Достапни линкови

МВР- приведен е малолетникот кој на Тик-Ток објави видео како пали шума


Илустрација

Од Министерството за внатрешни работи денеска информираат дека малолетник од скопското село Мојанци е приведен поради потпалување на нискостеблеста шума и трева на јавна површина. Приведениот, како што наведуваат од МВР, го признал делото, а полицијата го открила откако на социјалните мрежи споделил видео и фотографии како го предизвикува пожарот.

„На 4 август 2020 на социјалната мрежа „Тик-Ток“ тој објавил видео и фотографии како предизвикува пожар, односно потпалува нискостеблеста шума и трева на јавна површина. Фотографиите и видеата биле споделени на повеќе социјални мрежи, по што Секторот за компјутерски криминал и дигитална форензика презеде мерки и активности и на 5 август 2020 до СВР Скопје-Единицата за насилен криминал доставена е документација со повеќе снимени видео клипови на кои се гледа дел од фигура на лице како врши потпалување на повеќе дрва и грмушки на јавна површина – планина, како и фотографии од лице со профил на социјална мрежа „Тик-Ток“, под псевдоним Д.К.“, се наведува во полициското соопштение.

Единицата за насилен криминал утврдила дека местото каде што малолетникот го извршува кривичното дело се падините на блиската шума над селото.

„По утврдување на идентитетот, на 13 август 2020 малолетникот заедно со неговиот татко бил повикан на разговор во просториите на Единицата за насилен криминал, каде што во присуство на инспектор по малолетничка деликвенција, го признал делото и потврдил дека тој палел нискостеблеста трева и шума на падините на блиската шума над село Мојанци“, соопшти МВР.

Од МВР велат дека за настанот бил запознаен Јавен обвинител за малолетници и по негови насоки делото е квалификувано како „предизвикување општа опасност“, предвидено и казниво член 288 од Кривичниот законик.

XS
SM
MD
LG