Достапни линкови

Вести

„Недела неработен ден“ во јануари влегува во собраниска процедура

Собрание на Република Северна Македонија

Законската одредба недела да биде неработен ден би требало да влезе во собраниска процедура по Нова година, очекува министерката за труд и социјална политика, Јагода Шахпаска. Таа на денешната прес-конференција информираше дека имало дилеми во одредени области и затоа им било потребна темелна анализа за да ги соочат аргументите за и против на сите заинтересирани страни.

Дилемите, како што појасни министерката, се околу тоа кој треба да биде опфатен со недела неработен ден, односно кои дејности во државата треба да функционираат – здравството, полицијата, социјалната служба, центрите за детска заштита, старските домови, противпожарните служби, комуналните служби.

„Нашето Министерство ја изработи драфт-верзијата, ја предочивме на сите членови односно партнерите во социјалниот дијалог, се уште во општеството има интерес за ова законско решение – за и против, меѓутоа ние не се откажуваме“, рече Шахпаска.

види ги сите денешни вести

Притвор за шестмината приведени при заплената на марихуана

Скопје- акција на македонската полиција за заплена на 200 килограни канабис,10.04.2021

Скопскиот кривичен суд одредил триесет дневен притвор за шестмината осомничени за шверц на марихуана приведени во акцијата на Министерството за внатрешни работи во петокот во близина на Плетвар, јавија повеќе медиуми. Тие се повикуваат на извори од обвинителството кои велат дека судот го прифатил нивното барање за одредување мерка притвор за „неовластено производство и пуштање во промет наркотични дроги, психотропни супстанции и прекурсори” кривично дело кое е предвидено и казниво по член 215 став 3 од Кривичниот законик.

Полицијата вчера соопшти дека во акцијата која ја спроведе во петокот заедно со американската агенција ДЕА е запленета 200 килограми марихуана во вредност од околу 800 000 евра, а дека до обвинителството поднеле кривични пријави против шест лица Д.Ј.(35) од Струмица, А.У.(45) од Скопје. М.З.(29) од Куманово, М.С.(36) од Битола, К.С.(46) од Прилеп, Г.К.(25) од Скопје.

Покрај претресите во нивните домови во кои се најдени пари, марихуана и оружје, од полицијата соопштија дека извршиле контрола и во две фабрики за производство на медицински канабис во Прилеп и во Битола со кои, како што наведоа од МВР, соработувал А.У.

ВМРО-ДПМНЕ тврди дека во акцијата е приведен Александар Ушликовски, личен возач на Трајче Заев, братучед на премиерот Зоран Заев, а тврдат дека марихуана тргнала од Фирмата Медика 420 од Битола која се поврзувала директно со фамилијата Заеви. Портпаролот Димче Арсовски вели дека Трајче и Бобан Заеви се сопственици на фирма основана во 2019 година во Петрич, Бугарија со име “Медикал 420 БГ”. Тој праша дали случајот има поврзаност со тие фирми.

Трајче Заев на профил на социјалната мрежа Фејсбук на кој стои неговото име, пак, наведува дека ниту еден од уапсените не е вработен во ниедна фирма на Заеви. Од СДСМ реагираа дека „ниту комбето, ниту било кој од приведените во акцијата имаат каква било поврзаност со семејството на претседателот Зоран Заев“.

Нови 687 заразени со Ковид19, починати 46 лица

Пункт за тестирање за коронавирус во Скопје

Министерството за здравство информира дека во последните 24 часа се направени 3.050 тестирања, а регистрирани се 687 нови случаи на Ковид19. Од нив најмногу во Скопје – 310, па потоа следуваат Куманово – 55, Битола – 35, Прилеп, Охрид и Струмица по – 33, Велес – 31, Кавадарци и Тетово по – 23, Гостивар – 19, Штип и Кочани по – 17, Свети Николе – 11. Неколку други градови имаат по едноцифрена бројка новозаразени.

Пријавени се вкупно 46 починати лица од кои од Скопје 13, од Битола шест, од Тетово четири, по три починати пациенти од Куманово, Прилеп и Струмица, по две од Штип, Радовиш и Виница и по еден од Велес, Кавадарци, Охрид, Струга, Неготино, Кратово, Македонски Брод и Македонска Каменица. Најмладиот починат е на 34 годишна возраст, а највозрасниот на 90 години. Од починатите пациенти, 43 се починати во болнички услови, а три лица во домашни услови.

Истовремено регистрирани се 1.347 оздравени пациенти.
Со ова вкупната бројка на ковид дијагностицирани лица во нашата земја од почетокот на епидемијата изнесува 141.844, бројката на оздравени пациенти е 116.780, на починати е 4.228, а бројот на активни случаи изнесува 20.836.

Рааб- Британија и САД силно се против кампањата на Русија за дестабилизација на Украина

Британскиот министер за надворешни работи Доминик Рааб

Британија и Соединетите Американски Држави силно се спротиставуваат на руската кампања за дестабилизација на Украина и ја повикуваат Москва да работи на деескалација на ситуацијата, рече денеска британскиот секретар за надворешни работи Доминик Рааб.

Големо движење на руската војска кон границата со Украина и на украинскиот полуостров Крим кој е анектиран од Русија е забележано на фотографии и видеа, што ги поттикна загрижувањата дека Москва можеби се подготвува да испрати свои сили во источна Украина.

Кремљ ги отфрли барањата на западните земји да ги повлече војниците и негира дека тие се закана наведувајќи дека воените движења на руска територија се суверено прашање.

Соопштението на Рааб доаѓа ден откако украинскиот претседател Володимир Зеленски во Инстанбул го брифираше турскиот колега Реџеп Таип Ердоган за ситуацијата во регионот. По нивните разговори Ердоган ги нарече последните случувања загрижувачки и изрази надеж дека ќе се најде мирно решение преку дијалог и на линија со украинскиот територијален интегритет.

Борисов очекува колективен имунитет во Бугарија во мај

Премиерот на Бугарија Бојко Борисов

Бугарскиот премиер Бојко Борисов во видео објава на својот профил на социјалната мрежа Фејсбук објави дека во петокот Бугарија повторно се договорила и во април, мај и до средината на јуни да добие 2.700.000 вакцини од Фајзер/Бионтех.

„Мислевме дека во август, но убеден сум дека во мај – со повеќе од 3 милиони вакцинирани и опоравени, ќе имаме колективен имунитет за да се стави крај на оваа пандемија“, нагласува Борисов.

Новите случаи на заразени со коронавирусот во изминатите 24 часа во Бугарија се 1.352 од направени 9.118 тестови. Податоците во Бугарскиот унифициран портал за информации покажува дека 14,83 проценти од примероците се позитивни. Од почетокот на пандемијата досега во Бугарија има регистрирано вкупно 371 531 заразени, а 14 351 починаа.

Владата со демант на тврдењата на Милошоски дека Спасовски и Заев делеле пасоши на борци од ИСИС

Зградата на Владата на Република Северна Македонија

Владата на Северна Македонија најостро ги демантира и отфрла како невистинити тврдењата на пратеникот Антонио Милошоски дека наводно „премиерот Заев и министерот Спасовски делеле македонски пасоши на терористи од ИСИС“, се наведува во денешното соопштение од владината прес служба.

"Ова е брутална лага која има за цел да ја манипулира јавноста, да попречува случајот да се расчисти до крај и да направи штета на угледот на институциите кои посветено и успешно се справуваат со секаков вид криминал“, наведуваат од Владата.

Реакцијата следува по прес конференцијата на пратеникот од ВМРО-ДПМНЕ Антонијо Милошоски кој рече дека имаат информации дека македонски пасош издаден во 2018-та година добил и косовскиот државјанин Фитим Дема, член на радикалната терористичка група ИСИС.

Ова е последна прес конференција на опозициската партија која со денови наназад објавува имиња на познати криминалци од регионот, членови на српската, црногорската, италијанската, шпанската и турската мафија кои тврдат дека се стекнале со македонски патни исправи со туѓ идентитет, а дека зад тоа стојат министерот Оливер Спасовски и премиерот Зоран Заев.

Од Владата тврдат дека ВМРО-ДПМНЕ преку објавите се обидува да ја саботира акцијата на Министерството за внатрешни работи.

„Неколку дена пред да бидат соопштени резултатите од акцијата челниците на политичката партија ВМРО-ДПМНЕ започнаа да ја саботираат акцијата, а тоа го прават и деновиве и со тоа сериозно и неодговорно се обидуваат да го загрозуваат процесот преку доведување на јавноста во заблуда со лаги. Владата очекува Обвинителството да расчисти со овие обиди за саботажа“, наведуваат од Владата.

Инаку за случајот македонски пасоши за познати криминалци од регионот прво објави ВМРО-ДПМНЕ на брифинг со новинари, па потоа и партискиот лидер Мицкоски одржа прес конференција. И од Министерството за внатрешни работи тврдат дека опозициската партија се обидела да направи саботажа на акцијата која тие заедно со Интерпол и Регионалната канцеларија за безбедност и истраги при амбасадата на САД ја спроведувале од 2019 година.

Од кога се обелодени акцијата МВР приведе девет полициски службеници, а едно лице, кое не било полициски службеник туку надворешен посредник, е во бегство и за него е распишана меѓународна потерница.



СДСМ-ниту комбето, ниту кој било од приведените имаат каква било поврзаност со семејството на Заев

Седиштето на СДСМ во Скопје

СДСМ во соопштение ја обвинува ВМРО-ДПМНЕ дека изгубени во желбата да се наштети по секоја цена изнесувале лажни вести поврзани со случајот со запленетата марихуана во вредност од 800 000 евра.

„ВМРО-ДПМНЕ фејк-њуз предводена од Мицкоски по којзнае кој пат фатена во лага. Ниту комбето кое го спомнуваат, ниту било кој од приведените во акцијата имаат каква било поврзаност со семејството на претседателот Зоран Заев“, наведуваат од СДСМ.

Од ВМРО-ДПМНЕ денеска прашаа дали Трајче Заев избегал во Дубаи. Од партијата тврдат и дека еден од приведени во акцијата е Александар Ушликовски, негов личен возач, а дека пратката со марихуана тргнала од Фирмата Медика 420 од Битола која се поврзувала директно со фамилијата Заеви.

Трајче Заев, братучедот на премиерот Зоран Заев на профил на социјалната мрежа Фејсбук на кој стои неговото име, наведе дека изнесените работи од опозициската партија не се точни.

„Споменатото комбе од акцијата на МВР не е сопственост на фирма на Заеви. Ниеден од уапсените не е вработен во ниедна фирма на Заеви. Јас сум на службено патување од 23ти март во Обединетите Арапски Емирати со цел проширување на работата на нашите компании, отварање на нови пазари за нашите домашни македонски производи и стекнување на нови партнери за соработка“, наведува Трајче Заев.

Полицијата вчера соопшти дека во акцијата која ја спроведе заедно со американската агенција ДЕА е запленета 200 килограми марихуана, а дека до обвинителството поднеле кривични пријави против шест лица Д.Ј.(35) од Струмица, А.У.(45) од Скопје. М.З.(29) од Куманово, М.С.(36) од Битола, К.С.(46) од Прилеп, Г.К.(25) од Скопје.

Борел ги обвини Кина и Русија за блокирање на акција во Бурма

Шефот на дипломатијата на ЕУ, Жозеп Борел

Шефот на надворешната политика на Европската Унија Жозеп Борел ги обвини Русија и Кина дека го блокираат заедничкиот меѓународен одговор на воениот удар во Бурма и дека ЕУ може да понуди повеќе економски стимулации доколку демократијата се врати во земјата.

"Не е изненадување за нас дека Русија и Кина ги блокираат обидите во Советот за безбедност на Обединетите нации, како на пример за воспоставување на ембарго за оружје“, напиша Борел на неговиот блог објавен денеска.

Тој наведува и дека геополитичкиот натпревар во Мјанмар ги отежнува можностите да се најде заедничка основа, споменувајќи ја Бурма со своето друго име, додавајќи дека сепак тие имаат должност да се обидат.

Борел пишува дека безнедносните сили убиле повеќе од 550 невооружени демонстранти, меѓу кои 46 деца откако војската на први февруари ја презеде власта од избраната влада.
Кина и Русија, двете имаат врски со вооружените сили на Бурма, како прв и втор најголем снабдувач со оружје на земјата.

Над 30 отсто вакцинирани во Србија

Вакцинација во Србија

Премиерката на Србија, Ана Брнабиќ, изјави синоќа за РТС дека е надминат бројот од 30 отсто на полнолетни граѓани во Србија кои се вакцинирани, како и дека вчера бил првиот ден по долго време кога имало повеќе отпуштања отколку приеми во ковид болниците, јави дописникот на МИА од Белград.

Брнабиќ посочи дека, откако претседателот Александар Вучиќ е вакциниран, повторно започнал неверојатен интерес за вакцините во Србија, односно повеќе од 80.000 граѓани биле вакцинирани за еден ден.

Епидемиологот Бранислав Тиодоровиќ денеска изјави дека е потребно, за да се врати Србија во нормален живот, да се спроведе помасовна вакцинација во најкус можен рок и дека би било идеално да се вакцинираат три до три и пол милиони луѓе во следните два месеца, со што би се стекнале услови за колективен имунитет.

Вкупно 1699 лица се лекуваат од Ковид19 во болниците низ земјава

Ковид-19 центар во Скопје

Во изминатите 24 часа во ковид центрите во болниците низ земјава е пријавено дека се лекуваат 996 пациенти позитивни и суспектни на корона вирусот, a на инфективните одделенија во Скопје се лекуваат 703 лица сомнителни и потврдени за Ковид19.

„Вкупната бројка на пациенти позитивни и суспектни на корона вирусот кои се лекуваат на инфективните оддели во главниот град и во болниците низ земјава е 1699 и има околу 340 празни болнички кревети во ковид центрите“, информираат од Министерството за здравство.

Од таму наведуваат дека според направените приеми и исписи на пациенти бројките се менуваат од час во час и додаваат дека сите оддленија на клиничките болници имаат довод на кислород.

Трајче Заев ги демантира обвинувањата од ВМРО-ДПМНЕ за запленетата марихуана

Седиштето на ВМРО-ДПМНЕ во Скопје

Трајче Заев, братучедот на премиерот Зоран Заев, чие име го споменуваат од ВМРО-ДПМНЕ поврзано со заплената на марихуаната во вредност од 800 000 евра, на профил на социјалната мрежа Фејсбук на кој стои неговото име, наведува дека изнесените работи од опозициската партија не се точни.

„Споменатото комбе од акцијата на МВР не е сопственост на фирма на Заеви. Ниеден од уапсените не е вработен во ниедна фирма на Заеви. Јас сум на службено патување од 23ти март во Обединетите Арапски Емирати со цел проширување на работата на нашите компании, отварање на нови пазари за нашите домашни македонски производи и стекнување на нови партнери за соработка“, наведува Трајче Заев.

Од ВМРО-ДПМНЕ денеска прашаа дали Трајче Заев избегал во Дубаи. Од партијата тврдат и дека еден од приведени во акцијата е Александар Ушликовски, негов личен возач, а дека пратката со марихуана тргнала од Фирмата Медика 420 од Битола која се поврзувала директно со фамилијата Заеви.

„Запленетата дрога била превезувана во бело комбе со грчки таблици, на име на фирма која што јавно прашавме дали има партнерски односи со фирма на Заеви“, рече портпаролот на ВМРО-ДПМНЕ Димче Арсовски.

Полицијата вчера соопшти дека во акцијата која ја спроведе заедно со американската агенција ДЕА е запленета 200 килограми марихуана, а дека до обвинителството поднеле кривични пријави против шест лица Д.Ј.(35) од Струмица, А.У.(45) од Скопје. М.З.(29) од Куманово, М.С.(36) од Битола, К.С.(46) од Прилеп, Г.К.(25) од Скопје.

Покрај Ушликовски кој опозицијата го поврзува со Заеви, од таму тврдат и дека еден од приведените е командирот на прилепската полиција Кире Спиркоски кој наведуваат дека бил близок со министерот за внатрешни работи Оливер Спасовски.

Инаку, покрај претресите во домовите на приведените во кои се најдени пари, марихуана и оружје, од полицијата соопштија дека извршиле контрола и во две фабрики за производство на медицински канабис во Прилеп и во Битола.

Франција го продолжува периодот за ревакцинација против Ковид19

Франција- луѓе чекаат да бидат вакцинирани против Ковид19

Франција ќе го зголеми периодот меѓу првата и втората доза на вакцините против Ковид19 на Фајзер и Модерна за да ја забрза вакцинацијата во земјата. Министерот за здравство Оливие Веран денеска за медиумите рече дека мРНА вакцините против Ковид19 сега ќе бидат давани во временски период од шест недели, наместо на четири, како што беше досега.

Тој вели дека тоа ќе им овозможи да вакцинираат повеќе луѓе побрзо без да се намали заштитата. По бавниот почеток на вакцинацијата, Франција е блиску до дадени десет милиони први дози, бројка што се очекува да се достигне во средината на месецов.

Некои здравствени експерти сметаат дека треба да се зголеми времето меѓу двете дози за да може да се вакцинира што е можно повеќе население во услови во кои на светско ниво има недостиг од вакцини.

Инцидент во иранската нуклеарна централа Натанз

Иранската нуклеарна централа Натанз

Проблем со електричната енергија се случил денеска во иранската нуклеарна централа Натанз, ден откако Техеран пушти во употреба нови центрифуги за побрзо збогатување ураниум. Ова е последен инцидент што се случува во едно од најобезбедените ирански места и се случува додека траат преговорите на Техеран со светските сили за нуклеарниот договор од 2015 година.

Иранската агенција за атомска енергија соопшти дека нема последици или загадување од инцидентот. Мината година во капацитетот се случи пожар што спред иранските власти било обид за саботажа на иранската нуклерна програма.

Натанз е клучно место во Иран за збогатување ураниум и е набљудувано од инспекторите на Меѓунарондата агенција за атомска енергија.

ВМРО-ДПМНЕ прашува дали Трајче Заев избегал во Дубаи

Скопје- акција на македонската полиција за заплена на 200 килограни канабис,10.04.2021

ВМРО-ДПМНЕ денеска во партиско соопштение го обвинува министерот за внатрешни работи Оливер Спасовски дека цел ден молчел за акцијата на македонската полиција заедно со американската агенција ДЕА во која се заплени марихуана во вредност од околу 800 илјади евра, а шест лица се приведени. Од опозициската партија тврдат дека еден од приведени е Александар Ушликовски, личен возач на Трајче Заев, братучед на премиерот Зоран Заев.

„Пратката со марихуана тргнала од Фирмата Медика 420 од Битола. Патем оваа фирма се поврзува директно со фамилијата Заеви. Братучедите на Зоран Заев, Трајче и Вице. Оттука логично се поставува прашањето дали и кога братучедите на Заеви ќе бидат испитани за овој нарко криминал кој го прекина американската ДЕА? Исто така треба да одговорат дали Трајче Заев, братучедот на Зоран Заев е во Македонија или избегал во Дубаи?“, наведуваат од ВМРО-ДПМНЕ.

Полицијата вчера соопшти дека во акцијата е запленета е 200 килограми марихуана, а дека до обвинителството поднеле кривични пријави против шест лица Д.Ј.(35) од Струмица, А.У.(45) од Скопје. М.З.(29) од Куманово, М.С.(36) од Битола, К.С.(46) од Прилеп, Г.К.(25) од Скопје.

Еден од приведените, велат од ВМРО-ДПМНЕ е командирот на прилепската полиција Кире Спиркоски кој наведуваат дека бил близок со министерот Спасовски.

Покрај претресите во нивните домови во кои се најдени пари, марихуана и оружје, од полицијата соопштија дека извршиле контрола и во две фабрики за производство на медицински канабис во Прилеп и во Битола.

Ердоган- случувањата во источна Украина се загрижувачки

Турскиот претседател Реџеп Таип Ердоган и украинскиот претседател Володимир Зеленски на средбата во Истанбул, 10.04.2021

Турскиот претседаетел Реџеп Таип Ердоган по средбата со украинскиот претседател Володимир Зеленски ги нарече случувањата во источниот украински регион Донбас загрижувачки.

Состанокот кој се одржа вчера во Истанбул и траеше повеќе од три часа е дел од претходно договорена посета, но се случи истовремено со тензиите меѓу Киев и Москва за долготрајниот конфликт во источна Украина.

Зборувајќи на заедничката прес конференција со Зеленски, Ердоган последните случувања го нарече загрижувачки и изрази надеж дека конфликтот ќе биде решен на мирен начин со дипломатски напори, врз основа на интегритетот на Украина и меѓународните закони. Турција и Украина имаат добри врски, а Анкара претходно ја осуди руската анексија на Крим во 2014 година.

Времето денеска- свежо утро, сончево попладне

Времето утрово ќе биде свежо, преку денот сончево со мала до умерена локална облачност и потопло. Ќе дува слаб до умерен ветер од јужен правец. Утринската температура ќе биде во интервал од -4 до 2, а максималната од 14 до 21 степен, информираат од Управата за хидрометеоролошки работи.

Во Скопје времето ќе биде сончево со мала до умерена облачност и со слаб до умерен југоисточен ветер. Утринската температура ќе се спушти до 0, а максималната ќе достигне 19 степени.

Според УХМР и во понеделник времето ќе се задржи стабилно со дополнителен пораст на дневната температура. Од вторник ќе има зголемување на облачноста со локални врнежи од дожд, на места поројни и проследени со грмежи. Од среда ќе дува и умерен до засилен северозападен ветер, што ќе услови повторно намалување на температурата.

Спасовски и Чулев давале исказ за софтверот на Рашковски

Актуелниот министер за внатрешни работи Оливер Спасовски и поранешниот технички министер за внатрешни работи Наќе Чулев на Седница на Советот за безбедност, 15.05.2020

Актуелниот министер за внатрешни работи Оливер Спасовски и поранешниот технички министер Наќе Чулев, кој ја извршуваше функцијата во првата половина на 2020 година, деновиве биле на распит како сведоци во Основното јавно обвинителство за гонење организиран криминал и корупција, јавува телевизија Телма. Двајцата биле повикани во различни денови, а исказот го дале пред обвинителката Вилма Русковска.

Поранешниот и актуелниот министер биле повикани за случајот поврзан со поранешниот генерален секретар на владата, а сегашен советник во владата Драги Рашковски кој набавил софтвер за сообраќајни прекршоци за Министерството за внатрешни работи за 81 000 евра, а не е во употреба осум месеци.

По наредба на Основното јавно обвинителството за гонење организиран криминал и корупција вчера се вршеше претрес во просторите на фирмата „Инвока гроуп“ од која е набавен софтверот, а се поврзува со Рашковски и во домот на сопственикот на фирмата.

Основното јавно обвинителство за гонење на организиран криминал и корупција на 18 март соопшти дека отвориле предмет по допрен глас во врска со набавката на софтверот за „определување на просечна брзина на возилата во сообраќајот и изрекување казни“.

Нови 1092 заразени со Ковид19, 32 починати

Пункт за тестирање за коронавирус во Скопје

Министерството за здравство согласно податоците од Институтот за јавно здравје информира дека во последните 24 часа се направени 5.569 тестирања, а регистрирани се 1.092 нови случаи на Ковид19.

Од нив најмногу во Скопје – 452, а потоа следуваат Битола – 85, Куманово – 80, Прилеп – 49, Кавадарци – 45, Велес – 41, Струмица – 36, Охрид – 33, Тетово – 30, Штип – 27, Кичево - 22, Гостивар и Кочани – по 21, Гевгелија – 18, Струга – 15, Ресен – 13, Радовиш – 11 и Делчево – 10. Неколку други градови имаат по едноцифрена бројка новозаразени.

Пријавени се вкупно 32 починати лица од кои најмногу од Скопје- десет, а по двајца починати има од Куманово, Прилеп, Тетово, Гостивар, Кавадарци, Гевгелија и Виница, а по еден починат од Битола, Берово, Велес, Крива Паланка, Неготино, Охрид, Свети Николе и Штип. Најмладиот починат е на возраст од 46 години, а најврозрасниот на 91 година. Сите се починати во болнички услови.

Регистрирани се 2003 оздравени пациенти. Со ова вкупната бројка на КОВИД-дијагностицирани лица во нашата земја од почетокот на епидемијата изнесува 141.157, бројката на оздравени пациенти е 115.433, на починати е 4.182, а бројот на активни случаи изнесува 21.542.

Иран пушти нови центрифуги за збогатување на ураниум

Иранскиот претседател Хасан Рохани

Иран денеска објави дека пушти во работа нови модернизирани центрифуги кои овозможуваат брзо збогатување ураниум иако нивната употреба е забранета со одредбите од нуклеарниот договор кој го постигна Техеран со светските сили во 2015 година.
Иранскиот претседател Хасан Рохани официјално ја отвори линијата за производство од 164 центрифуги поставена во комплексот Натанз во централниот дел на земјата.

Ова се случува во момент кога се водат преговори во Виена меѓу Иран и останатите држави потписнички на договорот од 2015 година за тоа како повторно во него да се вклучат и Соединетите Американски Држави. Поранешниот американски претседател Доналд Трамп во 2018 година одлучи да ја повлече својата земја од договорот кој го потпишаа Германија, Кина, Франција, Велика Британија и Русија.

Трамп еднострано ги повлече САД од догоорот и повторно воведе економски и финанисиски сакнции за Иран, на што Техеран одговори со тоа од 2019 година почна да ги крши обврските преземени со него.

Во Србија досега 755 несакани реакции од вакцинацијата

Белград- вакцинација на возрасни граѓани

Во Србија досега се пријавени 755 несакани реакции на вакцини против коронавирус, што значи дека има само една пријавена реакција на 3.973 имунизирани граѓани, изјави претставникот на Агенцијата за лекови и медицински помагала (АЛИМС), Павле Зелиќ, јави дописникот на МИА од Белград.

Зелиќ на РТС изјави дека сите реакции се благи, дека се однесуваат на појава на оток, црвенило, високи температури, болки во мускулите и поминуваат за неколку дена.

Во Србија е достапна имунизацијата со вакцините „Синофарм“, „Фајзер/БиоНТек“, „АстраЗенека“ и „Спутник Ве“, а Зелиќ изјави дека Модерна се уште не поднела барање за регистрација, дека се водат преговори и дека очекува и таа да се најде во понуда.
Тој изјави дека во Србија има сосема доволно вакцини, затоа што досега се пристигнати над 3,5 милиони дози.

Во Индија нов рекорд заразени со ковид19, недостигаат вакцини

Мумбаи- луѓе со заштитни маски чекаат на железиничка станица, 09.04.2021

Во Индија е забележан нов рекорд во бројот на новозаразени со Ковид19, а бројот на смртни случаи е највисок во последниве пет месеци. Според извештаите во земјата има недостиг на вакцини, а Мумбаи е во викенд локдаун.

Втората најбројна земја во светот има над милион нови случаи од крајот на март и повеќе од 500 починати на ден, иако се верува дека реалните бројки се многу повисоки.

Централната власт во обид да ја зачува економијата не презема драстични рестриктивни мерки, но тоа го прават локалните влади. Во меѓувреме земјата која има 1,3 милијарди луѓе се соочува и со недостиг на вакцини, а досега се обезбедени 94 милиони дози.

ВМРО-ДПМНЕ и СДСМ повторно во расправија за аферата со пасошите

Македонски пасоши

Генералниот секретар на ВМРО-ДПМНЕ Ѓорѓија Сајкоски денеска на прес конференција во партиското седиште рече дека аферата „Мафија“ покажува силна вмешаност на највисоките структури од државата во давање на логистика, поддршка и заштита на најсилните мафии и нарко картели во Европа и пошироко. Тој вели дека целата афера се свела на апсење на неколку државни службеници, а дека „пипците на мафијата одат погоре“.

Сајкоски покажувајќи фотографии тврди дека уапсените полициски службеници биле фотографиеани на приватни дружења со министерот Оливер Спасовски.

„Значи само кога ќе гребнете по површината сомневањата недвосмислено одат до врвот на власта каде се Зоран Заев и Оливер Спасовски“, рече Сајкоски.

Пратеникот од СДСМ Мартин Костовски, пак, на прес конференција рече дека „ниеден обид на ВМРО-ДПМНЕ за извртување на вистината не може да го сокрие фактот дека токму Мицкоски се обиде да саботира сложена полициска акција преку јавно објавување на информации“.

„Заради лични интереси Мицкоски се обиде да загрози полициска акција и соработка на нашата полиција со стратешките партнери. Мотивите и целите за ваквите постапки треба да ги даде независна и професионална истрага пред надлежните инситуции“, рече Костовски.

Инаку за случајот македонски пасоши за познати криминалци од регионот прво објави ВМРО-ДПМНЕ на брифинг со новинари, па потоа и партискиот лидер Мицкоски одржа прес конференција. Од Министерството за внатрешни работи тврдат дека опозициската партија се обидела да направи саботажа на акцијата која тие заедно со Интерпол и Регионалната канцеларија за безбедност и истраги при амбасадата на САД ја спроведувале од 2019 година.

Од кога се обелодени акцијата МВР приведе девет полициски службеници, а едно лице, кое не било полициски службеник туку надворешен посредник, е во бегство и за него е распишана меѓународна потерница.

Од амбасадата за Радио Слободна Европа вчера наведоа дека не коментираaт за активни истраги, но дека работат одблиску со Министерството за внатрешни работи, како и со други владини министерства и институции во Северна Македонија.

Мицотакис бара расчистување на убиството на новинарот, фон дер Лајен го нарече одвратен и кукавички чин

Атина- Грчката полиција врши увид на местото каде што беше убиен новинарот Јоргос Карајваз,09.04.2021

Ладнокрвното убиство на новинарот Јоргос Карајваз го шокираше целото општество. Се сретнав со министерот за цивилна заштита Михалис Хрисохоидис за да побарам брзо расчистување на случајот. Ме увери дека грчката полиција вложува максимални напори да ги пронајде виновниците, напиша грчкиот премиер Кирјакос Мицотакис на социјалните мрежи по средбата со надлежниот министер, јави дописничката на МИА од Атина.

Средбата на Мицотакис со Хрисохоидис е по вчерашното убиство на 52-годишниот грчки новинар, кој кусо по 14 часот беше застрелан пред неговиот дом од две лица, кои откако испукале најмалку десет куршуми, со мотор побегнале во непознат правец.

Првичните процени на полицијата, според грчките медиуми, се дека станува збор за добро смислено и веројатно нарачано убиство, додека пак балистичката анализа покажала дека оружјето било „чисто“, односно не е поврзан со друго криминално дело во минатото.

Карајваз беше познат и искусен новинар, кој долги години следеше црна хроника и покриваше теми поврзани со полицијата, за истите теми имаше информативен портал, а паралелно работеше во претпладневна емисија на телевизијата „Стар“.

За убиството на новинарот, преку Твитер, синоќа реагираше и претседателката на Европската Комисија Урсула фон дер Лајен, која рече дека е одвратен и кукавички чин, истакна дека новинарите мора да можат безбедно да работат и изрази надеж дека криминалците набргу ќе бидат изведени пред лицето на правдата.

Ѓурѓај- се очекува Македонците масовно да гласаат на изборите во Албанија

Никола Ѓурѓај, претседател на македонско друштво Илинден

„Во Албанија историски е докажано дека никогаш немамо ниту има бугарско малцинство. Со притисоци врз албанските власти Бугарија се обидува во Албанија да создаде бугарско малцинство и покрај тоа што се знае дека во Република Албанија живеат Македонци“. Ова за Радио Слободна Европа го изјави политичкиот аналитичар од Тирана Никола Ѓурѓај, кој воедно е и главниот уредник на македонскиот весник ,„Илинден“ кој излегува во албанскиот главен град Тирана.

Ѓурѓај нагласува дека „во сите пописи кои се реализирани во времето на кралот, никој не се изјаснил како Бугарин , туку дека имало Македонци . Има лица кои имаат земано бугарски пасоши од областите Гора, Мала Преспа и Голо Брдо, но тоа е поради економски причини, нагласува тој.

Во врска со местото и улогата на Македонците во Албанија на престојуните парламентарни избори во Албанија кои се закажани за 25 април, Ѓурѓај за РСЕ вели дека ,, Македонците се очекува масовно да излезат на гласање во округот Корча и повторно за пратеник да го изберат Васил Стерјовски, лидерот на партијата на Македонците - Македонска Алијанса за европска иднина.
Македонската партија е во колиција со Социјалистичката партија на премиерот Еди Рама која според Ѓурѓај повторно ќе ја предводи власта.

Првиот човек на македонскиот весник ,,Илинден,, исто така смета дека Стерјовски и досега во актуелниот состав на Собранието на Албанија достојно ги бранел интересите на Македонците во Албанија. Ѓурѓај додава дека со македонски пратеник во Собранието се докажува дека Македонците во Албанија постојат.
Покрај Стерјовски на парламантарните избори во Албанија има уште ден Македонец на листата на партијата – Движење за Социјалистичка интеграција на сопругата на претседателот на државата Илир Мета, Моника Криемади.

Протест на ВМРО-ДПМНЕ пред Министерството за здравство, побарана оставка од Филипче

Скопје- ВМРО-ДПМНЕ на протест пред зградата на Министерството за здравство побара оставка од министерот Венко Филипче поради лошо снаоѓање со Ковид пандемијата

ВМРО-ДПМНЕ денеска на протест пред Министерство за здравство побара оставка од министерот Венко Филипче обвинувајќи го за лошо снаоѓање и менаџирање со епидемијата со Ковид19 .

Пратеничката од ВМРО-ДПМНЕ Ели Панова рече дека во моментов земјава била полоша од Италија која минатата година беше силно погодена од ковид пандемијата.

„Вашата неспособност за менаџирање го загрозува здравјето на обичниот граѓанин, па денес во Македонија имаме рекордна смртност од 4.108 луѓе како последица на Ковид, според вчерашниот извештај на Економист, Македонија са наоѓа на трето место по смртност во светот. Општите болници низ Македонија се полни, истите немаат основни медицински средства, се сликате позерски на донирани вакцини и опрема бидејќи не сте способни да набавите, а преживуваат само оние граѓани кои имаат да платат“, рече Панова.

Владимир Нелоски, претседател на Градскиот комитет на ВМРО-ДПМНЕ ги повика насобраните повторно со балоните со вода да фрлаат кон зградата на министерство за, како што рече, да им го измијат срамот.

„Минатата сабота се обидовме да го измиеме срамот и стигнаа пораки зошто со толку малку балони вода сме го миеле срамот, па велам ако они прават симулација на вакцинирање ние можеме да пробаме симулација на миење на срамот“, рече Нелоски.

Инаку оваа е четврта сабота по ред како опозициската партија протестира пред зградата на Министерството за здравство.

Амбасада на САД - работевме со МВР и дадовме техничка поддршка за заплената на дрога

Амбасадата на Соединетите Американски Држави во Скопје

Американската амбасада во Скопје работеше заедно со Министерството за внатрешни работи и даде техничка поддршка за вчерашната акција во која полицијата пресретна камион со марихуана во вредност од 800.000 евра, што транзитирал низ Македонија. Ова за порталот СДК.МК го навеле од американската амбасада во Скопје.

„Во овој случај, како и во случајот со пасошите, работевме заедно со МВР и дадовме техничка поддршка“, велат од амбасадата на САД.

Според вчерашната куса информација која ја објави министерот за внатрешни работи Оливер Спасовски на својот профил на социјалната мрежа Фејсбук македонската полиција извршила голема акција заедно со американската Агенција за борба против наркотици (ДЕА), во акцијата била запленета дрога во вредност од над 800.000 евра и бил привиден висок полициски службеник.

Некои медиуми, пак, јавија дека уапсениот е командир на Полициската станица во Прилеп. МВР најави повеќе детали за акцијата за денеска.

Од ВМРО-ДПМНЕ велат дека „очигледно е дека целата акција ја водат служби кои се борат против наркотици од странство“.

„Но, она кое што стигна до нас како информации за кое што, уште еднаш повторно сакам да упатам прашања до власта и конкретно до премиерот Зоран Заев, а тоа е дека возачот на Трајче Заев, првиот братучед на Зоран Заев е еден од уапсените, кој што бил пратечко возило на пратката со дрога? Вториот уапсен е Кире Спиркоски викан „Чипси“ командир од полициската станица Прилеп кој што пак може да се види дека е преблизок со Оливер Спасовски и со локалните структури на СДСМ во Прилеп, како што е градоначалникот Јованоски“, рече портпаролот на ВМРО-ДПМНЕ Димче Арсовски.

Инаку и во претходната акција „Двојник“ која се реализираше неделава и во која е откриено дека вкупно 215 лица се стекнале со македонски пасош со туѓ идентитет, а приведени беа девет лица вработени во МВР, а едно е во бегство, македонската полиција соработуваше со Регионалната канцеларија за безбедност и истраги при амбасадата на САД.

Од амбасадата за Радио Слободна Европа вчера наведоа дека не коментираaт за активни истраги, но дека работат одблиску со Министерството за внатрешни работи, како и со други владини министерства и институции во Северна Македонија.

Вчитај повеќе

XS
SM
MD
LG