Достапни линкови

Вести

Столтенберг - НАТО ќе го брани „секој сантиметар“ од територијата на Алијансата

Генералниот секретар на НАТО Јенс Столтенберг дава изјави за рускиот напад врз Украина во седиштето на НАТО во Брисел. 24 февруари 2022 година.
Генералниот секретар на НАТО Јенс Столтенберг дава изјави за рускиот напад врз Украина во седиштето на НАТО во Брисел. 24 февруари 2022 година.

Генералниот секретар на НАТО Јенс Столтенберг изјави дека рускиот напад врз Украина го нарушил мирот во Европа и вети дека Алијансата ќе го брани „секој сантиметар“ од територијата на членките.

„Мораме да одговориме со обновена решителност и уште посилно единство“, рече Столтенберг на прес-конференција по одржувањето на итниот состанок на амбасадорите на НАТО во Брисел.

„Она што го правиме е одбранбено“, рече Столтенберг кој потврди дека 30 национални лидери на НАТО ќе одржат виртуелен состанок на 25 февруари.

Столтенберг ја повтори посветеноста на Алијансата кон Членот 5, кој предвидува дека нападот врз една членка претставува напад врз сите членки.

Тој рече дека алијансата исто така ги активира своите „одбранбени планови“ за сојузничките земји кои не се членки на НАТО, но се усогласени со Западот.

Шефот на НАТО рече дека западната воена алијанса веќе ги зајакнува своите одбранбени способности и дека има повеќе од 100 воени авиони во висока борбена готовност за да го заштити воздушниот простор на членките.

Столтенберг го критикуваше рускиот напад врз Украина, велејќи дека тоа е „намерна, ладнокрвна и долго планирана инвазија“.

Тој рече дека „Русија користи сила за да се обиде да ја преработи историјата“.

„Русија ја нападна Украина. Ова е брутален чин на војна. Нашите мисли се со храбриот народ на Украина“, рече тој.

„Мирот на нашиот континент е нарушен“, додаде тој.

Итната седница на 24 февруари дојде откако Естонија, Латвија, Литванија и Полска побараа ретки консултации според Членот 4 од Повелбата на НАТО.

Тој член може да биде инициран кога „се загрозени територијалниот интегритет, политичката независност или безбедноста на која било од страните на [НАТО]“.

„Одлучивме, во согласност со нашето одбранбено планирање да ги заштитиме сите сојузници, да преземеме дополнителни чекори за понатамошно зајакнување на одвраќањето и за одбраната низ Алијансата“, изјавија претставниците на четирите земји.

види ги сите денешни вести

Оштетени две згради, жителите евакуирани по експлозија во Санкт Петербург

Оштетена зграда во Санкт Петербург, Русија, 2 март 2024 година.
Оштетена зграда во Санкт Петербург, Русија, 2 март 2024 година.

Две згради se оштетени, а луѓето од нив евакуирани во рускиот град Санкт Петербург во утринските часови на 2 март, откако жителите пријавија силна експлозија која уништила прозорците, објави Ројтерс.

Гувернерот на Санкт Петербург, Александар Беглов, изјави дека „инцидентот“ се случил во североисточниот кварт Красногвардејски.

„Немаше жртви, но жителите се евакуирани од нивните станови“, рече Беглов, без да ја објасни причината за инцидентот или да прецизира што точно се случило.

На видеото на Ројтерс направено на местото на настанот се гледа оштетената фасада на зградата и балконите со скршени прозорци, како и скршено стакло и остатоци на земјата.

Граѓаните кои претрпеле штета за Ројтерс изјавиле дека слушнале чудни звуци проследени со експлозија и пожар.

„Прво слушнав свиреж, бидејќи само го отворив прозорецот, потоа истрел, а потоа видов пламен и чад, прозорецот излета“, изјави жителката Елена за Ројтерс.

Руските медиуми објавија дека инцидентот би можел да биде предизвикан од соборен украински дрон, кој бил насочен кон складиште за гориво во близина.

Руските власти досега не се огласи во врска со овие тврдења.

Вучиќ за нови избори во Белград, ја повика Владата да ги спроведе препораките на ОДИХР

Александар Вучиќ, претседател на Србија (Илустративна фотографија)
Александар Вучиќ, претседател на Србија (Илустративна фотографија)

Претседателот на Србија, Александар Вучиќ, на 2 март изјави дека побарал од изборната листа околу Српската напредна партија (СНС) да оди на нови избори во Белград.

„Знам дека го имате мнозинството, но подобро е да загубите отколку да се повтори ситуацијата од 2008 година, кога Демократската партија и социјалистите извршија изборна кражба“, рече Вучиќ на прес-конференција во Претседателството на Србија.

Тој ја повика Владата веднаш да започне со спроведување на препораките дадени од Канцеларијата на ОБСЕ за демократски институции и човекови права (ОДИХР) во извештајот за декемвриските избори во Србија.

ОДИХР на 28 февруари го објави конечниот извештај за изборите во Србија, кои се одржаа на 17 декември минатата година.

Во него се наведува дека на вонредните парламентарни избори во Србија „доминирало одлучното учество на претседателот, кое заедно со системските предности на владејачката партија создало нефер услови за учесниците“.

Меѓу другото, се наведува и дека „во кампањата генерално биле почитувани основните слободи, но таа била поткопана со остра реторика, пристрасност во медиумите, притисок врз вработените во јавниот сектор и злоупотреба на јавните ресурси“.

Покрај ОДИХР, на нерегуларности во изборниот процес укажаа и странски и домашни набљудувачи.

Во меѓувреме, Европскиот парламент усвои Резолуција со која бара меѓународна истрага за наводни нерегуларности за време на изборите, како и суспендирање на европските фондови, доколку се докаже дека властите биле директно вмешани во изборна измама.

Во Резолуцијата, ЕП повика на независна истрага со посебен осврт на изборите за градското собрание на Белград и наводите за организирана миграција на гласачите на локално ниво.

Во Србија на 17 декември се одржаа избори на парламентарно и покраинско ниво и во 65 градови и општини во Србија, вклучително и Белград.

Конститутивната седница на градското собрание на Белград, која требаше да се одржи на 1 март, по втор пат е одложена за 3 март, бидејќи немаше кворум за нејзино одржување. Советниците од владејачката Српска напредна партија (СНС) и Социјалистичката партија на Србија (СПС) не присуствуваа на седницата.

Ванковска и Јакимовски ги собраа потписите, официјализирани пет кандидатури за претседател

Избори, Северна Македонија (Илустративна фотографија)
Избори, Северна Македонија (Илустративна фотографија)

Податоците на Државната изборна комисија (ДИК) покажуваат дека заклучно со вчера, од вкупно 11 кандидати, уште шестмина од нив ги немаат потребните 10.000 потписи за претседателска кандидатура, а петорица веќе ја постигнаа потребната бројка.

Од синоќа, до потребните потписи стигна и Билјана Ванковска (Левица) која според пресекот на ДИК има 10.278 потписи, како и Стевчо Јакимовски (ГРОМ) кој има 10.269 потписи.

Претходно со собрани 10.000 потписи претседателски кандидати се Максим Димитриевски (ЗНАМ-За наша Македонија), со 11.562, Бујар Османи (ДУИ), со 11.079 и Арбен Таравари (коалиција „Вреди“) со 10.706.

Од другите кандидати, Вело Марковски има 1330 потписи, Мерсиха Смаиловиќ 1286, Ѓорѓи Манасков 388, Зорица Цветковска 176, Господин Поповски 106 и Томе Николовски со 0 потписи.

Од утре пак, потписи ќе собираат и кандидатите на ВМРО-ДПМНЕ Гордана Силјановска Давкова и на СДСМ Стево Пендаровски, и покрај поддршката што за нив се очекува партиите да ја официјализираат овој викенд.

Постапката за собирање потписи почна на 23 февруари, а ќе трае до 8 март до 24 часот. Собирањето потписи се одвива во сите подрачни одделенија и канцеларии на ДИК сместени во седиштата на 34 локални самоуправи и пред надлежните нотари.

Учесниците на изборите, листите со кандидати за претседател на државата треба да ги достават до ДИК најдоцна до 19 март, на полноќ. Претседателските избори се закажани за 24 април, а вториот круг е на 8 мај кога треба да се одржат и парламентарните избори.

Палестинските власти се надеваат на примирје во Газа до Рамазан

Палестинците во Газа носат вреќи со брашно добиени како дел од хуманитарната помош, 19 февруари 2024 година (Фото-архива).
Палестинците во Газа носат вреќи со брашно добиени како дел од хуманитарната помош, 19 февруари 2024 година (Фото-архива).

Палестинските власти се надеваат на договор за прекин на огнот во Газа до Рамазан, светиот месец за муслиманите, изјави на 2 март нивниот министер за надворешни работи Ријад ал Малики, пренесе Ројтерс.

Зборувајќи на прес-конференција на дипломатскиот форум во Анталија, Турција, Малики рече дека Палестинската управа ќе биде „единствената легитимна власт“ да управува со Газа по војната.

Палестинската управа, која има ограничена самоуправа во делови од Западниот Брег кој го окупираше Израел, ја загуби контролата врз Газа од Хамас, кој Соединетите Американски Држави (САД) и Европската унија (ЕУ) го означија како терористичка организација .

Израел и Хамас преговараат преку посредници за можен прекин на огнот во Газа, со цел да ги прекинат борбите навреме за Рамазан, муслиманскиот месец на постот, кој треба да започне на 10 март оваа година.

Војната во Газа трае од 7 октомври 2023 година, откако во нападот на Хамас врз Израел загинаа повеќе од 1.200 луѓе, а според израелските власти, уште 100 починале од повредите. Хамас зеде повеќе од 250 заложници во Газа.

Според Министерството за здравство во Газа под контрола на Хамас, повеќе од 30.320 луѓе загинале на територијата од почетокот на војната.

Групите за човекови права го обвинуваат Израел за употреба на непропорционална сила како одговор на нападот и во последователната војна против Хамас.

Според Канцеларијата на Обединетите нации (ОН) за координација на хуманитарни прашања, повеќе од 576.000 луѓе во Појасот Газа, што е една четвртина од населението на енклавата, се на работ на гладување.

ОН соопштија дека се соочуваат со „огромни пречки“ во обезбедување помош.

Џо Бајден, претседателот на САД, најголемиот сојузник на Израел, на 1 март објави дека земјата ќе испорача храна и други резерви во Газа со воени авиони.

Наместо во училници, државната матура ќе се полага во холови и спортски сали

Матурантите полагаат државна матура по мајчин јазик (Илустративна фотографија)
Матурантите полагаат државна матура по мајчин јазик (Илустративна фотографија)

Оваа учебна година државната матура наместо во училници ќе се полага во големи простории во училиштата – холовите, училишните спортски сали или во друга голема училишна просторија во која има услови за полагање.

Во голема просторија ќе има и повеќе тестатори така што оваа новина ќе овозможи подобра контрола на случувањата во текот на испитот и ќе оневозможи препишувања или масовно споделување на одговори, како што се случи минатата година во група на апликацијата Вибер на испитот по Англиски јазик, информираат од Државниот испитен центар (ДИЦ) кои го организираат оваа полагање за МИА.

Според нив, целта на новиот начин на реализирање на испитите е самостојно решавање на тестот и почитување на правилата за полагање кои постојат од воведувањето на државната матура во 2007 година (не е дозволено: користење какви било дополнителни средства - учебници, хартија, мобилни телефони и други електронски уреди, консултација со другите матуранти, препишување, недолично однесување кон други лица во просторијата, пишување недолични знаци на тестот или текст кој го открива идентитетот и слично).

„Очекуваме оваа промена да овозможи подобра работна атмосфера во текот на испитот и можност матурантите да го покажат своето објективно знаење, со што резултатите од матурата ќе бидат генерално поверодостојни“, изјави за МИА Билјана Михајловска, директорка на ДИЦ.

Работна група на ДИЦ, во која учествувале и претставници од Министерството за образование и наука, ги контактирала сите средни училишта и собрала податоци за нивните просторни услови и според нив најголемиот дел од училиштата имаат доволно големи простории за своите ученици.

„Само мал дел од училиштата немаат доволно простории и дел од матурантите од тие училишта ќе полагаат во најблиското училиште во кое има услови за полагање“, додава Михајловска.

За предлозите за воведување блокатори на сигнали на мобилни телефони, директорката на ДИЦ вели дека без оглед дали во испитната просторијата има или нема блокатор, матурантите воопшто не смеат да користат електронски уреди во текот на испитот, така што блокаторите би го спречиле користењето на мобилните телефони за препишување и споделување информации во ситуација кога тестаторот не го забележал или го игнорирал прекршувањето на правилата.

Двата екстерни испита од државната матура во јунската сесија оваа година ќе се полагаат на 1 јуни – задолжителниот испит (македонски јазик, албански јазик и турски јазик) и литература и на 8 јуни – изборниот испит (математика, англиски јазик, француски јазик, германски јазик, руски јазик, филозофија и естетика).

Двајца загинати и осум повредени лица во руски напад со дрон во Одеса

Спасувачите бараат преживеани во урнатините по напад на руски дрон врз станбена населба во Одеса, пристанишен град во јужна Украина, 2 март 2024 година.
Спасувачите бараат преживеани во урнатините по напад на руски дрон врз станбена населба во Одеса, пристанишен град во јужна Украина, 2 март 2024 година.

Две лица загинаа, осуммина се повредени, додека шест лица се водат за исчезнати откако руски дрон се урна на 2 март во станбен блок во пристанишниот град Одеса во јужна Украина, соопштија властите, пренесе Ројтерс.

„Русија продолжува да се бори против цивилите... Едно од непријателските беспилотни летала погоди станбена зграда во Одеса. Уништени се 18 станови“, изјави украинскиот претседател Володимир Зеленски во објава на мрежата Телеграм.

На видеото кое го објави Зеленски од висина се гледа дека на станбената зграда и недостасува дел, како и десетици спасувачи кои се борат да се пробијат низ урнатините.

Според Зеленски, станува збор за беспилотно летало Шахид од иранско производство. Русија лансираше неколку илјади вакви дронови при напади врз цели во Украина.

Регионалниот гувернер на Одеса, Олех Кипер изјави дека работите за расчистување на урнатините се во тек и дека еден човек е извлечен жив, кој најверојатно бил во подрумот во моментот на ударот.

Украинскиот јавен радиодифузен сервис „Суспилне“ го цитираше локалното обвинителство дека шест лица се уште се водат како исчезнати.

Сообраќајка кај село Колари, загина 46-годишен скопјанец

Полиција, лента, увид (Илустрација)
Полиција, лента, увид (Илустрација)

Во сообраќајна несреќа вчера околу 18 часот на магистрален пат Кичево – Гостивар кај селото Колари животот го загубил 46 годишник од Скопје, откако со возилото што го управувал излетал од патот, соопштија од Министерството за внатрешни работи (МВР)

Во сообраќајката со тешки повреди се здобила малолетна сопатничка во автомобилот.

„На 01.03.2024 во 18.20 часот во полициската станица Кичево, пријавено е дека на магистрален пат Кичево – Гостивар, кај селото Колари, патничко возило „форд“ со скопски регистарски ознаки, управувано од В.Н.(46) од Скопје, излетало од коловозот. Притоа, тој од здобиените повреди починал на местото на настанот, а смрт констатирал лекар од Итна медицинска помош. Со тешки телесни повреди се здобила малолетна сопатничка, констатирани во болницата во Кичево“, информираше СВР Охрид.

Увид на местото извршила увидна екипа од Одделението за внатрешни работи Кичево.

Повеќе од 120 лица уапсени во Русија поради учество на собири во чест на Навални

Граѓаните положија цвеќе на гробот на Алексеј Навални, еден ден откако беше погребан на гробиштата Борисовско во Москва, 2 март 2024 година.
Граѓаните положија цвеќе на гробот на Алексеј Навални, еден ден откако беше погребан на гробиштата Борисовско во Москва, 2 март 2024 година.

Најмалку 120 лица се уапсени во Русија за присуство на собири за оддавање почит на починатиот критичар на Кремљ Алексеј Навални, кој беше погребан во Москва на 1 март по неговата сомнителна смрт во затвор на Арктикот минатиот месец, откако некои руски региони го прогласија покојниот опозициски политичар за „симбол на екстремизам“, пренесува рускиот сервис на Радио Слободна Европа (РСЕ) и Current Time.

Навални беше погребан на гробиштата во близина до домот каде што живеел како дете во Москва, додека десетици илјади поддржувачи им пркосеа на забраните на руските власти, со тоа што се собраа да му оддадат почит на Навални, и покрај силното полициско присуство.

На роднините и блиските соработници им беше дозволено да влезат во црквата каде што се одржа кратка комеморација за најистакнатиот непријател на рускиот претседател Владимир Путин, пред да биде погребан на блиските гробишта Борисовско.

Полициски службеници беа распоредени во голем број низ цела Русија. Иако не беа пријавени непосредни инциденти за време на службата и погребот на Навални, повеќе од 120 луѓе подоцна беа приведени во Москва, Санкт Петербург, Новосибирск, Екатеринбург и други градови низ Русија поради учество на собири во чест на Навални.

Полицијата приведе најмалку 18 лица во Новосибирск, според Коалицијата Новосибирск 2020 и Сибирмедиа.

Според Телеграмскиот канал Автозак, најмалку 17 лица се приведени во Москва.

Меѓу приведените во Москва се Михаил Шнајдер, поранешен заменик-шеф на опозициската Партија на слободата на народот или ПАРНАС, која властите ја затворија во мај, и Андреј Морев, заменик-шефот на московскиот огранок на партијата Јаблоко (Јаблоко), како и неговиот колега Александар Ефимов. Морев подоцна беше ослободен без протокол.

Првиот оддел на проектот за човекови права објави дека судовите во четири руски региони го прогласиле името на Навални за „екстремистички симбол“.

Оттаму соопштија дека ознаката била употребена против тројца учесници на собирот во спомен на Навални во регионите Чељабинск, Краснодар и Мурманск. Наводно, етикетата била користена и во регионот на Улјановск.

За време на црковната служба, на социјалните мрежи се појавија фотографии од отворениот ковчег на Навални и покрај забраната за фотографирање и снимање.

Илјадници луѓе пешачеа по патеката долга 2,4 километри од црквата до гробиштата, каде на некои им беше дозволено да го видат местото на погреб откако ковчегот со телото на Навални беше положен во земја.

Масовна посетеност на погребот на Навални во Москва
please wait

No media source currently available

0:00 0:00:59 0:00

На погребот присуствуваше американскиот амбасадор во Москва, како и уште неколку западни дипломати.

„Работата на Алексеј Навални беше посветена на споделување на визијата за подобра иднина за Русија и сите Руси. И на крајот, тој го даде својот живот за својата патриотска служба, објави.Амбасадата на Соединетите Американски Држави (САД) во Москва на социјалната Телеграм.

Францускиот претседател Емануел Макрон и германскиот канцелар Олаф Шолц, ја пофалија храброста на граѓаните кои присуствуваа на погребот на Навални.

„Потребна беше многу храброст да му се оддаде почит на Алексеј Навални. Илјадници Руси го најдоа тоа во себе. Ова е неговото наследство. Вечен спомен“, напиша Макрон на социјалната мрежа Х.

„Алексеј Навални со својот живот плати за својата борба за демократија и слобода. По неговата смрт, храбрите Руси го продолжуваат неговото наследство: многумина од нив беа на погребот денес и ризикуваа - за слобода“, стои во објавата на Шолц на Х.

Погребот на Навални под силно полициско обезбедување
please wait

No media source currently available

0:00 0:00:45 0:00

Пред церемонијата, портпаролот на Кремљ, Дмитриј Песков, предупреди дека секој неовластен собир за поддршка на Навални ќе се смета за кршење на законот.

Тој исто така рече дека Кремљ не го смета Навални за политичар и нема што да му каже на семејството на Навални.

Вдовицата на Алексеј Навални, Јулија Навални, директно го обвини рускиот претседател Владимир Путин за смртта на нејзиниот сопруг.

Кремљ постојано негираше каква било вмешаност или одговорност за смртта на Навални.

Временска прогноза – Облачно време со услови за краткотраен дожд

Жена со чадор во Скопје (Илустративна фотографија)
Жена со чадор во Скопје (Илустративна фотографија)

Времето денеска ќе биде променливо облачно со услови за краткотраен локален дожд. Попладне и во вечерните часови облачноста ќе се намалува. Ќе дува слаб до умерен ветер претежно од северозападен правец, информира Управата за хидрометеоролошки работи.

Минималната температура ќе се движи во интервал од 3 до 9, а максималната ќе достигне од 9 до 16 степени Целзиусови.

Во Скопје исто така се очекува променливо облачно време со услови за краткотраен дожд. Ќе дува слаб ветер од северозападен правец. Минималната температура ќе се спушти до 7, а максималната ќе достигне 16 степени.

Во текот на викендов времето ќе биде претежно стабилно и потопло. Под влијание на нов влажен бран во понеделник попладне и во вторник времето повторно ќе биде облачно, на повеќе места со врнежи од дожд. Наместа врнежите ќе бидат обилни, со пороен карактер и со појава на ретки грмежи.

Температурата во вторник ќе биде во опаѓање, а на планините врнежите ќе бидат претежно од снег.

Каспаров - Русија може да се откаже од некои територии ако ја загуби војната во Украина

Гари Каспаров.
Гари Каспаров.

Рускиот опозициски политичар и ко-основач на Форумот Слободна Русија, Гари Каспаров, во интервју за Радио Слободна Европа (РСЕ) изјави дека сегашните граници на Русија „можеби не мора нужно да останат“ доколку Москва ја загуби војната во Украина, но нагласи дека целосен колапс на Русија е малку веројатен.

Зборувајќи за можните области кои би можеле да се отцепат од Руската Федерација, Каспаров ги наведе републиките Татарстан, Башкортостан, Дагестан и Чеченија, но додаде дека се уште не е јасно што ќе следи по војната.

„На крајот, економските фактори ќе играат голема улога во ова прашање. Но, денес е многу важно да не се поддржува позицијата на обединета и неделива Русија“, рече Каспаров, додавајќи дека верува дека „промената на империјалистичкиот карактер на Русија е неопходна за нејзино преобликување.

Како што јави РСЕ на англиски јазик, 60-годишниот поранешен светски шампион во шах, исто така, рече дека загубите на Русија ќе бидат „минимални“.

„Но, ако ја отстраните империјата, тогаш треба да се согласите дека некои нејзини делови на крајот може да исчезнат“, рече Каспаров, оценувајќи дека економските врски се отежнувачки фактор за распадот на Русија.

Тој рече дека ако некои делови од Русија се отцепат, тогаш би било можно да се постигнат нови договори меѓу руските територии во рамки на она што би било „слободна конфедерација“.

„Тоа е точно, меѓу другото, и од психолошка гледна точка, бидејќи ќе биде невозможно да се изгради неимперијална Русија со зачувување на погрешните империјални заблуди“, изјави Каспаров за РСЕ во Вилнус на собир на руски опозиционери.

Како што рече, смета дека Соединетите Американски Држави и Европската Унија се „плашат“ од евентуален распад на Русија доколку таа ја загуби војната во Украина.

Според него, тоа создава проблеми во подобро разбирање на светот и војната во Украина, но влијае и на поддршката за Киев во спротивставувањето на руската агресија.

„Украинската победа би била силен удар за Русија и најверојатно ќе доведе до промена на целата [нејзина] политичка структура“, рече Каспаров.

Тој рече дека руската јавност сè уште не разбира дека војната оди кон пораз и дека „диктатурата на Путин нема да опстане“.

Каспаров, кој моментално живее во САД, е познат како остар критичар на политиката на Кремљ, вклучувајќи ја и војната во Украина.

Тој и уште еден истакнат критичар на рускиот претседател Владимир Путин, Михаил Ходорковски, поранешен нафтен тајкун, беа ставени во регистарот на странски агенти на Русија во мај 2022 година.

Вчитај повеќе

XS
SM
MD
LG