Достапни линкови

Вести

Апелација ја потврди првостепената пресуда за „Рекет“

Бојан Јовановски - Боки 13 во судница за случајот „Рекет“

Апелационен суд Скопје како неосновани ги одби жалбите на обвинетите Бојан Јовановски и Катица Јанева за случајот „Рекет“ и ја потврди првостепената пресуда.

„Апелациониот суд Скопје, постапувајќи по кривичниот предмет КОКЖ -91/20 познат во јавноста под името „Рекет“, донесе одлука со која жалбите на обвинетиот Бојан Јовановски од Скопје и обвинетата Катица Јанева од Скопје, ги одби како неосновани, а првостепената пресуда ја потврди. Вака донесената одлука ќе биде објавена во целост на веб страната на судот во рокот определен со Законот за управување со движењето на предметите во судовите“, информираат од Апелационен суд Скопје.

Во мај адвокатите на поранешната специјална јавна обвинителка Катица Јанева која е осудена од првостепениот суд на седум години затвор од Апелациониот суд побараа да биде укината пресудата и случајот да биде вратен на повторно судење. Адвокатот Дељо Кадиев, образложувајќи ја жалбата, рече дека има голем број суштествени повреди на постапката за овој случај и затоа една третина од жалбата се однесува на тоа.

Претходно и адвокатот на Бојан Јовановски, осуден на девет години казна затвор за случајот „Рекет“ побара од Апелациониот суд да биде укината пресудата и случајот да биде вратен на повторно судење поради суштествени повреди и погрешно утврдена материјална и фактичка состојба.

Јанева за случајот „Рекет“ од Основниот кривичен суд е осудена на казна затвор од седум години за „примање награда за противзаконито влијание“ и „злоупотреба на службена положба и овластување, а Јовановски казната од девет години ја доби за кривично дело „перење пари и други приноси од казниво дело“.

види ги сите денешни вести

Времето денеска: сончево и топло

Ќе биде сончево и топло со мала до умерена локална облачност. Ќе дува слаб до умерен ветер претежно од западен правец. Преку ноќта кон вторник, претежно во планинските подрачја ќе има услови за краткотраен дожд. Дневната температура ќе биде од 25 до 33 степени. Во Скопје и околината слично време. Дневната температура ќе биде 31 степен.

Борел - Ја следиме ситуацијата во северниот дел на Косово, провокациите се неприфатливи

Косовски специјалци на граничниот премин Јариње со Србија

Високиот претставник на ЕУ за надворешни работи и безбедносна политика, Жозеп Борел изјави дека продолжува внимателно да ја следи ситуацијата на северот на Косово и им порача на двете страни дека сите дополнителни провокации или еднострани и некоординирани дејствија се „неприфатливи“.

„Србија и Косово мора безусловно да ја деескалираат ситуацијата на терен со итно повлекување на специјалните полициски единици и отстранување на блокадите на патиштата“, изјави Борел во соопштението на Европската служба за надворешни работи.

Тој истакна дека Србија и Косово мора да најдат решение за да ја смират ситуацијата и да се договорат како да се оди напред, а ЕУ „активно ќе ги поддржи тие напори“.

„И косовските и српските лидери се целосно одговорни за секој ризик по безбедноста и благосостојбата на заедниците во Косово и во Србија. Го истакнав тоа во моите повици до претседателот Вучиќ и премиерот Курти оваа недела“, вели Борел.

Тој нагласи дека дијалогот со посредство на ЕУ останува единствената платформа каде што се разговараат и решаваат сите отворени прашања меѓу страните, вклучително и прашања поврзани со слободата на движење и регистарските таблички, порачувајќи дека „силно ги повикува Косово и Србија да го искористат“.

Пристигнувањето на двајцата главни преговарачи во Брисел во наредните денови е првиот позитивен чекор, изјави Борел, додавајќи дека е клучно тие да дојдат со мандат да разговараат за тоа како да продолжат понатаму и да најдат одржливи решенија што се во интерес на граѓаните.

„Повторуваме – очекуваме и Косово и Србија да се вратат на подобрување на околностите кои водат кон помирување, регионална стабилност и соработка за доброто на своите граѓани. Ова е клучно за постигнување сеопфатен и правно обврзувачки договор за нормализација на нивните односи, што е неопходно и за двете страни да напредуваат на својот пат кон ЕУ“, изјави Борел.

Тој изјави дека е во контакт со генералниот секретар на НАТО, Јенс Столтенберг на кого му се заблагодари за вонредната соработка меѓу КФОР и Еулекс.

Тензиите меѓу Косово и Србија се зголемија пред една недела по одлуката на косовската влада за воведување на пробни косовски таблички за возилата со српски регистарски ознаки. Србите од северно Косово поради тоа ги блокираа патиштата кон граничните премини Брњак и Јариње кон Србија.

Србија, која не ја признава својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

Нови 336 случаи на коронавирус, 17 починати

Илустрација: Ковид-болница во Гостивар

Во изминатото деноноќие се регистрирани 336 нови случаи на коронавирус, а 17 луѓе почина, информира Министерството за здравство. Направени биле 3.425 тестирања.

Најмногу нови случаи се регистрирани во Скопје – 169, Велес и Струмица по 21, Куманово 17, Охрид и Кавадарци по 15, Битола 14, Штип 13, Кочани 11, Свети Николе 10, Прилеп 6, Тетово 4, Кичево, Гевгелија и Крива Паланка по 3, Виница, Кратово и Македонски Брод по 2 и Струга, Радовиш, Дебар, Берово и Демир Хисар по еден нов случај.

Починатите се на возраст од 38 до 89 години

Регистрирани сe 222 оздравени пациенти.

Вкупната бројка на КОВИД-дијагностицирани лица во нашата земја од почетокот на епидемијата изнесува 189.887 бројката на оздравени пациенти е 170.956, на починати е 6.594, а бројот на активни случаи изнесува 12.337.

Седми ден протести во северно Косово, надлетуваат српски воени авиони, војската ја зголеми борбената готовност

Косовски специјалци на граничниот премин Јариње

Протестот на косовските Срби, незадоволни од распоредувањето на специјалните полициски сили на административните премини Јариње и Брњак и одлуката на Приштина да ги замени српските регистарски таблички, трае седми ден по ред. Ниту припадниците на специјалната полиција, ниту граѓаните собрани на протестот не се откажуваат од своите позиции.

Премиерката на Србија, Ана Брнабиќ синоќа од Њујорк порача дека Белград е подготвен за дијалог, но очигледно дека Приштина не е. Таа апелираше до меѓународната заедница да инсистира Приштина да започне со спроведување на договорот од Брисел, а особено формирањето на Заедницата на српски општини (ЗСО).

Како што соопшти РТС два авиона од типот „орел“ и денеска прелетаа над Јариње правејќи два круга.

Половина час пред прелетот на авионите, областа каде се распоредени косовските полициски специјалци и граѓаните кои протестираат, ги прелета и хеликоптер на КФОР.

Министерот за одбрана, Небојша Стефановиќ и началникот на Генералштабот на српската армија, генерал Милан Мојсиловиќ, започнаа со обиколка на дел од силите кои се во состојба на зголемена борбена готовност поради настаните во Јариње, соопшти Министерството за одбрана.

Како што е наведено во соопштението, тактичките групи лоцирани во Гарнизонот во Рашка, воената база Рудница и во правец кон административниот премин Јариње, се во состојба на зголемена борбена готовност.

Во меѓувреме, српскиот претседател Александар Вучиќ денеска телефонски разговараше со генералниот секретар на НАТО, Јенс Столтенберг по повод, како што изјави шефот на Алијансата, „загрижувачката состојба во северниот дел на Косово“.

Тензиите меѓу Косово и Србија се зголемија пред една недела по одлуката на косовската влада за воведување на пробни косовски таблички за возилата со српски регистарски ознаки. Србите од северно Косово поради тоа ги блокираа патиштата кон граничните премини Брњак и Јариње кон Србија.

Србија, која не ја признава својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

Филипче - Од утре почнува вакцинацијата со трета доза против ковид-19 за одредени категории граѓани

Министерот за здравство Венко Филипче

Граѓаните над 60 години, здравствените работници и лица со имунолошки болести со потврда од утре ќе можат да примат трета доза вакцина против ковид-19, потврди денеска министерот за здравство Венко Филипче. Тој посочи дека процесот на скрининг во училиштата ќе почне најверојатно за две недели.

„Граѓаните над 60 години согласно временскиот период после примената втора доза на вакцина ќе добијат порака да се вакцинираат, притоа таа порака ќе биде потсетување во смисла дека нема посебен термин или пункт, може да одат каде било најблиску до местото на живеење. И понатаму ќе функционира пунктот во салата „Борис Трајковски“, во сите други поликлиники тука во Скопје и ширум државата“, рече Филипче.

Одговарајќи на новинарско прашање, за скринингот во училиштата министерот Филипче рече дека најверојатно ќе започне за две недели.

Во Берене беше устоличен српскиот епископ Методиј

Устоличување на епископот будимљанско-никшиќки Методиј во манастирот Ѓурѓеви ступови кај Беране

Епископот будимљанско-никшиќки на СПЦ денеска беше устоличен во манастирот Ѓурѓеви ступови кај Беране, на церемонија која ја предводеше патријархот на Српската православна црква Порфириј во присуство на црногорскиот премиер Здравко Кривокапиќ, членови на неговата влада, пратеници од владејачкото мнозинство и голем број граѓани.

Церемонијата и литургијата која и претходеше беа обележани со масовно кршење на епидемиолошките мерки од страна на највисоките претставници на власта, во ситуација кога Црна Гора е една од земјите со најбрзо ширење на коронавирусот во Европа, пренесува новинската агенција Бета.

Методиј на чело на епархијата ќе го наследи доскорешниот еписокп Јоаникиј, кој на 5 септември во Цетиње беше устоличен за митрополит црногорско-приморски на СПЦ.

Чинот на устоличување на Методиј не беше проследен со тензии, како на почетокот на септември, кога Јоаникиј беше устоличен на Цетиње со демонстрации и силно противење на граѓаните.

Неколку илјади граѓани тогаш го блокираа Цетиње во обид да го спречат устоличувањето, зашто на СПЦ гледаат како на негатор на црногорскиот идентитет, нација, држава, јазик и култура.

Со висок безбедносен ризик, устоличувањето се изврши во Цетињскиот манастир во кој патријархот Порфириј и митрополитот Јоаникиј беа донесени со воен хеликоптер под силна полициска заштита.

Претходно, полицијата со солзавец ги разби демонстрантите, а во судирите беа повредени 60 полицајци и демонстранти.

МНР на Албанија: Србија да ги повлече вооружените сили од косовска граница

Косовски специјалци на граничниот премин Јариње кон Србија

Албанското Министерство за надворешни работи реагираше во врска со случувањата на северот на Косово, „изразувајќи загриженост за однесувањето на Србија“.

„Министерството за Европа и надворешни работи на Република Албанија е многу загрижено поради ескалацијата на ситуацијата на северот на Република Косово и најостро ги осудува вандалските дејствија на некои лица. Ништо не ја оправдува употребата на насилство, оштетување на јавниот имот и непочитување на законот. Министерството за Европа и надворешни работи бара овие вандали да бидат изведени пред лицето на правдата“, стои во официјалната реакција на Министерството.

Се додава дека Албанија е особено загрижена за распоредувањето на српските вооружени сили во близина на границата со Косово и воените авиони кои прелетуваат во близина и над воздушниот простор на Косово, кои ги „поттикнуваат поединците да провоцираат немири и насилство, како и да го дестабилизираат Косово“.

Овие акти, се оценува, се косат со меѓународните договори, кои имаат за цел да обезбедат ред и стабилност во тој дел од регионот.

Албанското МНР ја повикува Србија да ги повлече своите вооружени сили во близина на границата, бидејќи, како што стои, провоцираат насилство и посочува дека единствено решение за намалување на тензиите е дијалогот и оти Албанија ќе продолжи да ги поттикнува страните за тоа.

„Ја повикуваме Србија да ги повлече своите вооружени сили испратени на границата со Косово и да работи за итна деескалација на ситуацијата. Ги повикуваме сите актери да покажат воздржаност и веднаш да се упатат кон дијалог, како единствен начин за напредување и решавање на отворените прашања во духот на соработката, на кои Албанија е неповратно посветена, во своите билатерални и мултилатерални напори“, се наведува понатаму во реакцијата.

Тензиите меѓу Косово и Србија се зголемија пред пет дена по одлуката на косовската влада за воведување на пробни косовски таблички за возилата со српски регистарски ознаки. Србите од северно Косово поради тоа ги блокираа патиштата кон граничните премини Брњак и Јариње кон Србија.

Србија, која не ја призна својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

На граничните премини се распоредени косовски специјалци, а српски воени авиони ја надлетуваат граничната линија.

Албанија - Утре почнува учебната година, наставниот кадар мора да има сертификат или негативен тест

Дете оди на уличиште во Тирана на 14 септември 2020 година

Во Албанија утре почнува новата 2021/2022 учебна година, а со самото тоа стапува во сила одлуката на Комитетот на експерти за справување со пандемијата, според која наставниот кадар мора да поседува сертификат за вакцинација или негативен тест, што треба да го прават еднаш неделно.

„Утре стапува во сила наредбата за презентирање на потврдата за вакцинација од страна на образовниот кадар во сите училишта во земјата, додека од 11 октомври тоа важи за студентите. Алтернативата за немање сертификат за вакцинација ќе биде неделниот тест или алтернативна настава за невакцинирани студенти“, рече министерката за здравство Огерта Манастирлиу.

Според неа, зголемениот интерес во текот на отворените месеци за вакцинација довело до над 80 отсто од наставниот кадар во основните и средните училишта да е вакциниран со една доза и над 60 отсто со две дози, што, оцени таа, претставува висока покриеност со имунизација против Ковид-19.

Поради трендот на раст на новозаразени и починати од Ковид-19, министерката упати апел до граѓаните да не потпаѓаат под влијание на пропагандата на антивакцерите и да се вакцинираат, како единствен начин на заштита.

Парламентарни избори за наследник на Меркел во Германија

Избори во Германија

Денеска во Германија се одржуваат избори за нов парламент, односно Бундестаг, кој треба да ја определи иднината на земјата, но и на Европа.
Анкетите покажуваат тесна трка за наследник на канцеларката Ангела Меркел која се пензионира по 16 години на власт. Нејзината коалиција ЦДУ/ЦСУ заостанува зад социјалдемократите (СДП), кои се помал партнер во актуелната влада.

Последните анкети покажуваат дека разликата меѓу нив е само неколку процентни поени, но сепак во маргината на грешка, а многу гласачи се неопределени.

Премиерот на Северна Рајна – Вестфалија Армин Лашет е кандидат за канцелар на конзервативната коалиција ЦДУ/ЦСУ, но од неговата номинација во јануари неговата поддршка паѓа.

Во изненадувачки развој на настаните, поддршката за кандидатот на социјалдемократите Олаф Шолц, министер за финансии и вицепремиер, летово се зголеми. Тој се претставува себе си како „кандидат за континуитет“ со оглед на тоа што е вицеканцелар во владата на Меркел.

Иако исходот на изборите е нејасен, повеќето набљудувачи очекуваат тројна коалиција, но не се знае кој ќе биде во неа.

Шолц рече дека ги сака Зелените во неговата влада, но исто така не исклучи вклучување на крајно левата Ди Линке (Левица), ако го надминат прагот од 5 проценти од гласовите да влезат во парламентот.

Шансите на Ди Линке за влез во владата се отскочна штица и за Лашет кој постојано ги предупредува гласачите дека Германија може силно да заврти во лево ако Германците ѝ дадат поддршка на СДП.

„Ако саката стабилност во Германија, ЦДУ/ЦСУ мора утре да биде на прво место“, рече тој на последниот настан во кампањата во неговиот роден град Ахен, заедно со Меркел.

Канцеларката рече дека Лашет е „градител на мостови“, кој направи многу за градење на европското единство.

Друга можна коалиција е продолжување на соработката на ЦДУ/ЦСУ и СДП, можеби заедно со Зелените или со пробизнис Слободните демократи (ФДП).

Меѓутоа, со години постои незадоволство во левичарски наклонетото младинско крило во СДП поради партнерството со конзервативците.

Зелените се на трето место на анкетите, а нивен кандидат за канцелар е Аналена Баербок. Се очекува тие да го зголемат бројот на пратеници и да влезат во владата.

Ако СДП победи, тие може да се обидат да формираат влада со Зелените и со ФДП, но аналитичарите велат дека таква идеолошки различна коалиција може тешко да се формира.

Крајно десничарската Алтернатива за Германија (АфД) не е вклучена во коалициските пресметки и покрај рејтингот од 11 отсто, зашто сите партии одбиваат да соработуваат со нив.

Главни теми на изборите се климатските промени, пензиите, даноците, минималната плата, домувањето, образованието, здравството, миграциите и дигитализацијата.

Четири Палестинци убиени во судирите со израелските војници на Западниот Брег

Архивска фотографија: Протести на Палестинците на Западниот Брег

Израелските војници убиле најмалку четири Палестинци рано утринава во оружените судири за време на апсењата во окупираниот Западен Брег.
Како што наведе израелската војска, целта била апсење припадници на Хамас на пет локации.

Тројца вооружени Палестинци биле убиени во селото Бидо кај Рамала, а еден кај Џенин, јавуваат палестинските медиуми.

Палестинците наводно отвориле оган кон израелски војници во селото Буркин, каде што израелските сили опколиле една куќа за време на апсењата.

Израелската војска влегла и во градот Беит Фаџар јужно од Витлеем и Хеброн.

Судири имало и во селото Беит Анан северно од Ерусалим каде што биле ранети двајца Палестинци.

Израелскиот премиер Нафтали Бенет рече дека биле апсени припадници на Хамас кои планирале изведување терористички напади во непосредна иднина.

Портпаролот на израелската војска рече дека во апсењето учествувала елитната воена контратерористичка единица, полицијата, граничната полиција и припадници на безбедносните служби.

Ова се најкрвавите судири меѓу израелските сили и палестинските екстремисти на Западниот Брег во изминатите недели.

Екстремистичкото движење Хамас, кое владее со другата палестинска територија – Појасот Газа, соопшти дека денешните убиства се „резултат на продолжувањето на соработката“ на меѓународни признатата палестинска управа, која владее на Западниот Брег, и израелската влада. Хамас се финансира од Иран.

Израел го освои Западниот Брег во 1967 година и во наредните децении таму основа десетици еврејски населби во кои живеат скоро половина милион еврејски доселеници. Палестинците бараат Западниот Брег да биде дел од нивната идна држава, а еврејските населби ги сметаат за пречка за решавање на судирите со Израел.

Ердоган сигнализира подготвеност да купи повеќе руски ракетни системи

Турскиот претседател Реџеп Таип Ердоган

Турскиот претседател Реџеп Таип Ердоган сигнализира дека размислува за купување повеќе софистицирани руски противвоздушни ракетни системи, потег што дополнително ќе го налути Вашингтон.

Турција, која е членка на НАТО, беше исфрлена од програмата за борбените авиони Ф-35, а турски претставници во одбраната без санкционирани откако Анкара го купи рускиот систем С-400 во 2019 година.

САД велат дека користењето на руски систем во НАТО претставува опасност за авионите Ф-35.

Турција, пак, тврди дека системот С-400 може да се користи независно, без да биде интегриран со системите на НАТО.

Ердоган за американската телевизија Си Би Ес рече дека на Турција не ѝ била понудена можност да купи американски противвоздушен систем Патриот. Тој се пожали што Вашингтон не ги испорачал стелт авионите Ф-35, и покрај тоа што Турција платила 1,4 милијарди долари. Си Би Ес објави делови од интервјуто кое во целост треба да се емитува денеска.

Воени експерти велат дека противвоздушниот ракетен систем С-400 е еден од најнапредните системи за противвоздушна одбрана во светот.
Ердоган треба да се сретне со рускиот претседател Владимир Путин на 29 септември.

Најмалку тројца загинати и повеќе повредени во железничка несреќа во САД

Илустрација

Најмалку тројца луѓе загинаа, а повеќе се повредени денеска кога воз излета од шините во американската сојузна држава Монтана, објави железничката компанија Амтрак.

Седум од десетте вагони од композицијата излетале од шините околу 16 часот по локално време, односно околу полноќ по европско време во близина на местото Џоплин на северот на Монтана, наведува компанијата.

Во возот кој сообраќал од Сиетл до Чикаго имало 146 патници и 16 вработени.

Амтрак соопшти дека испратил тимови на местото на несреќата и дека тие соработуваат со локалните власти да ги префрлат повредените патници и безбедно да ги евакуираат останатите.

На видео снимките објавени на социјалните мрежи се гледа најмалку еден превртен вагон.

Координаторката на итната служба во Монтана за Њујорк Тајмс изјави дека најмалку 50 луѓе се повредени.

Причината за несреќата сè уште не е позната.

Наутро свежо, во текот на денот сончево и топло

Временска преогноза

Утрово времето е свежо, а преку ден ќе биде сончево и топло. Ќе дува слаб до умерен ветер од променлив правец. Минималната температура ќе биде во интервал од 4 до 9, а максималната од 27 до 32 степени.

Во Скопје времето ќе биде сончево и топло. Минималната температура ќе се спушти до 7, а максималната ќе достигне до 31 степен.

Времето утре ќе биде сончево и топло со мала до умерена облачност, а кон крајот на денот облачноста ќе се зголеми. Од вторник ќе настапи значителна промена на времето. Ќе преовладува претежно облачно и свежо време со повремени врнежи од дожд со променлив интензитет.

Дневните температури значително ќе опаднат и ќе бидат под просекот за овој период од годината.

Заев очекува исчекор во односите со Бугарија по изборите таму и во Македонија

Премиерот Зоран Заев

Премиерот Зоран Заев денеска рече дека очекува исчекор во односите со Бугарија по завршувањето на локалните избори во Македонија на 17 октомври, како и парламентарните избори во Бугарија кои треба да се одржат на крајот на ноември.

„Очекуваме зелено светло во Бугарија, се надевам час поскоро, најскоро во декември да може да го направиме следниот получекор – првата меѓувладина конференција“, рече Заев, додавајќи дека потоа следува скрининг процесот, па отворањето на кластерите.

Тој повтори дека градењето пријателство треба да оди билатерално, сите следни чекори што ќе ги преземаме ќе бидат со давањето поддршка од страна на Бугарија кон Македонија за нашиот европски пат.

Заев рече дека со блокадата на македонските евроинтеграции, Бугарија го прекршила договорот за добрососедство меѓу двете земји.

„Сега можеме да живееме ние со блокадата уште 27 години, како што беше со Грција. Тоа зависи како ќе одлучиме сите ние, или како што ни кажува нашиот народ, барем по истражувањата и тоа што стои, мудри политики водејќи грижа за целокупното достоинство на македонскиот народ, почитувајќи ја историјата, изнаоѓајќи ги европските начини како да продолжи нашата земја да се движи кон европското семејство заради европските вредности“, истакна премиерот Зоран Заев.

Нови 392 случаи на коронавирус, 17 починати

Илустрација

Во изминатото деноноќие се регистрирани 392 случаи на коронавирус во Македонија, а 17 луѓе починале од вирусот, информира Министерството за здравство. Направени биле 4.633 тестирања.

Најмногу нови случаи се регистрирани во Скопје – 180, Куманово 32, Кавадарци 20, Битола 18, Кочани 17, Прилеп и Велес по 16, Кичево 14, Тетово, Охрид и Штип по 11, Гевгелија и Крива Паланка по 7, Кратово 6, Радовиш и Валандово по 4, Ресен и Пробиштип по 3, Гостивар, Струмица, Делчево и Виница по 2 и во Неготино, Дебар, Берово и Демир Капија по еден нов случај.

Регистрирани сe 339 оздравени пациенти.

Починатите се на возраст од 46 до 98 години.

Дополнително се пријавени уште три лица починати со ковид-19 од 12 до 22 септември.

Вкупната бројка на КОВИД-дијагностицирани лица во нашата земја од почетокот на епидемијата изнесува 189.551 бројката на оздравени пациенти е 170.734, на починати е 6.577, а бројот на активни случаи изнесува 12.240.

Индија наредниот месец ќе извезе осум милиони вакцини против коронавирус

Вакцини против коронавирус на Џонсон и Џонсон

Индија до крајот на октомври ќе извезе осум милиони дози од вакцината против коронавирус, откако ја укина забраната за извоз на вакцини, соопшти тамошното Министерство за надворешни работи.

Премиерот Нарендра Моди тоа го ветил и на вчерашниот Самит на лидерите на САД, Индија, Австралија и Јапонија што се одржа во Вашингтон.

Најголем дел од вакцините на производителот Џонсон и Џонсон ќе бидат наменети за земјите во азиско-пацифичкиот регион.

Индиските власти оваа недела ја укинаа забраната за извоз на вакцини, зашто во Индија се намали бројот на заболени и починати од коронавирусот, а вакцинацијата е забрзана.

Индија е еден од најголемите светски производители на лекови. Земјата соопшти дека до крајот на наредната година ќе испорача една милијарда дози од вакцините против коронавирус, но испораките без запрени во мај поради растот на бројот на заразени и починати во земјата.

Околу 47 отсто од населението во Индија примило барем една доза вакцина, а 16 отсто ги примиле двете дози.

Распуштена организацијата во Хонгконг која го организира одбележувањето на убиствата на Тјенанмен

Демонстрант стои пред тенковите на плоштадот Тјенанмен во Пекинг во 1989 година

Организација од Хонгконг, која го организира годишното бдеење на 4 јуни во знак на сеќавање на демонстрантите убиени на плоштадот Тјенанмен во Кина во 1989 година ќе се распушти, откако се соочи со обвиненија поврзани со национална безбедност.

Тоа е најновата од десетици граѓански организации кои се повлекоа во изминатата година, откако Пекинг го воведе законот за национална безбедност во Хонгконг.

„Верувам дека луѓето во Хонгконг, без разлика која е нивната улога, ќе продолжат да го одбележуваат 4 јуни како претходно“, изјави Ричард Цои, секретар на организацијата Хонгконшка алијанса за поддршка на патриотските демократски движења во Кина.

За распуштање на организацијата гласале 41 нејзин член, а четворица биле против, рече Цои.

Хонгконг традиционално го одржува најголемото годишно бдеење во светот на 4 јуни, иако полицијата ги забрани последните два настани поради загриженост од ширењето на коронавирус. Кина ги забранува комеморациите и ја цензурира темата.

Кина никогаш не даде целосен извештај за сузбивањето на протестите во 1989 година. Властите подоцна соопштија дека имало околу 300 жртви, но организациите за човекови права и очевидци велат дека можеби биле убиени илјадници луѓе.

Пекинг во воведе контроверзниот закон во Хонгконг пред една година, по што ги затвори или протера најголемиот број од продемократски политичари.

Поранешната британска колонија е дел од Кина, но е управувана според принципот „една земја, два система“, што значи дека градот има сопствен правен систем и права, меѓу кои и слобода на говор и слобода на печат.

Српски борбени авиони ја надлетуваат административната граница со Косово

Илустрација: Полицајци на ЕУЛЕКС во близина на Звечан

Косовските Срби шести ден по ред протестираат незадоволни од распоредувањето на специјалните полициски сили на граничните премини Јариње и Брњак и одлуката на Приштина да ги замени српските регистарските таблички. Како што објави РТС, два авиони на Војската на Србија во два наврата околу пладне прелетаа над областа во близина на административниот премин Јариње, како и попладнево уште еднаш.

Појавувањето на авионите предизвика аплауз од насобраните, кои извикуваа „Србија, Србија“, објави РТС.

Во изминатите неколку дена, над областа кај Јариње прелетаа и хеликоптери на Војската на Србија.

„Од четврток, три хеликоптери МИ-35 ќе ја надлетуваат областа веднаш до административната линија во близина на преминот Јариње од страна на централна Србија“, потврдија вчера од Министерството за одбрана.

Српскиот министер за внатрешни работи, Александар Вулин, изјави дека МВР и неговите единици и Војската на Србија се подготвени да одговорат на секоја ескалација, но и дека ќе сторат сè за да избегнат какви било конфликти и сè да биде мирно, нагласувајќи дека вооружените единици на Приштина мора да се повлечат од северот на Косово.

„Србија има право со хеликоптери да го контролира секој дел од нејзината територија до административната линија, и тоа се наши редовни активности. Се разбира, сега нашиот интерес за таа област дополнително се зајакна и загрижени сме што вооружени луѓе стојат спроти невооружени цивили“, изјави министерот Вулин во утринската програма на ТВ Прва.

Ноќеска биле запалени објекти во Зубин Поток и Звечан на северот на Косово. Косовскиот премиер Албин Курти ја обвини Србија дека ги користи косовските граѓани за да предизвика сериозен меѓународен конфликт.

Тензиите меѓу Косово и Србија се зголемија пред пет дена по одлуката на косовската влада за воведување на пробни косовски таблички за возилата со српски регистарски ознаки. Србите од северно Косово поради тоа ги блокираа патиштата кон граничните премини Брњак и Јариње кон Србија.

Србија, која не ја призна својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

Најмалку осум загинати во експлозија на автомобил бомба во Могадишу

Самоубиствен бомбашки напад во Могадишу

Најмалку осум луѓе, меѓу кои две деца, денеска загинаа во Могадишу во експлозија на автомобил бомба на контролен пункт во близина на претседателската палата, соопшти сомалиската полиција.

„Потврдено е дека осум луѓе, главно цивили, загинаа, а седуммина се ранети во експлозија на бомба во автомобил“, наведе полицијата.

Самоубиствениот напад се случил претпладнево на контролен пункт на еден километар од претседателската палата.

Очевидци рекоа дека возилото експлодирало додека му приоѓале стражарите на контролниот пункт.

Одговорноста за нападот ја презедоа џихадистите од организацијата Ал Шабаб, која се формираше во 2000 година по спојувањето на неколку сомалиски исламистички организации и Ал Каеда.

НАТО Центар за поддршка ќе им помага на домашните компании да учествуваат на тендери на Алијансата

Илустрација

Преку НАТО Центар за поддршка на домашните компании што од денеска ќе функционира во Министерството за одбрана, фирми од земјава ќе може да учествуваат на тендери за потребите на Северноатлантската алијанса, кои на годишно ниво изнесуваат 5 милијарди евра.

Премиерот Зоран Заев, министерката за одбрана Радмила Шекеринска и заменик-министерот за финансии Димитар Ковачевски денеска на прес-конференција во Министерството за одбрана истакнаа дека преку центарот компаниите имаат можност да учествуваат во постапките за набавките на НАТО и земјите членки.

„Членството во НАТО ни овозможи сигурност на безбедносен план, но носи и големи придобивки за економијата. Компаниите можат да аплицираат и да заработат од вкупниот буџет од 5 милијарди евра. Нашите компании се рамноправни со другите фирми од земјите членки на НАТО и пред нив има огромни можности за заработка“, истакна Заев.

НАТО Центарот за поддршка ќе биде точка од која компаниите ќе ги добиваат сите информации за учество на тендерите. Тој, како што наведе Заев, нема да биде само бирократска алатка туку алатка која ќе им помага на фирмите.

Шекеринска, пак, порача дека во НАТО центарот домашните компании ќе имаат поддршка, не само административна, туку и за успешно аплицирање на тендери и поврзување со светските гиганти кои веќе имаат договори со НАТО-агенциите, а имаат потреба и од добавувачи.

Курти по палењето објекти во северно Косово - Србија провоцира сериозен меѓународен конфликт

Центарот за регистрација на возила во зградата на Општина Зубин Поток

Косовскиот премиер Албин Курти, по повод синоќешните напади на објекти во општините со мнозинско српско население, Зубин Поток и Звечан, ја обвини Србија дека ги користи косовските граѓани за да предизвика сериозен меѓународен конфликт.

Курти на својата страница на Фејсбук напиша дека овие акти се дело на криминалци и дека е „јасно оти тие се поттикнати и поддржани од Србија, односно од тамошниот автократски режим“.

„Поединци или групи на кои владеењето на правото и јавната безбедност им ги загрозуваат криминалните активности ја напаѓаат нашата држава и го загрозуваат мирот. Јасно е оти тие се поттикнати и поддржани од Србија, односно од тамошниот автократски режим. За жал, пред очите на меѓународната заедница, Србија користи граѓани на Косово за да испровоцира сериозен меѓународен конфликт“, напиша Курти.

Тој порача дека таквите напади нема да се толерираат и ги повика граѓаните да останат спокојни и да соработуваат со институциите.

Министерот за внатрешни работи на Косово, Џељаљ Свечља денеска информира дека синоќа по полноќ е запален Центарот за регистрација на возила, кој се наоѓа во објектот на општината Зубин Поток, а нападнат е и Центарот за регистрација во Звечан.

Во објава преку својата страница на Фејсбук, Свечља оцени дека станува збор за „криминални акти со терористички елементи“.

Тензиите меѓу Косово и Србија се зголемија пред пет дена по одлуката на косовската влада за воведување на пробни косовски таблички за возилата со српски регистарски ознаки. Србите од северно Косово поради тоа ги блокираа патиштата кон граничните премини Брњак и Јариње кон Србија.

Србија, која не ја призна својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

Пожар и подметнат експлозив на северот на Косово

Центарот за регистрација на возила во зградата на Општина Зубин Поток

Косовскиот министер за внатрешни работи Џељаљ Свечља денеска соопшти дека непознати лица претходната ноќ го запалиле Центарот за регистрација на возила во зградата на Општина Зубин Поток, а дека со експлозив е извршен напад врз Центарот за цивилна регистрација во Звечан.

КоССев пренесува дека Свечља на Фејсбук напишал дека тие кривични дела имаат „терористички елементи“.

„Овие кривични дела најдобро покажуваат што би се случиле на граничните премини Јариње и Брњак да не се присутни Специјалните единици за обезбедување на редот и сигурноста“, напиша Свечља.

Тој исто така ги повика жителите на северот на Косово да ги почитуваат законите и да не дозволуваат да бидат манипулирани од оние кои имаат „материјална користи само благодарејќи на тензиите“.

Косовските медиуми претходно објавија дека бомбата на регистрацискиот центар во Звечан наводно ја фрлиле Срби „кои не прифаќаат реципроцитет за регистарските таблички“.

Денеска е петти ден од блокадата на Србите од северно Косово на патиштата кај Брњак и Јариње поради одлуката на косовската влада за воведување на пробни косовски таблички за возилата со српски регистарски ознаки.

Србија, која не ја призна својата поранешна покраина како посебна нација и ја смета својата граница со Косово како „административна“ и привремена граница, со години симнува регистарски таблички од автомобили регистрирани од Косово, кои влегуваат во Србија. Возачите треба да платат пет евра за привремена регистарска табличка од 60 дена.

Српскиот патријарх Порфириј денеска стигнува во Црна Гора за устоличување на епископот Методиј

Патријархот на Српската православна црква (СПЦ) Порфириј

Патријархот на Српската православна црква (СПЦ) Порфириј денеска пристигнува во Црна Гора, каде што треба да го устоличи епископот будимљанско-никшиќки Методиј, во манастирот Ѓурѓеви ступови кај Беране.

Свечениот дочек на Порфириј е закажан за 17 часот пред манастирот, а чинот на устоличување за в недела во 9 наутро.

СПЦ и Епархијата будимљанско-никшиќка ги повикаа верниците да присуствуваат на тој чин.

Методиј на чело на епархијата ќе го наследи доскорешниот еписокп Јоаникиј, кој на 5 септември во Цетиње беше устоличен за митрополит црногорско-приморски на СПЦ.

Чинот на устоличување на Методиј и најавата на тој настан не е проследен со тензии, како на почетокот на септември, кога Јоаникиј беше устоличен на Цетиње со демонстрации и силно противење на граѓаните.

Неколку илјади граѓани тогаш го блокираа Цетиње во обид да го спречат устоличувањето, зашто на СПЦ гледаат како на негатор на црногорскиот идентитет, нација, држава, јазик и култура.

Со висок безбедносен ризик, устоличувањето се изврши во Цетињскиот манастир во кој патријархот Порфириј и митрополитот Јоаникиј беа донесени со воен хеликоптер под силна полициска заштита.

Претходно, полицијата со солзавец ги разби демонстрантите, а ви судирите беа повредени 60 полицајци и демонстранти.

Медицинскиот факултет во Белград прв воведе ковид-пропусници во Србија

Илустрација: Тврдината Калемегдан во Белград

Студентите, наставниците, соработниците и ненаставниот кадар на Медицинскиот факултет во Белград, додека трае актуелната епидемиолошка состојба, ќе можат да влезат на факултетот само со ковид-пропусница.

Управата на Факултетот, повикувајќи се на одредбите од Законот за заштита на населението од заразни болести, усвои документот според кој услов за присуство на часовите и вршење на други активности на факултетот е „отсуство на знаци и симптоми на акутна респираторна инфекција и треска“, доказ за целосна имунизација, доказ за прележана болест ковид-19, серолошки докази за постоење на антитела или ПЦР тест не постар од 72 часови.

„Непочитувањето на наведените мерки повлекува одговорност пропишана со законот, подзаконските акти и општи и индивидуални акти на факултетот“, се наведува во документот усвоен на седница на наставно-научниот совет на Медицинскиот факултет во Белград.

Премиерката Ана Брнабиќ во Њујорк изјави дека темата за воведување на корона пропусниците во Србија сè уште е „на маса“ и рече дека нешто повеќе од 53 отсто од населението во Србија е вакцинирано.

„Темата за ковид пропусниците сè уште е на маса, за која, како што зборував овде во Њујорк, се користи за да се мотивираат младите да се вакцинираат. Ова не е мерка што ќе нè заштити од заразување, бидејќи може да се заразите и надвор, но тоа е мотивирачка мерка. Затоа апелирам, ве молам, верувам во граѓанска солидарност“, изјави Брнабиќ.

Бајден домаќин на Самитот на „Четворката“ со поглед на Кина

Поглед на Овалната соба во Белата куќа

Американскиот претседател Џо Бајден вчера во Белата куќа им беше домаќин на лидерите на Австралија, Индија и Јапонија за да го зацврстат сојузот во подем, познат како Четворката (Квад), кој има заедничка загриженост поврзана со Кина.

Самитот на нагласи потребата за слободен, стабилен и отворен Индо-Пацифички регион.

Иако Кина не беше спомената во јавните забелешки од четворицата лидери, се очекуваше Пекинг да биде на врвот на агендата, со оглед на тоа што Вашингтон го обновува својот стратешки фокус на Индо-Пацифичкиот регион.

Лидерите на Квад претходно годинава одржаа онлајн средба, но ова е прв собир во живо.

Бајден, кој често зборува за борбата на демократиите против автократии во Русија и Кина, на состанокот кажа дека Четворката е на фронтот на многу глобални предизвици.

Формулацијата „слободен и отворен Индо-Пацифик“ навестува заедничка загриженост за зголеменото кинеско економско и воено влијание во регионот, особено за слободата на пловидба и за воената експанзија на Пекинг во Јужното Кинеско Море.

Во заедничката изјава по разговорите, четворицата лидери соопштија дека се посветени на „промовирање на слободниот, отворен поредок базиран на правилата вкоренети во меѓународното право и брз страв од принуда“.

„Ние се залагаме за владеење на правото, слобода на пловидба и прелетување, мирно решавање на споровите, демократски вредности и територијален интегритет на државите“, соопштија тие.

Претходно, портпаролот на кинеското Министерство за надворешни работи Жао Лиџијан ја критикуваше Четворката.

„Затворена, ексклузивна клика насочена кон други земји е спротивна на трендот на времето и аспирациите на земјите од регионот. Таа нема да наиде на поддршка и е осудена на неуспех“, рече тој на брифинг со новинарите.

Самитот доаѓа една недела откако САД и Велика Британија објавија нов пакт за безбедност со Австралија, вклучувајќи договор за обезбедување подморници на нуклеарен погон за Канбера.

Франција ги отповика своите амбасадори во САД и во Австралија обвинувајќи ја администрацијата на Бајден дека ѝ забила нож во грб со тоа што овозможила откажување на милијарди вредниот договор за набавка на подморници од Франција.

Сепак, тензиите се намалија по телефонскиот разговор меѓу Бајден и францускиот претседател Емануел Макрон во кој се договорија да преземат чекори за поблиска координација во Индо-Пацификот.

Вчитај повеќе

XS
SM
MD
LG