Достапни линкови

Земале пари од државата за плати, ама не им ги дале на работниците


Сања Лукаревска, директорка на УЈП

УЈП денеска информираше дека работодавачи од Скопје, Тетово, Гостивар, Струга…, ја зеле фиансиската поддршка од државата за плата на вработените, но не им ја исплатиле на работниците. Тоа го покажала анализата на Управата за јавни приходи, институција преку која се спроведуваше оваа мерка за поддршка од последиците од корона-кризата, а со цел да се задржат работните места.

Директорката на УЈП, Сања Лукаревска, на денешната прес-конференција ги соопшти податоците од реализацијата на мерката во април, мај и јуни, и апелираше до работодавачите кои ја добиле финансиската поддршка, а не ја исплатиле кон работниците тоа да го сторат пред јавно да бидат објавени.

Според неа, станува збор за над 13 милиони денари кои ги земале над 700 фирми, но не ги исплатиле на работниците. Со тоа биле оштетени речиси 1000 работници.

„Апелирам до сите работодавачи што не ја испочитувале оваа законска одредба да го направат тоа кон своите вработени, бидејќи целта беше да се зачуваат работните места, а не парите да ги земат работодавачите. Да го направат тоа пред да бидат јавно објавени“, истакна Лукаревска.

Таа појасни дека рокот за исплата е поминат, но сепак ова законско право треба да го остварат работниците. Лукаревска нагласи дека доколку не се постапи и по овој апел, веќе се во координација со Државниот инспекторат за труд за да се преземат мерки согласно закон, кој предвидува присилна наплата, глоби и враќање на средствата назад.

XS
SM
MD
LG