Достапни линкови

Вести

Словенечките новинари протестираа против измени во закони за медиуми

Човек шета во центарот на Љубљана

Стотици словенечки новинари, медиумски работници и активисти протестираа пред словенечкиот Парламент против законските измени, чија цел, според медиумите, е Владата да ги стави медиумите под своја политичка контрола.

Јавноста и новинарските кругови неодамна го критикуваа предлогот на Владата за изменување на три закони од областа на јавните медиуми и политиката на медиуми по итна постапка, по многу краток рок за јавна расправа.

Според нив, во државната телевизија и новинската агенција СТА, кои се основани од државата и примаат државни субвенции, повеќето членови на одборите би ги назначувала Владата наместо Парламентот, а директорите би можеле да бидат сменети пред истекот на нивниот мандат.

Здружението на словенечки новинари, нивната унија, но и неколку меѓународни здруженија на новинари сметаат дека е тоа е лошо за независноста на јавните медиуми и нивниот бизнис затоа што јавната РТВ би добила значително помалку пари отколку порано, а субвенциите би биле насочени кон медиумите поблиски до владата.

Опозициските партии изразија солидарност со барањата за продолжување на рокот за јавна расправа, а Владата потврди дека крајниот рок ќе биде продолжен за три месеци, до средината на септември.

види ги сите денешни вести

Прекинато е истекувањето гас од „Северен тек 1“

Сателитски поглед на истекувањето гас од гасоводот „Северен тек“ во Балтичкото Море, приближно 13 наутички милји југоисточно од островот Борнхолм, Данска.

Постигнат е стабилен притисок во оштетениот гасовод Северен тек 1, соопштија денеска властите во Данска, што укажува на тоа дека одливот на природен гас од последните истекувања сега е запрен.

Вкупно четири истекувања беа откриени на гасоводите Северен тек 1 и 2 во Балтичкото Море во близина на Данска и Шведска минатата недела.

И покрај тоа што ниту еден од гасоводот не бил во употреба во моментот на сомнителните експлозии, тие беа наполнети со гас што почна да излегува на површината на Балтичкото Море од 26 септември.

Вчера данската агенција за енергетика објави дека гасот повеќе не тече од гасоводот Северен тек 2.

Три истекувања, две во данската зона и едно во шведската зона, беа откриени минатата недела во двата главни руски подводни цевководи дизајнирани за транспорт на природен гас во Германија, додека Шведска на 29 септември соопшти дека нејзината крајбрежна стража открила и четврто истекување .

Инцидентите се случуваат во време на зголемени тензии меѓу Европа и Русија поради војната во Украина.

Иако и НАТО и Европската унија велат дека протекувањето на информациите било предизвикано од саботажа, тие досега се воздржуваа директно да ја префрлат вината на Русија.

Рускиот претседател Владимир Путин на 30 септември го обвини Западот дека ги саботира нафтоводите изградени од Русија, обвинение кое го негираа САД и сојузниците.

Лидерите на Европската унија ќе разговараат за безбедноста на клучната инфраструктура кога ќе се сретнат во Прага на 7 октомври.

„Саботажата на гасоводите „Северен тек“ е закана за ЕУ“, рече Шарл Мишел, кој претседава со состаноците на лидерите на ЕУ, во твит на 1 октомври по разговорите со данската премиерка Мете Фредериксен во Брисел.

„Ние сме решени да ја обезбедиме нашата критична инфраструктура. Лидерите ќе се осврнат на ова на претстојниот самит во Прага“, напиша тој.

Ристо Пенов е изборот на ЛДП за нов министер за локална самоуправа

Логото на ЛДП

Централниот одбор на ЛДП на синоќешната седница го прифати предлогот Ристо Пенов да биде наследник на Горан Милевски на местото министер за локална самоуправа, откако тој даде оставка од ова место и најави повлекување од лидерското место во партијата.

„Централниот одбор се заблагодари на досегашниот ангажман на Милевски, на успешното менаџирање со Министерството и на придонесот за регионалниот развој на државата“, соопштија од партијата.

Министерот за локална самоуправа Горан Милевски на 20 септември поднесе оставка до Владата, како што наведе, од лични причини. Неговата оставка во јавноста се поврзува со неговиот став за Францускиот предлог, различен од оној што го имаше владејачката коалиција, чиј член е и неговата Либерално-демократска партија (ЛДП).

Милевски беше против Францускиот предлог со кој дел од бугарските барања влегоа во преговарачката рамка со ЕУ како услов за повлекување на бугарското вето за почеток на преговорите на Македонија со ЕУ.

Сепак, двајцата пратеници од неговата партија во Парламентот, гласаа „за“ предлогот.

Пеново во јавноста пак е познат како поранешен градоначалник на Скопје во два мандари, во 1996 и 2000 година. По завршувањето на градоначалничката функција, Пенов беше пратеник во Собранието, исто така со два мандати.

Зеленски објави дека украинските војници целосно го контролираат Лиман

Украинскиот претседател Володимир Зеленски

Украинскиот претседател Володимир Зеленски изјави дека украинските трупи имаат целосна контрола врз источниот град Лиман, стратешки град во регионот на Донбас од кој руските сили се повлекоа еден ден претходно.

Зеленски го даде краткиот коментар во видео клип објавен на неговиот канал Телеграм на 2 октомври.

„Од 12:30 часот, Лиман е целосно исчистен. Благодарам на нашите војници. Слава на Украина“, рече тој.

Повторното заземање на Лиман беше најзначајната победа на украинските сили на бојното поле во последните неколку недели, која следи по контраофанзивата во регионот Харкив на север, што ги зафати руските сили и запрепасти многу набљудувачи.

Лиман е сместен на крстосница и во него се пресретнува железницата, па аналитичарите велат дека украинските трупи најверојатно ќе го користат градот како место за понатамошен напредок кон исток.

Градот беше место на интензивни борби со денови, при што украинските трупи постепено го опколија, проценувајќи дека го бранат околу 5.000 руски војници.

Руското Министерство за одбрана на 1 октомври соопшти дека ги повлекува војниците од областа „поради создавање закана од опкружувањето“.

Непотврдени извештаи велат дека руските сили таму претрпеле големи загуби, а непознат број војници биле заробени.

Тоа беше последниот неуспех за рускиот претседател Владимир Путин, кој дојде еден ден откако тој ја прогласи анексијата на четири украински региони кои веќе со месеци се делумно окупирани од руските сили.

Регионот Доњецк, каде што се наоѓа Лиман, е еден од тие четири региони. Киев и Западот ја осудија декларацијата за анексија како нелегална и фарса.

„Ослободувањето на овој град во регионот на Доњецк е еден од клучните фактори за понатамошна деокупација на регионот Луганск“, напиша на Телеграм Серхи Хаидаи, шеф на воената управа на Луганск.

Декларацијата на Путин дека Русија го анектира Доњецк, заедно со Луганск, Керсон и Запорожје, беше голема ескалација од страна на Кремљ.

Набљудувачите рекоа дека тоа сигнализира натамошно вкопување од страна на руското раководство, што ги намалува изгледите за мировен договор.

Заедно со Крим, кој Москва го зазеде во 2014 година, четирите региони сочинуваат околу 20 отсто од Украина, вклучително и некои од нејзините најиндустриски развиени територии.

Киев соопшти дека нема да преговара со Москва се додека Путин остане на власт.

Во јужниот украински регион Керсон, украинските сили водеа паралелна контраофанзива која досега донесе неколку од драматичните придобивки забележани во Харкив.

Експертите велат дека руските команданти префрлиле некои од нивните најискусни и најспособни единици подалеку од Донбас во Керсон во август, во очекување на украинска контраофанзива.

ВМРО ДПМНЕ ја објави аферата „Броило“, СДСМ негира дека е вмешан премиерот Ковачевски

Илустративна фотографија

Пратеникот на ВМРО-ДПМНЕ и член на извршниот комитет на партијата, Миле Лефков ја објави т.н. афера „Броило“, во која тврди дека премиерот Димитар Ковачевски се здружил со неговиот кум Горанчо Паунов за преку фирмата Пиксел груп да инкасираат милиони евра преку монопол на пазарот со фотоволтаични панели. Од СДСМ ги негираа овие информации и велат дека премиерот не е дел од сопствеништвото на компанијата.

Лефков најави дека во периодот кој следува ќе откријат детали како во „Броило“ фирми блиски до Ковачевски вртат милиони евра и во име на партијата го повика премиерот да каже каква е неговата вмешаност. Тој рече дека Пиксел груп како фирма основана од Ковачевски и Паунов е вмешана во бизниси во вредност од 26 милиони евра. Пиксел груп, според Лефков, е централната фирма во аферата.

„Аферата броило зазема димензии од десетици милиони евра, кога пред месец и половина, Пиксел груп најави дека влегува во фаза на инвестиција во фабрика за производство на соларни панели во индустриската зона во Тетово, во вредност од 54 милиони евра. Ова е зона во која инвеститорите имаат даночни и царински ослободувања, а според написите во медиумите се очекува да потпишаат и договор за државна помош“ вели Лефков.

Тој тврди дека фирмата е регистрирана под името АЕ Солар АД Тетово, како заедничка на Пиксел груп која поседува 40%, и 60% што ја поседува фирма од Бугарија, а Паунов е поставен за еден од двајцата извршни директори. Вели дека инвестицијата на Пиксел груп треба да биде 21.6 милиони евра, соодветно на процентот на учество.

„Со тоа, Ковачевски како премиер, ќе му потпише договор за државна помош, на кумот Горанчо Паунов како извршен директор на фирмата, во која 40% од сопственоста е на Пиксел груп, основана заедно со Ковачевски. И сето ова се случува во период откако друга бугарска фирма најави инвестиција во ФЕЦ Осломеј, каде државата е партнер со 18.5%. Па оттука се поставува прашањето дали панелите произведени во фабриката во Тетово ќе завршат во ФЕЦ Осломеј, каде државата е застапена со 18.5%? И каква е улогата на Ковачевски кој се јавува како основач на фирмата која е во кругот на бизнис интересите од оваа шема, но сега и како премиер?“ , прашува Лефков кој фрла сомнеж за монополизирање на пазарот за фотоволтаични панели преку тетовската фабрика.

Од СДСМ велат дека Ковачевски повеќе од 2 години не е дел од сопствеништвото на Пиксел груп.

„Конкретно за оваа компанија Пиксел Гроуп Доо Скопје, Димитар Ковачевски не е дел дел од сопственичката структура, ниту пак е сопственик. Уште на ден 28.09.2020 г Димитар Ковачевски во целост го повлече износот на финансиските средства вложени за обезбедување на почетната ликвидност на компанијатa. Тоа е јавно соопштено, за да може целосно да се посвети на функцијата којашто тогаш ја извршуваше, земеник министер за финансии. Сето ова може да види и во Анкетниот лист на премиерот“, одговори Даниела Марковска, пратеничка на СДСМ.

Таа вели дека ВМРО-ДПМНЕ шири лаги и го напаѓа претседателот Ковачевски затоа што е чесен и работи за граѓаните „додека Мицкоски се кара за тендери и провизии“.

„Дека станува збор за фабрикувана манипулацијата на ВМРО-ДПМНЕ се гледа и од тоа што споменуваат државна помош за компаниите, којашто се однесува на сите компании кои исполниле услови“, додава Марковска.

Полицијата го пронајде телото на Ердон Рамадани, 22-годишникот што со автомобил излета во Вардар

Илустративна фотографија

Идентификувано е телото кое претпладнево беше пронајдено во водите на реката Вардар. Се работи за Ердон Рамадани, 22 - годишникот од Куманово кој на 27 септември со автомобил фолксваген голф излета од автопатот во реката Вардар, од мост кај селото Желино.

„По наоѓање на телото, извршена е идентификација од најблиските членови на семејството на Е.Р. . Извршен е преглед од лекар од Судска медицина, додека Јавен обвинител наредил обдукција на телото“, информираше Марјан Јосифоски, портпарол на СВР Тетово.

По Рамадани се трагаше изминатите пет дена, а телото беше пронајдено од тетовските полицајци, кај бетонски мост во близина на касарната Еребино.

„Најден е младиот кумановец, во реката Вардар. Благодарност до сите спасувачки екипи кои придонесоа во текот на сите овие денови. Длабоко сочувство до семејството“, порача преку социјалните мрежи Блерим Сејдуи, градоначалникот на Желино.

Во потрагата учествуваа повеќе институции, а беа вклучени нуркачи и кучиња трагачи.

Папата Франциск го повика Путин да ја запре „оваа спирала на насилство и смрт“

Папата Франциск на неделната молитва во Ватикан

Папата Франциск го повика рускиот претседател Владимир Путин да ја запре „оваа спирала на насилство и смрт“ поради војната во Украина.

Изјавата на папата дадена на денешната неделна јавна молитва на плоштадот Свети Петар во Ватикан, е една од најсилните што ги има дадено од инвазијата на 24 февруари.

„Мојот апел најпрво е упатен до претседателот на Руската Федерација, молејќи го да ја запре, исто така, заради љубовта кон својот народ, оваа спирала на насилство и смрт“, рече Францис.

„Од друга страна, тажен од огромното страдање на украинското население по претрпената агресија, упатувам подеднакво уверлив апел до претседателот на Украина да биде отворен за сериозни мировни предлози“, рече тој.

Римокатоличкиот водач, исто така, го осуди зголемениот ризик од нуклеарна војна, нарекувајќи го „апсурден“.

„Длабоко жалам за сериозната ситуација што се појави во последните денови, со понатамошни дејствија спротивни на принципите на меѓународното право. Всушност, тоа го зголемува ризикот од нуклеарна ескалација, до степен на страв од неконтролирани и катастрофални последици ширум светот“, рече тој.

Коментарите на папата дојдоа два дена откако Путин одржа жесток говор во Кремљ во кој објави дека Русија анексира четири региони на Украина кои се делумно окупирани од руските сили.

Во говорот на 30 септември, Путин упати и прикриени закани за употреба на нуклеарно оружје во конфликтот, повторувајќи ги претходните изјави во кои тој го предупреди Западот дека „ова не е блеф“.

Радев вели дека Бугарија е подготвена да го зголеми извозот на струја во Македонија, согласно ЕУ правилата

Претседателот на Бугарија Румен Радев

Претседателот на Бугарија Румен Радев изјави дека Бугарија е подготвена да го зголеми својот извоз во Македонија, во согласност со правилата на европскиот енергетски пазар и бугарското законодавство и интересот на бугарските граѓани и бизниси.

Тој додаде дека вчера, заедно со македонскиот претседател Стево Пендаровски и претседателката на Европската комисија, Урсула фон дер Лајен, разговарале за можностите ЕУ финансиски да ги поддржи можностите на Северна Македонија за да се избегне евентуална ликвидносна криза во зима во однос на снабдувањето со електрична енергија во земјава.

Останатите политички разговори меѓу двете земји, според Радев, се одвиваат во нормална атмосфера на меѓусебно почитување и пријателство, но како што истакна бугарскиот претседател, многу е важно во Република Северна Македонија да се разбере дека спроведувањето на билатералните обврски треба да продолжи што е можно поскоро. Тој потсети дека вистинските преговори за членството на Македонија во ЕУ согласно преговарачката рамка не се започнати, а ќе почнат, како што рече, кога земјата ќе ги вклучи Бугарите во својот Устав.

„Очекувам државниците во нашата пријателска земја да покажат политичка мудрост и да ја градат европската иднина на Република Северна Македонија ослободена од идеологиите на минатото“, вели бугарскиот претседател Румен Радев.

Тој вчера во Софија, по церемонијата за пуштањето на новиот интерконектор за гас меѓу Бугарија и Грција, се сретна со македонскиот претседател Стево Пендаровски и претседателката на Европската комисија Урсула фон дер Лајен, каде тема на разговор била енергетската криза и условите под кои Бугарија, која е членка на ЕУ може да испорача струја за Македонија, земја што се уште не е дел од Унијата.

Во Бугарија денеска се оддржуваат нови предвремени парламентарни избори, четврти во последните 18 месеци.

Русија го блокираше музичкиот сервис СаундКлауд поради ширење „лажни информации“

Илустративна фотографија

Руските регулатори наводно ја блокирале веб-страницата на апликацијата за стримање музика СаундКлауд (SoundCloud), повикувајќи се на „лажни информации“ за војната во Украина.

Руските новински агенции ТАСС и Интерфакс денеска соопштија дека набљудувачката служба за комуникации Роскомнадзор ја блокирала страницата на барање на канцеларијата на Генералното обвинителство.

„Роскомнадзор го ограничи пристапот до услугата СаундКлауд во врска со поставување материјали што содржат лажни информации поврзани со природата на специјалната воена операција на територијата на Украина“, ја цитира Интерфакс објавата на регулаторот.

Според некои извештаи, оваа одлука влијае само на веб-страницата СаундКлауд, бидејќи мобилната верзија на апликација сè уште е достапна во Русија.

Од инвазијата на Украина на 24 февруари, руските власти ги засилија напорите да ги цензурираат информациите и критиките за војната.

Пратениците усвоија закон веднаш по инвазијата со кој се криминализира „дистрибуцијата на лажни информации“ за руските вооружени сили, а обвинителите обвинија десетици луѓе.

Регулаторот го спречи пристапот до Твитер и ги забрани Фејсбук и Инстаграм на компанијата Мета.

Нејасно е зошто властите сега се префрлија против СаундКлауд. Сепак, некои медиумски извештаи велат дека емитувањата на рускиот сервис на РСЕ може да бидат главната причина.

СаундКлауд во Русија го користеа не само медиумите, туку и независните музичари, авторите на подкасти и други.

По инвазијата, Канцеларијата на јавниот обвинител побара СаундКлауд и другите подкаст платформи да ги отстранат подкастите на независната веб-страница за вести Медиазона и објавите поврзани со војна од БиБиСи, Докса и други медиуми.

Гувернерката Ангеловска-Бежоска: Централните банки да се фокусираат на одржување ценовна стабилност

Гувернерката на Народна банка Анита Ангеловска - Бежовска

Во услови на изразени инфлациски притисоци централните банки мора да останат фокусирани на среднорочната ценовна стабилност, што бара нормализирање на монетарната политика, смета гувернерката на Народната банка на Република Северна Македонија, Анита Ангеловска-Бежоска при што додава дека при нормализирањето на монетарната политика овие банки водат сметка за ефектите врз економскиот раст и стабилноста на финансискиот систем.

Ставот е пренесен во соопштението на банката по учеството на гувернерката на Самитот на министри за финансии, гувернери на централни банки и директори на даночни управи, насловен „Финансиска и монетарна стабилност на регионот во услови на изразени геополитички ризици“, кој се одржа во Црна Гора.

На самитот било потенцирано значајното забрзување на инфлацијата во сите земји во регионот, која во просек достигна 13,5 проценти, како и притисоците од енергетскиот шок врз девизните пазари што резултираше со потреба од затегнување на монетарните политики во регионот. Ова, се додава во соопштението, доаѓа до израз откако ФЕД и ЕЦБ во неколку наврати ги зголемија каматните стапки, а ФЕД веќе ја намалува ликвидноста од пазарите што помал простор за маневар на останатите централни банки.

„Доколку централните банки во регионот не преземаат мерки кои ќе го следат циклусот на ФЕД и ЕЦБ, тогаш може да се соочат со ризици за капитални одливи или помали капитални приливи, а со тоа и зголемени притисоци на девизниот пазар“, смета гувернерката.

Сите учесници на панелот се согласиле дека одржување на стабилноста на девизниот курс е од исклучително значење за стабилизирање на инфлацијата, се додава во соопштението на Народна банка.

МААЕ бара ослободување на уапсениот директор на украинската централа Запорожје

Рафаел Гроси, генерален директор на Меѓународната агенција за атомска енергија (МААЕ)

Нуклеарното тело на Обединетите нации повика на ослободување на директорот на најголемата нуклеарна централа во Украина, кој наводно бил киднапиран од руска воена патрола.

Повикот испратен од страна на шефот на Меѓународната агенција за атомска енергија (МААЕ), Рафаел Гроси, дојде еден ден откако Ихор Мурашов беше приведен додека патувал меѓу централата Запорожје и градот Енерходар.

Мурашов „беше изваден од автомобилот и со врзани очи однесен во непознат правец“, соопштија вчера од Енерхоатом, украинската државна компанија која ја надгледува работата на централата.

Гроси „изрази надеж дека Мурашов ќе се врати во своето семејство безбедно и брзо, и ќе може да ги продолжи своите важни функции во фабриката“, објави МААЕ на Твитер.

Притворот на Мурашов имаше „многу значајно влијание“ врз него и врз стандардите за нуклеарна безбедност и безбедност, соопшти агенцијата.

Нејасно е зошто е приведен Мурашов. Руските власти не дадоа изјава за приведувањето.

Фабриката и околината се под контрола на руските сили од март, додека украинскиот персонал продолжи да работи во централата.

Нејзиниот последен реактор беше затворен во септември поради гранатирање во нејзина близина. Киев и МААЕ предупредуваат на можноста од еколошка катастрофа поради гранатирањата.

Русија ги отфрли повиците за создавање демилитаризирана зона околу централата во Запорожје.

Минатиот месец одборот на гувернери на МААЕ донесе резолуција со која се повикува Русија да ја прекине окупацијата на централата и „веднаш да ги прекине сите дејствија“ против неа и „било кој друг нуклеарен објект во Украина“.

Русија и Кина гласаа против резолуцијата.

Пендаровски и уште осум претседатели од НАТО земји бараат Русија да се повлече од Украина

Македонскиот претседател Стево Пендаровски на НАТО самитот во Мадрид, 29 јуни, 2022

Претседателите на НАТО земји-членки од Централна и Источна Европа, меѓу кои и македонскиот претседател Стево Пендаровски, дадоа заедничка пишана изјава во врска со одлуката на Русија за нелегално анектирање на украински територии во која повторно изразуваат поддршка за суверенитетот и територијалниот интегритет на Украина.

„Ние, претседателите од Централна и Источна Европа, од земји чиишто лидери го посетуваа Киев за време на војната и лично беа сведоци на последиците од руската агресија, не можеме да молчиме пред фрапантното прекршување на меѓународното право од страна на Руската Федерација и во таа насока ја даваме следнава изјава: Повторно ја изразуваме нашата поддршка за суверенитетот и територијалниот интегритет на Украина. Не ги признаваме и никогаш нема да ги признаеме руските обиди за анектирање на која било украинска територија“, се наведува во изјавата.

Во Изјавата се дава целосна поддршка за Украина и се бара Русија веднаш да се повлече од сите окупирани територии. Притоа се охрабруваат сите сојузници значително да ја зголемат воената помош кон Украина.

„Секој што ќе изврши чин на агресија мора да сноси одговорност и да биде изведен пред правдата“, стои во заедничката изјава.

Покрај македонскиот претседател, во изјавата се потпишани Милош Земан, претседател на Чешката Република, Алар Карис, претседател на Република Естонија, претседателот на Република Латвија Егилс Левиц, Гитанас Науседа претседател на Република Литванија, Мило Ѓукановиќ претседател на Република Црна Гора, Анджеј Дуда претседател на Република Полска Клаус Јоханис, претседател на Романија и Зузана Чапутова, претседателка на Словачката Република.

Руската воена инвазија започна на 24 февруари, а пред неколку дена рускиот претседател Владимир Путин одржа жесток говор во Кремљ во кој објави дека Русија анексира четири региони на Украина кои се делумно окупирани од руските сили. Претходно, Москва одржа референдуми во четирите украински региони за кои западните земји рекоа дека се „измама“ и беа широко отфрлени од меѓународната заедница.

Американскиот претседател Џо Бајден рече дека „овие акции немаат легитимитет“, додека земјите како Германија, Велика Британија, Шведска и Полска, исто така, брзо ја осудија акцијата на Москва.

Избори во БиХ - над 3,3 милиони гласачи бираат 518 функционери

Гласање во Сараево, 2 октомври 2022

Граѓаните од Босна и Херцеговина денеска гласаат на општите избори на кои бираат свои претставници на сите нивоа на власта – во државата, Федерацијата БиХ и Република Српска, односно треба да ја изберат следната влада, со мандат од четири години.

Во седум часот беа отворени нешто повеќе од 5.900 избирачки места, на кои својот глас околу 3,3 милиони граѓани ќе можат да го дадат до 19 часот.

На низ ќе се изберат 518 функционери на различни нивоа на власта.

Граѓаните гласаат за избор на тројца членови на Претседателството на Босна и Херцеговина, 42 претставници во Претставничкиот дом на Парламентот на Босна и Херцеговина, 98 претставници во Претставничкиот дом на Федерацијата на Босна и Херцеговина, 83 претставници во Народното собрание на Република Српска, претставници во собранијата на десет окрузи во Федерацијата Босна и Херцеговина и претседател и двајца потпретседатели на РС.

За овие функции се натпреваруваат нешто повеќе од 7.200 кандидати од 90 политички партии и 38 партиски коалиции, како и 17 независни кандидати.

Изборите се случуваат и во време на руската војна во Украина, која дополнително ја подели Босна и ги зголеми стравувањата од зголемување на превирањата за долгогодишните прашања во оваа балканска држава.

Босна останува поделена на бошњачка и хрватска федерација и претежно српски ентитет на Република Српска според условите на Дејтонскиот договор од 1995 година со кој заврши тригодишната војна во поранешната југословенска република, обележана со етничко чистење и бруталност.

Тоби Фогел, аналитичар од Западен Балкан и висок соработник на Советот за политика за демократизација, кој беше критичен за неуспесите на Западот во Босна, вели дека се сомнева дека гласањето ќе биде „трансформативно“.

„На крајот на краиштата, проблемите во Босна не се поврзани со тоа кој е на власт и кој е во опозиција, туку со тоа како е структурирана моќта и примената на структурата на моќта. Тоа се структурни проблеми кои се навраќаат на Дејтонскиот мировен договор и уставната поставеност што ја содржат“, рече тој.

Сепак, тесната трка меѓу етнички распределените места на трипартитното федерално претседателство, вклучително и невиден предизвик за местото на мнозинството Бошњаци, најавуваат интересен ден за гласање.

Голем дел од вниманието, исто така, ќе се фокусира на Република Српска и нејзиниот водач, Милорад Додик, кој поттикна забрзување на сецесионистичките напори на регионот со доминантно српско население.

Додик одржува блиски врски со соседна Србија и со Русија за дипломатска и друга поддршка за да се спротивстави на федералната структура на Босна и меѓународниот притисок.

Соединетите Држави објавија санкции против Додик во 2017 година и повторно во јануари поради неговите сецесионистички напори.

Во Бугарија се гласа на четвртите парламентарни избори во помалку од две години

Избори во Бугарија, 2 октомври 2022

Во Бугарија денеска почна гласањето за четвртите парламентарни избори за помалку од две години, а главна тема пред доаѓањето на зимата е скокот на цените како последица на војната во Украина.

Избирачките места беа отворени во 7:00 часот по локално време, а ќе бидат затворени во 20:00 часот, кога се очекува да бидат објавени првите излезни резултати.

Право на глас имаат 6 602 990 бугарски граѓани запишани во избирачкиот список. Отворени се 11 636 избирачки места, а во 9 369 од нив ќе се гласа машински, во 1 105 избирачки места ќе се гласа со два апарати, додека во 2 785 места, претежно помали градови и села бугарските граѓани ќе гласаат со хартиени ливчиња.

Регистриран е и зголемен број отворени избирачки места во странство, што на бугарските државјани надвор од земјата им дава можност да гласаат во максимален број.

На предвремените парламентарни избори во Бугарија учествуваат 28 политики формации, од кои 22 се политички партии, а шест се коалиции. Според родовата застапеност, вкупно 1 954 жени и 4 670 мажи ќе се борат за место во бугарскиот парламент кој брои 240 места

Предвремените избори беа распишани откако во јуни ѝ беше изгласана недоверба на коалицијата предводена од прозападниот премиер Кирил Петков.

Последните истражувања на јавното мислење покажуваат дека до седум партии би можеле да го надминат изборниот праг од четири отсто.

Иако партијата ГЕРБ на поранешниот премиер Бојко Борисов ја загуби поддршката на претходните избори, според предизборните анкети се очекува да добие најмногу гласови, по што следи партијата Продолжуваме со промените на Кирил Петков и Асен Василев.

Според аналитичарите, гласачите не се подготвени да прифатат промени во време на криза и повеќе се склони да гласаат за партијата што им е позната.

Оценките се дека поради длабоките поделби меѓу најголемите партии, речиси е невозможно да се формира одржлива коалициска влада, што би ја продолжило политичката криза и дополнително би ја влошило економската состојба во најсиромашната членка на ЕУ.

Топло утро со сонце и ветер, најмногу дожд наврна на Маврово

Илустративна фотографија

Утринските температури во целата држава се над нулата, а топло е и на планинските предели, соопштија денеска од УХМР.

За денеска предвидуваат сончево време со мала до умерена облачност. Ќе дува умерен, а во источните делови и долж Повардарието засилен северен ветер.

Максималната температура ќе биде во интервал од 19 до 26 степени, а во Скопје до 24 степени.

Локални врнежи од дожд ќе има утре, а потоа следува период на стабилно време со умерен, повремено засилен ветер од северен и северозападен правец, најавуваат од УХМР.

Оттаму информираат дека во изминатите 24 часа, до 8 часот денеска, најмногу дожд наврна во Маврово 31 литар на м2.

Стампедо по фудбалски натпревар во Индонезија однесе стотици животи

Немири по фудбалскиот натпревар во Индонезија, 2 октомври 2022 година.

Бројот на загинати во стампедо на фудбалски натпревар во Индонезија се искачи на 174, од кои повеќето беа прегазени до смрт откако полицијата употреби солзавец за да ги разбие немирите во саботата, што го прави еден од најсмртоносните спортски настани во светот.

Немирите избувнаа откако натпреварот заврши во саботата навечер кога домаќинот Арема ФК од градот Маланг во Источна Јава загуби од Персебаја од Сурабаја со 3-2.

Заменик увернерот на Источна Јава, Емил Дардак за локалните медиуми изјави дека бројот на загинати се искачи на 174, додека повеќе од 100 повредени луѓе се на интензивно лекување во осум болници, од кои 11 се во критична состојба.

Вечерта по натпреварот, разочарани по поразот на нивниот тим, илјадници поддржувачи на Арема, фрлаа шишиња и други предмети кон играчите и фудбалските службеници. Навивачите го преплавија теренот на стадионот во знак на протест и побараа управата на Арема да објасни зошто по 23 години непоразени домашни натпревари, овој натпревар заврши со загуба, велат очевидци.

Немирите се проширија надвор од стадионот каде што најмалку пет полициски возила беа запалени. Полицијата одговори со фрлање солзавец, вклучително и кон трибините на стадионот, предизвикувајќи паника меѓу публиката. ФИФА инаку го има забрането солзавецот на фудбалските стадиони.

Некои од жртвите се задушиле, а други биле прегазени додека стотици луѓе трчале кон излезот во обид да го избегнат солзавецот. Во хаосот, 34 лиаца загинаа на стадионот, меѓу кои и двајца полицајци, а некои извештаи вклучуваат деца меѓу жртвите.

Фудбалскиот сојуз на Индонезија (ПССИ) ја суспендираше првата фудбалска лига Лига 1 на неодредено време поради трагедијата и му забрани на Арема да биде домаќин на фудбалски натпревари до крајот на сезоната.

Претседателот на Индонезија Џоко Видодо изрази длабоко сочувство за загинатите во телевизиските изјави во неделата.

„Длабоко жалам за оваа трагедија и се надевам дека ова е последна фудбалска трагедија во оваа земја, не дозволувајте да се случи друга човечка трагедија како оваа во иднина“, рече Видодо.

Тој им нареди на министерот за млади и спорт, началникот на националната полиција и на претседателот на ПССИ да спроведат темелна евалуација на фудбалскиот натпревар во земјата и неговата безбедносна процедура.

Индонезија треба да биде домаќин на Светското првенство за играчи до 20 години во 2023 година од 20 мај до 11 јуни, со 24 репрезентации . Како домаќин, земјата автоматски се квалификува за купот.

Ферли Хидајат, началникот на локалната полиција на Маланг, рече дека на натпреварот во саботата имало околу 42.000 гледачи, од кои сите биле за Арема бидејќи организаторот им забранил на навивачите на Персебаја да влезат на стадионот во обид да избегнат тепачки.

Ограничувањето беше наметнато откако судирите меѓу поддржувачите на двата ривалски фудбалски тима на стадионот Блитар во Источна Јава во февруари 2020 година предизвикаа материјални загуби од вкупно 250 милиони рупии (18.000 американски долари).

Натпреварот во сабота е веќе меѓу најлошите вакви катастрофи во светот, вклучувајќи го и квалификацискиот натпревар за Светското првенство во 1996 година помеѓу Гватемала и Костарика во Гватемала Сити, каде над 80 лица загинаа, а повеќе од 100 беа повредени. Во април 2001 година, повеќе од 40 луѓе беа згмечени до смрт за време на фудбалски натпревар во Елис Парк во Јоханесбург, Јужна Африка.

Вчитај повеќе

XS
SM
MD
LG