Достапни линкови

Вести

Летово потврдени 1.405 случаи на ковид-19 кај странски посетители на Грција

NORTH MACEDONIA -- Police officer takes documents from a motorist at the 'Bogorodica' border crossing between North Macedonia and Greece, near the southern city of Gevgelija, North Macedonia, 01 July.

Од почетокот на летната сезоната во Грција се потврдени 1405 случаи на ковид 19 кај странски државјани. Албанските државјани и понатаму се први на листата странски посетители во Грција со најголем број потврдени случаи на ковид-19 во периодот од 1 јули до 27 септември, според официјалните податоци од Генералниот секретаријат за цивилна заштита на Грција.

Во конкретниот временски период Грција ја посетиле 4.327.654 лица, а биле направени 569.212 тестови на влезните точки во земјата и потврдени 1.405 позитивни случаи на ковид-19.

Најголемиот број заразени лица, 1.034 се регистрирани на аеродромите, 343 на копнените граници, а 28 на пристаништата.

Позитивни биле 203 државјани на Албанија, 181 посетител од Франција, 107 од Бугарија, 95 од Романија и 87 туристи од Чешка кои ја посетиле Грција.

Во Грција пак од почетокот на епидемијата заклучно со вчера, се направени вкупно 1.296.795 тестови, регистрирани се 18.123 случаи на Ковид-19, а починаа 388 лица.

види ги сите денешни вести

Борел ја поздрави соработката со САД за дијалогот Белград-Приштина

Високиот претставник за надворешна политика на ЕУ, Жозеп Борел

Високиот претставник за надворешна политика на ЕУ, Жозеп Борел, ја поздрави добрата соработка со САД околу дијалогот Белград- Приштина, јави МИА.

Одговарајќи на новинарско прашање дали зборувал со американската страна за спорот помеѓу Србија и Косово, Борел одговори потврдно. Тој за спорот разговарал со неговиот колега, Ентони Блинкен.

„Сега има многу добра соработка помеѓу САД и Европа, нема повеќе конкурентност од страна на САД, не пробуваат да надвладеат во дијалогот, ова е процес што го води ЕУ, имаме силна соработка и тоа ќе помогне“, рече Борел.

Борел на денешниот Совет за надворешни работи на министрите на ЕУ брифирал за последната рунда на дијалогот помеѓу Белград и Приштина што се одржа минатата недела во Брисел и изрази надеж дека е можен нов состанок летово. Главна тема на состанокот во Луксембург беше Белорусија и санкциите против режимот на претседателот Александар Лукашенко.

Маричиќ и Брнз разговараа за Извршната наредба на Бајден

Министерот за правда, Бојан Маричиќ


Министерот за правда Бојан Маричиќ денеска се сретна со амбасадорката на САД Кејт Брнз, на која биле дискутирани модалитетите за соработка во рамки на неодамна објавениот Меморандумот за воспоставување на борба против корупцијата на САД. Дополнително на средбата, како што соопштија од Министерството за правда е разговарано и за Извршната наредба издадена од американскиот претседател Џо Бајден, за лица кои дејствуваат против демократските вредности, а доаѓаат од Западен Балкан.

Министерот Маричиќ, според соопштението, ја потенцирал важноста на континуираната поддршка на САД и ја искористил средбата да ги презентира досегашните реализирани активности во рамки на Стратегијата за реформа на правосудниот сектор и ги најавил и следните чекори во областа на борба со корупцијата кои почнуваат наскоро, меѓу кои и Проектот на ОБСЕ и ЕУ за мониторингот на случаи на висока корупција.

„Извршната наредба издадена од претседателот Бајден наиде на огромна поддршка бидејќи во актот акцент е ставен и на борбата против корупцијата, што е клучен приоритет и на Министерството за правда и на Владата на Република Северна Македонија. Останува нашето партнерство, продолжува соработката и обостраната заложба во бескомпромисната борба против корупцијата, беа согласни министерот Маричиќ и амбасадорката Брнз“, соопшти Министерството за правда.

Бајден во почетокот на месецов донесе извршна наредба за замрзнување имот и забрана за влез во САД на лица кои претставуваат закана по безбедноста и мирот на секоја држава на Западен Балкан.

Санкциите ќе се однесуваат и на оние лица, кои, меѓудругото, се одговорни или вклучени во попречување на имплементацијата на Договорот од Преспа од 2018 година, и Охридскиот рамковен договор од 2001 година. Извршната наредба ќе опфаќа и лица кои директно или индиректно се вклучени во корупција, злоупотреба на јавни фондови, поткуп и слично.

Претседавачката на ОБСЕ во посета на земјава

Претседавачката со ОБСЕ, шведската министерка за надворешни работи Ан Линде

Претседавачката со ОБСЕ, шведската министерка за надворешни работи Ан Линде, денеска и утре е во посета на Северна Македонија. Таа утре треба да се сретне со премиерот Зоран Заев и со министерот за надворешни работи Бујар Османи, како и со пратеници и претставници на граѓанското општество.

Мисијата на ОБСЕ во Скопје соопшти дека во фокус на посетата на Линдe е спроведувањето на стратешките реформи во земјата, владеењето на правото, доброто владеење, активностите во борбата против организираниот криминал и корупцијата, унапредувањето на слободата на медиумите и социјалната кохезија. Според соопштението, таа ќе разговара и за важноста на регионалната стабилност и безбедност, вклученоста и партнерството со ОБСЕ.

Северна Македонија ќе претседава со ОБСЕ во 2023 година, а треба да се приклучи на Тројката од 1 јануари 2022 година, што е формат на соработка помеѓу сегашното, претходното и следното претседателство.

Данска ги укина рестрикциите за влез на македонски државјани

Пасош. Илустрација.

Данското Министерство за надворешни работи денеска соопшти дека земјите од портокаловата листа за ризик од Ковид-19, како што се Северна Македонија, Албанија, Либан и Србија, се додадени на жолтата листа. Дански институт за превенција и контрола на заразни болести во меѓувреме регистрираше пад на стапката на инфекции со коронавирус во овие држави.

Од 19 јуни, според соопштението, патниците од овие земји ќе можат да влегуваат во Данска без да одат во карантин и без двојни тестирања за Ковид-19, јавија медиуми од земјата.

Патниците од земји коишто се на портокаловата листа исто така можат да влегуваат во Данска за несуштински потреби, но морат да поминат низ самоизолација и тестирања за Ковид-19. На 12-ти овој месец, данската Влада го укина карантинот за патници од Кипар, Хрватска, Луксембург и Швајцарија, поради ниската стапка на инфекции со Ковид-19 во изминатиот период.

САД со нови санкции поврзани со Белорусија

Претседателот на Белорусија, Александар Лукашенко.

САД денеска воведоа санкции поврзани со Белорусија за 16 физички лица и пет субјекти, според веб-страницата на Министерството за финансии, со што се зголемува притисокот врз претседателот на Белорусија, Александар Лукашенко.

Меѓу оние кои беа на црната листа на Министерството за финансии се и Комитетот за државна безбедноста, како и Главната дирекција за борба против организираниот криминал и корупцијата на Белорусија.

ЕУ претходно воведе нови санкции за голем број службени лица и субјекти во Белорусија, вклучително и членови на семејството на Лукашенко. Списокот со 78 лица и осум субјекти се очекува да биде објавен денеска, а на него се наоѓаат пратеници, обвинители, судии и други службени лица за кои ЕУ наведува дека се „одговорни за сериозни прекршувања на човековите права и за поткопување на владеењето на правото како и за репресија врз граѓанското општество и демократската опозиција“.

Обезбедени 1732 единици крвна плазма, третирани 1431 пациенти

Илустрација

Министерството за здравство соопшти дека со крвна плазма се третирани 1431 пациенти. Според податоците на Институтот за трансфузиона медицина досега се обезбедени вкупно 1732 единици конвалесцентна плазма за третман на пациенти заразени со Ковид-19.

„Со ваквиот највисок чин на хуманост, граѓаните кои се оздравени имаат можност да им помогнат на тие кои во моментот се борат со коронавирусот.
Преку даруваната конвалесцентна плазма, антителата на оздравените пациенти се користат во сузбивање на болеста кај друго лице со Ковид-19“, велат од Министерството за здравство.

Министерот за здравство Венко Филипче денеска се сретна со дел од дарителите на ковалесцентна плазма и порача дека тие со својата несебичност спасиле човечки животи во пандемијата.

Лицето дарител на конвалесцентна плазма треба да има документиран лабораториски доказ дека било болно од Ковид-19, да биде минимум 21 ден без симптоми, по што се прави дополнителен тест за потврда дека нема присуство на вирус.

Од министерството додаваат дека Институтот за трансфузиона медицина е достапен во секое време и сите оздравени пациенти кои ги исполнуваат условите за дарители, може да се јават за детални информации и закажување во Институтот за трансфузиона медицина, да ја покажат својата хуманост и да помогнат во лекувањето на другите заболени со Ковид-19.

Путин- ситуацијата со коронавирусот во некои региони е влошена

Рускиот претседател Владимир Путин

Руските власти кои се обидуваат да се справат со смртоносниот трет бран на коронавирусот повторно ја отворија мобилната болница во Москва, додека рускиот претседател Владимир Путин рече дека ситуацијата во некои региони е влошена.

Министерката за здравство Светлана Стригункова денеска рече дека мобилната болница, која беше затворена во средината на февруари, располага со 1420 кревети за третирање на болните од Ковид19. Оваа објава следуваше откако вкупно беа регистрирани 17 378 нови случаи на Ковид19 и 440 починати во последните 24 часа. Од новозаразените 7584 се во Москва.

"За жал заканата од коронавирусот не е одмината. Во некои региони ситуацијата се влошува како што знаете“, рече Путин на денешната средба со пратениците.

Руските федерални служби за борба со коронавирусот соопштија дека вкупниот број на заразени од почетокот на епидемијата досега е 5 334 204, а бројот на починати е 129 801.

СДСМ тврди дека идентитетот е зачуван, ВМРО-ДПМНЕ бара да се објави македонскиот предлог до Софија

Софија- средба на македонскиот премиер Зоран Заев и бугарскиот службен премиер Стефан Јанев, 17.06.2021

Пратеникот од СДСМ Костадин Костадинов денеска рече дека лично секогаш бил оптимист и дека се надева на позитивен исход, но дека утре на Самитот на Европската унија ќе се знае која е конечната одлука за продолжување на европската интреграција земјава блокирана од Бугарија од лани.

„Кога станува збор за процес на интеграција и разговори за одреден билатерален проблем и кога разговорите траат за разлика од ВМРО-ДПМНЕ којшто буквално се се обидуваат да изнесат на јавна сцена, сметам дека во ниту една демократска развиена држава таквите процеси којшто се од особена важност во исклучително важни моменти треба да бидеме трпеливи и да ги оставиме. Она што е важно и она што граѓаните го знаат и она што грѓаните веруваат е дека на секој можен начин се заштитени македонскиот идентитет, македонскиот јазик но силно веруваме во европската иднина на Република Северна Македонија“, рече Костадинов.

Инаку бугарската влада минатата недела соопшти дека нема промена во нивната позиција за самитот на Европската унија кој треба да се одржи на 22 јуни и дека сметаат оти не се исполнети условите за Меѓувладината конференција на ЕУ со С. Македонија.

Ден подоцна во Софија пристигна македонска делегација предводена од премиерот Зоран Заев која достави предлог кој бугарската влада рече дека внимателно ќе го разгледа.

Портпаролот на ВМРО-ДПМНЕ Наум Стоилковски денеска му порача на Заев да „не помислувал да си игра со македонскиот национален идентитет, да не си игра со македонскиот јазик, со македонската култура, со македонската самобитност и македонската историја“, затоа што како што рече ќе добиел жесток одговор на каков било обид за ништење на македонскиот национален идентитет.

„Најдобар демант наместо поразни флоскули, е предочување на предлогот пред јавноста, за таа сама да ја оцени вистинитоста“, рече Стоилковски.

Нови тројца заразени со Ковид19, двајца починати

Пункт за тестирање за коронавирус во Скопје

Министерството за здравство согласно податоците од Институтот за јавно здравје информира дека во последните 24 часа се направени 1.601 тестирања, а регистрирани се три нови случаи на Ковид19, сите во Скопје. Пријавени се две починати лица кои починале во болнички услови. За истиот период регистрирани се 15 оздравени пациенти. Со ова вкупната бројка на ковид-дијагностицирани лица во нашата земја од почетокот на епидемијата изнесува 155.627, бројката на оздравени пациенти е 149.877, на починати е 5.477, а бројот на активни случаи изнесува 273.

Центро-десничарска партија води на регионалните избори во Франција

Францускиот претседател Емануел Макрон гласа на регионалните избори

Француската центро-десничарска партија Републиканци е на пат да го добие првиот круг на регионалните избори во Франција, покажуваат излезните анкети. Зад нив е крајната десница на Мари Ле Пен. Истражување на ИПСОС покажува дека партијата Републиканци освоила 27 отсто од гласовите на вчерашното гласање, a партијата на Ле Пен добила 19 отсто, што е помалку за седум проценти од регионалните избори во 2015 година.

По нив следуваат Зелената партија, Социјалистичката партија, па партијата на претседателот Емануел Макрон „Република во движење“ која освоила 11 отсто од гласовите.

Гласањето, чиј втор круг треба да се одржи на 27 јуни, беше обележано со рекордна апстиненција на гласачите. На изборите се гледа и како на некаков сигнал за претседателските избори кои треба да се одржат за помалку од година.

Гир- се надеваме дека преговорите со С.Македонија ќе се отворат што е можно побрзо

Eвроамбасадорот во Северна Македонија, Дејвид Гир

Сите сме мошне посветени кон заедничко изнаоѓање решенија што ќе доведат до отворање на пристапните преговори на Северна Македонија што е можно побрзо, изјави денеска евроамбасадорот Дејвид Гир, во одговор на новинарско прашање дали португалскиот предлог за деблокирање на нашиот евроинтеграциски процес ќе се разгледува и за време на словенечкото претседателство со ЕУ.

„Ги цениме напорите да се решат нерешените прашања меѓу Северна Македонија и Република Бугарија. Тоа е навистина важно и нешто кон што повикуваме што се однесува до отворањето на самите преговори. Тука можам да го повторам она што го кажува раководството на ЕУ, се надеваме дека преговорите ќе се отворат што е можно побрзо“, истакна евроамбасадорот Гир.

На прашање да даде коментар за реториката на одделни бугарски политичари, како и на европратеник од Бугарија во однос на Северна Македонија, Гир рече дека кога станува збор за добрососедските односи, важно е политичарите да се воздржани во изјавите.

„Што се однесува до забелешките дадени од извесни политичари на други земји и пратеници од земји членки, јас нема да коментирам за тоа, не е тоа во мојата пракса. Но, важно е да се воздржуваме секогаш кога станува збор за добрососедски односи. Тие се навистина важни и затоа политичарите мора да се воздржуваат во таа насока“, рече евроамбасадорот Гир на прес-конференцијата по повод потпишувањето на договор за поддршка на претпријатијата во износ од 100 милиони евра од Европската инвестициска банка.

Бугарскиот европратеник Ангел Џамбаски деновиве напиша дека една нација живее на двете страни од границата Деве Баир, а тоа е бугарската, и посочи дека немало две нации или два народи.

Филипче-засега не се планираат рестрикции поради Делта сојот

Министерот за здравство, Венко Филипче

Министерот за здравство Венко Филипче денеска рече дека ги анализираат податоците во земјава, во соседството и во Европа и дека тука ситуацијата е доста стабилна така што во овој момент не планираат рестриктивни мерки поради ширењето на новиот Делта сој на коронавирусот.

„Но, морам да потенцирам, будно ја пратиме состојбата не само кај нас, туку и во околните земји поради тоа што многу често за временска разлика од една до две недели се случуваа промени во сите земји во регионот. Продолжуваме со овие мерки и продолжуваме да ја пратиме ситуацијата“, изјави Филипче.

Во Македонија досега се регистрирани два случаи на Делта сојот кај луѓе што се вратиле од Ирак, но министерот рече дека врз основа на епидемиолошките анкети не детектирале ризик за ширење.

Во однос на вакцинацијата министерот рече дека во државата има околу 240 илјади вакцинирани граѓани заклучно со крајот на минатата недела, а околу 180 илјади граѓани чекаат во овој момент за вакцинација.

„Вакцинирано е население од некаде над 20 проценти од тие што треба да се вакцинираат, ако се исклучат децата, над 50 отсто се вакцинирани граѓани кои имаат над 70 години, околу 33 проценти од граѓаните над 60 години“, рече министерот Филипче.

Според неговата најава в петок се очекува да пристигне голема количина на вакцините „Фајзер“.

Изгласана недоверба на шведскиот премиер

Шведскиот премиер Стефан Лофвен во телевизиско обраќање за време на пандемијата со коронавирусот

Стефан Лофвен, социјалдемократскиот премиер на Шведска кој е на функцијата од 2014 година, го загуби гласањето доверба во парламентот кое се одржа денеска во услови на станбена криза во земјата и пораст на цените на недвижностите. Со ова тој стана прв премиер во историјата на Шведска на кој му е изгласана недоверба.

Гласањето беше иницирано од мала левичарска партија која е дел од малцинската влада, но не е член на двопартиската владина коалиција, а досега гласаше како и мнозинството за владините предлог закони. Причината за левичарската партија да гласа против Лофвен се плановите за дерегулацијата на шведскиот пазар на недвижности поради зголемувањето на цените за време на пандемијата.

Шведска има строга регулација за наем на недвижности со што цените и во поголемите градови се достапни за жителите. Тоа пак ги дестимулира градежниците да градат нови згради па луѓето кои сакаат да изнајмат стан чекаат со години во услови во кои купувањето имот од друга страна е речиси невозможно поради високите цени. Левичарската партија стравува дека дерегулацијата на пазарот на недвижности може да донесе нагло зголемување на цените и поголема сегрегација меѓу богатите и сиромашните.

Се уште е нејасно што ќе се случи понатаму на политичката сцена во Шведска. Лофвен минатата недела рече дека ќе го почека гласањето доверба па ќе одлучи што е најдобро за земјата. Тој има една недела да реши дали ќе побара предвремени избори или ќе даде оставка и со тоа ќе му остави на претседателот на парламентот Андреас Норлен да почне преговори со партиите за да се најде решение за нов премиер.

Лани смртноста зголемена за 26 отсто во однос на 2019 година, десет отсто починале како последица од Ковид19

Државен завод за статистика

Бројот на починати лица лани е зголемен за 26 отсто во однос на 2019 година и изнесува 25 775 лица, покажуваат податоците на Државниот завод за стстистика. Најголем број смртни случаи – 3 847, имало во месец ноември.

Поголем број од починатите се од машки пол и тоа 13 914 или 54 проценти од вкупно умрените лица. Бројот на починати доенчиња изнесува 108 и нивното учество во вкупниот број на умрени изнесува 0,4 проценти.
Според податоците на ДЗС, просечната возраст кај починатите од машки пол изнесува 71,6 години, а кај оние од женски 75,3 години или просечната возраст на смртност кај жените е повисока за 3,7 години.

Како и минатите години, најголемо учество имаат починатите лица од болести на циркулаторниот систем, што претставува 41,6 отсто, неоплазмите со 15.2 проценти, а потоа следат умрените како последица од пандемијата на КОВИД-19 со 10,9 проценти.

Со 5,8 проценти се застапени случаите кај кои причина за смрт се болестите на респираторниот систем, додека оние кај кои причина за смрт се ендокрините, нутритивните и метаболичните болести се застапени со 5,3 проценти од вкупно умрени, со 3,7 проценти се затапени лицата кај кои причина за смрт се болестите на нервниот систем, по што следат останатите заболувања, но со помала застапеност.

Синдикат на угостителство- газдите сами да си работат или да ги платат работниците

Угостителски објекти во Скопје во пандемија

Ситуацијата во угостителскиот сектор, што го доживеа најголемиот удар за време на пандемијата е алармантна. На компаниите од угостителството и туризмот им недостигаат 50 проценти од потребниот кадар, пред сè келнери, рецепционери, готвачи и помошници готвачи, покажуваат резултатите од интерната анкета која била спроведена од една од коморите, информира Синдикатот на угостителство и туризам (СУТКОЗ).

„Сведоци сме како работодавците од овие сектори бараат работници и се жалат, па им порачуваме на тие газди сами да си работат или да им се извинат на работниците, да ги вратат и платат согласно работното место кое го работат со коефициентите за плата пропишани во Колективниот договор за угостителство и туризам, за да се спаси туристичката сезона“, велат од Синдикатот за угостителство и туризам.

Според податоците на СУТКОЗ, од почетокот на кризата од четири илјади до 20 илјади вработени го напуштиле угостителскиот сектор.

Германија уапси руски истражувач во германски универзитет поради сомнение за шпионажа

Германските власти соопштија дека уапсиле руски државјанин осомничен за давање сензитивни информации од германски универзитет на Москва за што добивал пари.

Осомничениот, идентификуван како Илнур Н. Е се смета дека работел со руските тајни служби од октомври 2020 година досега, се наведува во денешното соопштение на Федералниот јавен обвинител. Во него се наведува и дека тој е однесен во притвор на 18 јуни.

Осомничениот работел како асистент истражувач за научни и технички работи на универзитет во Германија, а се сретнал со член на руските тајни служби најмалку три пати во период од октомври 2020 до јуни 2021 година, наведуваат од обвинителството. Од таму додаваат дека на најмалку два состанока дал информации за што добил пари.

ЕУ воведува нови економски санкции за Белорусија

Луксембург- Шефот на европската надворешна политика Џозеп Борел претседава со состанокот на министрите за надворешни работи на земјите членки на Европската унија,21.06.2021

Министрите за надворешни работи на Европската унија денеска одобрија нови санкции за голем број службени лица и субјекти во Белорусија, вклучително и членови на семејството на авторитарниот белоруски лидер Александар Лукашенко. Списокот со 78 лица и осум субјекти се очекува да биде објавен денеска, а на него се наоѓаат пратеници, обвинители, судии и други службени лица за кои ЕУ наведува дека се „одговорни за сериозни прекршувања на човековите права и за поткопување на владеењето на правото како и за репресија врз граѓанското општество и демократската опозиција“.

Синот на Лукашенко Дмитри и сопругата на неговиот најстар син Лилија исто така се ставени на списокот со санкциите поради „полза и поддршка на режимот на Лукашенко“.

Новите мерки за замрзнување на имотот и забрана за патување беа подготвени од експерти кои имаа задача да дизајнираат санкции за Белорусија како одговор на присилното слетување на авионот на Рајанер во Минск минатиот месец за да биде уапсен опозицискиот новинар и активист кој се наоѓаше во авионот. ЕУ веќе забрани белоруските авиокомпании за летаат над територијата на земјите членки и да ги користат нивните аеродроми.

И пред овој инцидент ЕУ размислуваше за нови санкции поради бруталната акција врз опозицијата која протестираше против режимот на Лукашенко по изборите лани во август, кои унијата ги смета за нерегуларни.
Министрите за надворешни работи на земјите членки на ЕУ денеска се сретнаа во Луксембург, на состанок со кој претседаваше шефот на евроспката дипломатија Џозеп Борел.

На Светското фудбалско првенство во Катар само со две дози вакцини против Ковид19

Катар ќе бара навивачите кои ќе сакааат во живо да го следат Светското фудбалско првенство во 2022 година да бидат вакцинирани против Ковид19, соопшти катарската влада. Премиерот шеик Калид бин Калифа бин Абдул Азиз ал-Тани за државните медиуми рече дека заливската држава, која е домаќин на Светското фудбалско првенство, се обидува да обезбеди еден милион вакцини за да ги имунизира фудбалските фанови кои сакаат да ги следат натпреварите.

“Кога ќе дојде датумот за Светскиот куп на ФИФА во Катар повеќето земји ќе ги имаат вакцинирано своите граѓани. Ако постои можност некои земји да не успеат да ги вакцинираат сите свои граѓани Катар нема да дозволи фановите да влезат на стадионите без да бидат целосно вакцинирани против Ковид19“, рече катарскиот премиер.

Светското фудбалско првенство е предвидено да почне на 21 ноември 2022 година.

САД подготвуваат нови санкции за Русија поради Навални

Советникот за национална безбедност на САД Џејк Суливан

Соединетите Американски Држави подготвуваат нови санкции за Русија поради труењето на критичарот на Кремљ Алексеј Навални, рече советникот за национална безбедност на САД Џејк Суливан. Тој додаде дека санкциите ќе ги преземат кога ќе бидат убедени дека со нив се погодени вистинските ентитети.

Навални беше уапсен кога се врати во Русија од Германија каде што беше на лекување по речиси фаталното труење со нервен гас. Тој го обвини рускиот претседател Владимир Путин за нападот, обвинување кое Кремљ го негираше.

Американскиот претседател Џо Бајден рече дека на минатонеделниот самит му кажал на Путин дека ќе продолжи да го отвора прашањето за почитувањето на човековите права, вклучително и апсењето на Навални. Администрацијата на Бајден воспостави санкции во март за руски официјални лица откако американските разузнавачки служби заклучија дека лица од Рускиот федерален безбедносен сервис се зад труењето на Навални.

Нуклеарката Бушер во Иран привремено не работи поради дефект

Нуклеарната централа Бушер на југот на Иран

Нуклеарната централа Бушер на југот на Иран е привремено затворена по технички „дефект“, објави доцна синоќа иранската организација за атомска енергија. „По технички дефект, централата во Бушер е привремено затворена и централата е исклучена од националната електрична мрежа“, велат од организацијата што управува со нуклеарната централа во земјата, но не ги прецизира деталите за дефектот. Се додава дека по отстранувањето на дефектот, електраната повторно ќе се поврзе со националната електрична мрежа.

Два силни земјотреси го погодија Иран

Бушер се наоѓа во Персискиот Залив и е поблиску до градовите на неколку соседни земји отколку од Техеран. Нуклеарката е изградена во зона склона кон земјотреси и ги загрижува овие држави. Областа беше погодена од земјотрес со јачина од 5,8 степени според Рихтеровата скала во април. Централата во Бушер, со реактор од 1.000 мегавати, е изградена со помош на Русија.

Словенците ќе можат да избираат вакцина со која ќе се имунизираат

Во Словенија, се користат вакцините на Модерна и Фајзер, како и Астра Зенека и Џонсон и Џонсон

Словенците од денеска имаат можност да изберат со која вакцина против ковид-19 ќе се вакцинираат. Тоа деновиве го најави словенечкиот премиер Јанез Јанша, додавајќи дека клучната цел е да се постигне таква стапка на вакцинација што ќе обезбеди имунитет и нормален живот не само во лето, туку и во есен, рече Јанша, повикувајќи ги граѓаните да се вакцинираат во што поголем број.

Њујорк Тајмс: Словенечкиот премиер ја следи тактиката на Трамп

Во Словенија, се користат вакцините на Модерна и Фајзер, како и Астра Зенека и Џонсон и Џонсон. Според официјалните податоци, 28,2 проценти од населението во Словенија досега биле вакцинирани со дозите потребни за целосна имунизација, а 797.861 само со прва доза.

Конзервативците на Меркел ќе ја претстават изборната програма

Армин Лашет, претседател на германската Христијанско-демократска унија

Владејачките конзервативци на германската канцеларка Ангела Меркел ќе ветат „деценија на модернизација“ во денешното претставување на изборната програма наменета да го отстранат предизвикот на нивните ривали од Партијата на зелените. Манифестот е контраодговор на понудата на Зелените за „нов почеток“ и ќе им покаже на конзервативците околу тоа кој треба да биде нивен кандидат кој ќе ја замени Меркел, која ќе се повлече од функцијата канцелар по федералните избори на 26 септември. Лидерот на Христијанско-демократската унија (ЦДУ) Армин Лашет, кој сега е фаворит за канцелар, се надева дека програмата ќе ја зацврсти неодамна вратената предност на конзервативците во анкетите пред Зелените и ќе обезбеди победа во септември.

Партијата на Меркел победи на изборите во Саксонија-Анхалт

„Сакаме 20-тите години да ги направиме деценија на модернизација“, рече Силвија Брехер, заменик-лидер на ЦДУ, постар партнер во сојуз со Баварската христијанска социјална унија (ЦСУ). „Ние сакаме да ја направиме нашата земја подобра и да ги заштитиме слободата на сегашните и идните генерации: со ефикасна заштита на климата, безбедни работни места, здрави финансии и правичност во социјалните прашања“, рече таа за Ројтерс. Откако минатата година уживаше голема поддршка од народот, владејачката „голема коалиција“ на ЦДУ / ЦСУ и левичарските Социјалдемократи (СПД) видоа дека гласачите се разочарани од нивното справување со пандемијата.

Македонската репрезентација против Холандија на ЕУРО 2020

Македонската фудбалска репрезентација последниот натпревар на ЕУРО 2020 ќе го игра против репрезентација на Холандија

Денеска во 18 часот македонската фудбалска репрезентација ќе игра против репрезентација на Холандија која со две победи во групата Ц се пласираше во осминафиналето на Европското првенство. „Не можеме само да ги поминеме. Мора да играме добро за да победиме, и тие ќе ја сфатат оваа игра исклучително сериозно“, изјави селекторот на холандската фудбалска репрезентација, Франк де Бур. Северна Македонија ќе го заврши првото големо натпреварување во својата историја во групната фаза, бидејќи загуби од Австрија со 1: 3 и од Украина со 1: 2. Селекторот Игор Ангеловски рече дека е задоволен од играта во второто полувреме против Украина и дека се надева дека неговиот тим ќе игра така во Амстердам. „Во второто полувреме, ние бевме вистинска Северна Македонија. Така ќе играме против Холандија“, изјави тој.

Граѓаните убедени во успех на македонските фудбалери на ЕУРО 2020

Вчера, капитенот на македонската репрезентација Горан Пандев објави крај на репрезентативната кариера по натпреварот со Холандија. 37 годишниот Пандев одигра 121 натпревар за македонската репрезентација. Тој веќе еднаш се прости од играњето за репрезентацијата, но ја смени одлуката откако Игор Ангеловски дојде на селекторската позиција во 2015 година.

Ерменија пред нова криза по вонредните парламентарни избори

Премиерот Никол Пашинијан гласа на избирачко место во Ереван, 20 јуни 2021 година.

Ерменија е на прагот на обновување на политичката криза откако вршителот на должноста премиер, Никол Пашинијан, објави дека победил на предвремените избори, додека главниот опозициски сојуз ги отфрли резултатите поради наводен изборен фалсификат. Прелиминарните резултати од вчерашните избори покажаа дека со пребројувањето на скоро три четвртини од местата, партијата Граѓански договор на Пашинијан водеше со 55,6 проценти од гласовите, додека Алијансата на Ерменија на поранешниот претседател Роберт Кочаријан имаше 20 проценти.

Ерменскиот премиер поднесе оставка за да има избори во јуни

„Граѓаните во Ерменија ѝ дадоа мандат на нашата партија Граѓански договор да ја води земјата, а јас лично да ја водам земјата како премиер“, објави Пашинијан. Неколку моменти подоцна, алијансата на Кочаријан соопшти дека нема да ги признае резултатите се додека не се решат наводните неправилности во гласањето. „Стотици сигнали од избирачките места што сведочат за организирани и планирани фалсификати служат како сериозна причина за недостаток на доверба“, се вели во соопштението на блокот. Предвремените парламентарни избори распишани од премиерот Никола Пашинијан поради незадоволството на граѓаните по поразот на Ерменија во конфликтот со Азербејџан во врска со Нагорно Карабах.

Во Брисел седница на Советот за надворешни работи на ЕУ

На денешната седница на Советот за надворешни работи на ЕУ, шефот на европската дипломатија Жозеп Борел, меѓу другото, ќе информира за исходот од новата рунда на дијалогот Белград-Приштина, наведуваат извори на ЕУ во Брисел. Министрите на ЕУ, како што е најавено, ќе разговараат за процесот на стабилизација и асоцијација. Дипломатски претставници на ЕУ објаснија дека повеќето членки на ЕУ се спротивставуваат на отворање нови поглавја во разговорите за членство со Србија, велејќи дека властите во Белград не успеале да ги спроведат очекуваните реформи, пред се во областите на владеење на правото, антикорупција, судска независност и слобода на изразување.

Вархеји- oваа година може да биде година на Западен Балкан

Висок функционер на португалското претседателство со ЕУ за новинарите изјави дека „изгледите за Србија се дека некои нови тематски обединети поглавја на „кластери“ ќе бидат отворени подоцна оваа година, под услов, секако, да бидат исполнети условите“. Официјален претставник на ЕУ, како што јавуваат некои новински агенции, им потврдил на новинарите дека министрите не се очекува да го одобрат почетокот на преговорите за членство со Албанија и Северна Македонија.

ЕУ со нова стратегија кон Русија

Борел ќе ги информира министрите и за новиот пристап на Унијата кон Русија, во кој се наведува дека ЕУ треба да биде подготвена истовремено да „одговор, присила и разговори“ во односите со Русија. Новите насоки во односите со Русија треба да бидат усвоени на самитот на ЕУ на 24 и 25 јуни. „Доколку земјите-членки ги одобрат тие препораки, тие треба да направат да се почитуваат и да не дозволуваат Русија да нè дели“, изјави Борел.

Вчитај повеќе

XS
SM
MD
LG