Достапни линкови

Вести

Новиот ковид бран ги полни амбулантите, но нема многу во болниците

Илустрација

Според извештаите од болниците, моментно се хоспитализирани 340 лица, a од нив 81 отсто не се вакцинирани, додека 19 проценти се вакцинирани. Во исто време, 78 отсто од починатите лица од ковид-19 биле невакцинирани, а само 22 отсто примиле вакцина, се вели во анализата објавена од Министерството за здравство за вакцинирани од позитивните случаи со ковид-19 во период од 6 август 2021 година до 13 јануари 2022 година.

Од Министерството потенцираат дека изминативе неколку недели, притисокот врз болниците е намален што се однесува до хоспитализациите, но зголемени се амбулантските прегледи, кои се движат и до стотина пациенти на ден во една установа.

Во период од 06.08.2021 до 13.01.2022 година на територија на државата како позитивни на ковид-198 се тестирани 85.593 граѓанин, од кои 37 отсто биле целосно вакцинирани, односно 32.079 лица. Според статистиката за изминативе месеци, 53.514 граѓани, односно 63 отсто од позитивните на ковид-19 не биле вакцинирани, се вели во соопштението на Министерството за здравство.

За време на пролетниот бран минатата година, на болничко лекување поради ковид-19 имаше над 1700 луѓе.

види ги сите денешни вести

Столтенберг- Финска во наредниве денови ќе стане членка на НАТО

Генералниот секретар на НАТО Јенс Столтенберг.

Финска ќе се приклучи на НАТО во рок од неколку дена по одлуката на Турција да го ратификува нејзиниот пристап во западната одбранбена алијанса, рече на 31 март генералниот секретар на НАТО Јенс Столтенберг.

„Сите 30 сојузници на НАТО сега го ратификуваа протоколот за пристап“, рече Столтенберг.

Тој на социјалната мрежа Твитер напиша дека му честитал на претседателот на Финска Саули Ниинисто за завршувањето на како што вели историската ратификација на пристапувањето на Финска.

„Со нетрпение очекувам да го подигнам знамето на # Финска во седиштето на НАТО во наредните денови. Заедно сме посилни и побезбедни“, напиша Столтенберг на Твитер.

Турскиот парламент на 30 март ја ратификуваше кандидатурата на Финска за влез во НАТО. Со тоа е отстранета последната пречка во долго одложуваното пристапување на оваа нордиска земја во Алијансата.

Сите 276 присутни пратеници гласаа за кандидатурата на Финска, неколку дена откако унгарскиот парламент ја одобри.

„Ова ќе го направи целото семејство на НАТО посилно и побезбедно“, напиша на Твитер генералниот секретар на НАТО, Јенс Столтенберг, поздравувајќи го потегот на Турција.

Турција и Унгарија беа последните две членки на НАТО што го ратификуваа пристапувањето на Финска.

Обидот на Шведска да се приклучи на Алијансата останува неизвесен, а Турција и Унгарија одложуваат да и дадат зелено светло, и покрај тоа што изразија поддршка за проширувањето на НАТО.

Вознемирени од руската инвазија на Украина пред една година, Финска и Шведска ја напуштија својата повеќедецениска политика на неврзаност и се пријавија да се приклучат на Алијансата.

Поранешниот пишувач на говори на Путин обвинет за дискредитирање на руските вооружени сили

Поранешниот пишувач на говори на рускиот претседател Владимир Путин, Абас Галјамов е осомничен за дискредитација на руските вооружени сили, обвинение што руските власти го користат за задушување на критиката на Кремљ. Неговото име се појави во рускиот регистар за потерници на министерството за внатрешни работи. На Галјамов му се заканува казна од 10 години затвор. Тој живее во егзил во Израел.

Руската неформална група која ги следи и заштитува онлајн новинарите објави дека според нивните информации кои ги добиле од официјални документи за истрагата против него, причината за неговото гонење е интервју кое што го дал јутјуб каналот на Украина 1+1. Галјамов дал интервју на 9 април 2022 година каде што разговарале за воени злосторства од руските трупи во Украина во градовите Буча и Краматорск.

Во нивната објава е наведено дека истрагата против Галјамов е стартувана на 18 јануари, а неговото име е внесено во регистарот на потерници на 17 февруари, еден месец пред да се појави на веб страната на руското Министерство за внатрешни работи.

На 24 март, веб-страницата „Медиазона“ објави дека на веб-страницата на Министерството за внатрешни работи го нашла официјалното известување во кое Гаљамов се идентификува како баран по неодредени обвиненија. Известувањето беше објавено еден ден откако РСЕ објави опширно интервју со Галјамов.

Во интервјуто, Галјамов сугерираше дека тековната неиспровоцирана инвазија на Украина може да доведе до револуција во Русија.

Тој, во интервјуто зборуваше и за времето кога работел како член на тимот за пишување говори на Путин, откако Путин стана премиер во 2008 година. Тој рече дека во тоа време, никој не можеше да предвиди „дека Русија ќе се претвори во некаква фашистичка држава, како што е сега“.

Минатиот месец, руското Министерство за правда го додаде Галјамов во својот регистар на „странски агенти“, велејќи дека тој дистрибуирал „материјали собрани од странски агенти, изразил идеи против специјалната воена операција во Украина, учествувал како експерт и одговорен на информативни платформи презентирани од странски субјекти“.

Тој работеше како пишувач на говори за Путин од 2008 до 2010 година. Тој беше заменик-шеф на администрацијата на тогашниот претседател на Руската Република Башкортостан Рустем Хамитов од 2010 до 2014 година.

Дискредитирањето на руските вооружени сили стана кривично дело според новиот закон усвоен откако Русија испрати војници во Украина во февруари 2022 година.

Убиен е 46 годишен маж во Капиштец

Илустрација

Убиен е еден човек во скопската населба Капиштец во близина на Млечен ресторан. Според првичните полициски информации убиството е направено утринава нешто после осум часот по расправија на гости во казиното. Од Министерството за внатрешни работи ( МВР) велат дека полициските екипи се на терен.

„Во 08.05 часот во СВР Скопје пријавено е дека во казино лоцирано на бул.„М.Т.Гологанов“ едно лице пукало во Н.А. (46) од с.Арачиново, со кого претходно играле на апаратите во казиното, по што Н.А. подлегнал на повредите“ се вели во кусото соопштение од МВР.

На терен е излезен јавен обвинител за откривање на детали што точно се случило. Од Обвинителството најавија наскоро детали за преземените мерки.

Турција го ратификуваше членството на Финска во НАТО

Турскиот претседател Реџеп Таип Ергодан во Парламентот на Турција

Турскиот парламент на 30 март ја ратификуваше кандидатурата на Финска за влез во НАТО. Со тоа е отстранета последната пречка во долго одложуваното пристапување на оваа нордиска земја во Алијансата.

Сите 276 присутни пратеници гласаа за кандидатурата на Финска, неколку дена откако унгарскиот парламент ја одобри.

„Ова ќе го направи целото семејство на НАТО посилно и побезбедно“, напиша на Твитер генералниот секретар на НАТО, Јенс Столтенберг, поздравувајќи го потегот на Турција.

За да се прими нова членка во НАТО, потребна е целосна едногласност од 30-те земји членки, а Турција и Унгарија беа последните две членки на НАТО што го ратификуваа пристапувањето на Финска.

Обидот на Шведска да се приклучи на Алијансата останува неизвесен, а Турција и Унгарија одложуваат да и дадат зелено светло, и покрај тоа што изразија поддршка за проширувањето на НАТО.

Вознемирени од руската инвазија на Украина пред една година, Финска и Шведска ја напуштија својата повеќедецениска политика на неврзаност и се пријавија да се приклучат на Алијансата.

Трамп обвинет, се очекува да се предаде следната недела

Поранешниот американски претседател Доналд Трамп

Поднесено е обвинение против поранешниот американски претседател Доналд Трамп во судот во Менхетен. Ова ќе биде судска историска пресметка по долгогодишни истраги за неговите лични, политички и деловни зделки и како и по ненадејниот претрес во неговиот обид да ја врати Белата куќа.

Обвинението не е објавено, но тоа произлегува од наводна исплата направена за време на претседателската кампања во 2016 година за да се премолчат тврдењата за вонбрачна сексуална средба со порно глумица.

Портпаролот на канцеларијата на окружниот обвинител на Менхетен го потврди обвинението и изјави дека обвинителите се обратиле до тимот за одбрана на Трамп за да го координираат неговото предавање, што би можело да се случи следната недела.

Трамп, кој негира дека сторил нешто лошо и постојано ја напаѓа истрагата, го нарече обвинението „политички прогон“.

„Ова е политички прогон и мешање во изборите на највисоко ниво во историјата. Од времето кога се симнав по златниот ескалатор на кулата Трамп, па дури и пред да положам заклетва како ваш претседател на САД, радикалните леви демократи – непријателот на вредните мажи и жени во оваа земја – беа вклучени во лов на вештерки за да го уништат движењето „Направи ја Америка повторно голема“, рече Трамп во обраќањето откако поротата во судот на Менхетен гласаше да се покрене обвинение против него поради наводни исплати за вонбрачна сексуална средба.

Обвинението, против Трамп го иницира канцеларијата на локалниот окружен обвинител во време на подготовки за новата национална претседателска трка. Процесот за кривичната постапка се одвива во градот што поранешниот претседател со децении го нарекуваше дом.

Пристигнувајќи во време на длабоки политички поделби, обвиненијата најверојатно ќе ги зајакнат наместо да ги преобликуваат перспективите на двобојот на оние кои сметаат дека одговорноста е одамна задоцнета и оние кои, како Трамп, сметаат дека републиканецот е цел на политички цели на демократските политички сили во земјата.

Точната природа на обвиненијата беше нејасна во петокот бидејќи обвинението остана под печат, но тие произлегуваат од плаќањата направени за време на претседателската кампања во 2016 година за да се премолчат тврдењата за вонбрачна сексуална средба.

Обвинителите рекоа дека работат на координирање на предавањето на Трамп, што би можело да се случи на почетокот на следната недела. Тие не кажаа дали имаат намера да бараат затворска казна во случај на осуда, развој што нема да го спречи Трамп да бара и да ја преземе претседателската функција.

Ковачевски на средба со Вучиќ во Белград

Македонскиот премиер Димитар Ковачевски на средба со српскиот претседател Александар Вучиќ во Белград

Македонскиот премиер Димитар Ковачевски при неговата прва официјална посета на Белград се сретна со српскиот претседател Александар Вучиќ. Во владиното соопштение е наведено дека на средбата било потврдено дека билатералните односи меѓу двете земји се карактеризираат со динамичен политички дијалог на високо ниво, економска соработка и трговска размена.

Тема на разговор биле и регионалните иницијативи како Отворен Балкан и Берлинскиот процес чија цел е регионален развој и побрза интеграција на единствениот европски пазар и во Европската Унија. Во тој контекст разговарале и за политиката на проширување на Европската Унија со земјите од Западен Балкан и за динамиката на пристапните преговори на Северна Македонија и Србија.

„Во таа насока беа потенцирани реформските процеси во повеќе клучни области, градење на институционални капацитети како и развојните стратегии кои ги спроведуваат владите на двете земји“ се вели во соопштението до македонската влада по средбата.


Ковачевски ќе има тет-а-тет средба со Брнабиќ, на која ќе се разговара за теми од интерес на граѓаните на двете земји, како и за натамошното продлабочување на односите.

По пленарната средба, предвидено е потпишување на меморандуми за соработка во рамки на иницијативата Отворен Балкан, за мерките за подобрување на движењето на лица и стоки преку заедничката државна граница, Меморандум за разбирање - проект за електронска наплата на патарина – воспоставување интероперабилен електронски систем за наплата на патарина и Меморандум за соработка во рударството и енергетиката.
по што ќе следува заедничка прес- конференција на двајцата премиери, Ковачевски и Брнабиќ.

Остри реакции по одлуката на Уставен за повисоки плати на функционерите

Стево Пендаровски

Претседателот на државата Стево Пендаровски во врска со одлуката на Уставниот суд со која се укинуваат одредби од Законот за плата и други надоместоци на избрани и именувани лица во Република Македонија, ја повика Владата да се најде законско решение со кое ќе се регулира прашањето преку намалување на бодовите.

„Во врска со одлуката на Уставниот суд со која се укинуваат одредби од Законот за плати на функционерите, ја повикувам Владата да се најде законско решение со кое ќе се регулира прашањето преку намалување на бодовите. Сметам дека е невкусно во време на економска криза да се покачуваат платите кои се исплаќаат од државниот буџет“ изјави за Сител, претседателот Стево Пендаровски.

Вицепремиерот Фатмир Битиќи одговарајќи на новинарско прашање за одлуката на Уставен суд за зголемување на платите на функционерите рече дека не може да не се почитува одлука на Уставен суд.

„Владеењето на правото е неприкосновено. Ако има друга одлука со која што треба таму да се интервенира, јас сум еден од првите што ќе ја поддржи“, одговори Битиќи.

Покачувањето треба да следува веќе од идниот месец. Градоначалникот на скопската општина Аеродром, Тимчо Муцунски, попладнево на социјалните мрежи напиша дека се откажува од зголемувањето на платата.

„Зголемувањето на платата, согласно одлуката на Уставниот суд во целост ќе го донирам за хуманитарни цели, семејства со ниски месечни примања и семејствата на уставобранителите. Имајќи ја предвид тешката економска и финансиска состојба во која живееме, почнувајќи од следниот месец разликата во платата ќе ја донирам за хуманитарни цели“, напиша Муцунски.

Со одлука на Уставниот суд за укинување на два члена од Законот за плата и надоместоци на функционерите, се овозможува зголемување на платите на државните функционери за дури 78 отсто.

Покрај нив, законот се однесува и на примањата на премиерот, претседателот, собранискиот спикер, но и сите вршители на јавни функции, соопштија од Синдикатот на управа, правосудни органи и здруженија на граѓани (УПОЗ). Тука спаѓаат и сите заменици министри, градоначалници, директори во државни фирми и агенции.

Иницијативата е поднесена од адвокат од Скопје, а Уставниот суд одлуката ја донел на 21 март, само четири месеци по поднесувањето, што е прилично брз рок, споредено со други иницијативи кои со години чекаат Судот да одлучи по нив.

Со одлука на Уставниот суд на 21 март се укинати член 4 од Законот за изменување и дополнување на Законот за плата и други надоместоци на избрани и именувани лица во Република Македонија и член 1 од Законот за изменување на Законот за плата и други надоместоци на избрани и именувани лица во Република Македонија.

Како што информираа од Уставниот суд, со првата укината одредба е утврдено дека основицата за пресметување на плата на избраните и именуваните лица се применува од јануари 2012 година и е во износ од 25.726 денари, додека со втората укината одредба е предвидено дека платите на избраните лица во 2014 година може да се зголемат за 4 отсто започнувајќи со исплатата на платите во 2014 година.

Уставниот суд смета дека во случајот, постои двојство во уредувањето на прашањето за основицата на платата на избраните и именуваните лица, што претставува неконзистентност во законското уредување на оваа материја.

Од УПОЗ појаснуваат дека со одлуката на Уставниот суд се укинува основицата од 26.000 денари за пресметување на платите на функционерите. Од сега основицата ќе изнесува колку просечна бруто плата и таа сума ќе се множи со коефициентот.

Лавров во посета на Турција следната недела

Рускиот министер за надворешни работи Сергеј Лавров

Рускиот министер за надворешни работи Сергеј Лавров ќе ја посети Турција на 6 и 7 април на покана на неговиот турски колега Мевлут Чавушоглу, изјави портпаролката на руското Министерство за надворешни работи, Марија Захарова.

Таа прецизира дека двајцата планираат да разговараат, пред сè, за состојбата и перспективите на билатералните односи во областите од заемен интерес, вклучувајќи ги трговијата, енергетиката и туризмот.

Лавров и Чавушоглу ќе „разменуваат мислења“ и за регионални и меѓународни прашања, вклучително и за ситуацијата во Украина, Сирија и Нагорно Карабах, како и во Централна Азија и Авганистан.

Министрите ќе прецизираат „распоред за билатерални контакти на различни нивоа“, најави Захарова.

Турција остана неутрална за време на конфликтот во Украина, воздржувајќи се од приклучување на западните санкции кон Русија и одржувајќи добри односи и со Киев и со Москва. Двапати беше домаќин на мировните преговори меѓу Москва и Киев, но последниот состанок беше во март и не даде резултати.

Турција во јули минатата година помогна да се постигне договор за извоз на украинско жито блокирано во пристаништата на Црното Море.

Болсонаро се врати во Бразил

Поранешниот претседател на Бразил, Жаир Болсонаро

Поранешниот претседател на Бразил, Жаир Болсонаро, се врати во својата земја, откако во последните три месеци беше во Соединетите Држави. На аеродромот во Бразилија беше пречекан од стотици поддржувачи.

Официјални лица на неговата Либерална партија изразија очекување дека Болсонаро, кој никогаш не го призна поразот на минатогодишните избори, ќе ја предводи опозицијата, пренесува Ројтерс.

Болсонаро го напушти Бразил два дена пред да му ја предаде претседателската функција на Луис Инасио Лула да Силва на 1 јануари.

Тврдеше дека треба да се одмори, но критичарите велат дека го избегнал ризикот од истраги со кои можел да се соочи во Бразил.

Истрагата се фокусираше на неговата критика за гласачкиот систем на Бразил и неговата наводна улога во поттикнувањето на поддржувачите да упаднат во владините згради на 8 јануари, потсетувајќи на нападот на американскиот Капитол во Вашингтон во 2021 година.

Универзална сала оставена сама на себе, градските советници не и ја отстапија на Владата

Универзална сала во Скопје

Советниците во Градскиот совет не ја изгласаа иницијативата на советниците на СДСМ, Универзална сала да се отстапи на Владата, односно на Министерството за кутура, за да започне нејзината реконструкција. Предлогот на СДСМ доби само 15 гласа.

Советничката група на СДСМ, која е и подносител на оваа иницијатива, не гледа ништо спорно во тоа Универзалната сала времено да му биде отстапена на Министерството за култура за да се заврши реконструкцијата, а потоа да му се врати на Градот Скопје.

Додека советниците од СДСМ не гледаат ништо спорно во иницијативата, советничката група на ВМРО-ДПМНЕ смета оти со нејзино прифаќање ќе се прифати и поразот, но и неспособноста на, како што велат, советниците, на градоначалничката и на службите на Градот Скопје. За Левица, пак, иницијативата за отстапување на Универзалната сала на Владата не е спорна, туку е спорна самата Влада. Советниците од оваа партија порачаа дека на една година пред парламентарни избори нема да дозволат овој објект да им биде отстапен на, како што велат, делегитимираната Влада.

За градоначалничката на Скопје, Данела Арсовска, тоа не е одлука којашто таа како градоначалник може или сака да ја направи.

За преземањето на Универзална сала од страна на Министерството за култура се зборува уште од ноември минатата година кога министрите за култура и за локална самоуправа, Бисера Костадиновска-Стојчевска и Ристо Пенов, беа на средба со градоначалничката Данела Арсовска, од каде што излегоа со тврдење дека Универзалната сала целосно ќе биде преземена од Министерството за култура, за истата да се реконструира, за што добиле согласност од градоначалничката.

Годишен извештај на омбудсманот: повреди на детските права, граѓанските состојби, работните односи

Народниот правобранител Насер Зибери

Детските права, правосудството, граѓанските состојби, потрошувачките права се дел од областите во кои има констатирано најмногу повреди во 2022 година, изјави денеска Народниот правобранител Насер Зибери, повикувајќи се на Годишниот извештај за степенот на обезбедувањето почитување, унапредување и заштита на човековите слободи и права.

„Властите во наредниот период треба сериозно да се ангажираат за да се донесат законски измени, некои да се допрецизират, или да се изнајдат системски решенија, се со цел на граѓаните да не им се прекршуваат нивните права“, порача Зибери.

Статистиката покажува дека во Канцеларијата на Народниот правобранител во 2022 година биле примени за околу 20 отсто повеќе претставки во однос на минатата година. Тој посочи дека како и минатите години, така и во 2022 продолжи трендот на прво место според бројот на поднесени преставки да биде областа правосудство, потоа потрошувачките права права, работните односи, детските права и имотно-правните односи.

Врз основа на предметното постапување и следење на состојбата, општа констатација на Народниот правобранител е дека во постапките за присилна наплата на неплатен даночен долг, радиодифузна такса, други јавни приходи и парични казни, Управата за јавни приходи, Градот Скопје и општините, не ги почитуваат уставно прокламираните начела за заштита на основните слободи и права на граѓаните.

„Имено, од овие субјекти, на одредени граѓани со години им се загрозува како личната, така и егзистенцијата на нивните семејства бидејќи присилна наплата исклучиво ја спроведуваат преку блокада на нивните трансакциски сметки во банки со одземање на целиот износ од плата, пензија, надоместоци од социјална заштита, невработеност и слично, кој тие го примаат. Следствено на тоа, тие подолг временски период, остануваат без основни средства за егзистенција, а дополнително се принудени да им плаќаат финансиски средства на банките за деблокирање на трансакциските сметки“, рече Зибери.

На темата финансии, Зибери посочи уште една појава која се однесува на работата на финансиските друштва, за што иако немаат директна надлежост граѓаните доставиле претставки. Тој притоа посочи пример за земен брз кредит од 9.000 денари, граѓанин, кој поднел претставка кај Народниот правобранител, бил принуден да плати сума за осум пати поголема од главниот долг.

„За да има јавноста јасна престава за што зборувам ќе илустритам со еден пример. Земен кредит од 9.000 денари, за доцнење со негова исплата навистина како во рекламите, не се наплатува камата, меѓутоа се наплатуваат други огромни трошоци. Така за конкретниот пример на име достасан надоместок наплатени се 2.026 денари, за надоместок за доцнење дури 58.846, денари, па кога на ова ќе се додаде износот за пратената опомената 5.900, денари долгот ја достигнува сумата од 75.772 денари, што е сума за осум пати поголема од главнит долг“, рече Зибери.

Како проблем на денешната прес - конференција Народниот правобранител го посочи и тројно зголемениот данок на имот за 2022 година, од страна на Општина Охрид. Апсурдот според него е што, сите решенија се донесени во текот на месец март 2022 година, односно по само два месеци од денот на започнувањето на применета на Законот за изменување и дополнување на Законот за даноците на имот, па аналогно на тоа, единствено се засноваат на претпоставката на Општина Охрид дека нема да ги користат или нема да ги издаваат под закуп предметните недвижности, подолго од шест месеци во текот на една година.

Кралот Чарлс Трети: Руската инвазија ги загрозува демократските вредности

Говор на Британскиот крал Чарлс Трети

Британскиот крал Чарлс Трети денеска предупреди за „заканата“ што ја претставува руската инвазија врз Украина за безбедноста на Европа и „демократските вредности“.

Во говорот пред германските парламентарци, тој ја подвлече значајната улога што Велика Британија и Германија ја одиграа во поддршката на Киев, особено на воениот фронт.

„Одлуката на Германија да испрати голема воена помош за Украина е храбра, важна и добредојдена“, рече тој.

Британскиот крал, првиот монарх кој зборуваше во Бундестагот, беше пречекан со долг аплауз. Во говорот одржан главно на германски јазик, Чарлс Трети повика на единство околу Украина и климатските промени.

Британскиот крал Чарлс Трети вчера пристигна во посета на Германија, што е негова прва посета во странство откако дојде на тронот. Тој првично требаше да ја посети Франција, а потоа и Германија, но посетата на Франција беше одложена поради протестите во земјата.

Чарлс има крвни врски со Германија, но двете земји се бореа на спротивни страни за време на двете светски војни. Говорејќи во Бундестагот во четвртокот, тој истакна колку далеку стигнале Велика Британија и неговата земја домаќин оставајќи го зад себе минатото исполнето со конфликти, нагласувајќи ги заедничките вредности што сега ги делат.

Во петок, кралот Чарлс ќе направи понатамошен чекор во зближувањето со одавање почит на жртвите од бомбардирањето на сојузниците за време на Втората светска војна во Хамбург.

Дисциплинската комисија бара разрешување на обвинителката Русковска

Обвинителката Вилма Русковска

Комисијата за утврдување на дисциплинска одговорност при Јавното обвинителство на Република Северна Македонија утврди дека поранешната основна јавна обвинителка на Основното јавно обвинителство за гонење на организиран криминал и корупција Вилма Русковска е одговорна за сторена тешка дисциплинска повреда од член 91 алинеја 6 од Законот за Јавното обвинителство и одлучи да поднесе предлог за нејзино разрешување до Советот на јавните обвинители.

По спроведената дисциплинска постапка против три јавни обвинителки и разгледување на извештајот на обвинителот-известител Комисијата за утврдување на дисциплинска одговорност на јавен обвинител во вршење на јавнообвинителската функција при ЈОРСМ, донесе решение со кое:

„За поранешна основна јавна обвинителка на Основното јавно обвинителство за гонење на организиран криминал и корупција е утврдено дека е одговорна за сторена тешка дисциплинска повреда од член 91 алинеја 6 од Законот за Јавното обвинителство и Комисијата одлучи да поднесе предлог за нејзино разрешување до Советот на јавните обвинители“.

Тие донеле одлуки и за другите обвинителки: Ивана Трајчева и Елизабета Јосифовска.

„За една јавна обвинителка од Основното јавно обвинителство за гонење на организиран криминал и корупција, за утврдена тешка дисциплинска повреда е изречена дисциплинска мерка – намалување на месечна плата во висина од 30% од исплатената нето плата во траење од 6 месеци. За една јавна обвинителка Комисијата одлучи да ја ослободи од одговорност, бидејќи не се докажа дека сторила тешка дисциплинска повреда од член 91 алинеја 6 од Законот за јавното обвинителство“, се наведува во решението на Комисијата.

Против Решението на Комисијата, како што информираат од ЈОРСМ, незадоволните страни имаат право на жалба пред Советот на јавните обвинители.​

Во март годинава, обвинителките Вилма Русковска, Ивана Трајчева и Елизабета Јосифоска, беа сослушани во рамки на дисциплинската постапка поведена против нив, а поврзана со претресот во Управата за финансиска полиција.

Русковска, е суспендирана, а паралелно против трите обвинителки се води и истрага по кривичната пријава на екс директорот на Управата за финансиска полиција, Арафат Муареми. Тој обвинуваше дека претресот во неговите канцеларии не бил во согласност со законот.

Предлогот да се поведе дисциплинска постапка го даде републичкиот обвинител Љубомир Јовески, кој дополнително ја суспендира Русковска и од работа.

Претресот во Управата за финансиска полиција од страна на ОЈО ГОКК беше извршен 18 јули минатата година.

Макрон: Протестите нема да ги запрат реформите

илустрација од протестите во Франција

Протестите нема да ги запрат пензиските реформи или други промени во политиката, рече францускиот претседател Емануел Макрон пред да го претстави планот од 50 мерки за да се избегне криза со вода ова лето и во годините што доаѓаат.

Со овој план, Макрон и неговата влада сакаат да преминат на други теми освен законот за пензиите, кој веќе два месеци предизвикува жестоки протести низ целата земја, пренесува Ројтерс.

Меѓутоа, во Савин-ле-Лак на Алпите, каде што требаше да одржи говор, го пречекаа групи демонстранти лути поради законот за пензиите.

На еден постер пишуваше „Макрон да поднесе оставка! и „Земи си ја пензијата, а не нашата“. Локалните медиуми јавуваат дека двајца демонстранти се уапсени.

Двајца мажи се во кома по насилните судири во саботата меѓу демонстрантите и полицијата за време на демонстрациите против изградбата на огромен резервоар за вода за наводнување на фармите во западна Франција.

Најлошата суша во Франција минатото лето ја засили дебатата за водните ресурси во најголемиот земјоделски производител во Европската унија.

Земјоделците велат дека им требаат големи акумулации за да ги наводнуваат нивните посеви ова лето, додека еколошките здруженија велат дека отпадните води се начин земјоделците да го конфискуваат општото добро.

„Протестите се нормални“, им рече Макрон на новинарите, „но тоа не значи дека треба да престанеме. Ништо не го оправдува насилството во едно демократско општество“, рече тој.

Милиони Французи протестираат и штрајкуваат од средината на јануари во знак на протест против реформите. Протестите се интензивираа откако владата употреби посебни овластувања за да ја „протурка“ реформата без гласање во парламентот.

Макрон, кој вети дека ќе го реформира пензискиот систем во двете претседателски кампањи, тврди дека промената е потребна за да се балансира националниот буџет. Синдикатите и опозицијата тврдат дека има и други начини за тоа.

Фон дер Лајен: Ставот на Кина кон војната во Украина ќе биде „одлучувачки за односите меѓу Кина и ЕУ“

Претседателката на Европската комисија Урсула фон дер Лајен

Претседателката на Европската комисија Урсула фон дер Лајен денеска изјави дека односот на Кина кон војната во Украина ќе биде „одлучувачки фактор за односите меѓу ЕУ и Кина“.

Кина, како постојана членка на Советот за безбедност на ОН, има одговорност да одигра конструктивна улога во промовирањето на мирот заснован на територијалниот интегритет на Украина, со повлекувањето на руските сили, рече претседателот на ЕК.

„Секој еден мировен план што ќе ги консолидира руските анексии едноставно не е одржлив план“, рече Фон дер Лајен во говорот во Брисел пред да отпатува за Пекинг, пренесоа британските медиуми.

Шефицата на ЕК кажа дека „одлучувачки фактор за продолжување на односите меѓу ЕУ и Кина ќе биде како Кина ќе продолжи да се однесува кон војната на Путин“.

Кина сè уште не ја признава руската анексија на Крим од Украина во 2014 година, но избра да го преориентира својот водечки надворешнополитички проект, Иницијативата „Појас и пат“, за подобро да се интегрира со Русија и помалку да се фокусира врз Украина.

Вчитај повеќе

XS
SM
MD
LG