Достапни линкови

Вести

Хеликоптер на АРМ ќе се справува со пожарот над Галичник

Пожар илустрација
Пожар илустрација

Со хеликоптер на АРМ ќе се гаси пожарот што избувна попладнево над село Галичник, соопшти Центарот за управување со кризи (ЦУК). Пожарот е на непристапен терен и зафатил борова шума, а огинот брзо се шири оти има ветер. Пожарот претставува потенцијална опасност за селото Галичник, но истовремено и за силите ангажирани за негово гаснење, велат од ЦУК.

Во ЦУК информација за пожарот добиле околу 13 и 30 часот, но заради непристапноста на теренот ја известиле и Армијата. Од ЦУК соопштија дека ќе обезбедат и координати и лице на терен за комуникација со хеликоптерскиот армиски екипаж.

За пожарот се известени Дирекцијата за заштита и спасување, локалните противпожарни единици, МВР, а и другите субјекти од Системот за управување со кризи (СУК), согласно процедурите за работа на дежурните регионални центри за управување со кризи, се додава во соопштението.

Според ЦУК, пожарот зафатил борова шума на непристапен терен и заради засилениот ветар претставува потенцијална опасност за селото Галичник, но истовремено и за силите ангажирани за негово гаснење.

види ги сите денешни вести

За соработниците на Навални нема место во Москва за збогување со него

илустрација
илустрација

Соработниците на починатиот опозициски политичар Алексеј Навални велат дека не можат да најдат локација во руската престолнина за да одржат јавна церемонија за збогување со критичарот на Кремљ, откако неговата мајка рече дека официјални лица ја уценувале да одржи тајна комеморација.

„Ги повикавме повеќето приватни и државни агенции за погреби, трговски субјекти и погребални салони. Некои велат дека местата се зафатени. Некои одбиваат да разговараат кога ќе го слушнат името на Навални. На едно место директно ни кажаа дека им било наредено да не соработуваат со нас“, напиша портпаролката на Навални, Кира Џармиш, за платформата X.

Роднините на Навални допрва треба да ги потврдат деталите за прошталната церемонија и погребот на борецот за борба против корупцијата, објави Current Time, медиумски проект на руски јазик кој го води Радио Слободна Европа во соработка со Гласот на Америка.

Телеграмскиот канал База во понеделникот (26 февруари), повикувајќи се на неименувани извори на гробиштата Борисовско во Москва, објави дека неговите вработени започнале со подготовките за погребот на Навални во текот на ноќта, додавајќи дека 29 февруари е одреден како прелиминарен датум.

База објави и видео што го добило од следбеник, а на кое се гледа дека местото на гробиштата Борисовско претходната вечер било темелно исчистено од снег, со присуство на голем број полициски возила. Видеото не е независно потврдено.

Неколку телеграмски канали спомнаа можни места каде што би можел да биде погребан Навални, вклучително и три гробишта во Москва, Борисовско, Хованско и Троекуровско.

Телото на Навални и беше предадено на неговата мајка Људмила Навални на 24 февруари, повеќе од една недела по неговата сомнителна смрт во казнената колонија на Арктикот. Причината за смртта на 47-годишниот лидер на опозицијата не е соопштена.

Пред да биде предадено телото, Навалнаја рече дека властите поставуваат услови за тоа каде, кога и како да биде погребан нејзиниот син.

„Тие сакаат тоа да биде тајно“, рече таа.

Во меѓувреме, стотици Руси беа уапсени додека му оддаваа почит на Навални на локации низ Русија. Роднините, соработниците и западните претставници на Навални го обвинија претседателот Владимир Путин за смртта на опозицискиот лидер во затвор. Руските власти ја отфрлија вината и го нарекоа „хистеричен“ гневот на Меѓународната заедница поради смртта на Навални додека беше во затвор.

Митрески за продолжување на рокот на патните исправи: Меѓународните договори не можат да се менуваат со друг закон

Јован Митрески, претседател на Собранието на РСМ
Јован Митрески, претседател на Собранието на РСМ

На прашањето дали мнозинстовото во законодавниот дом утре (28 февруари) ќе даде поддршка за продолжување на важноста на патните исправи, претседателот на македонското Собрание, Јован Митрески одговори дека меѓународните договори не можат да се менуваат со друг закон.

„Според информациите што ги добивам е дека тој закон нема да ги реши проблемите и дека е спротивен на членот 118 од Уставот во смисла на тоа дека меѓународните договори дека се дел од внатрешниот правен промет и фактички дека не можат да се менуваат со друг закон, така да конечната одлука ќе биде соопштена во текот на денот“, изјави Митрески.

Тој додаде дека во текот на денешниот ден ќе го дополни дневниот ред за утрешната седница за законот на патни исправи, а во врска со поддршката на пратениците рече дека одлуките ги носат самите пратенички групи.

Опозициската ВМРО-ДПМНЕ минатата недела повика на поддршка од владеjачкото мнозинство за продолжување на важноста на патните исправи. Според нив, потребни се 15 пратеници од власта, кои заедно со пратениците на ВМРО-ДПМНЕ, ќе го изгласаат законот за продолжување на важноста на пасошите.

Претседателот на СДСМ, Димитар Ковачевски минатата недела пак, изјави дека залудно ќе биде менување на закон со којшто ќе се продолжи рокот на траење на пасошите со Република Македонија, затоа што тоа треба да биде усогласено со Грција и со ЕУ.

Тој посочи дека Владата треба да обезбеди согласност од земјите-членки на ЕУ и од другата потписничка страна – Грција, па потоа да разговара за менување на закон.

Столтенберг вели дека НАТО не планира испраќање борбени трупи во Украина

Јенс Столтенберг, генерален секретар на НАТО
Јенс Столтенберг, генерален секретар на НАТО

Генералниот секретар на НАТО Јенс Столтенберг изјави дека Алијансата не планира да испрати борбени трупи во Украина. Тој рече дека земјите-членки на НАТО и даваат поддршка без преседан на Украина.

„Тоа го правиме од 2014 година. Меѓутоа, нема планови за распоредување борбени трупи на НАТО во Украина“, рече Столтенберг.

Отфрлајќи ја можноста за воена акција на НАТО, Столтенберг повтори дека рускиот напад врз Украина сериозно го крши меѓународното право и дека врз основа на тоа, украинската страна има право на самоодбрана.

„НАТО има право да ја поддржи Украина да се брани од руската агресија“, рече Столтенберг.

Претходно пак, портпаролот на Кремљ, Дмитриј Песков изјави дека појавувањето на војници на НАТО на територијата на Украина ќе доведе до директен конфликт со Русија и ескалација на ситуацијата.

Осврнувајќи се на вчерашната изјава на францускиот претседател Емануел Макрон дека нема консензус за испраќање војници на европските земји во Украина, но дека „ништо не треба да се исклучи“, портпаролот на Кремљ кажа дека дискусиите на западните земји за можноста за испраќање свои војници во Украина претставува нов, многу важен елемент.

„Сите други елементи во говорот на францускиот претседател веќе се претставени на еден или друг начин и веќе ги зедовме предвид“, рече тој, додавајќи дека Москва добро ја знае позицијата на Макрон - „на Русија треба да и се нанесе стратешки пораз."

По вчерашната конференција за Украина во Париз, Макрон изјави дека нема консензус за испраќање војници од европските земји во Украина, но нагласи дека „ништо не треба да се исклучува“.

„Во моментов нема консензус за испраќање војници. Ништо не треба да се исклучи. Ќе направиме се за Русија да не победи“, рече Макрон на прес-конференција, пренесоа медиумите.

На самитот во Париз присуствуваа околу 20 европски лидери, а Елисејската палата соопшти дека целта на состанокот беше да му се испрати на рускиот претседател Владимир Путин „порака дека Европа е решена да и помогне на Украина и да се спротивстави на „наративот на Кремљ“ дека Русија мора победи во војната, која влезе во третата година“.

Во Брисел состаноци за користењето на динарот на северот на Косово

илустрација
илустрација

Со посредство на Европската Унија (ЕУ) во вторник (27 февруари)во Брисел се одржуваат средби во рамки на дијалогот Косово-Србија, со цел да се најде решение за користењето на српскиот динар на територијата на Косово.

Белградската страна на средбите ја претставува главниот преговарач Петар Петковиќ, а Приштина - гувернерот на Централната банка на Косово (ЦБЛ), Ахмет Исмаили.

Регулативата на ЦБК, која стапи на сила на 1 февруари, го предвидува еврото како единствена валута за готовинско плаќање во Косово и забранува употреба на српскиот динар.

Според ЕУ, оваа одлука предизвикала практични проблеми за српската заедница во Косово, која го користела динарот и добивала помош од Србија во таа валута. Затоа, ЕУ свика состанок за 27 февруари за да се најде решение за прашањето.

Србите од Косово бараат да се поништи одлуката за забрана на динарот
please wait

No media source currently available

0:00 0:03:06 0:00

Главниот преговарач на Косово, Бесник Бислими, на 21 февруари рече дека ја одбил поканата на претставникот на ЕУ за дијалог, Мирослав Лајчак, објаснувајќи дека тоа не е состанок на кој главниот преговарач мора да оди бидејќи, како што рече, „ прашањето за динарот не е дел од дијалогот“.

Лајчак во вторник најпрвин се среќава со претставниците на српската делегација, а потоа и со косовската делегација. Заеднички состанок може да се случи доколку двете страни се подготвени да најдат практични решенија.

ЦБК донесе одлука единствено средство за готовина и платежни трансакции да е еврото, со што се укинува српскиот динар. Оваа одлука беше критикувана од Меѓународната заедница, која ги повика Приштина и Белград да најдат решение за ова прашање во рамките на дијалогот за нормализација на односите.

Припадниците на српската заедница добиваат различни приходи од српскиот буџет во динари, а Меѓународната заедница предупреди дека одлуката на Косово да го укине може да ги зголеми етничките тензии.

Рускиот активист за човекови права Орлов осуден на две и пол години затвор

Активистот за човекови права Олег Орлов во судницата за време на читањето на пресудата, Москва, 27 февруари 2024 година
Активистот за човекови права Олег Орлов во судницата за време на читањето на пресудата, Москва, 27 февруари 2024 година

Рускиот активист за човекови права, ветеранот Олег Орлов во вторник (27 февруари) беше осуден на две и пол години затвор, откако судот во Москва го прогласи за виновен за дискредитација на руските вооружени сили, процес што меѓународните набљудувачи го осудија како политички мотивиран.

Седумдесетгодишниот Орлов повеќе од две децении беше еден од водачите на групата за човекови права Меморијал. Таа организација ја доби Нобеловата награда за мир во 2022 година, една година откако беше забранета и распуштена во Русија.

Обвинителството побара од Головинскиот окружен суд во Москва да го осуди Орлов на две години и 11 месеци затвор, обвинувајќи го за постојано „дискредитирање“ на руската армија поради инвазијата на Украина.

Околу 200 поддржувачи чекаа во ходникот пред судницата за да се простат од него.

Орлов беше обвинет за дискредитација на руската војска во колумна напишана за француското онлајн издание Медиапарт и беше осуден во октомври по првото судење.

Казната беше релативно лесна казна и обвинителите побараа ново судење.

Додека другите активисти бегаа од се посуровата репресија, Орлов остана во Русија, велејќи дека е „покорисен“ таму, отколку во странство.

Орлов, чие повторно судење започна на 16 февруари, дојде во судот држејќи копија од романот „Процес“ на Франц Кафка, во кој се зборува за човек кој бил уапсен и суден за обвиненија за кои не знаел.

Тој неодамна за АФП изјави дека кариерата помината работејќи на историската меморија на советските злосторства и кршењето на човековите права во модерна Русија - особено во Северен Кавказ - не му оставила друг избор освен да води кампања против офанзивата во Украина.

Меморијал организацијата се етаблираше како клучен столб на руското граѓанско општество со зачувување на споменот на жртвите на комунистичката репресија и кампања против кршењето на човековите права.

Организацијата беше официјално распуштена од руските власти кон крајот на 2021 година и ја доби Нобеловата награда за мир во 2022 година заедно со водечка украинска група за човекови права и ветеран белоруски активист.

Локални избори во Израел

илустрација
илустрација

Во Израел денеска (27 февруари) се одржуваат локалните избори, кои првично беа закажани за крајот на октомври минатата година, но двапати беа одложени поради војната што изби на 7 октомври меѓу Израел и палестинското движење Хамас, кое пак САД и ЕУ го прогласија за терористичка организација.

Околу 7,2 милиони луѓе имаат право да излезат на гласање во Ерусалим, населбите на окупираниот Западен Брег и дел од анектираната Голанска Висорамнина.

Локалните избори беа одложени во ноември минатата година во градовите и кибуците во близина на Појасот Газа, како и во градовите во северниот дел на Израел во близина на границата со Либан, каде што има тешки борби меѓу израелската армија и либанското исламистичко движење Хезболах.

Речиси 150 илјади Израелци беа раселени поради војната или непријателствата во овие два региона. Двајца кандидати за избори во евакуираните области беа убиени во нападот што го започна Хамас во јужен Израел на 7 октомври.

Израелските војници, вклучително и оние стационирани во Појасот Газа, почнаа да гласаат минатата недела.

Од први март шестмесечна забрана за извоз на рускиот бензин

илустрација
илустрација

Русија во вторник (27 февруари) нареди шестмесечна забрана за извоз на бензин од 1 март за да се одржи стабилноста на цените во услови на зголемена побарувачка од потрошувачите и земјоделците и да се задржи работата на рафинериите.

Забраната, за која првпат беше објавена од рускиот РБЦ, беше потврдена од портпаролката на вицепремиерот Александар Новак, човек на претседателот Владимир Путин за огромниот енергетски сектор на Русија, вториот по големина извозник на нафта во светот.

РБЦ, цитирајќи неидентификуван извор, соопшти дека премиерот Михаил Мишустин ја одобрил забраната откако Новак ја предложил во писмо од 21 февруари.

„За да се компензира прекумерната побарувачка на нафтени деривати, неопходно е да се преземат мерки за стабилизирање на цените на домашниот пазар“, наведува Новак во предлогот.

Домашните цени на бензинот во Русија се чувствително прашање за возачите и земјоделците во најголемиот светски извозник на пченица пред претседателските избори на 15-17 март, додека некои руски рафинерии беа цел на напади со украински беспилотни летала во последните месеци.

Нафтата, нафтените деривати и гасот го сочинуваат убедливо најголемиот дел од рускиот извоз и главниот извор на заработка во странска валута за руската економија од 1,9 трилиони долари, а исто така обезбедуваат Москва да има место на врвот на глобалната енергетска политика.

Кремљ работи со Саудиска Арабија, најголемиот светски извозник на нафта, за да ги одржи високите цени во рамките на пошироката групација ОПЕК+, која ја вклучува Организацијата на земјите извознички на нафта и клучните сојузници.

Русија веќе доброволно го намали извозот на нафта и гориво за 500 000 барели дневно во првиот квартал, како дел од напорите на ОПЕК + за поддршка на цените.

Најголеми производители на бензин во Русија во 2023 година беа рафинеријата Гаспром Нефт во Омск, Рафинеријата НОРСИ на Лукоил во Нижни Новгород и Рафинеријата Рјазан на Роснефт.

Во 2023 година Русија произвела 43,9 милиони тони бензин и извезла околу 5,76 милиони тони, или околу 13 отсто од своето производство. Најголеми увозници на руски бензин се главно африканските земји, вклучувајќи ги Нигерија, Либија, Тунис и Обединетите Арапски Емирати.

Русија минатиот месец го намали извозот на бензин во земјите надвор од Комонвелтот на независни држави за да компензира за непланираните поправки на рафинеријата поради пожари и напади со беспилотни летала врз нејзината енергетска инфраструктура.

Минатата година Русија го забрани извозот на бензин меѓу септември и ноември за да се справи со високите домашни цени и недостигот. Овој пат забраната нема да важи за земјите-членки на Евроазиската економска унија, Монголија, Узбекистан и двата отцепени региони на Грузија поддржани од Русија - Јужна Осетија и Абхазија.

ДИК: Бујар Османи ги собра потребните потписи за претседателска кандидатура

Прес конференција на ДИК (архивска фотографија)
Прес конференција на ДИК (архивска фотографија)

Според најновите објавени податоци на Државната изборна комисија (ДИК) заклучно со вчерашниот ден (26 февруари) до 20 часот вкупно 38 396 граѓани дале потпис за подносителите на кандидатура за претседател на државата. Според објавените податоци на ДИК, досега потребните 10 илјади потписи од граѓаните ги собрал Бујар Османи, кандидат на Демократската унија за интеграција (ДУИ) за кого се потпишале 10 528 граѓани.

Според пресекот на ДИК, по Османи најблиску со собирање на потребните 10 000 потписи на граѓани се лидерот на ЗНАМ, Максим Димитриевски, кандидатот на опозицискиот блок „Вреди“, Арбен Тарвари, кандидатката поддржана од партијата Левица, Билјана Ванковска-Цветковска и кандидатот на ГРОМ, Стевчо Јакимовски.

Постапката за собирање потписи, која почна на 23 февруари ќе трае непрекинато секој ден од 8 до 20 часот, а последниот ден на 8 март ќе работат до 24 часот. Собирањето потписи се одвива во сите подрачни одделенија и канцеларии на ДИК сместени во седиштата на 34 локални самоуправи и пред надлежните нотари.

Кога подносител на листа на кандидат за претседател е група избирачи, потребно е да се соберат најмалку 10 000 потписи од запишаните избирачи во Избирачкиот список, додека кога подносител на листа на кандидат за претседател се пратеници, потребно е да се соберат најмалку 30 потписи од пратениците.

Учесниците на изборите, листите со кандидати за претседател на државата треба да ги достават до ДИК најдоцна до 19 март, на полноќ. Рокот за собирање потписи се однесува и за претседателските и за парламентарните избори.

Бектеши: Од следниот месец нема гарантирани цени на производите

илустрација
илустрација

Министерството за економија нема да ја продолжи мерката за гарантирани цени која завршува на крајот на месецов, туку, како што најавува ресорниот министер Крешник Бектеши, ќе го чека носењето на законот за забрана на нефер трговски практики со кој, според него, ќе се стави ред во нелојалната конкуренција во трговијата и ќе доведе до намалување на цените на прехранбените производи.

„Очекуваме ова законско решение, кое е целосно усогласено со европската регулатива и е со европско знаменце, да биде усвоено во најкраток можен рок. Со законот очекуваме да се намалат цените на прехранбените и земјоделските производи“, изјави Бектеши за МИА.

Законот за забрана на нефер трговски практики во синџирот на снабдување на земјоделски и прехранбени производи, како што кажа, уште во декември 2023 година, на предлог на Министерството за економија беше усвоен од Владата и доставен до Собранието.

Бектеши вели дека законското решение со кое се става ред во нелојалната конкуренција во трговијата и се воведуваат фер практики помеѓу трговците и добавувачите во синџирот со земјоделски и прехранбени производи, се очекува оваа недела да влезе во второ читање во комисиите во Собранието.

Министерството за економија лани на 20 септември донесе Одлука за изменување на одлуката за посебни услови за трговија на одделни стоки, определување на највисоки цени на одделни производи во трговијата на мало, како и обврска трговците да прибавуваат и продаваат определени видови и количество на одделни стоки на потрошувачите, според определен редослед која важи до 29 февруари годинава.

Мерката ги опфаќаше оризот, брашното, лебот, јацата, месото, тестенините и други производи.

Цените на прехранбените производи - еден чекор назад, неколку чекори напред
please wait

No media source currently available

0:00 0:03:39 0:00

Покрај тоа, беше донесена и одлука за изменување на одлуката за определување на највисоки цени за одделни производи во трговијата на големо и трговијата на мало што, исто така, важи до 29 февруари годинава и се однесува на газирани и негазирани пијалаци.

Министерството за економија донесе и одлука за намалување на увозните давачки за увоз на свеж зеленчук што важи до 28 февруари годинава според која применливата царина е 10 отсто за кромид, праз, карфиол и брокула, салата, моркови, модар патлиџан и тиквици, како и одлука за намалување на увозните давачки за увоз на свежи домати, краставици и пиперки што исто така важи до 28 февруари годинава и за кои применливата царина е 10 отсто. Со земјите од ЦЕФТА, пак, нема царина.

Јужна Кореја тврди дека Северна Кореја испратила 6700 контејнери со муниција во Русија

Лидерите на Русија и Северна Кореја, Владимир Путин и Ким Јонг Ил, 13 септември 2023 година
Лидерите на Русија и Северна Кореја, Владимир Путин и Ким Јонг Ил, 13 септември 2023 година

Северна Кореја испратила околу 6 700 контејнери со милиони муниција во Русија од јули за да ја поддржи нејзината војна против Украина, објавија во вторник (26 февруари) јужнокорејските медиуми, цитирајќи го министерот за одбрана.

На брифинг за локалните медиуми во понеделникот, министерот за одбрана Шин Вон Сик соопштил дека контејнерите може да содржат повеќе од три милиони артилериски гранати од 152 мм или 500 000 од 122 мм.

„Можеби е мешавина од двете и може да се каже дека се испратени најмалку неколку милиони гранати“, рече Шин, според новинската агенција Јонхап.

Стотици севернокорејски фабрики за муниција работат со околу 30 отсто од капацитетот поради недостаток на суровини и електрична енергија, но оние што произведуваат артилериски гранати за Русија работат со „полн замав“, додаде тој, без да го прецизира изворот на информацијата.

Сеул и Вашингтон ги обвинија Пјонгјанг и Москва за трговија со оружје и ја осудија Северна Кореја за снабдување на Русија со оружје за нејзината војна против Украина. Двете земји го негираа ова, иако ветија дека ќе ја зајакнат воената соработка.

Американскиот Стејт департмент во извештајот објавен во петокот рече дека Северна Кореја испорачала повеќе од 10 000 контејнери со муниција или сличен материјал во Русија од септември. За возврат, Северна Кореја доби околу 9000 контејнери со претежно резерви на храна, за кои Шин рече дека помогнале да се стабилизираат цените.

Шин рече дека Северна Кореја би можела да лансира уште еден сателит веќе следниот месец, бидејќи Москва продолжува да обезбедува техничка помош, а Пјонгјанг, исто така, побара помош со технологија на авиони и опрема за копнена мобилност, објави Јонхап.

Вчитај повеќе

XS
SM
MD
LG