Достапни линкови

Вести

Изречени 915 казни за неносење маски

Во изминатите 24 часа на територијата на Македонија се регистрирани 915 прекршоци по однос на мерката за носење лична заштита на лице.

Министерството за внатрешни работи апелира до граѓаните да ги почитуваат мерките и протоколите донесени од Владата, со цел справување со ковид-19.

Носењето маска е дел до мерките за справување со ковид-19. Засега важат правилата маска да се носи во затворен простор и на отворено кога нема услови за одржување растојание меѓу луѓето. Комисијата за заштита од заразни болести даде препорака, а Владата ја прифати – да се носи и маска на отворено, но за да се стартува со таа мерка се потребни законски измени, кои се во собраниска процедура и се очекува да бидат усвоени идната недела.

види ги сите денешни вести

ОН: 2020 година веројатно ќе биде една од трите најтопли години

илустрација

Оваа година веројатно ќе биде една од трите најтопли, предупредија ОН, додавајќи дека постои можност до 2024 година да има привремено зголемување на температурата над прагот од 1,5 Целзиусови степени што е цел на Меѓународен договор за клима во 2015 година во Париз.
Температурата соборува рекорди од година во година, а деценијата 2011-2020 ќе остане најтопла досега забележана, со шест најтопли години од 2015 година, се вели во извештајот на Меѓународната метеоролошка организација за состојбата на глобалната клима.

Граѓаните со повисока свест од партиите за климатските промени

Од јануари до октомври, глобалната просечна температура беше околу 1,2 Целзиусови степени повисока од референтниот период 1850-1900 година, така што 2020 година ќе биде една од трите најтопли години. Се додава дека екстремната топлина, пожарите, поплавите, зголемената киселост на океаните и рекордната сезона на урагани во Атлантикот сведочат за продолжување на климатските промени. Најголем пораст на температурата има во Северна Азија, особено во сибирскиот дел на Арктикот, каде што беше потопло за повеќе од пет степени од просекот. Топлината во Сибир беше најголема на крајот на јуни, со 38,0 степени во Верхојанск на 20 јуни, што во моментов е највисока температура измерена северно од Арктичкиот круг.

САД и официјално го напуштаат Парискиот договор за климата

Сезоната на шумски пожари, која опустоши големи области на Австралија, Сибир, западниот брег на САД и Јужна Америка, беше најактивна во последните 18 години. Меѓу лошите вести е дека арктичкиот морски мраз достигна годишен минимум во септември, заземајќи го второто место за време на 42-годишното сателитско набљудување. Гренланд продолжува да ја губи ледената маса, иако побавно отколку во 2019 година. И океаните, кои складираат повеќе од 90 проценти од вишокот енергија што се акумулира во климатскиот систем на Земјата, се загреваат побрзо и побрзо во последните децении, се вели во извештајот.

Бајден сака да преговара за ирански договор

Избраниот американски претседател Џо Бајден

Избраниот американски претседател Џо Бајден изрази желба за брзо започнување нови преговори со Иран, но во консултација со сојузниците на САД, и тоа откако повторно ќе се приклучи на меѓународниот договор за нуклеарната програма. Бајден во интервју за Њујорк Тајмс го потврди ставот што го искажа за време на кампањата за претседателските избори одржани на 3 ноември во САД. Тој во колумна во септември напиша дека Соединетите држави ќе се вратат на договорот доколку Техеран строго се придржува кон обврските од тој документ. Бајден за Њујорк Тајмс изјави дека тоа е сè уште негова позиција.

Иранскиот безбедносен апарат под удар по атентатот врз нуклеарниот научник

„Најдобар начин да се постигне одредена стабилност во регионот е да се разгледа иранската нуклеарна програма. Ако Иран има атомска бомба, тогаш би се создала трка на нуклеарно вооружување на Блискиот исток и тоа е последното што ни треба на тој дел од светот", рече тој. Враќањето на договорот би значело укинување на големите санкции воведени од актуелниот американски претседател Доналд Трамп по повлекувањето од договорот. Како одговор, Иран постепено започна да се повлекува од своите обврски согласно договорот.

Геј вечера што ја ослабува моќта на Орбан

Јозеф Сајер

Откритието дека соработник близок со унгарскиот премиер Виктор Орбан бил на геј забава во Брисел, предизвика бомба во Унгарија каде што опозицијата и медиумите го осудија владиното лицемерие во кое се критикуваат ЛГБТ луѓето. Оставката на европратеникот Јозеф Сајер, столб на мнозинската партија Фидес, може да ја ослабне позицијата на Унгарија, која е во судир со Европската унија околу владеењето на правото, проценува агенцијата Франс Прес. Сајер (59) во вторникот признал дека бил на сексуална забава во центарот на Брисел, што белгиските медиуми ја опишаа како „оргии“ со околу 25 голи мажи.

Унгарски европратеник поднесе оставка по полициската рација на „сексуална забава“ во Брисел

Полицијата ја прекина забавата и ги казни присутните за непочитување на мерките воведени против коронавирусот. „Сајер донесе добра одлука“ со повлекување и извинување, објави делегацијата на Фидес во Европскиот парламент. Сепак, унгарската влада не се огласи. Независната веб-страница Телекс објави дека не ја доведува во прашање приватноста на пратениците, но укажува на проблемот со „лагите и нечесноста“. Фидес напаѓа луѓе со различна сексуална ориентација во Унгарија под изговор на „заштита на нормалноста“, додека Сајер добро се забавува на геј забава во Брисел. Патем, Сајер сака да се претстави како еден од авторите на промената на Уставот во 2011 година. Една клаузула од текстот на Уставот вели дека бракот е „заедница на маж и жена“ и дека владата сака да ги брани христијанските вредности. Друга непријатност за унгарската влада е фактот што бриселската полиција пронајде дрога во близина на Сајер и дека тој е казнет за непочитување на санитарните мерки. Тоа го нарушува моралот што го промовира Орбан, изјави опозицијата.

Директор на музеј во Унгарија го нарече Сорос либерален фирер, предизвика остри критики

„Додека политичарите на Фидес ни држат лекции за христијанството и семејните вредности, тие водат сосема поинаков живот“, рече поранешниот левичарски премиер Ференц Ѓурчањ. Фидес е постојана мета на критики од Европската народна партија (ЕПП). Многу пратеници на ЕПП претходно повикаа на исклучување на унгарската партија од европската група, бидејќи смета дека се оддалечува од нејзините политички упатства.

Почина поранешниот француски претседател Д’Естен

Поранешниот француски претседател Жискар Д'Естен

Поранешниот француски претседател Жискар Д'Естен, клучен архитект на европската интеграција во 1970-тите, почина на 94-годишна возраст. Тој почина вчера во неговиот дом во регионот Лоар-ет-Шер, во централна Франција, по компликациите поврзани со ковид-19. Познат за многу Французи едноставно како Жискар или, либералниот претседател беше шеф на државата од 1974 до 1981 година. Во Европа, тој разви блиски односи со поранешниот западен германски канцелар Хелмут Шмит и заедно ги поставија темелите на заедничката валута на еврото, поставувајќи го Европскиот монетарен систем.

Франција и Германија се за ревизија на Шенген зоната

Дома, тој беше познат по воведувањето либерални политики, особено легализирање на абортусот и развод по заедничка согласност. По поразот на претседателските избори во 1981 година од социјалистот Франсоа Митеран по последиците од глобалниот економски пад во 70-тите години на минатиот век, Жискар остана активен во центристичката политика, враќајќи го своето место во парламентот и освојувајќи ја претседателската функција во регионалниот совет на Оверн. Тој исто така служеше како европски парламентарец од 1989 до 1993 година.
Во 2004 година, откако го загуби пратеничкото место во Франција, тој ја заврши својата активна политичка кариера.

НАТО изрази загриженост за руското „воено засилување“

генералниот секретар на НАТО Јенс Столтенберг

Министрите за надворешни работи на НАТО го завршија дводневниот состанок што го трасира патот кон реформите во трансатлантскиот сојуз бидејќи се соочува со двојни предизвици од Русија и Кина, како и со ситуацијата во Авганистан. На состанокот, одржан преку видео-врска како претпазливост против ширењето на коронавирусот, се дискутираше за тоа како алијансата мора да се прилагоди на новите закани, вклучително и „упорно агресивната Русија“ и „подемот на Кина“. Во извештајот на експертска група на 67 страници во кој се дадени сугестиите за тоа како да се рестартира Алијансата, е забележано дека НАТО се соочуваше со една голема закана за време на Студената војна, но оти сега се соочува со двајца „системски ривали“ - Русија и Кина - заедно со „трајната закана од тероризам“.

Османи: Ние сме е рамноправен чинител во НАТО

Говорејќи пред новинарите, генералниот секретар на НАТО Јенс Столтенберг рече дека министрите разговарале за „континуираното воено натрупување на Русија во соседството на Алијансата, како и за контролата на оружјето“. Тој рече дека НАТО го прилагодува својот став за одвраќање „за решавање на дестабилизирачките активности на Русија“, но министрите се согласуваат дека тие мора да продолжат да водат дијалог со Русија.

Дводневен онлајн состанок на македонско-бугарска комисија за историски прашања

Македонско - бугарска комисија за историја

На оваа средба на Заедничката македонско-бугарска комисија за историски и образовни прашања која ќе се одржи денеска и утре онлајн поради пандемијата со коронавирусот тема треба да бидат револуционерот Гоце Делчев, евентуалното негово заедничко чествување и македонските учебници за периодот среден век и ран османлиски период. На ден пред средбата на Комисијата ко-претседавачите од двете страни, Ангел Димитров и Драги Ѓоргиев си разменија не многу оптимистични пораки.

Искричења пред утрешната средба на историчарите

Професорот Ѓоргиев во изјава за Радио Слободна Европа изрази зачуденост од изјавата на неговиот колега, бугарскиот копретседавачот Ангел Димитров. Тој рече дека бугарската позиција е единствена и политички монолитна, за разлика од македонската повикувајќи се на интервјуто на премиерот Зоран Заев за БГНЕС во кое, според Димитров, има „нов поглед кон минатото“. Бугарскиот историчар кажаното од премиерот го доведува во релација со ставовите на македонските историчари. Ѓорѓиев пак, вели дека во пресрет на средбата очекува дека членовите на Комисијата ќе се однесуваат професионално и академски.

Мицкоски ги повика граѓаните будно да ги следат преговорите во Бугарија

Претходно, комисијата ги помина бугарските учебници за тој период. Последната средба се одржа на 15 и 16 октомври во Скопје и тогаш немаше големи поместувања во работата односно беше постигнат мал напредок за македонските учебниците, но не и за досегашната покомплицирана тема – Гоце Делчев. Во меѓувреме, откако Бугарија и официјално забележа дека Договорот за добрососедство се крши и поради тоа што комисијата работела бавно министерот за надворешни работи Бујар Османи одговори дека таа не работи бавно земајќи предвид други такви комисии кои работеле со години.

Времето денеска: значително облачно со дожд

Ќе биде значително облачно со повремени локални врнежи од дожд, претежно во западните делови. Ќе дува умерен, вдолж Повардарието повремено засилен југоисточен ветер. Дневната температура ќе биде од 4 до 10 степени. Во Скопје и околината слично време. Дневната температура ќе биде до 8 степени.

Мицкоски ги повика граѓаните будно да ги следат преговорите во Бугарија

Лидерот на ВМРО-ДПМНЕ Христијан Мицкоски на протестот во Куманово ги повика граѓаните будно да следат во наредните денови што ќе се случува и какви преговори ќе донесе Владо Бучковски со источниот сосед. Тој вели дека ја предупредува македонска јавност дека новоименувањето на Бучковски за посредник во спорот со Бугарија, човек кој е осуден па политички ослободен, а ќе го решава историскиот спор со Бугарија и историскиот спор со соседна Бугарија претставува вовед во едно ново апокалиптично сценарио, и вовед во ново предавство кое ќе биде извршено врз македонскиот народ.


Мицкоски посочи дека на маса за преговори се ставени се македонската историја, македонскиот јазик, традиција, обичаи и откажување од македонското национално малцинство во Бугарија.


„Од прилика за сето ова денеска преговара Владо Бучковски по налог на Зоран Заев и тој човек не знам дали ќе успее во овие седум дена, во период кој следи секако ќе се обиде да земе дел од срамот којшто ќе биде нанесен врз македонскиот народ. Го предупредувам македонскиот народ, граѓаните на Македонија на будно следење на тоа што се спрема, што се подготвува на тоа што се подготвува на тоа што се преговара“ изјави Мицкоски.


Тој најави дека ВМРО-ДПМНЕ како политичка партија ќе ја предводи идната влада која, како што рече, ќе биде влада на национално единство, нема да почитува ниту една реченица, ниту еден збор, од евентуално парче хартија кое ќе го потпишат, воецот Заев и Бучковски, а кое ќе биде на штета на македонскиот идентитет, јазик, традиција, обичаи.

Нови 946 заразени со ковид-19 и 33 починати

Ковид-19 центар во Скопје

Во последните 24 часа се регистрани 946 нови случаи на заразени со ковид-19 од вкупно 2564 направени тестирања. Најголемиот број на новозаразени се евидентирани во Скопје 426, потоа во Битола 61, Прилеп-56 и Тетово-46. Во изминатово деноноќие од последици од ковид 19 починале 33 пациенти од кои деветмина се од Скопје, а шест од Прилеп.

Денеска Институтот за јавно здравје регистрира 789 оздравени пациенти.

Вкупната бројка на ковид дијагностицирани во нашата земја од почетокот на епидемијата изнесува 63890, бројката на оздравени пациенти е 40977, на починати е 1825, а бројот на активни случаи изнесува 21088. Најголем број на активни случаи е забележан во Скопје изнесува 10 273, додека во внатрешноста најмногу активни случаи на заболени од коронавирус има во Прилеп 1002, па во Тетово 917, Гостивар 936 и Куманово.

Американка протерана од Русија

Илустрација, слика од интернет страницата на невладината организација во Русија

Руските власти и ја одземаа дозволата за престој на американската државјанка и директорка на невладината организација за заштита на човекови права Венеса Коган. Портпаролката на невладината организација Ксенија Бабич изјави дека Коган која живее 11 години во Русија аплицираше за руски паасош, но денеска им пристигнало известување дека барањето е одбиено затоа што „ таа претставува закана за безбедноста на земјата“. На Коган, чиј сопруг и деца се руски државјани, и е наредено да ја напушти Русија во рок од две недели. Невладината организација со која таа раководи, е вклучена во одбрана на човековите права во ситуации поврзани со вооружени конфликти, тортура и родово насилство на територија на поранешниот Советски сојуз. Организацијата ги претставува жртвите во Европскиот суд за човекови права .

Борел: ЕУ не е цела без Западен Балкан

Илустрација, средба на ерменскиот претседател Армен Саркиссин со шефот на европската дипломатија Жозеп Борел

Шефот на дипломатијата на Европска Унија, Жозеп Борел денеска изјави дека ЕУ нема да биде цела без Западен Балкан. Тој ги предупреди земјите од регионот дека ќе можат да напредуваат кон членство само ако се обединети во изнаоѓање на заеднички основи. Борел ова го посочи во видео-порака по повод дебата во Надворешнополитичкиот одбор на Европски парламент за ситуацијата во Западен Бакан по 25 години од Дејтонскиот договор.

„По 25 години од потпишувањето на Дејтон, земјите од регионот одлучно се придвижуваат, секоја со својата брзина, кон ЕУ. Помирувањето бара желба, заложби и разбирање. Тоа е порака за БиХ, но и за цел Западен Балкан и за Европа,“ изјави наведе Борел.

Штрукељ: Новите вакцини против Ковид-19 се добри, но да бидеме внимателни

Професорот на Факултетот за фармација при Универзитетот во Љубљана Борут Штрукељ на денешниот Самит Македонија 2025

Новите вакцини против Ковид-19 се многу добри. Сепак , мора да бидеме внимателни изјави денеска професорот на Факултетот за фармација при Универзитетот во Љубљана и член на тимот за развивање на вакцината за Ковид 19, Борут Штрукељ на денешниот Самит Македонија 2025.

Тој во своето обраќање на вториот ден од деветтото издание на Самитот изјави дека новите вакцини се составени од РНК И ДНК молекули, значи само од генетски материјал, па затоа може да се каже дека на некој начин поради тоа се поефикасни и побезбедни. Штрукељ рече дека основното прашање е како ќе развиеме вакцина за толку кратко време, ако земеме предвид дека за тоа реално се потребни три до четири години.

Сепак тој посочи дека се инвестирани билиони евра за најкратката можна процедура, а тоа како што рече, го олесни целокупниот процес.

„Секоја земја, секое Министерство за здравство е одговорно за вакцинацијата и ќе има можност да одбере од најмалку три различни вакцини на пазарот. Светот има повеќе опции. Но, се’ уште е тешко прецизно да се зборува за безбедноста и ефикасноста“, истакна Штрукељ.

Коѕијас: Шовинистички наратив од Бугарија за Северна Македонија

Архивска фотографија - Никос Коѕијас со Зоран Заев, Никола Димитров и Алексис Ципрас на потпишувањето на Преспанскиот договор

Сериозен проблем се создаде во нашиот регион, поради шовинистичкото откопување на македонското прашање од радикалните националисти од Бугарија, пишува поранешниот министер за надворешни работи на Грција Никос Коѕијас на почетокот од неговата колумна за „Независната балканска новинска агенција”, пренесува МИА од Атина.

Коѕијас вели дека „станува збор или за јасни радикални десничари како што е актуелниот министер за одбрана и за некои други бугарски политичари што сакаат да ги поддржат нивната предизборна битка и нивните лични стратегии”.

Поранешниот дипломат и сегашен професор по меѓународни односи Коѕијас истакнува дека со Договорот од Преспа, Грција се ослободи од проблемот, а денес „про-турски ориентираните во Бугарија сметаат дека од договорот, загубиле дел од нивниот „шовинистички наратив” и „како втор бељаџија во регионот, поставуваат два нови предуслови за европскиот тек на Северна Македонија”, пренесе МИА.

Вархеји не верува дека Македонија годинава ќе почне преговори со ЕУ

Еврокомесарот Оливер Вархеји и премиерот Зоран Заев

Европскиот комесар за проширување Оливер Вархеји предупреди дека се намалуваат шансите Северна Македонија и Албанија оваа година да започнат разговори за пристап со Европската унија (ЕУ), јави дописничката на Радио Слободна Европа од Брисел.

„Се уште се надевам, но за жал е сè помалку сигурно дека оваа година можеме да донесеме рамки за преговори. Во таа смисла правиме заеднички напори со германското претседателство со Советот на ЕУ “, рече Вархеји.

Тој зборуваше во комитетот за надворешна политика на Европскиот парламент (АФЕТ), каде предупреди дека во отсуство на решение за отворање преговори, „ЕУ ризикува да не биде веродостојна во исполнувањето на ветувањата дадени кога решивме да ги отвориме преговорите со тие земји“.

Во март, ЕУ едногласно го одобри отворањето на преговорите за членство со Северна Македонија и Албанија, со цел првиот состанок да се одржи во декември оваа година. Сепак, од септември, Бугарија ја блокира одлуката, условувајќи го процесот со решавање на билатералниот спор со официјално Скопје.

Европскиот комесар Оливер Вархеји побара од Северна Македонија да вложи дополнителни напори и „да ги исполни грижите на Бугарија“ со цел да се најде решение што е прифатливо за обете страни. Тој оцени дека станува збор за политичка волја, ангажман и решителност и изрази подготвеност на Европската комисија да помогне да се најде решение.

Последниот состанок на Советот за општи работи на ЕУ оваа година, каде треба да се одобри отворањето на преговорите, ќе се одржи на 8 декември. Сепак, пред овој состанок, потребно е да се постигне договор меѓу сите земји-членки, со цел да се направат подготовки за состанокот, а потоа да се одржи и меѓувладина конференција, која официјално ги отвора преговорите за членство.

Северна Македонија е земја кандидат за полноправно членство во ЕУ од 2005 година, а во 2009 година доби зелено светло од ЕК за да може да ги отвори пристапните преговори. Цела деценија државата беше блокирана од соседна Грција, што го услови почетокот на овој процес со решавање на спорот за името. Со постигнувањето на Договорот од Преспа во 2018 година, отстранувањето, како што се сметаше во тоа време, беше последната политичка блокада.

Бугарија и Северна Македонија долго време дебатираа за името на македонскиот јазик, а меѓу другото, Бугарија одбива да го користи терминот „македонски јазик“ во официјалните документи на ЕУ, но приговорите на официјална Софија се појавија само оваа есен, кога требаше земјите од ЕУ се согласуваат за рамка за преговори.

Нов Зеланд прогласи вонредна климатска состојба

Илустрација - Муриваи плажата во Нов Зеланд

Новозеландската влада денеска прогласи вонредна климатска состојба во земјата. Декларацијата се темели на истражувањата на Меѓувладин панел за климатски промени за потребите за драстично намалување на глобалните емисии, за да се избегне затоплувањето од 1,5 степени Целзиусови.

„Ова е научна декларација. Оваа декларација е потврда за идните генерации. Потврда за товарот кој ќе го носат ако веднаш нешто не преземеме“ изјави премиерката Џакинда Ардерн во Парламентот.

Нов Зеланд им се придружи на 32 земји, вклучително и Канада, Франција и Велика Британија, кои прогласија вонредна состојба поради климатските промени.

Онлајн седници без џемпери: Кавга на СДСМ и ВМРО-ДПМНЕ за амандманите

Дел од амандманите од опозицијата кои ги објави пратеникот Јован Митрески од СДСМ, Скопје 2 декември 2020

Владејачкиот СДСМ денеска ја обвини „опозицијата во Собранието, предводена од ВМРО-ДПМНЕ“, дека се однесува неодговорно и несериозно во расправата за онлајн седниците на Парламентот поради пандемијата, односно за измените на собранискиот деловник.

„ВМРО-ДПМНЕ и опозициските пратеници по секоја цена се обидуваат од Собранието да направат циркус, место за нивна забава. Никако поинаку не можат да се толкуваат бројните несериозни, безобразни и апсурдни амандмани поднесени на предлог измените и дополнувањата на Деловникот за работа на Собранието“, изјави денеска Јован Митрески, координатор на пратеничка група на СДСМ и коалицијата.

Тој сподели амандмани од пратеници од опозицијата, со кои, според него, се даваат „дрски и несериозни предлози“. Дел од амандманите што Митрески ги објави се потпишани од „Група пратеници“, а дел од Борислав Крмов од Левица.

„Во еден од амандманите се вели дека за време на велигденските празници, пратениците кои ќе учествуваат во работата на Собранието од далечина, да имаат бојадисано јајце пред камера. Понатаму, во дел од амандманите се вели, пратениците кои учествуваат во работата од далечина да не смеат да носат облека со обележја на месарници“, вели Митрески.

На ова реагираше ВМРО-ДПМНЕ дека тоа не се амандмани поднесени од нивните пратеници.

„Ова е срамен обид на СДСМ и нивните пратеници за манипулирање и дефокусирање на јавноста од нивниот насилнички и недемократски метод набрзина да ги изгласаат измените на Деловникот кои поради нивното тенко и нефункционално мнозинство очајно им се потребни“, изјави на денешната прес-конференција заменик - координаторот на пратеничката група на ВМРО-ДПМНЕ во Собранието, Дафина Стојаноска.

Амандамани од пратеници и пратенички групи за измени на деловникот на Собранието што денеска ги објави пратеникот од СДСМ, Јован Митрески
Амандамани од пратеници и пратенички групи за измени на деловникот на Собранието што денеска ги објави пратеникот од СДСМ, Јован Митрески

Боки 13 и татко му отстранети од судница на судењето за „Рекет 2“

Архивска фотографија од едно од рочиштата за „Меѓународен сојуз“

На денешното рочиште за случајот „Рекет 2“, познат и како „Меѓународен сојуз“, судијката Софче Гаврилова-Ефремова, го отстрани од судница првообвинетиот Бојан Јовановски - Боки 13, по неколку предупредувања дека го нарушува текот на судењето.

Отстранувањето од судницата следеше откако Јовановски ѝ се обрати на судијката „дека ќе ја отстранат и затоа е сервилна“.

Претходно, на денешното рочиште, исто така, заради попречување на презентација на доказите беше отстранет од судница и обвинетиот Миле Јовановски, татко на првообвинетиот Јовановски.

Првообвинет во случајот е Бојан Јовановски и се товари за перење пари и измама. Обвинета е и поранешната пратеничка од СДСМ, Фросина Ременски, која се товари за помагање на делото измама, додека Јасна Мандиќ и таткото на Боки-13, Миле Јовановски, и асистенката Христина Блажевска, се обвинети за помагање во делата перење пари и измама. Како правно лице осомничен е „Меѓународниот сојуз“.

Ангелов: Се уште нема потреба за згрижување ковид пациенти во Ибис

Стојанче Ангелов, ЦУК

Директорот на Центарот за управување со кризи (ЦУК), Стојанче Ангелов, на денешната прес-конференција изјави дека во овој момент, нема неопходна потреба за болничко згрижување на пациенти во стара „Систина“, бидејќи состојбата со заразата е стабилна и има места во државните болници во земјата.

Директорот кажа дека се работи на формално-правна техникалија за потпишување на нацрт-договорот на Министерството за здравство и приватните клиники, дека нема да се чека 5 до 12 за да се состанат, и ако се јави итна потреба, за половина час ќе се состане Главниот штаб и сите процедури ќе бидат завршени.

По прогласувањето на кризната состојба на 21 ноември, министерот за здравство Венко Филипче и претставници на трите приватни клиники во земјава се договорија дека објектот на поранешната болница „Систина-Мала Богородица“ да се користи како нов Ковид-центар.

Земјотрес од 3,9 степени со епицентар на 12 километри од Скопје

Илустрација

Земјотрес со јачина од 3,9 степени по Рихтерова скала се почувствува попладнево точно во 14.09 часот, објави светската мрежа за земјотреси, ЕМСЦ.

Епицентарот, според ЕМСЦ, бил на македонско косовската граница, на 12 километри од Скопје и на 82 километри југоисточно од Приштина, на длабочина од 1 километар.

Според Европскиот медитерански сеизмолошки центар, пак, епицентарот на земјотресот бил на 8 километри источно од Скопје, на длабочина од 2 километри.

Шилегов: Спомениците од „Скопје 2014“ да се стават во еден парк

Петре Шилегов, градоначалник на Град Скопје

Скопскиот градоначалник Петре Шилегов денеска предложи спомениците од „Скопје 2014“ да се дислоцираат во паркот во Ѓорче Петров, кој порано беше дива депонија, и таму да се направи Мементо парк. Според него, со тоа не би се повредиле чувствата на граѓаните кои сакаат да ги гледаат тие споменици.

„Мораме да бидеме внимателни да не предизвикуваме нов револт во општеството. Македонското општество е сериозно поделено и треба да внимаваме со сите чекори и треба да имаме меѓусебна почит независно од тоа дали некому му се допаѓа или не му се допаѓа. Скопје не е град каков што е сега во Центарот. Ниту бил, ниту треба да биде, ниту ќе биде. Меѓутоа, мора да почитуваме дека на некои луѓе тоа им се допаѓа и да им овозможиме тоа да го гледаат. Да не бидеме брутални во отстранувањето туку да имаме еден сосема поинаков, помирувачки општествен процес во таа работа“, рече Шилегов.

Шилегов вели дека таков пример има во Унгарија каде сите споменици и обележја од времето на комунизмот се ставени во еден Мементо парк.

На следната владина седница ќе се одлучува за Недела неработен ден

Владините портпароли Душко Арсовски и Мухамед Хоџа

Предлогот недела да се прогласи за неработен ден следната недела се очекува да се најде на разгледување на владина седница, информираше денеска владиниот портпарол Мухамет Хоџа.

„Министерството за труд и социјална политика е посветено да достави предлог до владата, но како што сте информирани овој оддел е во консултации со приватниот сектор, стопанските комори и другите министерства, очекуваме овие консултации да бидат завршени за брзо време и предлогот неделата да биде неработен ден ќе се најде на владината седница и очекуваме дека тоа ќе се случи следната недела“, рече Хоџа на денешната прес-конференција во Владата.

Предлогот недела да биде неработен ден, кој дојде од дел од синдикатите, а Владата го прифати, наиде на критика кај дел од работодавците. Конфедерацијата на слободни синдикати на Македонија (КСС) вчера објави дека предлага недела да биде ден за одмор, а секоја работа во недела да се пресметува како прекувремена работа и да се исплаќа дневница зголемена за 50 отсто.

Македонските учебници по историја тема на утрешната средба на Комисијата

Копретседавачите на Комисијата од двете страни, Ангел Димитров и Драги Ѓоргиев

Содржината во македонските учебници по историја за средновековниот период и раноосманлискиот период ќе биде тема на 11. средба на македонско-бугарската Мешовита комисија за историски и образовни прашања, која ќе се одржи утре и задутре, објави МИА, повикувајќи се информации од Комисијата.

Според МИА, тема на разговор ќе биде и евентуалното заедничко чествување на Гоце Делчев, а средбата ќе се одржи онлајн поради состојбата со Ковид-19.

На ден пред дводневната онлајн средбата на Заедничката македонско-бугарска мешовита комисија за историски и образовни прашања копретседавачите од двете страни, Ангел Димитров и Драги Ѓоргиев си разменија не многу оптимистични пораки. Професорот Ѓоргиев во изјава за Радио Слободна Европа изрази зачуденост од изјавата на неговиот колега, бугарскиот копретседавачот Ангел Димитров.

Тој рече дека бугарската позиција е единствена и политички монолитна, за разлика од македонската повикувајќи се на интервјуто на премиерот Зоран Заев за БГНЕС во кое ,според Димитров, има „нов поглед кон минатото“. Бугарскиот историчар кажаното од премиер го доведува во релација со ставовите на македонските историчари.

Се подготвуваме за вакцинација против Ковид-19, вели Филипче

Венко Филипче

Здравствениот систем го подготвуваме за вакцинација за Ковид-19. Ова ќе биде една од најголемите логистички операции која ќе треба да ја спроведеме, објави денеска министерот за здравство, Венко Филипче на неговите профили на социјалните мрежи и додава дека вакцинирањето ќе го спроведат лекари и медицински сестри кои во овој момент не работат со ковид пациенти.

„Делот на прием, чувањето на вакцините, дистрибуцијата до местата каде ќе бидат аплицирани веќе планот е во завршна фаза, но во текот на следната недела ќе организираме и една вежба на терен како тоа би изгледало“, соопшти министерот.

Македонија ќе обезбеди вакцини против Ковид-19 преку системот Ковакс, а ќе бидат набавени дози за 20 отсто од населението, како и останатите земји во регионот. Станува збор за 400 илјади вакцини или двојно повеќе дози, 800 илјади, бидејќи едно лице ќе треба да прими две дози од вакцината.

Како што денеска објави министерот Филипче, препораката е први да бидат вакцинирани здравствените работници, вработените во војската и полицијата, сите јавни службеници, во јавниот транспорт, хроничните болни сите критични групи согласно мислењето на експертите.

Хонгконшкиот активист Вонг осуден на 13 месеци затвор, по 10 за колегите

Агнес Чоу, Иван Лам и Џошуа Вонг

Познатиот хонгконшки продемократски активист Џошуа Вонг и уште двајца негови колеги се осудени на затворски казни поради минатогодишните антивладини протести. 24-годишниот Вонг е осуден на 13,5 месеци затвор, а неговите колеги Агнес Чоу и Иван Лам на 10 и седум месеци затвор. Вонг стана активист на 13-годишна возраст и веќе е затворан, а бројни весници како „Тајм“ го прогласија за еден од највлијателните луѓе во светот.

„Следните денови ќе бидат тешки, но ние ќе издржиме“, извикал Вонг додека го изнесувале од судницата.

Вонг и активистите Иван Лам (26) и Агнес Чоу (26) на 23 ноември се изјаснија дека се виновни за обвиненијата за организирање, учество и поттикнување на демонстрантите да се приклучат на нелегален протест пред седиштето на полицијата во јуни минатата година. Лам, Чоу и Вонг беа членови на сега распуштената политичка партија Демосисто.

Османи: Ние сме е рамноправен чинител во НАТО

Бујар Османи

Министерот за надворешни работи Бујар Османи денеска и вчера учествуваше на министерскиот состанок на Северно-атлантскиот Совет на НАТО, кој поради рестриктивните мерки наметнати од пандемијата се одржа преку видео врска., информираше денеска македонското Министерство за надворешни работи (МНР).

„Ние остануваме посветени на темите од клучно значење за Алијансата и како најнова членка ќе продолжиме да промовираме атмосфера и политика на регионална стабилност како клучен двигател за безбедноста и просперитетот на сите земји од Западен Балкан“, истакна Османи, во своето прво обраќање пред колегите-министри на земјите-членки.

Османи истакна дека нашиот придонес ќе продолжи преку посветениот ангажман на Република Северна Македонија кон регионалната и глобалната безбедност, со директно учество во воените мисии предводени од Алијансата.

Вчитај повеќе

XS
SM
MD
LG