да полнат гориво, односно да набавуваат течен нафтен гас кој не е предвиден како вид на гориво во склучениот договор за набавка.
„При спроведување на две постапки ревизорите утврдиле дека за понудената цена, за сервисирање на возила од 0,01 денар за 1 работен час и за провизија од 0,01 проценти од износот на угостителската услуга, комисиите не побарале објаснување за понудената невообичаено ниска цена. Притоа, во дел од фактурите за сервисирање на возилата за 2024 година вршена е замена на делови кои не се предвидени со листата во тендерската документација, за дел од ставките фактурирани се цени кои се неколку пати повисоки од прифатената понуда, а за извршените услуги не се доставени работни налози како прилог на фактурите“, се наведува во извештајот на ревизорите.
Актите за внатрешна организација и систематизација на Министерството, во период од нивно донесување во 2019 година па се до 2025 година изменети се шест пати, со добиени согласности. Заклучно со 31.12.2024 година од предвидените 2 556 работни места пополнети се 244 работни места односно пополнетост од 10 проценти поради неизвршени усогласувања со одредбите од законот што влијае на реалното согледување на потребните капацитети на Министерството.
Руската вселенска агенција соопшти дека е поправена рампата за лансирање на космодромот Бајконур
Инженерите поправија лошо оштетена рампа за лансирање на космодромот Бајконур, соопшти руската вселенска агенција, со што се спречи потенцијално долгорочен проблем за снабдување на Меѓународната вселенска станица.
Во соопштението од 3 март, Роскосмос изјави дека работниците ги замениле оштетените жици и друга опрема на рампата - позната како Бајконур 31/6 - пред предвиденото.
Агенцијата соопшти дека товарната капсула „Прогрес“ требало да полета на 22 март.
Објектот доживеал сè уште необјаснета несреќа минатиот ноември за време на лансирањето на капсулата „Сојуз“ што превезувала двајца Руси и еден Американец до орбиталната станица. Официјалните лица изјавија дека компонента наречена кабина за одржување или сервис не се поместила под бранот на издувните гасови од ракетата што се качувала.
Лансирната рампа е единствената локација каде што Русија може да ги лансира своите капсули „Сојуз“ со екипаж, кои се главно транспортно и товарно возило за станицата, позната како МВС.
Руските товарни капсули „Прогрес“ се користат и за ориентирање на вселенската станица и прилагодување на нејзината орбита.
Во последниве години, приватните западни вселенски компании како SpaceX стапија во целосна употреба, потпишувајќи договори со американската вселенска агенција НАСА за превоз на луѓе и товар напред-назад до станицата. Тоа го намали товарот врз капсулите „Сојуз“ и објектот Бајконур.
Руската вселенска програма претрпе низа срамни инциденти во изминатите години, вклучувајќи ја сè уште необјаснета дупка направена од човек пронајдена на руски изграден модул на станицата, итно слетување на членови на екипажот што се враќаат на Земјата и скандал поврзан со деградирање на почитуван космонаут.
Тројцата обвинети полицајци се изјаснија дека не се виновни за случајот „Пулс“
Тројцата обвинети полициски службеници од Кочани денеска, 3 март пред Судот изјавија дека не се чувствуваат виновни по обвинението што произлегува од постапувањето по контроли поврзани со дискотеката „Пулс“ во Кочани, каде на 16 март минатата година во пожар загинаа 63 лица, а над 200 беа повредени.
Како што јави МИА, со читање на обвинителниот акт во Основниот кривичен суд – Скопје денеска започна судскиот процес против тројцата полициски службеници од Полициската станица во Кочани, обвинети за злоупотреба на службената положба и овластување, во предмет поврзан со извршени контроли во угостителскиот објект „Пулс“.
Според обвинението, во периодот од 7 октомври 2023 до 7 февруари 2024 година, обвинетите Кире Богатинов и Горан Лазаров, како службени лица, не ги извршиле своите службени должности, односно не постапиле во целост по анекс-плановите за акциска контрола од 5 октомври и 24 ноември 2023 година при изготвување записници за извршена контрола.
Во записниците, како што наведе Обвинителството, биле констатирани прекршоци за нарушување на јавниот ред и мир, но биле внесени неточни податоци за правното лице кабаре „Пулс“ во Кочани.
Третообвинетиот Александар Темелков, според обвинителниот акт, при одобрување на барања за поведување прекршочна постапка од 1 и 7 февруари 2024 година, не ја проверил целокупната документација приложена кон барањата, иако бил должен тоа да го стори, туку ги потпишал и ги поднел до судот во Кочани.
Барањата биле изготвени против неактивното правно лице „Класик“ Кочани и физичко лице посочено како одговорно во „Пулс“, иако, според обвинението, тие не биле активни субјекти во моментот на постапувањето.
Со ваквите дејствија, тројцата обвинети, според Обвинителството, прибавиле имотна корист за „ММММ Кафе“ ДООЕЛ Кочани, подружница „Кабаре Пулс“, како и за одговорното лице.
Обвинителката во воведното излагање посочи дека анекс-плановите за акциска контрола, предложени како доказ во постапката, прецизно ги утврдувале обврските на полициските службеници, вклучително и прибирање на материјална документација и проверка на податоците за правното и одговорното лице во објектот каде што е констатиран прекршок.
„Во конкретниот случај таква материјална документација не е побарана. Запишано е правно лице кое во моментот било неактивно и одговорно лице кое не било активно, на т.н. подружница на правното лице што стои во позадина“ рече обвинителката.
Во однос на третообвинетиот, таа појасни дека иако имал можност да ја провери состојбата преку приложената документација, вклучително и тековна состојба од Централниот регистар, сепак ги потпишал барањата и ги доставил до судот, каде постапките сè уште се во тек и не е донесена одлука.
Според Обвинителството, доколку била донесена одлука врз основа на таквите барања, казната би се однесувала на неактивно правно лице и лице кое фактички не било одговорно, со што активното правно лице и вистинското одговорно лице би избегнале санкција.
Судењето продолжува на 18 март со испитување сведоци предложени од Обвинителството.
На 16 март 2025 година, за време на настап на групата „ДНК“ во дискотеката „Пулс“ во Кочани, избувна пожар во кој загинаа 63 лица, а над 200 беа повредени. Во објектот имало над дозволениот број посетители, меѓу кои и малолетници, а пиротехнички средства биле активирани без дозвола. Објектот работел незаконски повеќе од една деценија, без минимално-технички услови, со реконструкции без дозволи и без систем за противпожарна заштита.
Над 470 македонски државјани контактирале со дипломатско-конзуларните претставништва во Тел Авив, Доха и Абу Даби
Министерството за надворешни работи и надворешна трговија информира дека согласно последните податоци, од почетокот на конфликтот до денес вкупно 473 македонски државјани контактирале со дипломатско-конзуларните претставништва на Република Северна Македонија во Тел Авив, Доха и Абу Даби.
„Од нив, 19 лица се пријавени од Израел, 106 од Катар, додека 348 граѓани се обратиле до ДКП Абу Даби. Во оваа бројка се вклучени и 18 лица од Кувајт, како и 12 лица од Бахреин“, соопшти МНР.
Согласно информациите добиени од надлежните власти, сè уште не се препорачува евакуација по копнен пат за граѓаните кои се наоѓаат во Катар и Обединетите Арапски Емирати.
Евакуацијата ќе биде почната во првата безбедна прилика, при што веќе се разгледуваат можностите за нивно безбедно извлекување веднаш штом се создадат соодветни услови.
Во однос на македонските државјани кои се наоѓаат во Тел Авив, од МНР велат дека активно ги разгледуваат можните алтернативи за нивно безбедно извлекување од државата.
„Уште еднаш апелираме до македонските државјани редовно да ги следат предупредувањата и насоките на локалните надлежни органи. На 24-часовно располагање остануваат дежурните телефонски броеви на кризниот штаб при Министерството за надворешни работи и надворешна трговија, како и контактите на дипломатско-конзуларните претставништва“, наведуваат од Министерството.
Од Министерството дополнуваат дека за сите дополнителни информации јавноста ќе биде навремено информирана.
САД објави дека „уништиле“ командни и контролни објекти на Иранската револуционерна гарда
Централната команда на САД (CENTCOM) објави дека американските сили уништиле командни и контролни објекти на Иранската револуционерна гарда (IRGC), ирански противвоздушни капацитети, места за лансирање ракети и беспилотни летала и воени аеродроми за време на континуираните операции.
„Ќе продолжиме да преземаме решителни мерки против непосредните закани што ги претставува иранскиот режим“, соопшти Централната команда на САД.
Порано денеска, Министерството за одбрана на Саудиска Арабија на платформата X објави дека две беспилотни летала ја погодиле амбасадата на САД во Ријад, предизвикувајќи мал пожар и ограничена материјална штета, според првичната проценка.
„Ќе дознаете многу наскоро“, изјави американскиот претседателот Доналд Трамп прашан за одговорот на нападот врз амбасадата на САД во Ријад и смртта на американските војници во конфликтот со Иран.
Во меѓувреме, амбасадата на САД во Кувајт објави дека ќе биде затворена до понатамошно известување „поради моменталните регионални тензии“.
Венс: Нуклеарните разговори со Иран не го поминаа тестот
Американскиот потпретседател Џ.Д. Венс изјави дека разговорите со Иран за неговата нуклеарна програма пропаднале откако официјалните лица заклучиле дека гаранциите на Техеран „не го поминале тестот за кредибилитет“, што го натерало претседателот Доналд Трамп да ја одобри операцијата „Епски бес“, која сега влегува во својот трет ден.
Во изјава за „Фокс њуз“ доцна на 2 март, Венс рече дека американските претставници, вклучувајќи ги Стив Виткоф, Марко Рубио и Џаред Кушнер, воделе „внимателни“ разговори во Женева со цел ограничување на нуклеарните активности на Иран во замена за олеснување на санкциите.
Разговорите пропаднаа околу збогатувањето на ураниумот, при што Венс праша зошто Иран гради „објекти 70 стапки под земја“ и збогатува ураниум над цивилните нивоа.
„Никој нема ништо против тоа што Иранците произведуваат медицински изотопи, проблемот се овие објекти за збогатување кои можат да се користат само за производство на нуклеарно оружје“, рече тој.
Венс додаде дека „нема шанси“ Трамп да ги вовлече САД „во повеќегодишен конфликт без јасен крај и без јасна цел“.
Тој исто така рече дека Вашингтон би претпочитал да има „пријателски режим во Иран, стабилна земја, земја која е подготвена да соработува со САД“.
Во меѓувреме, израелската армија соопшти дека „го нападнала и демонтирала“ седиштето на државната радио и телевизиска станица во Техеран, опишувајќи го како „комуникациски центар на терористички режим“.
„Со текот на годините, Иранската радиодифузна управа повикуваше на уништување на државата Израел и употреба на нуклеарно оружје“, се вели во соопштението објавено во понеделник од војската.
„Центарот неодамна го користеа силите на иранскиот режим за промовирање воени активности под маската на цивилни активности“, додаде израелската армија.
Кратко потоа, Израелските одбранбени сили (ИДФ) објавија дека е започнат нов бран ирански напади врз земјата.
Кина ги разгледува своите опции додека иранските напади го потресуваат Блискиот Исток
Кина ја засили дипломатската реторика по нападите на САД и Израел врз Иран и смртта на врховниот лидер ајатолахот Али Хамнеи, додека претпазливо се движи кон справување со нарушувањата на глобалните пазари на нафта и заканата од поширока нестабилност на Блискиот Исток.
Откако САД и Израел започнаа координирани воздушни напади врз Иран на 28 февруари, Пекинг го засили својот дипломатски одговор, а портпаролката на кинеското Министерство за надворешни работи, Мао Нинг, ги нарече заедничките напади кршење на меѓународното право и им рече на новинарите за време на брифингот за медиумите на 2 март дека Кина е длабоко загрижена за ефектите врз соседните земји.
Кинескиот министер за надворешни работи, Ванг Ји, исто така, ги повика земјите од Заливот да се обединат за да се спротивстават на странското мешање и „да ја држат својата иднина и судбина во свои раце“, според соопштението по телефонскиот разговор со министерот за надворешни работи на Оман.
Во разговор со иранскиот министер за надворешни работи, Абас Аракчи, Ванг рече дека верува оти Иран може да ја одржи националната и социјалната стабилност, како и да им даде важност на легитимните загрижености на своите соседи.
Мао еден ден претходно изјави дека воените напади „ги погазуваат принципите на Повелбата на ОН и основните норми на меѓународните односи“, додека Ванг се обиде да координира одговор со рускиот министер за надворешни работи Сергеј Лавров во врска со итниот одговор на Советот за безбедност на ОН.
„Кина е најголемиот светски увозник на енергија и најголемиот увозник на нафта. Ова не може а да не влијае на Пекинг“, изјави за РСЕ Џозеф Вебстер, виш соработник во Глобалниот енергетски центар на Атлантскиот совет.
Нападите врз Иран и невидениот одговор на Техеран со ракети и беспилотни летала низ регионот ги нагласуваат ризиците што може да ги претставува за Пекинг проширувањето на војната на Блискиот Исток.
Во текот на изминатата деценија, Пекинг постојано го прошируваше својот економски дострел и дипломатско присуство на Блискиот Исток, при што Иран стана клучен партнер како најсигурен антизападен бедем на Кина и извор на длабоко намалена нафта.
За возврат, Пекинг стана најголем трговски партнер на Техеран и сè поважен извор на технолошка и безбедносна соработка, од витално значење за способноста на Иран да се спротивстави на западниот притисок.