Достапни линкови

Вести

Угостителите бараат средба со Комисијата за заразни болести

Илустрација - Угостителски објекти во Скопје во време на пандемија.

Независната угостителска комора (НУК) бара учество на работен состанок на Комисијата за заразни болести поради најавите за нови рестриктивни мерки наменети за угостителските објекти, се вели во соопштението на НУК.

Барањето, се вели во соопштението, е по повод информациите во медиумите кои посочуваат дека од членовите на Комисија за заразни болести се залагаат „за целосен „Lockdown“ на сите угостителски објекти за периодот од 31 декември до 8 јануари.“

„Како Независна угостителска комора утринава доставивме барање за учество во понеделничкиот работен состанок на претставници на нашата комора и претставници на останатите комори за туризам и угостителство, на кои се планира да се донесат овие препораки за нови рестриктивни мерки за угостителите и угостителската индустрија“, се вели во соопштението.

Од НУК исто така наведуваат дека бараат да им се овозможи да ги слушнат „грижите и оправдувањата“ на членовите на Комисијата за заразни болести за усвојување на најавените рестриктивни мерки, но и да им биде дозволено да укажат на „нивните недоследности, нелогичности“, пред да бидат доставени до Владата.

види ги сите денешни вести

Заев: Однесувањето на опозицијата за пописот е неразумно

Зоран Заев

На прес-конференција во Владата премиерот Зоран Заев денеска изјави дека СДСМ и другите коалициски партнери, вклучувајќи ја и ДУИ, остануваат целосно посветени на успешно спроведување на пописот.

Toј рече дека се надева дека многу скоро во Собранието ќе биде донесен Законот за попис, а однесувањето на опозициската ВМРО-ДПМНЕ го окарактеризира како смешно, неодговорно и неразумно.

Симовски - Пописот треба да ја регистрира реалноста, а дали ќе се допадне некому не ме интересира

Тој дополни дека е убеден во што поскоро носење на законот за попис што е пред гласање во Собранието.

"Жалам само што се докажува неодговорноста на опозицијата што не се воведе онлајн работа на Парламентот, барем за оние пратеници кои се позиивни на Ковид-19 или се во самоизолација. И денеска видовме дека седницата се одлага. Убеден сум дека многу брзо може да се закаже оваа седница и час поскоро да заврши за да се донесе побрзо законот, затоа што после законот има голем број активности во делот на подготовка за спроведување", рече Заев.

Toj повтори дека со попишување по етничка припадност, со пописот ќе се регистрираат резиденти и нерезиденти жители.

"Ги попишуваме сите граѓани. Дефинитивно, меѓуграничната контрола дава можност во секој момент да знае државата, колку од граѓаните се надвор од државата повеќе од една година. Секогаш го имаме тој податок во базите. Граѓаните слободно ја изразуваат својата верска и етничка припадност", вели Заев, повторувајќи дека податоците од пописот се статистички податоци.

Според него, апелите за бојкотирање на пописот е туркање на граѓаните кон одговорност.

"Пописот насекаде во светот, во Европа така и кај нас е одговорност на граѓаните и тоа е регулирано во законот и следуваат казни за одбивање на попишување", рече Заев потенцирајќи дека државноста ја чуваат сите граѓани искажувајќи убедување дека нашиот народ целосно ќе ја исполни оваа обврска.

На новинарско прашање да ја коментира изјавата на пратеникот од ДУИ Арбр Адеми дека ДУИ нема да ги признае резултатите од пописот ако излезе дека Албанците во државава се под 20 отсто од вкупниот број на населението тој рече резултатите од пописот нема да влијаат на стекнатите права.

„Пописот е само статистичка операција која е повеќе за административни потреби и планирање и зад нејзиното спроведување и зад резултатите стојат СДСМ, ДУИ и останатите партии во владејачката коалиција. Стекнатите права на помалубројните народи се веќе стекнати и нив не смее никој да ги оспорува и назадува, без разлика на резултатите од статистичката операција“, рече Заев.

Силна експлозија во центарот на Мадрид

Експлозија во Мадрид

Најмалку две лица загинаа, а неколкумина се тешко повредени денеска во експлозија која одекна во зграда во центарот на Мадрид, изјави градоначалникот на шпанската престолнина.

„Според првичните информации експлозијата веројатно е предизвикана од истекување на гас во зградата“, изјави градоначалникот Хозе Луис Мартинез-Алмеида пред новинарите на местото на настанот.

Агенциите јавија дека од силината на ударот шест ката од зградата одлетале во воздух.

Заев: 8.000 дози вакцини од Србија се за здравствените работници

Илустрација.

Премиерот Зоран Заев, заедно со вицепремиерот задолжен за европски прашања, Никола Димитров, и министерот за здравство, Венко Филипче, преку интернет-конференциска врска одржа состанок со регионалниот директор на Светската здравствена организација (СЗО) за Европа, Ханс Клуге, и сo претставници на СЗО.

Како што информираат од владината прес-служба, на средбата биле истакнати напорите на СЗО, нејзините партнери и нашата земја за динамизирање на постапката за обезбедување вакцини преку „Ковакс-програмата, при што бил истакнат аспектот на почитување на основните вредности што притоа се покажуваат, а тоа е пријателството и солидарноста на европските земји и земјите во регионот на Западен Балкан.

Грција ќе издава дигитален сертификат за вакцинација

Премиерот Заев информирал за 8.000 дози вакцини што ќе пристигнат од Србија и кои ќе бидат наменети за сите здравствени и медицински работници на кои заедно со претставникот на СЗО им упатил јавна благодарност за покажаната хуманост и пожртвуваност во изминатите месеци додека трае епидемијата.

Доза транспарентност и релевантност, пред доза вакцина

Царовска: Реформата мора да се спроведе

Мила Царовска

Министерството за образование и наука соопшти дека со денешниот состанок со директори на основни училишта од секоја општина продолжува широкиот консултативен процес за реформите во основно образование, а дека за утре е закажан состанок со наставниците, а за задутре – со членови на МАНУ.

Министерката Мила Царовска по средбата изјавила дека концепцијата има широка поддршка од директорите, но дека како од секоја новина, постои само страв од непознатото којшто треба да се совлада.

"Постои потреба и од интензивна обука на наставниците за да може да се прилагодат на новата концепција. Наша цел е темелно да ја подготвиме реформата која првпат се фокусира на најважното, а тоа е знаењето на децата. Тоа значи дека сите заеднички ќе вложиме максимални напори за да го подготвиме системот за имплментација и да ги подготвиме наставниците. Реформата е започната навреме и со години трае овој процес кој сега мора да финишира, бидејќи секој ден доцнење е на штета на идните генерации, рече Царовска.

Сенатот на УКИМ пак укажа дека на последната вонредна седница тие донеле одлука дека реформата треба да почне како пилот проект, дополнувајќи дека таа е првична идеја за чие спроведување треба многу повеќе време.

"Реформата на воспитанието и образованието е длабоко стратешко прашање и процес на перманентно преиспитување и валоризација на воспитно-образовната политика. Избрзаните и недоволно обмислени одлуки и решенија донесени од МОН, без јавна и ефективна дебата, можат да предизвикаат сериозна штета со далекусежни последици. На вонредната седница, сенаторите упатија бројни и сериозни забелешки на Нацрт-концепцијата за основно образование. Промените треба да се креираат и спроведуваат во согласност со карактеристиките на контекстот, односно условите во кои се реализираат воспитно-образовната работа, конкретните образовни потреби и реалните можности за нивно остварување" се наведува во соопштението од Сенатот на УКИМ.

Најавената реформа предизвика силни реакции во јавноста особено поради идејата да се спојат историјата и географијата како еден предмет во основните училишта, нешто што во дел од јавноста беше оценето како обид за бришење на историјата во време кога Бугарија спори токму со дел од македонската историја.

Нова ковид мерка: Четири индустрии нема да плаќаат царина за увоз на суровини

Илустрација - Работник во индустрија

Владата денеска соопшти дека со првата мерка од петтиот пакет компаниите од метало-преработувачката индустрија, металургијата, текстилната и кожарската индустрија се ослободени од царинските давачки во висина од 7,1 милиони евра за суровини и за репроматеријали.

Како што се наведува во денешното соопштение, на вчерашната 40-та седница, Владата донесе одлука за укинување на увозните давачки – царинските стапки, на одделни суровини и репроматеријали кои се употребуваат во преработувачката индустрија, со цел да ги олесни условите за работење на овие компании и да овозможи да се зголеми нивната конкурентност во услови на пандемија и отежнато работење на компаниите од преработувачката индустрија.

Судскиот совет разреши судија од Кривичниот суд за несовесно работење

Основен кривичен суд - Скопје

Судскиот совет на денешната седница разреши судија од Основниот кривичен суд Скопје со образложение за „нестручно и несовесно вршење на судиската функција“. Претседателот на Судскиот совет, Киро Здравев, денеска информираше за ова и кажа дека постапката за разрешувањето на судијата се водела околу една и пол година, но не сакаше да открие за кого станува збор.

„Не можам да ви кажам за кого одлучувавме, меѓутоа факт е дека на денешнта седница имавме посебна точка за утврдување на одговорност на судија и нашата одлука е дека се разрешува од функцијата судија на конкретниот суд, поради повреда на одредбите од судскиот деловник по однос на примената на системот“, изјави Здравев по завршувањето на седницата.

Тој додаде дека „нестручното работење на судијата“ е утврдено за период од две до три години. Како една од причините поради кои толку време се водела постапката, Здравев го посочи недоаѓањето на конкретниот судија на закажаните расправи.

Подетално за предметот, како што рече, неможе да каже од причини што мора да се почитува презумпција на невиност, а кога „одлуката ќе стане правосилна, Советот ќе објави во Службен весник“.

Трамп ја напушти Белата куќа и замина за Флорида

Доналд и Меланија Трамп на заминувањето од Белата куќа

По еден од најконтроверзните претседателски избори и преодни периоди во историјата на САД, демократот Џо Бајден треба да даде заклетва на функцијата на 20 јануари напладне по локално време во Вашингтон, на скалите на Капитол среде големата безбедност во Вашингтон. Кога ќе ја стави раката на Библијата, 78-годишниот Бајден ќе стане најстарата личност што ќе положи заклетва како претседател на САД и ќе влезе во Белата куќа веднаш потоа, заменувајќи го Доналд Трамп како 46-от претседател на нацијата.

За прв пат по 152 години, претседателот во заминување не е предвидено да присуствува на церемонијата на инаугурацијата, иако поранешните претседатели Џорџ В. Буш, Бил Клинтон и Барак Обама треба да бидат таму кога главниот судија на Врховниот суд Џон Робертс ќе ја води заклетвата на Бајден. Поранешниот претседател Џими Картер, кој има 96 години, рече дека нема да може да присуствува.

Видео - Подготовки за инаугурацијата и заклетвата на Џо Бајден

Трамп ја напушти Белата куќа рано на 20 јануари по локално време во Вашингтон, и со хеликоптер се упати на 10-минутен лет до блиската воена база на церемонија пред се качи во претседателскиот авион, да лета за Флорида за да го продолжи животот како приватен граѓанин. За разлика од неговиот шеф, потпретседателот на Трамп, Мајк Пенс, рече дека ќе присуствува на инаугурацијата, како и многу други републикански пратеници.

Папата повика сите да го потпишат Договорот за забрана на нуклеарно оружје

Поглаватор на Римокатоличката црква, папата Франциск

Pапата Франциск ги повика сите држави да му се приклучат на договорот на Обединетите нации за забрана на нуклеарно оружје, истакнувајќи дека таквата забрана е неопходна за зачувување на светскиот мир денес, јави новинската агенција Ројтерс.

„Силно ги охрабрувам сите држави и сите луѓе решително да работат на унапредување на условите неопходни за свет без нуклеарно оружје придонесувајќи за унапредување на мирот и мултилатералната соработка, што на човештвото денес му се толку многу потребни“, рече папата, осврнувајќи се на договорот за време на неговото редовно неделно обраќање.

Меѓународниот договор за забрана на нуклеарно оружје стапува во сила в петок и досега го ратификуваа 86 држави, а беше инициран од Меѓународната кампања за укинување на нуклеарното оружје (ИЦА), која ја доби Нобеловата награда за мир во 2017 година. САД, Велика Британија, Франција и другите нуклеарни сили не го потпишаа договорот и ги бојкотираа преговорите што доведоа до него, соопшти агенцијата.

ССК со конкретни барања до Владата за поддршка во пандемија

Даниела Арсовска, Сојуз на стопански комори

Сојузот на стопански комори (ССК) денеска побара државната поддршка да се спроведува континуирано, да се дефинираат протоколи за работа на сите дејности и да се обезбеди директна, неповратна помош за превозот, за туризмот, за угостителството, за сметководството, за едукацијата и за установите за згрижување деца како најзагрозени сектори кои во изминатиот период беа целосно затворени, „а сега се наоѓаат во многу критична состојба и бројат намалени доходи од 70 до 100 проценти“.

ССК на денешната прес-конференција ги соопшти 15-те мерки кои се доставени до Владата за нивно разгледување и вградување во новиот, петти антикризен економски пакет, но како што рече претседателката на Сојузот, Данела Арсовска, сè уште не е закажана формална средба за дискусија.

„Првите две мерки што ги предлага ССК се однесуваат на продолжаување на поддршката од 14.500 денари за плати и бескаматните кредити преку Македонската банка за развој. Предлагаме и одложување на роковите за поднесок на годишна сметка и финансиски извештаи до 30.04.2021 во хартиена, односно 15.05.2021 во електронска форма. Меѓу клучните барања е и справување со сивата економија од нерегистрираните субјекти“, рече Арсовска“, истакна денеска Арсовска.

Мишел до Бајден: Заедно да изградиме посилни Европа и САД

Шарл Мишел

Претседателот на Европскиот совет (ЕС), Шарл Мишел, предложи нов темелен договор со новоизбраниот претседател на САД, Џо Бајден, во односите меѓу Европската унија (ЕУ) и САД, додека Урсула фон дер Лајен ја нарече промената на чело на САД „нова зора” во меѓусебните односи.

„Денес е повеќе од транзиција. Денес е можност да ги обновиме нашите трансатлантски односи, што многу беа нарушени во изминатите четири години. За време на тие години, светот стана посложен, нестабилен и непредвидлив“, рече Мишел на пленарната седница на Европскиот парламент во рамки на расправа за идните доноси меѓу ЕУ и САД.

Дебатата е организирана денеска, кога Бајден ќе положи заклетва како 46-ти американски претседател. Инаугурацијата на новиот американски претседател е закажана за попладне по средноевропско време.

„На првиот ден од неговиот мандат, јас свечено му предлагам на новиот претседател да изградиме нов фундаментален пакет за посилна Европа, посилна Америка и посилен свет“, додаде Мишел.

Угостителите се жалат на економските ковид мерки, владата негира

Вицепремиерот Фатмир Битиќи

Владата со донесената прва мерка од петтиот антикризен пакет им подари на „локомотивите“ – членки на Стопанската комора на Македонија 162,4 милиони евра, а на угостителите и натаму неосновано и неоправдано со времена одлука им го цепка и ограничува работното време и правото на работа, реагираше денеска Независната угостителска комора (НУК).

Според НУК, при крај е трпението на угостителите кои чекаат време и покана за работна средба со Владата на која и даваат рок до 25 јануари да ги усвои нивните барања за креирање посебни мерки за директна помош и поддршка на угостителската индустрија. Тие велат дека „сите индустрии добиле поддршка и помош од постојните сет економски мерки, само за угостителската континуирано се носат препораки и протоколи со ограничувања за работно време“.

Вицепемиерот задолжен за економска политика вели дека тоа не е точно.

Според него, уште во првиот и вториот актикризен пакет имало мерки насочени само кон угостителскиот сектор и оти само во делот на мерката за финансиска поддршка процентуално гледано искористеноста во овој сектор е солидна.

Одговарајќи на новинарско прашање за обвинувањата од НУК, Битиќи денеска рече дека е отворен за комуникација со секого, но оти во овие тешки времиња сите треба да бидат разумни во очекувањата и можностите.

Неделен ковид извештај на ИЈЗ: Повеќе починати и повеќе оздравени

Илустрација - Ковид амбуланта на Инфективната клиника во Скопје

Министерството за здравство (МЗ) денеска информираше дека според неделниот извештај на Институтот за јавно здравје (ИЈЗ), во периодот од 11 до 17 јануари се направени вкупно 14.111 тестирања за ковид-19, што е за 8,4 отсто повеќе од претходната недела, а регистрирани се 2.397 нови позитивни случаи од 34 градови во државата, односно 3 отсто помалку од претходната недела.

Најголем дел од регистрираните случаи се од Скопје (45,4%), а највисока неделна инциденца е регистрирана во Ресен. Процентот на позитивни од тестирани во периодот на известување се движи од 11 до 19 проценти, просечно 16 проценти, што претставува намалување од три отсто во споредба со минатата недела.

Видео - Помина ли најлошото во македонските ковид центри?

„Регистрирани се заболени лица во сите возрасни групи. Најзастапена е возрасната група на лица на возраст над 60 (26,3%). Голем број на заболени се регистрира и кај лицата во возрасните групи од 40-49 (18,6%), 30-39 (17,6%), 50-59 (16,8%) и 20-29 (14,7%). Најмал број е регистриран кај децата од 0-9 (1,3%) и 10-19 години (4,7%)“, се наведува во извештајот на ИЈЗ.

Во истиот периодот се пријавени 79 смртни случаи од 23 града, со зголемување од 6,8% во однос на минатата недела. Во однос на возраста, 62 лицa биле над 60 години, 13 лица на возраст од 50-59 години, 3 лица на возраст од 40-49 години и едно лице од 30-39 години.

Грција ќе издава дигитален сертификат за вакцинација

Грчкиот премиер Кирјакос Мицотакис

Премиерот на Грција Кирјакос Мицотакис изјави дека почнува издавањето на дигиталниот сертификат за вакцинација, што е уште една грчка иновација. За време на состанокот за текот на спроведувањето на националниот план за вакцинација, тој додаде дека оваа потврда не значи ограничувања, туку олеснување на движењето и патувањето, јави МИА од Атина.

Грчкиот премиер објасни дека сертификатот е за потврдување на законската вакцинација и е за лична употреба на граѓаните и уште еднаш го повтори предлогот до ЕУ за „единствен сертификат по европски стандарди“.

„Не станува збор за никакво ограничување, туку напротив ќе ни олесни да се ослободиме од рестрикциите што сега ги наметнува Ковид-19 во патувањата на европските граѓани. Тоа е нешто што особено се однесува на нашиот туризам и перспективите на нашата економија, особено во пресрет на летната сезона, рече Мицотакис и додаде дека засега овој предлог наидува на топол прием.

За конкретниот грчки предлог ќе се дискутира на утрешниот Самит на ЕУ, а Мицотакис изрази надеж дека ќе се постигне договор за единствен систем за сертификација.

Тој истакна дека на Самитот ќе побара од Европската комисија да се активира за побрзо одобрување на останатите вакцини, но и да изврши притисок до Фајзер за забрзување на производството на вакцини за „компанијата да биде доследна за дозите за кои се обврза да ги достави до европските земји во првиот квартал од 2021 година“.

Трамп во последен момент го помилува поранешниот советник Стив Бенон

Стив Бенон и Доналд Трамп

Американскиот претседател Доналд Трамп го помилува неговиот поранешен советник Стив Бенон во последниот бран помилувања пред денешното напуштање на претседателската канцеларија. Трамп одобрил 143 помилувања и преиначувања на пресуди на широк спектар личности, вклучувајќи поранешен републикански финансиер, рап ѕвезда и поранешен градоначалник.

„Претседателот Доналд Трамп им даде помилување на 73 лица и преиначување на пресудите на други 70 лица“, се вели во соопштението на неговата администрација.

Судбината на Бенон, влијателен советник на Трамп, кој помогна во менаџирањето на претседателската кампања во 2016 година, беше една од наијинтересните за јавноста. Тој се соочи со федерални обвинувања за наводна измама на луѓе при собирање средства за изградба на граничен ѕид меѓу САД и Мексико, проект на Трамп. Бенон се изјасни за невин по овие обвиненија.

СЗО: Британскиот вид коронавирус е присутен во 60 земји

Логото на СЗО

Новиот вид на коронавирус, кој прв пат беше забележан во Велика Британија, продолжува да се шири и во минатата недела бил присутен во 60 земји и територии, соопшти Светската здравствена организација (СЗО). Тоа е за 10 земји повеќе отколку на 12 јануари, наведува СЗО во својот неделен епидемиолошки преглед.

Варијантата на коронавирусот од Јужна Африка, која како и британската е повеќе заразна од оригиналниот SARS-CoV-2, се шири побавно и засега е присутна во 23 земји и територии, што е за три повеќе во однос на 12 јануари.

СЗО соопшти дека го следи и ширењето на две други варијанти вирус, кои се појавија во Бразил, а потоа се забележани и во Јапонија кај 4 патници од Бразил.

Џо Бајден напладне ја презема должноста претседател на САД

Џо Бајден со сопругата Џил

По едни од најконтроверзните претседателски избори и транзициски периоди во историјата на САД, Демократот Џо Бајден денеска напладне треба да даде заклетва и да ја преземе должноста претседател, на скалите на Капитол, под силно обезбедување во Вашингтон.

Кога ќе ја стави раката на Библијата, 78-годишниот Бајден ќе стане најстарата личност што дала заклетва како американски претседател и кратко потоа ќе влезе во Белата Куќа, заменувајќи го Доналд Трамп и станувајќи 46-ти претседател на земјата.

Прв пат во 152 години, претседателот во заминување, во случајов Трамп, нема да присуствува на инаугурацијата, иако поранешните шефови на државата Џорџ В. Буш, Бил Клинтон и Барак Обама треба да бидат таму кога претседателот на Врховниот Суд Џон Робертс ќе ја раководи заклетвата на Бајден на новата функција.

Поранешниот претседател Џими Картер, кој има 96 години, рече дека нема да може да присуствува на церемонијата. Потпретседателот на Трамп, Мајк Пенс, изјави дека ќе биде таму, како и многу други републикански конгресмени.

Историја ќе се испише кога 56-годишната Камала Харис ќе положи заклетва како потпретседател и ќе стане прва жена и прва обоена личност на таа функција.

Да продолжат разговорите со Бугарија, порачуваат евро-дипломатите

Eвроамбасадорот во Северна Македонија, Дејвид Гир

Шефовите на дипломатските мисии на земјите-членки на ЕУ во Северна Македонија предводени од евроамбасадорот Дејвид Гир, на редовниот годишен состанок со премиерот Зоран Заев, покажаа посебен интерес за активностите за решавање на отворените прашања со Република Бугарија поради кои не се постигна консензус за преговарачката рамка за Северна Македонија во Брисел, соопшти Владата.

На вчерашниот состанок било истакнато неподелено мислење дека процесот треба колку што е можно побрзо да продолжи и да заврши со старт на преговорите за членство на земјава во ЕУ.

Премиерот Заев истакнал дека за нас е важно да го продолжиме дијалогот со Бугарија, во духот на меѓусебно почитување и во имплементацијата на договорот за пријателство преку поинтензивна меѓу-секторска соработка.

Членството на Северна Македонија во ЕУ, повторил Заев, нема алтернатива.

„Истовремено остануваме цврсто определени за одредени прашања, кои се наши црвени линии, како што е македонскиот идентитет и македонскиот јазик, за нив не преговараме“, додал премиерот.

Времето- многу студено утро, подоцна сончево и потопло

Времето изутринава е ведро и многу студено, а преку денот ќе биде сончево со мала до умерена облачност. Ќе дува слаб до умерен ветер претежно од југозападен правец.

Утринските темепратури, според УХМР, се движат од минус 13 до минус четири, а дневните ќе бидат од минус еден до осум степени.

Во Скопје слично време со минимална температура од минус девет и максимална од четири степени.

Утре на планините во западните делови ќе има услови за повремен снег. Во наредните денови ќе преовладува променливо облачно и потопло време со повремени врнежи од дожд, а на планините од снег со променлив интензитет.

Во деновите од викендот ќе дува умерен до засилен јужен ветер. Поради јужното воздушно струење ќе има пораст на утринските и дневните температури, што ќе предизвика побрзо топење на снегот.

Трамп: Американците да се „помолат“ за успех на идната администрација

Членови на Националната гарда се одмораат пред американскиот Капитол во Вашингтон во пресрет на утрешната 59 та инагурација на новоизбраниот претседател Џо Бајден

Американскиот претседател Доналд Трамп на последниот ден од неговиот мандат ги повика Американците да „се молат за успех“ на администрацијата на новоизбраниот претседател Џо Бајден во неговото проштално видео. Трамп во неговиот говор ги цитираше, како што рече, успесите на неговиот четиригодишен мандат.

„Оваа недела инаугурираме нова администрација и да се помолиме за нејзин успех во одржување на безбедна и просперитетна Америка“, истакна Трамп во дел од видео- пораката која ја објави Белата Куќа.

Трамп не го спомна Бајден во делот од видео пораката која беше објавена. Целото видео со неговиот говор се очекува да биде објавено за неколку часа.
Трамп во заминување неколку пати се обиде да ја поништи победата на Бајден на изборите на 3 ноември, тврдејќи без докази дека победата му е украдена. Ваквите тврдења десетина пати беа одбиени од неколку американски судови, а случаите покренати од правниот тим на претседателот пропаднаа во Врховниот суд.


Тој неодамна изјави дека нема да присуствува на инагурацијата на Бајден закажана за 20 јануари, со што создаде прекин во традицијата на САД на мирен трансфер на власта.

Нови 400 заболени од коронавирус и 11 починати

Клиника за инфективни болести во Скопје

Во последните 24 часа се евидентирани нови 400 случаи на заболени од коронавирусот и 11 починати од последици од ковид-19 како и 206 оздравени пациенти. Како што соопшти Министерството за здравство, направени 2.327 тестирања, а од новите 400 случаи на заразени со коронавирусот најголемиот дел се од Скопје- вкупно 198, потоа најмногу регистрирани има во Куманово-28, Кавадарци 19 и Тетово-16.


Починати се 11 лица од кои пет од Скопје (82, 63, 75, 74 и 53), едно од Битола (66), од Струмица (70), Кавадрци (55), еден пациент од Струга (77), еден од Кочани (71) и еден од Пехчево (71). Пациентите се починати во болнички услови.

Вкупниот број на ковид дијагностицирани во земјава од почетокот на епидемијата изнесува 89.392, бројот на оздравени пациенти е 73.983, на починати е 2.726, а бројот на активни случаи изнесува 12.683.

Видео на Навални за „Палатата на Путин“ од милијарда долари

Фотографија од таканаречената „Палата на Путин“ објавена од антикоруциската фондација на Алексеј Навални

Руската антикорупциска фондација на опозицискиот лидер Алексеј Навални денеска објави афера во која е инволвиран рускиот претседател Владимир Путин, на само еден ден по апсењето на Навални.

Во аферата именувана како „ Палатата на Путин“ се тврди дека луксузна палата изградена на заливот на Црното Море наменета за рускиот владетел чини 1,3 милијарди американски долари а зафаќа простор од 17 илјади хектари . Во извештајот е наведено дека во луксузниот имот е вклучена црква 2,5 илјади метри квадратни стаклена градина, амфитеатар, неколку станбени згради и „специјален тунел“ што води до брегот. Во самата палата се вклучени домашно кино, лоби со бар, казино и сала со автомати и базени.

За прв пат на јавноста и се достапни фотографии од внатрешноста на имотот долго познат како Палатата на Путин, кој во јавноста негираше каква било поврзаност со имотот. Според руската политичка опозицијата, луксзуниот имот стана безобразен симбол на неконтролирана државна корупција што доаѓа од самиот врв.

„Ова е една од најдобро чуваните места во Русија и ова е најголемата тајна на Путин, која е заштитена од стотици па дури и илјадници непознати луѓе во Русија, “ вели Навални како наратор на почетокот од двочасовното видео објавено на Јутјуб.

Внатрешноста на таканаречената Палата на Путин - фотографија објавена од антикорупската фондација на Алексеј Навални
Внатрешноста на таканаречената Палата на Путин - фотографија објавена од антикорупската фондација на Алексеј Навални

Според објавените податоци во извештајот имотот кој е 39 пати поголем од Монако, „бил изграден за да не може да му се пристапи ниту од копно, ниту од мора или од воздух со тампон зона од околу 7 илјади хектари наводно во сопственост на моќната Федерална безбедносна служба и изнајмен од фирма што е сопственик на палатата.

Во извештајот е наведено дека е воведена и зона на забрана за летови околу територијата на имотот. Таканаречаната „Палата на Путин“ е изградена во период од 2005 до 2010 година. Истрагата на антикорупциската фондација покажала дека палатата е во сопственост на фирмата наречена Бином, а управувана од луѓе кои наводно се поврзани со внукот на Путин, Микаил Шеломов, но вистинскиот сопственик, како што се тврди во истрагата е Путин.

Ова двочасовно видео проследено со веб страна посветена на аферата денеска е објавено, на само еден ден по одлуката на Московскиот суд да се задржи во 30 дневен притвор Навални додека го чека судењето за обвиненијата кој тој ги опиша како политички мотивирани.

Остра реторика меѓу Вучиќ и Харадинај за „Голема Албанија“

Илустрација

Српскиот претседател Александар Вучиќ, изјави дека најавата на кандидатот за претседател на Косово, Рамуш Харадинај, за можното обединување на Косово со Албанија претставува закана не само за Србија, туку и за регионот, Европа и целиот свет. Тој денеска одговарајќи на новинарско прашање истакна дека Србија нема да возврати со закана на закана. Вучиќ коментирајќи ја оваа изјава, кажа дека би сакал да слушне некои реакции од Брисел или Вашингтон.
„Бидејќи, не дај Боже, некој во Србија од толку високо место да зборуваше за некои други видови на обединување на Балканот, тие многу скоро би не бомбардирале. Но, бесмислено е да се зборува повеќе за двојните аршини,“ изјави тој.

Лидерот на Алијансата за иднината на Косово и кандидат за претседател на Косово, Рамуш Харадинај, во понеделникот изјави дека Европската унија, со своето однесување кон Косово, може да го принуди Косово да се обедини со Албанија.
Денеска Харадинај по изјавата на Вучиќ искоментира дека Србија треба да го признае Косово за да спречи создавање на „ Голема Албанија“.
„Не се плашете господине Вучиќ. Нема потреба и да се нервирате. Косово го бара само тоа што му припаѓа. Доколку вие и останатите сакате да спречите референдум за обединување на Косово со Албанија во 2025 година, има еден многу едноставен начин: Србија да го признае Косово како независна држава. Понатаму Косово го знае својот пат за зачленување во НАТО, ЕУ и ОН. Со хистерична реторика нема да го спречите нашето право да ја дефинираме иднината на Косово, порача Харадинај преку својот официјален Фејсбук профил.
Тој додаде дека неговата вчерашна изјава и заложба за обединување со Албанија е резултат на „постојаната небрежност на Брисел кон Косово“.

Православни верници во Црна Гора пливаа по крстот и покрај забраните

Во неколку градови во Црна Гора верниците од српската православна црква пливаа во потрага по по Светиот Богојавленски крст кој се фрла во водите по повод празникот Водици или Богојавление. Ова се случува и покрај тоа што во Црна Гора на сила се мерките за забрана за групирање на граѓани. Свештеникот Данило Трпчевски поради организација на верскиот обред во Подгорица каде што по крстот во вода се фрлиле 15-тина верници, се повикан на информативен разговор во полиција. Скокањето во вода по крст како верски обред е одржан во Подгорица, Бару, Бело поле, Херцег Нови, и неколку други помали градови. Во дел од овие градови каде што се оддржал обредот, полицијата направила записник и го доставила до надлежното обвинителство.

Владата со план за работа за рамковните административци

Илустрација, владина седница


Владата денеска донесе одлука со која се усвојува планот за распределба на рамковно вработените административци. Министерот за политички систем и односи меѓу заедниците Артан Груби денеска најави дека новите решенија за работа ќе им бидат доделени на административните службеници во наредните неколку денови.

Министерството за информатичко општество и администрација, е задолжено во рок од седум дена од приемот на актите за систематизација на овие административни службеници, во рамки на своите надлежности да ја заврши постапката за согласност за работните места каде што ќе бидат сместени овие административни службеници.


Груби посочува дека органите на државната администрација се должни на административните службеници кои ќе ги прифатат во нивните институции да им овозможат стручна обука со цел да ги подобрат нивните знаења и вештини.

Осуден за шпионажа американско-ирански бизнисмен во Техеран

Илустрација, суд во Техеран

Иранскиот суд осуди американско- ирански бизнисмен кој беше обвинет за шпионажа, објавија денеска американските медиуми. Ова се случува во период кога односите меѓу двете земји се соочуваат со големи тендии. Стејт департментот соопшти дека „ имаат сознанија за случај во кој е приведен и друг американски државјанин во Иран“.
Според извештаите на иранските медиуми станува збор за Емад Шарки, кој бил назнален за заменик – шеф за меѓународно работи во иранската компанија нареан Сарава. На веб страницата на новинаската агенција „Клуб на млади новинари“ е посочено дека Шарки бил уапсен „во обид нелегално да ја напушти земјата преку западната граница на Иран“, објавува радио Фарда на РСЕ.
Поранешниот извршен директор на Сарава Холдинг, Саид Рахмани во 2019 година поднесе оставка и го напушти Иран.
Иранската новинаска агенција не наведува во извештајот кој е осудениот американско- ирански државјанин, бидејќи Техеран не дозволува двојно државјанство.

Вчитај повеќе

XS
SM
MD
LG