Достапни линкови

Вести

Димитров: Ако македонскиот јазик е причината да не се приближиме кон ЕУ, тогаш така и нека биде

Проблематизирањето на македонскиот јазик не е во согласност со вредностите за кои се залага Европа како континент, каде што се негуваат јазичната и културната разновидност и каде што сите народи се третираат достоинствено и со почит, вели вицепремиерот за европски прашања Никола Димитров во интервју за „Еуроњуз“.

„Ако постои политичка волја и лидерство во Бугарија, мислам дека можеме да најдеме европско решение кое би било добро и за македонско-бугарското пријателство и за европското ветување кон регионот и за Северна Македонија. Но, тука има едно „ако“, затоа што ние веќе сторивме сè што можевме. И, искрено, доколку мојот мајчин јазик, македонскиот, е причина за тоа да не можеме да се приближиме кон ЕУ, тогаш така и нека биде. Тогаш, ЕУ и не е тоа што сме мислеле дека е – заедница на вредности“, вели Димитров во интервјуто во кое зборува за предизвиците и пречките на патот на Северна Македонија кон Европската Унија.

Според него, тоа што Бугарија го доведува во прашање правото на земјата да го обликува својот сопствен идентитет и историја, создаде само горчина во една од најпроевропските земји на континентот. Димитров нагласува дека ветото на Бугарија за отворање на пристапни преговори на земјава со ЕУ оди на штета и на меѓусоседските односи и на кредибилитетот на Унијата.

Тој потенцира дека отпочнувањето на преговорите е повеќе од заслужено поради пропуштеното време и преседаните на евроинтегративниот пат, но пред сѐ поради постигнатите резултати во приближување кон европските стандарди и покажаното лидерство и зрелост во решавање на проблемите.

Според вицепремиерот, сепак и покрај последното разочарување, Владата останува посветена на остварување на аспирациите на земјава за членство во ЕУ и ќе продолжи активно да бара решение, но со истакнување на одредени позиции од кои нема отстапување.

види ги сите денешни вести

Израелската окупација на палестинските територии е нелегална, одлучи судот на ОН

Судиите на Меѓународниот суд на правдата во Хаг на 24.5.2024.
Судиите на Меѓународниот суд на правдата во Хаг на 24.5.2024.

Највисокиот суд на Обединетите нации (ОН) на 19 јули соопшти дека израелската окупација на палестинските територии и населби е незаконска и дека Израел треба да се повлече што е можно поскоро.

Советодавното мислење на судиите на Меѓународниот суд на правдата, познат како Светски суд, не е обврзувачко, но има тежина според меѓународното право и може да ја ослаби поддршката за Израел, пренесува Ројтерс.

„Израелските населби на Западниот Брег и Источен Ерусалим, и режимот поврзан со нив, беа воспоставени и одржувани со кршење на меѓународното право“, рече претседателот на Меѓународниот суд на правдата, Наваф Салам, читајќи ги наодите на 15-члената комисија.

Судот рече дека обврските на Израел вклучуваат плаќање на компензација за штетата и „евакуација на сите доселеници од постоечките населби“.

Израел го отфрли мислењето на судот

Во брзата реакција, израелското Министерство за надворешни работи го отфрли мислењето на Меѓународниот суд на правдата како „фундаментално погрешно“ и еднострано и го повтори својот став дека политичко решение во регионот може да се постигне само преку преговори.

„Еврејската нација не може да биде окупатор во својата земја“, се вели во соопштението од кабинетот на израелскиот премиер Бенјамин Нетанјаху.

Мислењето ги налути и доселениците на Западниот Брег, но и политичарите како министерот за финансии Безалел Смотрич, чија националистичка верска партија е блиска до движењето на доселениците и кој самиот живее во населба на Западниот Брег.

„Одговор на Хаг - суверенитет сега“, рече тој во објава на платформата „Х“, во очигледен апел Западниот Брег да биде формално припоен од Израел.

Мислењето на Меѓународниот суд на правдата, исто така, утврди дека Советот за безбедност на ОН, Генералното собрание и сите држави имаат обврска да не ја признаат окупацијата како легална или да „обезбедат помош“ за одржување на присуството на Израел на окупираните територии.

Палестинското Министерство за надворешни работи го нарече мислењето „историско“ и ги повика државите да го почитуваат.

„Нема никакво помагање. Нема соучесништво. Нема пари, оружје, трговија... нема какви било активности за поддршка на нелегалната окупација на Израел“, рече палестинскиот министер за надворешни работи Ријад ал Малики пред судот во Хаг.

Случајот произлегува од барањето за правно мислење од 2022 година од страна на Генералното собрание на ОН, пред војната во Газа која започна во октомври.

Израел го освои Западниот Брег, Појасот Газа и Источен Ерусалим - области на историската Палестина што Палестинците ги сакаат за држава - во војната на Блискиот Исток во 1967 година и оттогаш изгради населби на Западниот Брег и постојано ги проширува.

Израелските лидери тврдат дека териториите не се легално окупирани бидејќи се на спорна територија, но Обединетите нации и поголемиот дел од меѓународната заедница ги сметаат за окупирана територија.

Во февруари, повеќе од 50 земји ги презентираа своите позиции пред судот, а палестинските претставници побараа од судот да утврди дека Израел мора да се повлече од сите окупирани територии и да ги растури илегалните населби.

Израел не учествуваше во усните аргументи, но поднесе писмена изјава во која му кажа на судот дека издавањето советодавно мислење би било „штетно“ за напорите за решавање на израелско-палестинскиот конфликт.

Повеќето земји-учеснички побараа од судот да ја прогласи окупацијата за нелегална, додека неколку, вклучително и Канада и Британија, тврдеа дека треба да одбие да издаде советодавно мислење.

Соединетите Американски Држави се најголемиот воен сојузник и поддржувач на Израел и побараа од судот да не нареди безусловно повлекување на израелските сили од палестинските територии.

Ставот на САД беше дека судот не треба да донесе никаква одлука што би можела да им наштети на преговорите за решение за две држави засновано на принципот „земја за мир“.

Во 2004 година, Меѓународниот суд издаде советодавна одлука дека тампон зоната на Израел околу поголемиот дел од Западниот Брег е нелегална и дека израелските населби се основани со кршење на меѓународното право. Израел ја отфрли пресудата.

Јужноафриканската Република го обвини Израел за геноцид врз Палестинците во Газа пред Меѓународниот суд на правдата.

Војната во Газа започна откако Хамас, наведен како терористичка организација од САД и Европската унија, го нападна јужниот дел на Израел на 7 октомври, убивајќи околу 1.200 луѓе и зеде 250 заложници. По масакрот на Хамас, главно на цивили, Израел започна офанзива на Газа.

Според Министерството за здравство на Газа, под контрола на Хамас, во борбите загинале повеќе од 38.000 луѓе. На таа палестинска територија живеат околу 2,3 милиони луѓе.

Меѓународниот суд на правдата (МСП), наречен и Светски суд, е највисокото правно тело на Обединетите нации, основано во 1945 година за да ги решава споровите меѓу државите.

Панелот од 15 судии на МСП, проширен со дополнителен судија од секоја страна во спорот, се занимава, на пример, со гранични спорови, како и со други случаи иницирани од држави кои обвинуваат други земји за прекршување на обврските од договорите на ОН. Неговата јурисдикција секогаш се заснова на согласност на суверените држави на страните во предметниот спор. Без претходна или ад хок согласност, тој суд нема јурисдикција.

Во овој суд нема посебно обвинителство. Овој суд е надлежен и за спорови од Конвенцијата за геноцид од 1948 година.

Дачиќ го посети ранетиот полицаец во Лозница

Полиција во Лозница, западна Србија
Полиција во Лозница, западна Србија

Министерот за внатрешни работи Ивица Дачиќ го посети Вјекослав Илиќ, полицаецот кој беше повреден во нападот на 18 јули на запад на Србија во петокот во ппштата болница во Лозница, кога беше убиен уште еден полицаец.

„Го посетив Илиќ, кој е во стабилна состојба и се опоравува. Србија ја цени и почитува неговата пожртвуваност и храброст, но и вредностите што ги носи секој српски полицаец, подготвен да го жртвува сопствениот живот за да ги заштити своите граѓани и земјата“, изјави министерот Дачиќ.

Нападот врз полицајците се случил во раните утрински часови кога при рутинска контрола го запреле возилото во кое се наоѓал осомничениот.

При излегувањето од автомобилот, напаѓачот со пиштол ги застрелал полицајците, а потоа побегнал. Српските власти нападот го означија како „терористички“.

Министерот за внатрешни работи Ивица Дачиќ во петокот соопшти дека е убиено лицето кое усмрти еден и рани уште еден полицаец.

Дачиќ во своето обраќање пред новинарите не го откри името на убиениот, наведувајќи дека на 19 јули припадници на полицијата „ликвидирале албански терорист“ во селото Бања Ковиљача во близина на границата со Босна и Херцеговина.

Министерството за надворешни работи и дијаспора на Косово побара од српските власти да го потврдат идентитетот на убиениот.

Полицијата во Србија со фотографијата претходно соопшти дека интензивно трага по Фатон Хајризи, косовски државјанин кој избега од затвор во Косово.

Германец осуден на смрт со стрелање во Белорусија, тврди група за човекови права

Затвор во Минск, Белорусија (илустративна фотографија)
Затвор во Минск, Белорусија (илустративна фотографија)

Германец обвинет од Белорусија за извршување на неколку злосторства, вклучително и „тероризам“ и „платеничка активност“, е осуден на смрт со стрелање, објави белоруската група за човекови права на 19 јули.

Рико Кригер (30) е осуден според шест члена од белорускиот кривичен законик на тајно судење одржано на крајот на јуни, објави Центарот за човекови права Вијасна, пренесува агенцијата Франс Прес.

Точните обвиненија против него не беа веднаш јасни, а официјалната новинска агенција на Белорусија не објави ништо за неговиот случај.

Обвиненијата може да се поврзани со полковникот Калинуски, група доброволци и белоруски борци кои се бореле против Русија во конфликтот во Украина, објави Вијасна.

Според профилот на ЛинкедИн, за кој Вијасна вели дека му припаѓа на Кригер, тој работел како спасител за германскиот Црвен крст и како чувар за амбасадата на Соединетите држави во Берлин.

Ова е првпат некому да му се суди за платеничка активност во Белорусија, објави групата „Вијасна“.

Белорусија е единствената европска земја која дозволува смртна казна, резервирајќи ја за тешки злосторства, вклучително и тероризам и предавство.

Нетанјаху е против изградба на привремена болница за децата од Појасот Газа

Бенјамин Нетанјаху, pремиер на Израел
Бенјамин Нетанјаху, pремиер на Израел

Премиерот на Израел, Бенјамин Нетанјаху ги блокира плановите за изградба на полска болница во Израел во која би се лекувале болните и повредени деца од Појасот Газа.

Израелскиот министер за одбрана Јоав Галант на почетокот од неделата најави полска болница како привремена мерка за да се обезбеди лекување на децата додека е затворен за цивили граничниот премин Рафа помеѓу Појасот Газа и Египет.

Според Галант во привремената болница би се лекувале децата заболени од карцином, дијабетис и децата со ортопедски повреди.

Во соопштението од кабинетот на Нетанјаху се наведува дека „не се одобрува изградба на болница за жителите на Газа на израелска територија и затоа истата нема да биде изградена“.

Вирусот на детска парализа е пронајден во примероците од отпадните води од разурнатиот дел од Појасот Газа, соопштија во четвртокот Министерството за здравство кое е под контрола на Хамас.

Министерството за Газа контролирано од Хамас, кое САД и ЕУ го сметаат за терористичка организација соопшти дека илјадници луѓе кои живеат во преполни кампови за раселени луѓе сега се изложени на ризик да заболат од многу заразна болест која може да предизвика деформитети и парализа.

Српски хеликоптер го изгасна пожарот во близина на селото Росоман

Српски хеликоптер Камов К-32
Српски хеликоптер Камов К-32

Припадниците на Одделот за вонредни состојби и хеликоптерската единица на Министерството за внатрешни работи на Србија гаснеа пожар во близина на селото Росоман во Северна Македонија.

Според српското МВР, на таа локација од противпожарен хеликоптер испуштиле 20 тони вода.

Од 16 јули, во Северна Македонија се испуштени вкупно 157 тони вода.

„Екипа на МВР во текот на вчерашниот ден успешно го стави под контрола пожарот кај градот Радовиш, на планината Плачковица, каде исто така самостојно ја изврши интервенцијата“, се вели во соопштението.

Помошта од Србија е испратена врз основа на барање на Владата на Северна Македонија.

Министерството за внатрешни работи на Србија претходно соопшти дека испраќа противпожарен хеликоптер Камов К-32 со капацитет од пет тони вода во Северна Македонија со седум припадници на тамошното Министерството за внатрешни работи.

Пожарите во Северна Македонија опустошуваат стотици хектари, а веќе 30 дена е прогласена вонредна состојба. Во исто време, криза има и во однос на противпожарната опрема, па се гаснат и возила стари 45 години.

Во Северна Македонија нема доволно пожарникари, па општините си помагаат, а помош почна да пристигнува и од други земји.

Топлотниот бран ги зафати земјите од Западен Балкан, а екстремните температури на места надминуваат и 40 Целзиусови степени. Се очекува ова да биде најдолгиот и најинтензивен топлотен бран во 2024 година.

Почина шефот на Комунистичката партија на Виетнам

Нгујен Фу Тронг
Нгујен Фу Тронг

Нгујен Фу Тронг, генерален секретар на виетнамската владејачка Комунистичка партија, почина во петокот, на 19 јули, по 13 години на најмоќната позиција во земјата, за кое време го надгледуваше брзиот економски раст, долгогодишната борба против корупцијата и прагматичната надворешна политика. Имаше 80 години.

Неговите должности се привремено предадени на претседателот То Лам, ѕвезда во подем во партијата, кој би можел дополнително да ги зацврсти своите овластувања доколку му се дозволи да ги задржи двете улоги, пренесува Ројтерс.

Нгујен Фу Тронг почина во раните попладневни часови „поради старост и тешка болест“, се вели во соопштението на Комунистичката партија на својата веб-страница, без да се образложи природата на болеста.

Во соопштението се цитирани информации од неговиот медицински тим, во кој се вели дека тој починал „по период на болест, и покрај тоа што сесрдно го лекувале партијата, државата, тим од професори, лекари и водечки медицински експерти“.

То Лам ја презеде функцијата во четвртокот бидејќи шефот на партијата беше болен. Партијата сега ќе треба да одлучи дали То Лам официјално ќе биде назначен за вршител на должноста шеф на партијата до завршувањето на неговиот сегашен мандат во 2026 година или дали пред тоа ќе избере нов шеф од своите.

Иако Виетнам официјално нема врховен владетел, Нгујен Фу Тронг е најмоќната фигура во земјата како генерален секретар на партијата, функција што ја извршува од 2011 година.

Тој обезбеди трет мандат во 2021 година, откако беше отфрлено правилото на владеењето во два мандати, покажувајќи ја својата сила и значително политичко влијание во партијата која владее со обединет Виетнам речиси половина век.

Но, во последниве месеци тој се појавуваше изнемоштен на јавни настани и пропушти неколку состаноци на највисоко ниво.

Некои бизнисмени и аналитичари ја видоа консолидацијата на моќта под То Лам како потенцијално позитивно за забрзување на донесувањето одлуки во земјата од Југоисточна Азија, која е дом на големите фабрики на врвни мултинационални компании, вклучувајќи ги Самсунг, Интел, Канон и главниот снабдувач на Епл, Фокскон.

Откако беше објавена смртта на Нгујен Фу Тронг, јавните настани беа откажани низ целата земја до 25 јули, додека банерите на државните веб-страници станаа црно-бели.

Државните радиодифузери емитуваа документарен филм за Нгујен Фу Тронг со наслов: „Генералниот секретар Нгуен Пу Тронг: непоколеблив, интелектуален, примерен лидер“.

Баровите во главниот град Ханој одбија да служат пијалоци или да пуштаат музика во петокот навечер.

Нгујен Фу Тронг се школувал во Советскиот Сојуз и се сметал за марксистичко-ленинистички идеолог, но сепак негувал врски со Соединетите Држави.

Во 2017 година, тој го започна она што многумина го сметаа за борба против корупцијата во кинески стил, позната како „жешка печка“, во која стотици функционери беа под истрага за поткуп, а многумина беа принудени да поднесат оставки, вклучително и министрите во кабинетот, претседателот на парламентот и двајца претседатели на држави.

Нгуен Пу Тронг беше домаќин на американскиот претседател Џо Бајден и кинескиот лидер Си Џинпинг во Ханој минатата година, зајакнувајќи ги односите со двете земји и покрај зголемените тензии меѓу САД и Кина.

Амбасадата на Соединетите Американски Држави во Виетнам соопшти дека Нгујен Пу Тронг е „визионерски лидер кој со децении служел како мост меѓу Виетнам и Соединетите Држави“ и го пофали дека е првиот лидер на виетнамска партија што ги посетил Соединетите држави.

Кинеската комунистичка партија, исто така, испрати порака со сочувство до Виетнам, нарекувајќи го „доверлив марксист“ и „добар другар, брат и пријател“, објавија државните медиуми.

Тав Македонија: Засега нема откажани летови, сите аеродромски системи се во функција

Аеродромот во Скопје (архивска фотографија)
Аеродромот во Скопје (архивска фотографија)

ТАВ Македонија, подружница на ТАВ Аеродроми, аеродромскиот оператор на двата македонски аеродроми извести дека сите аеродромски системи се во функција и засега нема откажани летови, а не се соочуваат ниту со прекини или технички проблеми на нивните системи.

„Факт е дека одредени авиокомпании се соочуваат со тешкотии со нивните системи, но ние преземавме мерки за овозможување на непречени операции на аеродромите“, стои во соопштението од ТАВ.

Апелираат сите патници да ги проверат и потврдат информациите за нивниот лет со авиокомпанијата или туристичката агенција преку која резервирале авиобилет.

„Сите аеродромски сектори се во состојба на подготвеност поради глобалниот ИТ прекин и се преземаат сите неопходни мерки за опслужување на нашите патници на најдобар можен начин, дополнуваат“ од ТАВ.

Поради проблемите во глобалните ИТ системи, од компанијата „Виз ер“ која лета од Меѓународниот аеродром „Скопје“, соопштија дека патниците ќе може да доживеат прекини низ мрежата бидејќи услугите на веб страницата и мобилните апликации се привремено недостапни.

„За време на прекинот, достапно е бесплатно пријавување на аеродромот. Затоа, ги советуваме патниците да пристигнат на аеродромот најмалку 3 часа пред закажаното време на поаѓање за да овозможат доволно време за пријавување, безбедносна контрола и здравствени и безбедносни процедури специфични за аеродромот“ пишува во соопштението на компанијата.

Поради голем ИТ дефект денеска на 19 јули светските авиокомпании, аеродромите на најмалку четири континенти, здравствените системи, банките, телекомуникациите, медиумите и други компании, институции и организации се соочуваат со потешкотии во работата.

Сè поголем број влади и институции тврдат дека зад големиот технолошки дефект што ги погоди компаниите и системите ширум светот, не стои хакерски напад, а виновникот го наоѓаат во софтверот на компанијата за кибер безбедност „Крауд Страјк“ (CrowdStrike).

Американски новинар осуден во Русија на 16 години затвор

Новинарот Еван Грешкович
Новинарот Еван Грешкович

На 19 јули, судот во Русија го осуди Еван Гершкович, новинарот на „Волстрит журнал“ на 16 години затвор. Тој беше прогласен за виновен за обвиненијата за шпионажа кои тој, неговиот работодавец и американската влада ги отфрлија како политички мотивирани.

Судот ја донесе својата одлука веднаш по сослушувањето на завршните зборови во петокот, еден ден откако работодавачот на Гершкович и американскиот Стејт департмент побараа негово итно ослободување.

Портпаролот на Кремљ, Дмитриј Песков во Москва одби да одговори на новинарско прашање за причините за забрзаниот процес на донесување судска одлука, велејќи дека не може да ја коментира. Тој додаде дека судењето на Гершкович се одвивало зад затворени врати поради „чувствителноста на случајот“.

Судењето, кое започна на 26 јуни, се одржа зад затворени врати во Регионалниот суд во Свердловск во градот Урал, Екатеринбург, откако беше поместен од 13 август на барање на тимот на одбраната.

Гершкович беше уапсен во Екатеринбург на 29 март 2023 година, додека беше на новинарска задача.

Потоа беше обвинет дека се обидел да добие информации за фабриката што произведува тенкови за руската војна во Украина и да ги пренесе на американската Централна разузнавачка агенција ЦИА.

Тој е првиот американски новинар кој беше уапсен и осуден на 19 јули под обвинение за шпионажа во Русија по Студената војна.

Гершкович е 32-годишен американско-роден син на имигранти од поранешниот Советски Сојуз.

„Волстрит журнал“ и американската влада силно ги отфрлија наводите за шпионажа, велејќи дека Гершкович ја вршел својата работа како овластен новинар само кога бил уапсен. „Волтстрит журнал“ во изјавата на 18 јуни рече дека Гершкович бил неправедно уапсен.

„И покрај тоа што Русија го организира своето срамно лажно судење, ние продолжуваме да правиме се што можеме за да бараме итно ослободување на Еван“, се вели во соопштението на весникот во четвртокот.

На 18 јули, заменик портпаролот на американскиот Стејт департмент Ведант Пател не ги коментираше можните преговори за размена на затвореници.

Тој рече дека Вашингтон бара ослободување на Гершкович и уште еден затворен американски државјанин, поранешниот маринец Пол Вилан, што е можно поскоро.

„Сакаме и двајцата веднаш да се вратат дома и ќе продолжиме да работиме во оваа област додека не се обединат повторно со нивните најблиски“, рече Пател.

Тој додаде дека ниту еден претставник на американската амбасада не може да присуствува на судењето на 18 јули.

Русија се пожали на извештаите на американските медиуми за можна размена на Гершкович.

Барањата на Гершкович да биде ослободен од озлогласениот московски затвор Лефортово, каде што се наоѓаше од неговото апсење, беа одбиени.

Неговото апсење дојде околу една година откако Русија донесе нови закони со кои се криминализира критиката за војната на Москва против Украина, која Кремљ ја нарекува „специјална воена операција“, како и изјави за кои се смета дека ја дискредитирале војската.

Гершкович е еден од двајцата американски новинари кои во моментов се задржани од руските власти.

Втората е Алсу Курмашева, 47-годишна новинарка во Радио Слободна Европа, која има двојно американско-руско државјанство.

Курмашева беше уапсена во Казан во октомври и обвинета за нерегистрација како „странски агент“ според кривичниот руски закон што ги таргетира новинарите, активистите на граѓанското општество и други.

Таа е обвинета и за ширење невистини за руската војска и се соочува со затворска казна до десет години доколку биде осудена.

Радио Слободна Европа и американската влада велат дека обвиненијата се одмазда за нејзината работа како новинарка на медиумот со седиште во Прага.

Курмашева не беше означена како „неправедно приведена“, и покрај постојаните повици од нејзиниот работодавец и семејството да се случи тоа.

Нови 26 случаи на голема кашлица, две лица се хоспитализирани изминатата недела

Институт за јавно здравје
Институт за јавно здравје

Нови 26 случаи на голема кашлица се пријавени во периодот од 12 до 18 јули, што претставува намалување од 35,4 отсто во споредба со претходниот седмодневен период, информира Институтот за јавно здравје.

Најголем дел од случаите се пријавени во Скопје - 10. Пријавени се и седум случаи од Куманово, по два во Кратово и Тетово и по еден случај во Гевгелија, Неготино, Кичево, Битола и од Крива Паланка. Возраста на заболените се движи од три месеци до 70 години, а најголем број случаи се од возрасната група до четири години. Од новите случаи, хоспитализирани се две лица, покажува најновиот извештај на ИЈЗ објавен на 19 јули.

„Заклучно со 18 јули, во Северна Македонија се регистрирани вкупно 931 случај на голема кашлица, со инциденца од 50,7/100.000 жители. Тоа претставува неколкукратно зголемување на бројот на заболени во однос на изминатиот петгодишен период - од 2019 до 2023 година, кога се регистрирани вкупно 10 случаи“, пишува во извештајот.

Од вкупниот број заболени лица, кај 924 лица се регистрирани симптоми, додека болеста кај седум лица е во асимптоматска форма.

Епидемиолошките истражувања покажуваат поврзаност на 151 случај.

„Порастот на бројот на невакцинирани деца - пад на опфат со задолжителна имунизација, антивакциналните кампањи, но и колебливоста на родителите во однос на имунизацијата, доведуваат до повторна појава на вакцино - превентабилни заболувања во Северна Македонија“, наведуваат од ИЈЗ.

Во тек се три епидемии, пријавени во ниво на територијата на Скопје, Куманово и на Тетово.

Од вкупниот број регистрирани случаи, 580 не биле вакцинирани, не се комплетно вакцинирани согласно возраста или нема доказ за вакцинација. Од случаите кои се комплетно вакцинирани - 264, просекот на поминато време од последната доза на вакцина до заболувањето изнесува 13 години.

Од 18 јануари до 18 јули, дадени се вкупно 59.972 дози вакцина со компонента против голема кашлица.

Големата кашлица е едно од најзаразните заболувања. Кашлањето е често, силно, трае и до 100 дена. Силната бактериска инфеција може да предизвика дополнителни компликации.

Убиен напаѓачот на полицајците во Србија, објави Дачиќ

Полиција во градот Лозница во западна Србија на местото каде што беа застрелани двајца полицајци, 18 јули 2024 година.
Полиција во градот Лозница во западна Србија на местото каде што беа застрелани двајца полицајци, 18 јули 2024 година.

Министерот за внатрешни работи Ивица Дачиќ на 19 јули изјави дека е убиен напаѓачот што уби полицаец еден ден претходно во Лозница во западна Србија.

„Припадници на полицијата го ликвидираа во околината на Лозница убиецот на полицаецот“, рече Дачиќ.

Министерството за внатрешни работи на Србија претходно соопшти дека интензивно трага по Фатон Хајризи, кој е осомничен за напад на полицајци. Српското МВР ја објави фотографијата на Хајризи и ги повика граѓаните на соработка.

Престрелката се случила во раните утрински часови кога полицајците при рутинска контрола го запреле возилото во кое се наоѓал осомничениот. Излегувајќи од автомобилот со пиштол ги застрелал полицајците, а потоа побегнал. Властите го означија нападот како терористички.

„Обвинителството за организиран криминал случајот ќе го смета за терористички чин бидејќи се работи за напад врз функционери“, изјави министерот за полиција Дачиќ на 18 јули.

Полицијата соопшти дека на лице место е пронајден пасош издаден во Косово на име Артан Хајризи (1991) и германска лична карта.

Министерот Ивица Дачиќ изјави дека се проверува дали лицето чии документи се пронајдени е братот на Артан Хајризи, Фатон Хајризи, кој избега од затвор во Косово.

На 18 јули Артан Хајризи за медиумите изјави дека е во Германија и дека неговиот брат Фатон му го украл пасошот.

На 18 јули во Бјелина, Босна и Херцеговина, беше уапсено лице кое превезувало осомничено лице од Прешево на југот на Србија во Лозница, каде пукал во полицајци.

Вчитај повеќе

XS
SM
MD
LG