Достапни линкови

Вести

МАНУ, МПЦ-ОА и УКИМ со заеднички меморандум- Македонски манифест

Архивска фотографија- зградата на МАНУ

Македонската академија на науките и уметностите, Македонската Православна Црква – Охридска Архиепископија и Универзитетот „Св. Кирил и Методиј“ – Скопје денеска излегоа со заеднички став за како што наведуваат апсурдните барања од Бугарија во кој ги охрабруваат претседателот, премиерот, Собранието и другите фактори да почитуваат неколку постулати.

Овие институции бараат преговорите да се водат на рамноправна и принципиелна основа, со должно почитување на меѓународното право, без никакво условување од едната или од другата страна и со почитување на достоинството на македонскиот народ, да се почитуваат безрезервно сознанијата на македонските општествени, хуманистички и културолошки науки во врска со автохтоноста на македонскиот народ и неговиот историски, јазичен, културен и религиски континуитет, да се уважуваат не само објективните факти и научната аргументација, туку и комплексната интерпретација на историските факти, настани и личности.

„Да се уважуваат сознанијата, утврдените факти, усвоените теории и емпириските истражувања на современата светска славистика, лингвистика, историографија и меѓународното право, според коишто : македонскиот јазик и неговите дијалектни разновидности имаат свој просторен континуитет (што значи дека македонските дијалекти постојат и надвор од границата на денешна Македонија) и свој временски континуитет (што значи дека македонскиот јазик опстојувал со векови)“, наведуваат од МАНУ, МПЦ-ОА и УКИМ.

За македонскиот идентитет од трите институции наведуваат дека тој го црпи својот легитимитет од повеќе-вековните традиции, преданија, обичаи, колективна меморија, менталитет, јазикот, артикулираната свест за етнокултурната посебност, колективниот интегритет, почитта кон традиционалните религиски институции и наративот за припадноста на одреден географски и историски простор.

„Споделените места на меморија на балканските и медитеранските простори подразбираат инклузивен однос, а не ексклузивно присвојување на историјата и традицијата, подразбираат интелектуална слобода, а не робување на анахроните историски стереотипи и илузии, не културен и историски хегемонизам. Историската вистина не е политичка догма, туку дијалошка, повеќедимензионална категорија чувствителна на гледната точка, во тој контекст и на националниот интерес на секоја држава, вклучително и на Републиката", се наведува во манифестот.

Апелираат процесот за евроинтеграција да продолжи во духот на меѓусебно почитување и уважување на вложените напори од наша страна за исполнување на критериумите, да се применуваат позитивните и општоприфатени меѓународни Конвенции и Декларации на ОН за правото на самоопределување и за човековите права и слободи, да се почитува безусловно слободно изразената волја на македонскиот народ, неговата етничка и духовна посебност, да се почитува волјата на македонските граѓани, припадници на македонската Република.

види ги сите денешни вести

ЕУ лидерите повикаа на „ крај на репресеијата“ во Белорусија

Илустрација

Европската унија денеска одобри санкции кои ќе се однесуваат на клучните сектори на белоруската економија како и на главните извори на приходи на режимот на авторитарен владетел Александар Лукашенко. Станува збор за санкции кои се однесуваат на белорускиот извоз на ѓубрива, тутунска индустрија, нафта и петрохемиски производи.

На денешниот Самит на 27 земји членки на Унијата, лидери на блокот ги повторија повиците за итно ослободување на сите политички затвореници и произволно притворени лица во Белорусија и побараа „крај на репресијата на граѓанското општество и независните медиуми“ во она што беше наречено како „последната диктатура во Европа“.

Власта на Лукашенко беше под голем меѓународен притисок откако започна таканаречената брутална акција против политичката опозиција и независните медиуми во пресрет на спорните избори во август 2020 година.

Демонстрантите тврдеа дека изборите биле наместени, додека ЕУ, САД и другите земји одбија да ги признаат официјалните резултати од гласањето со што Лукашенко не е прифатен како легитимен лидер на Белорусија.

Односите се влошија на 23 мај кога белоруските власти со помош на воен авион го принуди патничкиот авион на Рајанер кој леташе на линијата Атина-Вилнус да слета во Минск. Лидери на неколку европски земји овој чин го сметаа за „киднапирање“ . Откако слета авионот, кој беше пренасочен непосредно пред да го напушти белорускиот воздушен простор, органите на прогонот веднаш ги уапсија опозицискиот блогер Раман Пратасевич и неговата руска девојка.

„Со оглед на сериозноста на тој инцидент, и со оглед на ескалацијата на сериозните повреди на човековите права во Белорусија и насилната репресија на граѓанското општество, демократската опозиција и новинарите, како и на лицата кои припаѓаат на националните малцинства, треба да се спроведат дополнителни насочени економски мерки “, соопштија лидерите на ЕУ.

Според заклучоците на Самитот, ЕУ ќе воведе понатамошни ограничувања кои ќе се однесуваат на трговијата со оружје, нафтени производи, и тутунски производи. Финансиските санкции ќе вклучуваат ограничувања на пристапот на белоруската влада до пазарите на капитал во ЕУ.

Европската унија, Соединетите држави, Велика Британија и Канада претходно спроведоа санкциите кон Белорусија во кои беа вклучени замрзнување на средствата и забрането патување кон нив за десетици функционери, пратеници и министри од администрацијата на Лукашенко и членовите на неговото семејство.

Вучиќ жали што Скопје и Тирана не почнаа преговори со ЕУ

Српскиот претседател, Александар Вучиќ, изјави денеска дека му е многу жал што ЕУ не им дала на Албанија и Северна Македонија датум за почеток на преговорите и дека не е фер кон тие земји и нивните граѓани.

„Тие ќе имаат искрен пријател во Србија и ќе ја подобриме соработката со нив и сакам да објавам дека ќе имаме важна во вторник видео конференција со премиерите Зоран Заев и Еди Рама. Верувам дека ќе донесеме конечни одлуки за заедничко дејствување против природни катастрофи и катастрофи и дека заеднички ќе обезбедиме што побрз проток на стоки, капитал, луѓе и услуги, и преку фитосанитарни и ветеринарни инспекции на граничните премини и други модалитети, “изјави Вучиќ.

Тој посочи дека системот на работни дозволи е од големо значење и дека оние кои добиле дозвола на територијата на една земја ќе имаат дозвола за секоја од земјите, што е од голема важност за забрзување на протокот на луѓе во регионот и обезбедуваат сè повеќе исчезнати работна сила за Србија.

Албанија нема да го укине полицискиот час

Албанскиот Комитетот на експерти за справување со пандемијата не
планира укинување на мерката за ограничено движење и покрај стабилната епидемиолошка состојба во Албанија. Скендер Братај, член на комитетот и директор на Националниот ургентен центар во Тирана изјави дека мерките ќе продолжат да се ослободуваат, но нема да бидат укинати целосно.

„Според одлуката на Комитетот полицискиот час од први јули се скратува за еден час, односно наместо во 23:00 ќе почнува на полноќ и ќе трае како и до сега до 6 часот. Во врска со барањето да се дозволи музика во угостителските објекти и по полноќ, а не како до сега до 22:00 часот, тоа не е поврзано само со опасниот вирус, туку со фактот дека локалите се во станбени области и музиката станува вознемирувачка за жителите во тие области, вели тој.

Тој додава дека од први јули ќе се дозволи одржување културни активности со присутност од 30 отсто од капацитетите.

Братај стравува дека мутацијата на делта коронавирусот можно е да се појави во Албанија, поради фактот што нема никакви ограничувања за влез во земјата за странците, но и поради најавата за масовно доаѓање на иселениците, кои, по традиција, летниот одмор го минуваат во родниот крај.

Според вчерашните податоци на министерството за здравство регистриран е само еден нов случај позитивен на Ковид-19, од направените 1.960 тестови, починати нема, активни на болеста се 87 лица а болнички се третираат само двајца пациенти.

Сенатори на средба со Бајден во Белата Куќа

Американските сенатори денеска ќе се сретнат со американскиот претседател Џо Бајден во Белата куќа откако постигнаа договор за „рамка“ за нацрт-законот за финансирање на изградба и реконструкција на инфраструктурата. Неколку сенатори изјавија дека рамката е договорена по состанокот со претставници на Белата куќа, кој се одржа во вечерните часови на 23 јуни.

„Дојдовме до договор за план што го имаме и само ќе се обидеме да го финализираме “, рече сенаторот Џо Манчин од Вирџинија.

Донесувањето на законот за обнова на патиштата, мостовите и другите традиционални инфраструктури во САД е главен приоритет на Бајден. Тој неодамна изјави дека тоа ќе помогне во поттикнување на економскиот раст,во периодот кога земјата се избавува од економските последици од пандемијата со ковид-19.

Законот првично беше „тежок “ илјада милијарди долари наменети за традиционална инфраструктура и за грижа на центрите за згрижување деца, болници и грижа за стари лица. Сенаторите договорија рамка за која е за речиси три пати помала од првичниот предлог осум години за инфраструктура.

Белата куќа соопшти дека состанокот меѓу сенаторите и претставниците на Белата куќа бил продуктивен.

„Групата постигна напредок кон скицирање на потенцијален договор и претседателот ја покани групата да дојде во Белата куќа за да разговараат за тоа лично“, изјави портпаролот на Белата куќа.

Деталите од договорот се уште не се достапни за јавноста.

Американските разузнавачи загрижени за можен пад на авганистанската влада

Авганистанската влада може да „падне“ за шест месеци по завршувањето на повлекувањето на американските трупи од земјата, заклучиле минатата недела американските разузнавачки агенции, пишува „Волстрит журнал“.

Според весникот неодамнешните достигнувања на талибанците низ Авганистан ја поттикнале американската разузнавачка заедница да ги ревидира своите изгледи за тоа колку долго може да издржи владата во Кабул, поддржана од Западот, откако американските трупи ќе го завршат во целост повлекувањето.

Повикувајќи се на официјални лица, весникот пишува дека талибанците ја презеле контролата над десетици области од владините сили во последните неколку недели. Меѓународните воени сили предводени од САД полека се повлекуваат од Авганистан, а крајниот рок за тоа е 11 септември. Американската армија соопшти дека веќе има повлечено повеќе од половина од своите 3.500 војници од регионот.

Претходно неделава бунтовниците го зазедоа главниот граничен премин на Авганистан со Таџикистан и извршија офанзива врз северните градови Кундуз и Мазар-е Шариф.

Според весникот „Волстрит Журнал“ Белата куќа ја охрабруваат војската да го забави темпото на повлекување на војската.

Локалните избори ќе се распишат во средината на летово

Талат Џафери

Претседателот на Собранието Талат Џафери на крајот на јули или почетокот на август ќе ги распише локалните избори што треба да се одржат во втората половина на октомври изјави денеска на редовната средба со новинари.

Точниот датум за распишување на локалните избори зависи од информациите кога завршуваат мандатите на градоначалниците. Тој предупреди дека доколку изборите би се одржале на 17 октомври, тогаш изборната кампања би можела да се поклопи неколку дена со пописот на населението, што завршува на 30 септември.

„Кога ќе дојде време ќе пуштам писмо до ДИК во однос на роковите и мандатите“ изјави Џафери.

Џафери информираше дека до 1 јули би требало да се одржи седница за една од интерпелациите поднесени од опозицијата. Тој додаде дека по 1-ви јули во наредните десет дена нема да има пленарни седници затоа што тогаш започнува комисиската дебата за ребалансот на Буџетот.

Тој истакна дека со Собранието не се пристигнати предлозите за еколошката такса на горивата и за намалуање на ДДВ кај струјата и оти не знае кога би биле ставени на дневен ред на седница.

Со два авиона викендов пристигнуваат кинеските вакцини „Синовак“ во Скопје

Министерот за здравство, Венко Филипче

Во два авиона по 250 илјади дози в недела во Скопје ќе пристигнат кинеските вакцини против ковид-19 од фирмата „Синовак“, најави денеска министерот за здравство Венко Филипче. Тој додаде дека утре се очекува и пратката од американската компанија „Фајзер “од 100 илјади вакцини кои доаѓаат во земјава преку ковакс механизмот. Тие во употреба ќе бидат пуштени на почетокот од идната недела.

„Верувам дека во понеделник и вторник ќе бидат пуштени во употреба“ изјави Филипче.

Вкупно се аплицирани 488.010 дози вакцини, а ревакцинирани се 206.163 граѓани. Вчера вкупно се вакцинирале 5.407 граѓани, додека прва доза вакцина вчера примиле 3.263 граѓани. Вкупниот број на лица кои изразиле желба за вакцинација преку веб платформата vakcinacija.mk е 458.040 граѓани.

Унгарскиот анти-ЛГБТ закон и односите со Русија клучни теми на Самитот на ЕУ

Лидерите на Европската Унија денеска на Самитот ќе дискутираат за новата стратегија за односите со Русија, за контроверзниот унгарски закон со кој се забранува „промоција на хомофобија“ на малолетници.

Претседателката на Европската Комисија Урсула фон дер Лајен изјави дека унгарскиот закон „јасно ги дискриминира луѓето врз основа на сексуална ориентација. Таа додаде дека извршната власт на ЕУ размислува за какви правни активности да преземе поради прекршување на основните европски вредности.

Повеќе од половина од земјите во ЕУ вклучувајќи ги и Германија, Франција, Италија и Шпанија потпишаа заедничка декларација во која изразуваат „голема загриженост “ во врска со законот на Унгарија.

Лидерите на дводневниот самит ќе дискутираат и за предлогот на Франција и Германија за самит на Европската унија со рускиот претседател Владимир Путин во обид за подобрување на односите. Ваквиот Самит ќе следува по средбата на Путин со американскиот претседател Џо Бајден во Женева минатата недела.

Ставовите на ЕУ и Русија се спротивставени по однос на прашањата околу Украина и Белорусија, и се обвинуваат меѓусебно за ширење на дезинформации и загрозување на безбедноста и стабилноста во Источна Европа како и мешање во избори.

На дводневниот самит се очекува да ги објави деталите за економските санкции против Белорусија поради присилното пренасочување на авион на Рајанер по што белоруските власти приведоа опозициски активист кој беше патник во авионот.

Нов бран ковид-19 може да ја заврши порано туристичката сезона во Бугарија

Плажа на Сончев брег во Бугарија

Не е исклучен нов бран на заразени со ковид-19 во текот на летото доколку се влоши ситуацијата со вирусот, вели министерот за здравство на Бугарија, Стојчо Кацаров. Тој посочува дека бугарските граѓани не треба да бидат уверени дека Бугарија има ниски стапки на ширење на коронавирус. Коцаров вели дека нов бран може да ја врати Бугарија на својата пролетна позиција и да ја заврши туристичката сезона.

„Не постои целосна контрола врз ширењето на вирусот и инфекцијата. Ние веќе го регистриравме појавувањето на индискиот вид во Бугарија. Ако овој процес продолжи, не можеме да исклучиме бран, вклучително и во текот на летото. Единствениот начин да спречување на понатамошни бранови и проблеми е вакцинирањето“, вели Коцаров.

Тој посочува дека на здравствениот систем во Бугарија му треба подобра организација.


Во Грција укинато задолжителното носење маски на отворено

заштитен плексиглас на влезот на Акропол во Атина

Од денеска изутрината во Грција е укината мерката за задолжително носење маска на отворено. Препораката е маските, сепак, да се носат на места каде, иако се на отворено, има турканици. Во затворен простор препораката за задолжително носење и натаму важи. Од понеделник, 28 јуни, се укинува и полицискиот час, а на масите во угостителски објекти ќе биде дозволено да седат до 10 лица.

Две третини од Грците ќе се вакцинираат против ковид-19

„Подобрена е епидемиолошката слика во земјата“, изјави членката на Комитетот за инфективни болести и владин советник, Вана Папаевангелу, додавајќи дека сепак, се додека вирусот циркулира меѓу луѓето, нема простор за самозадоволство. Папаевангелу изјави дека колку подолго циркулира вирусот, толку се поголеми шансите за нови мутации.

Франција и Германија предлагаат самит на ЕУ со Путин

Франција и Германија предлагаат самит на Европската унија со рускиот претседател Владимир Путин

Франција и Германија предлагаат самит на Европската унија со рускиот претседател Владимир Путин во обид за подобрување на односите, јавува новинската агенција Ројтерс, повикувајќи се на дипломатски извори. Тоа би бил прв таков состанок од 2014 година и ќе следи по средбата на американскиот претседател Џо Бајден со Путин во Женева на почетокот на овој месец. Овој предлог, според оценките, ја одразува загриженоста во Париз и Берлин дека пристапот на ЕУ кон Русија во последните години е главно насочен кон санкции врз Москва. „Треба да разговараме за тоа како да се извлечеме од оваа негативна спирала ... но треба да напредуваме обединети“, изјави за Ројтерс еден висок дипломат на ЕУ, додавајќи дека некои балтички земји можеби нема да се согласат на самит.

Борел го претстави новиот пристап на ЕУ во односите со Русија

Не е јасно дали на евентуален таков самит ќе учествуваат сите 27 лидери на ЕУ или само шефицата на Европската комисија Урсула фон дер Лајен и претседателот на Европскиот совет, Шарл Мишел. Таквите самити беа прекинати откако Русија го анектираше украинскиот полуостров Крим во 2014 година. Лидерите на ЕУ на дводневниот самит во Брисел ќе разговараат за новата стратегија за управување со влошените односи со Русија.

Блинкен: САД немаат подобар пријател од Германија

Германската канцеларка Ангела Меркел и државниот секретар на САД, Антониј Блинкен, одржаа заедничка прес-конференција во Берлин, 23 јуни 2021 година

Американскиот министер за надворешни работи Ентони Блинкен вчера во Берлин изјави дека Соединетите држави немаат „подобар пријател“ од Германија. „Сметам дека е фер да се каже дека САД немаат подобар партнер и подобар пријател во светот од Германија“, рече Блинкен на прес-конференција со германската канцеларка Ангела Меркел. Новинската агенција Франс Прес проценува дека ваквата изјава отстапува од традиционалната позиција на Соединетите држави, кои Британија обично ја сметаат за најблизок партнер.


Џонсон - Односите меѓу Британија и САД се неуништиви

„Сè започнува со заеднички вредности и интереси, како и заедничко верување дека сите предизвици со кои се соочуваме влијаат врз животот на сите луѓе“, рече Блинкен, додавајќи дека сите се согласуваат дека ниту една земја не може да надмине сè самостојно. Блинкен е на европска турнеја за време на која, по Германија, ќе ги посети Франција и Италија.

Денеска и утре Македонија во портоколова фаза

Денеска и утре целата територија на државата ќе биде зафатена со температури од портокалова фаза, соопштија од Министерството за здравство по најава од Управата за хидрометеоролошки работи. Согласно Акцискиот план за превентирање на последиците од топлотните бранови врз здравјето на населението, потребно е да се почитуваат општите мерки за заштита на здравјето, како што се: ослободување од работните обврски на најранливите групи на населението, вклучувајќи ги бремените жени и лицата на возраст над 60 години. Во установите за згрижување на децата (градинки) да не се практикуваат физички активности и да не се изнесуваат децата на отворено во периодот од 11 до 17 часот.

Доаѓа топлотен бран, потребна е адаптација за екстремна клима

Единиците на локалната самоуправа, Црвениот крст на РСМ и Центрите за социјални работи во регионите зафатени со топлотниот бран да имаат поактивен пристап и да пружат помош на осамени, стари и изнемоштени лица и бездомници, апелира Министерството за здравство. Исто така од Министерството за здравство апелираат до населението дека во целиот летен период потребно е да ги почитува општи мерки за заштита на здравјето, како што се во текот на екстремно топли денови да се остане повеќе во затворени простории (пред се климатизирани), а при неопходен престој на отворен простор во овој период, да се најде можност за почести одмори под сенка. Да се носи светла и лесна облека, а при директна изложеност на сонце да се носат заштитни очила и капа и да се користи крема со висок заштитен фактор. Да се внесува помало количество храна, претежно овошје и зеленчук, а помалку масна храна. Да се внесуваат големи количества течности, најдобро обична вода за пиење, а да се избегнуваат алкохолните пијалаци. При влегување во возило, потребно е тоа одреден период да се проветри, укажува МЗ. На хронично болните лица им се препорачува редовно да ја земаат препишаната терапија, во консултација со матичните лекари.

Како да се издржи топлотниот бран?

Поради високите температури и зголемената можност за појава на труења со храна и цревни заразни заболувања, се препорачува задолжително миење на земјоделско-градинарски производи (свеж зеленчук и овошје) пред нивна употреба, термичка подготовка на храната и нејзино консумирање веднаш по подготовката.

Во Брисел почнува самитот на Европската унија

Лидерите на Европската унија присуствуваат на состанокот на тркалезна маса на самитот на ЕУ во Брисел, 24 мај 2021 година

Лидерите на ЕУ денеска и утре ќе се состанат во Брисел за да разговараат за ковид-19, економското закрепнување, миграцијата и надворешните односи, вклучително и за односите со Турција и Русија. Самитот за С. Македонија претставува уште една теоретска можност за старт на преговорите во јуни. Во вторникот на Советот за општи работи на Унијата што се одржа во Луксембург Бугарија уште еднаш стави блокада на усвојувањето на преговарачката рамка за отпочнување на преговорите за пристапување на С. Македонија во ЕУ.

Сијарто: секогаш ќе се појави некое прашање заради кое не може да почнат преговорите со С. Македонија

На самитот, како што е најавено, ќе биде направен преглед на состојбата со пандемијата и вакцините. Во овој контекст, лидерите ќе се осврнат врз сите преостанати пречки поврзани со правото на слободно движење низ ЕУ. Во согласност со изјавата на членките на Европскиот совет од февруари 2021 година, Комисијата се очекува да даде извештај за научените лекции од пандемијата досега. Лидерите на ЕУ ќе ја разгледаат состојбата во спроведувањето на планот на ЕУ за закрепнување на Европа.

Анкара негира дека Ердоган ја навредил Урсула фон дер Лајен

Во врска со Турција лидерите ќе го разгледаат предлогот за давање 4,18 милијарди долари на Турција за да продолжи да биде домаќин на сириски бегалци до 2024 година. Ова е дел од поголемиот регионален план за поддршка на бегалците за да се спречи тие да стигнат до земјите членки на ЕУ.

Времето денеска: сончево и многу топло

Ќе биде сончево и многу топло со мала до умерена локална облачност. Ќе дува слаб до умерен ветер од северозападен правец. Попладне ќе има услови за изолирана појава на краткотраен дожд и ретки грмежи. Дневната температура ќе биде од 31 до 41 степен. Во Скопје и околината слично време. Дневната температура ќе биде 40 степени.

Заев за ФФМ- ако примаат пари од буџет мора да го почитуваат договорот за името

Премиерот Зоран Заев

Сите невладини институции, приватни или правно-приватни субјекти во кои спаѓаат и приватни фирми и граѓански здруженија, ако примаат пари од Буџетот за нивни меѓународни активности, треба да го почитуваат Преспанскиот договор. Вака премиерот Зоран Заев одговори вечерва на прашањето дали ќе се менува името на Фудбалската федерација на Македонија (ФФМ).

Заев рече дека чувствува горчина, но Преспанскиот договор е завршена работа и тоа е нешто што ни обезбедува иднина. Треба да тераме во тој правец, не ни требаат, како што нагласи, нови непријателства.

"Сите институции кои не се државни, а примаат пари од државата за нивно претставување надвор, имаат обврска според Преспанскиот договор да се променат. Очекувам федерациите дури и кои не примаат пари или други здруженија, да го следат уставното име на државата. Не дека не е горчина и кај мене. Тоа е завршена работа и тоа е нешто што ни обезбедува иднина. И треба да тераме во тој правец. Не ни требаат нови непријателства. Дефинитивно сите невладини институции, односно приватнни или правно-приватни субјекти во кои спаѓаат и приватни фирми и граѓански здруженија, ако примаат пари од Буџетот за нивни меѓународни активности, тоа треба да го направат“, објасни Заев.

Заев- прашањето со ФФМ ќе се реши врз основа на Договорот од Преспа и правилата на УЕФА

Во јануари, рече премиерот, ФФМ има примено пари од Агенцијата за млади и спорт.

„Очекувањата се да постапат согласно Уставот и законите зашто Преспанскиот договор е ратификуван и тој е закон. Да, во фудбаласката репрезентација на Северна Македонија играат Македонци, Албанци, Турци, Бошњаци,… Треба да го следиме Преспанскиот договор зашто тоа е наша обврска, а Грците си имаат нивни обврски кои ги исполнуваат“, рече Заев.

Инаку Грција по почетокот на Европското првенство во фудбал бараше од УЕФА , како што јавија медумите, македонската репрезентација да ја користи кратенката НМ или РНМ во англиската верзија на уставното име, а побара и да го разгледа името на македонската фудбалска федерација, и да се сменат дресовите.

Министерот за надворешни работи Бујар Османи вели дека Фудбалската федерација на Македонија (ФФМ) нема обрвска да го прилагоди своето име според Договорот од Преспа бидејќи е независна и непрофитна организација која во централниот регистар е регистрирана како здружение кое не прима државни пари.

УЕФА потврди дека ја примила забелешката од Грција но ја одби наведувајќи дека тие го користат името Фудбалска федерација на Република Северна Македонија во целата официјална комуникација и дека ја имаат прилагодено релевантната терминологија меѓу кои и статутот на УЕФА.

Оптимизам во Иран за оживување на нуклеарниот договор од 2015 година

Махмуд Ваези, шеф на кабинетот на иранскиот претседател во заминување Хасан Рохани

Иранскиот претседател во заминување Хасан Рохани рече дека главните прашања меѓу Техеран и светските сили за оживување на нуклеарниот договор од 2015 година се решени, иако Франција и Германија предупредија дека се уште има препреки.

Изјавата дадена на состанокот на неговиот кабинет денеска доаѓа откако високи ирански функционери сигнализираа дека има напредок во разговорите што се одвиваат од април во Виена. Шефот на кабинетот на Рохани Махмуд Ваези рече дека Соединетите Американски Држави се согласиле да тргнат повеќе од 1000 санкции кои поранешниот американски претседател Доналд Трамп ги воспостави откако пред три години реши да ја повлече земјата од нуклеарниот договор.

"Постигнат е договор за тргање на сите санкции за осигурување, нафта и транспорт, а сега се разговара кои од останатите санкции се поврзани со нуклеарниот договор, а кои се однесуваат на периодот пред неговото постигнување во 2015 година“, го цитираат Ваези иранските државни медиуми.

Соединетите Американски Држави се индиректно присутни на разговорите со Техеран во Виена поради тоа што Иран ги отфрли билатералните разговори лице в лице. Но, американска делегација е во австрискиот главен град додека други држави и Европската унија разговараат непосредно со двете страни.

Не треба веќе маски на отворено во Грција

Луѓе на плажа на Грција со почитување на социјалната дистанца

Грција ќе ја укине обврската за носење маски и на отворено и ќе ги олесни преостанатите рестрикции наменети за намалување на ширењето на ковид19, соопштија грчките здравствени власти. Носењето маска ќе остане задолжително во затворените објекти.

Денеска во земјата се регистрирани 520 нови случаи на ковид19 и 14 починати со што вкупната бројка на инфицирани од почетокот на пандемијата досега е 419 455 а на починати 12 595. Грчките здравствени власти велат дека помалку од десет случаи на инфекции со новиот делта сој се регистрирани во земјата и побараа од луѓето над 50 години да се вакцинираат што е можно поскоро.

Најавено е дека од 28 јуни ќе биде укинат и полицискиот час, дека бројот на луѓето кои седат на иста маса во ресторани ќе се зголеми од шест на десет, а бројката на присутни на свадби и други свечености ќе може да биде до 300 луѓе.

Британија демантира дека Русија пукала кон нивни брод во Црното море

Британскиот ХМС Дефендер во црноморското пристаниште во Одеса, 18.06.2021

Обединетото кралство ги негираше извештаите дека руски брод предупредувачки пукал кон брод на британската воена морнарица во Црното море, наведувајќи дека инцидентот е дел од претходно најавена воена вежба.

Руските медиуми денеска јавија дека руската војска пукала предупредувачки кон британски воен брод во близина на украинскиот полуостров Крим, кој Русија нелегално го анектираше во 2014 година.

"Веруваме дека Русите спроведувале вежба на гаѓање во Црното Море и ја предупредија поморската заедница на своите активности. Ниеден истрел не бил насочен кон ХМС Дифендер и не ги признаваме тврдењата дека бомби биле фрлени на неговата рута “, се наведува во соопштението на британското министерство за надворешни работи.

Руската државна агенција ТАСС јави дека до инцидентот дошло откако ХМС Дефендерот на британската морнарица наводно преминал три километри во територијата на Црното море кое Русија ја смета за своја. Во инцидентот не е предизвикана штета.

Москва го анексираше Крим во 2014 година и им дава поддршка на проруските сепаратисти во источниот украински регион Донбас каде што повеќе од 13 200 луѓе загинаа од почетокот на конфликтот до денес. Западните земји воспоставија санкции кон Русија поради анексијата на Крим, односот кон затворениот опозициски руски активист Алексеј Навални, изборните мешања и сајбер напади врз американската инфраструктура.

ФФМ се соочува со казна од УЕФА поради можно кршење на здравствените протоколи од македонски фудбалери

Букурешт- Македонските фудбалери на натправерот со Австрија на Европското првенство, 13.06.2021

Северна Македонија се соочува со казна од УЕФА за можно кршење на здравствените правила од страна на играчите на репрезентацијата иако веќе е елиминирана од Европското фудбалско првенство, јавува агенцијата Асошиејтед прес.

УЕФА наведува дека назначиле дисциплински истражител кој треба да провери дали имало “лошо однесување и можно прекршување“ од фудбалерите на здравствените протоколи на ЕУРО 2020. Тоа, како што јавува Асошиејтед прес, се однесува на земањето на примероци од играчите во Амстердам во саботата за задолжителни тестови за ковид19 пред почетокот на натпреварот со Холандија кој македонската репрезентација го загуби со 3-0.

Каква било дисциплинска одлука на УЕФА ќе биде насочена кон Фудбалската федерација на Македонија, а не индивидуално, кон играчите, пишува агенцијата.

Инаку македонската фудбалска репрезентација вчера се врати во Скопје, по последниот натпревар во рамките на Европското фудбалско првенство на кое не успеа да обезбеди понатамошен пласман.

Се спремаат протоколите за училишна настава од септември

Министерот за здравство, Венко Филипче

Министерот за здравство Венко Филипче смета дека учениците би можеле да се вратат во училиштата од септември, а за две недели целосно ќе бидат завршени протоколите за новата учебна година.

„Протоколите за учебната година се речиси готови. Има уште некои технички детали, на кои работи работната група, во која членуваат претставници од Министерството за образование и наука и епидемиолози од Комисијата за заразни болести. Планирано е да присуствуваат сите деца, сто отсто од вкупниот број во класовите. Така се подготвуваат и протоколите. Мерките се: дезинфекција, често проветрување на училниците, немешање на различни класови. Протоколите ќе бидат целосно завршени за две недели“, изјави Филипче.

Тој соопшти дека со пристигнувањето на големата количина вакцини викендов, се планира имунизација и на сите наставници. Филипче рече и дека одлуката на Бирото за развој на образованието да не се делат сега свидетелства на учениците оти нема услови, не е донесена во координација со министерството.

„Свидетелствата можат да се делат во дворовите. Се што може да се организира надворешни услови, може да се направи“, смета Филипче.

Бирото за развој на образованието на училиштата им прати известување дека во „вакви услови“ не може да се делат свидетелства па ја одложија процедурата за до крајот на учебната година.

Сијарто: секогаш ќе се појави некое прашање заради кое не може да почнат преговорите со С. Македонија

Штип- македонскиот и унгарскиот министер за надворешни работи Бујар Османи и Петер Сијарто,23.06.2021

Го почитуваме ставот на Софија дека прашањата кои тие сега ги наметнуваат се важни за нив. Нашето барање е да дадат доволно време да се најде решение за прашањето со Скопје и паралелно со тоа да започнеме преговори за зачленување во ЕУ. Овие две работи да течат паралелно, изјави министерот за надворешни работи на Унгарија, Петер Сијарто во Штип.

Тој на новинарско прашање кои земји застанаа во одбрана на С. Македонија вчера во Луксембург и дали навистина имало тензични расправи, потврди дека атмосферата била тензична, но оти не би сакал да потпалува поголеми огнови од она што е неопходно.

„Едно е сигурно дека навистина атмосферата била многу напната на состанокот на Советот вчера, бидејќи државите кои се залагаат за проширувањето, како Унгарија, почувствувавме доста голема фрустрација, затоа што секогаш ќе се појави некое плус прашање, некоја работа заради која не може да се започнат преговорите со Северна Македонија. Со години водевме преговори со Грција и кога тоа се случи, се заврши, кога помисливме дека е готово, тогаш се појавија Бугарите“, изјави Сијарто во Штип каде заедно со шефот на дипломатијата Бујар Османи учествуваа на македонско-унгарски бизнис форум.

Министерот Османи, пак, рече дека процесот оди понатаму и според него ќе зависи од исходот на Самитот на лидери на ЕУ утре и задутре во Брисел и дали блокадата за старт на преговорите ќе биде потврдена и од бугарскиот претседател Румен Радев.

Официјална Софија вчера одлучи да не ја промени позицијата за македонската евроинтеграција и остана на ставот дека не се исполнети нивните барања за преговарачката рамка меѓу С.Македонија и ЕУ и условите за одржување на првата меѓувладина конференција.

Вон дер Лајен: унгарскиот анти ЛГБТ закон е срам

Претседателката на Европската комисија Урсула вон дер Лајен

Претседателката на Европската комисија Урсула вон дер Лајен рече дека новиот унгарски закон со кој се забранува споделување на ЛГБТ содржина со малолетници е дискриминаторски и дека извршната власт на Европската унија размислува за правни активности бидејќи со него се прекршуваат основните вредности на блокот.

„Унгарскиот закон е срам“, рече Вон дер Лајен денеска.

Таа додаде дека предложениот закон јасно ги дискриминирани луѓето врз основа на нивната сексуална ориентација.

"Им дадов инструкции на одговорните комесари да напишат писмо до унгарските власти во кое ќе ги искажат правните проблеми пред да влезе законот во сила“, рече таа.

Контроверзниот закон кој според критичарите преставува напад врз правата на ЛГБТ заедницата се соочи со меѓународни критики откако беше усвоен од унгарскиот парламент минатата недела. Со него се забранува прикажување и промоција на хомосексуалност на лица под 18 години, се забрануваат дискусии и ширење на информации во училишта за кои ќе се оцени дека промовираат хомосексуалност, а се воспоставува и забрана за реклами кои се смета дека се наменети за лица под 18 години, а во нив се покажува солидарност со хомосексуалците.

На вчерашниот состанок на Советот за општи работи на Европската унија во Луксембург 13 земји членки ја осудија Унгарија за законот, а некои од нив побараа Европската комисија да ја повика Будимпешта на највисокиот суд на унијата. Унгарскиот премиер Виктор Орбан рече дека коментарите на Вон дер Лајен за законот се срамни и дека се основани врз лаги.

Заев: со Ахмети не сме разговарале за државните симболи

Архивска фотографија- средба на премиерот Зоран Заев со коалицискиот партнер Али Ахмети

Премиерот Зоран Заев денеска изјави дека со лидерот на ДУИ Али Ахмети не разговарале за државните симболи или поконкретно за химната.

„Со колегата Али Ахмети не сме разговарале за државните симболи. Треба да се фокусираме на економијата, зелената агенда, како и главниот фокус да остане на европеизацијата на Северна Македонија“, рече Заев на заедничката прес-конференција со премиерот на Албанија Еди Рама, одговарајќи на новинарско прашање.

Темата дали е разговарано или не за државните симболи се наметна откако на социјалните мрежи беше споделено кратко видео од подолгото интервју на лидерот на ДУИ Али Ахмети за телевизијата Клан. Во него Ахмети вели дека „се разговарало и за химната и за грбот и за знамето“, без да прецизира со кого и кога.

Вчера реагираа и од владата наведувајќи дека „ниту во Владата, ниту во владејачката партија СДСМ, ниту со премиерот Зоран Заев не е разговарано за промена на знаме, грб или химна на државата.

„Во изјавата на г. Ахмети не забележавме дека тој изјави дека наводно било разговарано со премиерот Заев или со било кој друг претставник на политичките субјекти во власта. Сметаме дека државата треба да се фокусира со сите свои капацитети на политиките кои носат развој, економија и повеќе пари за граѓаните. Владата ќе продолжи на тој пат“ се вели во одговорот од Владата.

Пет нови случаи на ковид19, еден починат

Пункт за тестирање за коронавирус во Скопје

Во последните 24 часа се направени 2.466 тестирања, а регистрирани се пет нови случаи на ковид-19, информираат од Министерството за здравство. Од нив во Скопје три и во Куманово и Тетово по еден. Пријавено е едно починато лице од Кичево на 39 години, починато во болнички услови.

За истиот период регистрирани се осум оздравени пациенти. Со ова вкупната бројка на ковид дијагностицирани лица во нашата земја од почетокот на епидемијата изнесува 155.645, бројката на оздравени пациенти е 149.916, на починати е 5.478, а бројот на активни случаи изнесува 251.

Вчитај повеќе

XS
SM
MD
LG