Вести
ИЈЗ: Ниту еден од нашите вработените не е позитивен на КОВИД-19
Во Институтот за јавно здравје ниту еден од вработените не е позитивен на КОВИД-19, информираат од институцијата.
Епидемиолошките екипи и натаму ја извршуваат својата работа како и во изминатите два месеца. Ова е официјална информација од Институтот за јавно здравје, се наведува во соопштението.
види ги сите денешни вести
Протести откако имиграциски агенти убија уште еден американски државјанин во Минеаполис
Американски имиграциски агенти застрелаа американски државјанин во Минеаполис во саботата (25 јануари), соопштија официјални лица, што предизвика жестоки протести и осуда од локалните лидери по вториот ваков инцидент овој месец.
Министерството за внатрешна безбедност го окарактеризира инцидентот како напад, велејќи дека агентот на граничната патрола пукал во самоодбрана откако му се приближил маж со пиштол и жестоко се спротивставил на обидите да го разоружа.
Инцидентот се случи по помалку од три недели откако службеник на Службата за имиграција и царина ја застрелал и ја убил Рене Гуд, исто така 37-годишна, во нејзиниот автомобил.
Видео снимките од местото на настанот, според Ројтерс, го прикажуваат човекот, идентификуван како 37-годишниот Алекс Прети, како држи телефон, а не пиштол, додека се обидувал да им помогне на други демонстранти кои биле соборени на земја од агентите.
На почетокот на снимката, може да се види како Прети снима федерален агент како прво турка една жена, а потоа и друга која паѓа. Прети стои помеѓу агентот и жените, а потоа ја крева левата рака за да се заштити додека агентот го прска со бибер спреј.
Потоа неколку агенти го зграпчуваат Прети - кој се бори со нив - и го принудуваат да легне на колена. Додека агентите го држат Прети, некој извикува нешто што звучи како предупредување за присуство на пиштол. Видеото потоа покажува како еден од агентите му го зема пиштолот на Прети и се оддалечува од групата што го носи.
Неколку моменти подоцна, полицаец со пиштол вперен во грбот на Прети испука четири куршуми, покажува видеото. Потоа се слушаат уште неколку истрели додека друг агент се чини дека пука во Прети.
Агентите се оддалечуваат од телото на Прети на улицата. Потоа се чини дека некои агенти му пружаат медицинска помош на Прети додека тој лежи на земја, додека други агенти ги приведуваат минувачите.
Различни толкувања на видео снимката
По пукањето во Прети, медицински техничар во одделот за интензивна нега, стотици демонстранти излегоа во тој дел од градот за да се соочат со вооружените и маскирани агенти, кои употребија солзавец и шок-бомби. Демонстрации избувнаа во Њујорк, Вашингтон и Сан Франциско, како и во други градови во Соединетите Американски Држави (САД).
Тоа, исто така, ги зголеми тензиите меѓу федералните официјални лица и властите на Минесота, кои веќе се во конфликт со администрацијата на претседателот Доналд Трамп поради инцидентот од 7 јануари во кој агент на Службата за имиграција и царина ја застрела американската државјанка Гуд.
Министерката за внатрешна безбедност, Кристи Ноем, им рече на новинарите дека човекот убиен во саботата нападнал агенти за време на рација за имиграција, иако не кажа дали извадил оружје. Федералните претставници објавија слика од пиштолот за кој велат дека Прети го носел за време на инцидентот.
„Тој не бил таму за мирно да протестира. Тој бил таму за да поттикне насилство“, рече Ноем на прес-конференција.
Властите на Минесота, вклучувајќи го и гувернерот Тим Волц, ја доведоа во прашање таа изјава.
„Го видов видеото од неколку агли и е одвратно“, рече Волц. „Не може да ѝ се верува на федералната влада да ја води оваа истрага. Државата (Минесота) ќе се справи со тоа.“
Шефот на Бирото за криминално апсење на Минесота, Дру Еванс, им изјави на новинарите дека федералните агенти во саботата ги блокирале обидите на неговиот тим да започне истрага.
Шефот на полицијата во Минеаполис, Брајан О'Хара, изјави дека убиениот маж бил легален сопственик на оружје без криминално досие освен сообраќајни прекршоци.
Додека луѓето протестираа против инцидентот, градската полиција и државните полицајци на Минесота пристигнаа за да ја контролираат толпата. Ситуацијата се чинеше дека се смири доцна во саботата откако федералните агенти ја напуштија областа, иако демонстрантите останаа на улиците со часови потоа.
Конфликт околу постапките на агентите за имиграција
Волц и други локални и државни службеници повикаа на итен прекин на локалните операции за спроведување на имиграциските закони од страна на администрацијата на Трамп.
Трамп ги обвини локалните власти за поттикнување.
„Градоначалникот и гувернерот поттикнуваат бунт со нивната помпезна, опасна и арогантна реторика“, напиша Трамп на социјалните медиуми.
Од друга страна, републикански сенатор повика на заедничка истрага за вооружениот инцидент.
„Мора да има целосна заедничка федерална и државна истрага. Можеме да им веруваме на американскиот народ со вистината“, напиша сенаторот Бил Касиди, републиканец од Луизијана, мрежата Икс.
Потпретседателот Џ.Д. Венс, кој го посети градот во четврток, ги обвини локалните лидери дека одбиваат да им обезбедат локална полициска поддршка на имиграциските агенти. Тоа предизвика жестока реакција од Волц, кој рече дека имиграциските операции ги оптовариле локалните полициски ресурси.
Најновиот инцидент се случи еден ден откако повеќе од 10.000 луѓе излегоа на заледените улици за да протестираат против активностите на имиграциските агенти. Жителите на Минеаполис веќе беа лути поради неколку инциденти, вклучувајќи го убиството на Гуд, притворањето на американски државјанин кој бил одведен од неговиот дом и притворањето ученици, вклучувајќи и 5-годишно дете.
Додека администрацијата на Трамп спроведува сеопфатна кампања за депортирање на имигранти, илјадници агенти на Службата за имиграција и царина се распоредени во Минеаполис, кој е под контрола на демократите.
Зеленски бара поддршка за воздушна одбрана додека Киев е без греење
Украинскиот претседател Володимир Зеленски побара од сојузниците поголема поддршка за воздушна одбрана, бидејќи стотици згради во Киев се без греење на нула температури втор ден по руските напади, јави АФП.
Русија ја погодува украинската енергетска инфраструктура цело време во текот на речиси четиригодишната војна, но Киев вели дека оваа зима била најтешка, со стотици руски беспилотни летала и ракети против украинската воздушна одбрана за време на големи мразови.
„Само оваа недела, Русите лансираа повеќе од 1.700 борбени беспилотни летала, над 1.380 водени воздушни бомби и 69 ракети од различни видови“, рече Зеленски претседателот по пристигнувањето во Вилнус.
„Затоа ракетите за системите за воздушна одбрана се потребни секој ден и ние продолжуваме да работиме со Соединетите Американски Држави и со Европа за да обезбедиме посилна заштита на нашето небо“, рече тој.
Руските бомбардирања особено го погодија Киев, принудувајќи половина милион луѓе да се евакуираат.
„Во моментов има 1.676 високи станбени згради во Киев без греење по непријателскиот напад врз градот Киев на 24 јануари“, рече градоначалникот на Киев, Виталиј Кличко.
Температурите под нулата и повторените воздушни напади ги забавија напорите на екипите кои работат да ги вратат греењето и струјата.
Во Вилнус, Зеленски учествуваше на церемонија по повод одбележувањето на востанието од 1863 година во Полска и Литванија против царска Русија.
Полскиот претседател Карол Навроцки, кој исто така присуствуваше на настанот, направи паралела помеѓу руската инвазија на Украина и минатите борби за слобода на народите во Руската империја.
„Пораката на овие прослави е дека со поглед кон минатото за она што го имаме заедничко, денес е полесно да се соочиме со проблемите што се пред нас. Особено во ерата на оживување на империјална Русија“, соопшти неговиот кабинет.
Полска и Литванија се меѓу најцврстите поддржувачи на Киев во Европската Унија, а двете земји неодамна испорачаа стотици генератори за Украина.
Разговорите со Русија и Украина, посредувани од САД, за планот на Вашингтон за завршување на војната завршија без очигледен пробив во саботата на 24 јануари.
Сепак, Зеленски рече дека преговорите биле „конструктивни“ и дека обете страни се согласиле повторно да се сретнат во Абу Даби следната недела.
Демонстранти се судрија со полицијата на антивладини протести во Тирана
Протестот на опозицијата против албанската влада ескалираше во судири меѓу демонстрантите и полицајците, при што десетици лица беа повредени од двете страни вечерта на 24 јануари во главниот град Тирана, соопштија властите.
Демонстрантите, повикани од Сали Бериша, лидер на опозициската Демократска партија, се собраа пред албанската влада и пред парламентот во Тирана, скандирајќи против владата на премиерот Еди Рама.
Бериша ги повика демонстрантите да се соберат „за да го изведат Рама пред суд“.
Бериша бара соборување на владата на Рама обвинувајќи ја за корупција, откако властите започнаа истраги кон крајот на минатата година за наводи за корупција против вицепремиерката Белинда Балуку и против руги функционери.
Демонстрантите се собраа неколку часа во близина на зградата на владата во саботата, каде фрлаа предмети и молотови коктели врз полицајците.
Полицијата одговори со водни топови во обид да ги растера, но демонстрантите се приближија до зградата на парламентот. По околу три часа, демонстрантите се разотидоа.
Државната полиција објави дека 11 полицајци се повредени и добиваат медицинска помош. Властите не пријавија повредени меѓу демонстрантите, но државната телевизија РТСХ и други медиуми во земјата објавија дека демонстранти се повредени.
„И покрај континуираните повици на полицијата да се прекинат актите на насилство, тие продолжија, што доведе до интервенција за растерување на толпата, во согласност со важечките законски одредби“, соопшти полицијата по протестот.
Уапсени се 23 лица, вклучувајќи и неправедно притворање малолетник.
„Родителите беа веднаш известени и сè додека не го земаа, малолетникот не беше придружуван до собите за придружба, туку остана во канцеларијата за прием на граѓани“, се вели во соопштението.
Претходно, Бериша објави видео на Фејсбук од она што го нарече „апсење на малолетникот кој ја напуштал џамијата каде што се молел“, обвинувајќи ја државата за „насилство врз деца“.
Полицијата соопшти дека почнала истраги за насилството на протестот.
Бериша рече битката ќе продолжи „бидејќи имаме една мисија и само една мисија, соборување на овој криминален режим, овој нарко-режим, овој непријател на Албанците и Албанија“.
Специјалното обвинителство за борба против корупцијата и организираниот криминал (СПАК) поднесе обвинение против министерката Балуку минатиот октомври и побара од Собранието да ѝ го одземе имунитет и да одобри нејзино апсење.
Балуку, која е и пратеничка и министерка за инфраструктура и енергетика, е обвинета за сторени прекршоци при доделување тендери.
Балуку ги негираше обвиненијата и рече дека целосно ќе соработува со правдата.
Таа беше суспендирана од службените должности и ѝ беше забрането да ја напушти земјата, но одлуката на СПАК да ја суспендира беше поништена од Уставниот суд.
Рама рече дека по одлуката на Уставниот суд, СПАК сега бара овластување да ја уапси Балуку, да ја прати во затвор или во домашен притвор.
Тој рече дека „апсењата без судење“ станале „груба мода во Албанија“, но додаде дека не може однапред да го процени конкретното барање.
Повеќе од 30.000 луѓе можеби се убиени во протестите во Иран, според списанието „Тајм“
Бројот на жртви на протестите во Иран можеби надминува 30.000 луѓе, според двајца високи ирански здравствени службеници кои разговарале со списанието „Тајм“, пренесе англискиот сервис на Радио Слободна Европа (РСЕ).
Во извештајот, објавен на 25 јануари, се вели дека поголемиот дел од смртните случаи се случиле од 8 до 9 јануари, кога владиното задушување на протестите низ целата земја го достигна врвот.
Поради интензивната цензура и продолжено исклучување на интернетот, информациите не можеа да бидат независно потврдени.
Пријавената бројка остро се спротивставува на официјалниот број жртви (3.117) објавен од Врховниот совет за национална безбедност на Иран, но е поблиску до меѓународните проценки.
Обединетите нации(ОН) посочија на значително поголеми жртви, а Маи Сато, специјалниот известувач на ОН за човекови права во Иран, на 22 јануари изјави дека бројот на цивили убиени во репресијата би можел да надмине 20.000, според извештаи од лекарите.
Организацијата „Амнести интернешнл“ ги опиша убиствата како убиства од „невидени размери“.
Според „Тајм“, обемот на смртни случаи во текот на тие два дена - кога опозиционерите ги повикаа луѓето да се приклучат на протестите - ги преоптовари државните ресурси. Според извештаите, службениците останале без вреќи за тела, амбулантните возила не можеле да ги транспортираат мртвите, а властите прибегнале кон користење камиони со 18 тркала.
Овие проценки, според извештаите, се совпаѓаат со болничките податоци прегледани од д-р Амир Параста, германско-ирански очен хирург. Според него, проценките на лекарите и на други лица кои први реагирале покажува најмалку 30.304 смртни случаи од 23 јануари, бројка за која предупреди дека останува нецелосна.
Протестите избувнаа кон крајот на декември 2025 година, во услови на растечко јавно незадоволство поради економски тешкотии, зголемена инфлација и остриот пад на иранската валута, ријалот.
Првичните демонстрации поради трошоците за живот и лошо економско управување брзо се проширија во неколку градови и ескалираа во пошироки антирежимски протести, предизвикувајќи смртоносен одговор од безбедносните сили.
Бура во САД остави 230.000 луѓе без струја, откажани илјадници летови
Повеќе од 4.000 летови беа откажани во САД пред огромната зимска бура која веќе ја прекина електричната енергија на повеќе од 230.000 луѓе дури до Тексас на запад и се закани да ги парализира источните држави со обилни снежни врнежи, јави Ројтерс.
Метеролозите рекоа дека снег, замрзнат дожд и опасно ниски температури ќе ги зафатат источните две третини од земјата во недела и во деновите потоа.
Нарекувајќи ја бурата „историска“, американскиот претседател Доналд Трамп на 24 јануари одобри прогласување на федерална вонредна состојба за катастрофа во Јужна Каролина, Вирџинија, Тенеси, Џорџија, Северна Каролина, Мериленд, Арканзас, Кентаки, Луизијана, Мисисипи, Индијана и Западна Вирџинија.
„Ќе продолжиме да ги следиме и да останеме во контакт со сите држави на патот на оваа бура. Останете безбедни и стоплетени“, напиша Трамп.
Седумнаесет држави прогласија вонредна временска состојба, соопшти Министерството за внатрешна безбедност.
Бројот на прекини на струја продолжи да расте. До 2:44 часот наутро на 25 јануари, околу 230.000 американски граѓани немаа електрична енергија, поголемиот дел од нив во Луизијана, Мисисипи, Тексас, Тенеси и Ново Мексико.
Министерството за енергетика во саботата издаде итна наредба со која го овластува Советот за електрична сигурност на Тексас да распореди резервни ресурси за генерирање во центри за податоци и други големи објекти, со цел да се ограничат прекините на струја.
Националната метеоролошка служба предупреди за невообичаено експанзивна и долготрајна зимска бура што ќе донесе широко распространета, тешка акумулација на мраз на југоистокот, каде може да се очекуваат „оштетувачки до локално катастрофални влијанија“.
Повеќе од 4.000 летови во САД закажани за 24 јануари беа откажани, според интернет-страницата за следење летови FlightAware. Повеќе од 9.400 летови во САД првично закажани за недела, 25 јануари, исто така, беа откажани.
Главните американски авиокомпании ги предупредија патниците да бидат внимателни за ненадејни промени во распоредот и откажувања на летови.
Украина, Русија и САД се договорија за нови разговори следната недела во Абу Даби
Украина и Русија ги завршија дводневните директни разговори со посредство на Соединетите Американски Држави (САД) на 24 јануари и се согласија да одржат уште следната недела во Абу Даби, и откако Киев ја обвини Москва дека ги поткопува преговорите за завршување на војната со нови напади, јави АФП.
Украинскиот претседател Володимир Зеленски рече дека „многу се дискутирало и важно е разговорите да бидат конструктивни“.
Тој додаде дека следната рунда би можела да се одржи „уште следната недела“.
Во пресрет на вториот ден од разговорите, Русија почна напад со беспилотни летала и ракети врз Украина, исклучувајќи милиони луѓе од електрична енергија на температури под нулата.
Киев ја обвини Москва дека ги поткопува преговорите со уште една „ноќ на руски терор“.
Портпарол на владата на Обединетите Арапски Емирати (ОАЕ) рече дека разговорите, во кои учествувале врвни воени офицери од двете страни, се одржале во „конструктивна и позитивна атмосфера“.
Но, изморените жители на Киев, кои поминаа низ уште една бессона ноќ, имаат малку надеж.
„Тие само ќе кажат дека сè е во ред, дека повторно, ништо не е договорено и повторно ќе има ракети“, рече Анастасија Толкачов, која мораше да ја помине ноќта на паркинг.
Според портпаролот на ОАЕ, разговорите беа за „извонредни елементи од предложената мировна рамка од САД, како и мерките за градење доверба“.
Според Зеленски, „централниот фокус на дискусиите беа можните параметри за завршување на војната“.
Двете завојувани страни велат дека судбината на територијата во источниот регион Донбас е главното нерешено прашање во потрагата по решение.
Повеќе од милион луѓе во Киев и Чернигив останаа без струја ноќта меѓу 23 и 24 јануари на температури под нулата поради руските напади. Околу половина од станбените блокови во Киев беа исклучени од греење, соопштија украинските власти.
Европската унија, која испрати стотици генератори на електрична енергија во Украина, ја обвини Москва за „намерно лишување на цивилите од топлина“.
Зеленски минатата недела прогласи вонредна состојба во енергетскиот сектор, кој е погоден од неуморните руски напади врз снабдувањето со топлина и електрична енергија.
Руските и украинските преговарачи последен пат се сретнаа лице в лице во Истанбул минатото лето, во разговори што завршија само со договори за размена на заробени војници.
Средбата во Абу Даби беше првпат тие да се соочат еден со друг за да разговараат за планот на администрацијата на Трамп.
„Безбеден град“ в недела ќе се тестира во Тетово
Во Тетово утре ќе се тестира проектот „Безбеден град“ во чии рамки ќе се спроведуваат активности за калибрација и верификација на поставените камери за сообраќаен надзор, соопшти Секторот за внатрешни работи (СВР) - Тетово.
Поради тоа на локациите каде има камери привремено ќе биде запиран сообраќајот.
- Ги повикуваме граѓаните и сите учесници во сообраќајот да ги почитуваат привремените ограничувања, како и да покажат разбирање, трпение и соработка со цел непречено и безбедно реализирање на планираните активности“, соопшти СВР Тетово.
Тестирањето на камерите ќе биде од 8 часот до 20 часот, при што на секоја локација со поставена камера постапката ќе трае од 15 минути до 30 минути.
Главните аргументи на власта за овој проект се подигање на безбедноста и намалување на бројот на сообраќајки и жртви. Опозициските СДСМ и ДУИ не дадоа поддршка за законските измени за да стартува овој проект кои владејачкото мнозинство ги изгласа со 81 глас „за“ на седница на Собранието оддржана во петокот, 23 јануари.
Покрај за трите града – Скопје, Куманово и Тетово, опрема за „Безбеден град“ е поставена и во првичната фаза треба да почне да се имплементира и на коридорите 8 и 10.
Санкционирањето на почеток, како што е познато, ќе биде за четири сообраќајни прекршоци: непрописно паркирање; брзо возење, поминување на црвено и управување со возило со истечена регистрација.
Во записникот што го добиваат граѓаните преку линк добиен на СМС и електронска адреса (што ја оставил сопственикот при регистрација) пишува кој прекршок, кога и каде е направен, како и казната што треба да се плати.
Казната ќе може да се плати електронски, во пошта и во банка.
Ако сопственикот на возилото ја прифаќа во рок од осум дена ќе може да плати половина од казната.
СДСМ на Конгрес, Филипче порача дека партијата нема време за предавства
Критики кон власта, порака дека во СДСМ нема простор за внатрешни поделби и повик за мобилизација за подобар живот на граѓаните, упати Венко Филипче, претседател на опозицискиот Социјалдемократски сојуз на Македонија (СДСМ) од 31 Конгрес на партијата што се одржува на 24 јануари во Скопје.
Конгресот се одржува во услови на засилени внатрепартиски тензии и јавни критики кон Филипче од поранешни партиски функционери за лошите резултати на локалните избори во октомври 2025 и му бараат оставка.
ВМРО-ДПМНЕ, пак, оцени дека говорот бил „празен“, а дека Филипче е штетен за Македонија и за нејзините интереси.
Филипче рече дека оти имало турбуленции и разочарувања, но и дека владејачката ВМРО-ДПМНЕ сака контролирана опозиција во Македонија, што успеало со формирањето на партијата ЗНАМ.
Максим Димитриевски, лидер на ЗНАМ, се отцепи од СДСМ во 2021 година и формира партија.
На „оние кои мислат дека можат да седат на две столчиња - да бидат во СДСМ, да работат за власта или да формираат фракции“, Филипче им порача дека тоа време завршува.
„Денес ставаме точка на разединувањето. СДСМ не е пазар за пазарење функции. Кој сака да се бори рамо до рамо со нас, добредојден е. Кој планира да нѐ поткопува одвнатре, да биде тројански коњ на ВМРО - ДПМНЕ или на други интересни групи, нека си замине веднаш. Немаме време за предавства“, рече тој.
Претседателот на СДСМ ја обвини власта дека ветила гордост и реформи, а „донесе грабеж од епски размери“. Според него, државата е во дипломатска изолација, европскиот пат е блокиран и дека „наместо во периметарот на САД, со Мицкоски завршивме надвор од кружницата на Европа“.
„Ја откривме оската со Србија и Унгарија, сојузот со Орбан и Вучиќ, каде се застапуваат антиевропски и се поддржуваат про-руски ставови, што нѐ доведоа да сме на листата на САД со земји од третиот свет. Таа оска ги штити интересите на Москва на Балканот, со инвестиции што не врзуваат за авторитарните режими“, рече Филипче.
Тој кажа дека СДСМ ќе тропнe на секоја врата, но не за да молат за гласови, туку за да ја „разбудат“ Македонија.
„Јас бирам борба, искрена, силна и чесна. Затоа, другарки и другари, нема седење, нема пишување статуси на фејсбук од удобни фотелји. СДСМ е на терен, одиме во секој град, во секое село. Ќе им кажеме на луѓето за долгот од 2 милијарди евра, за новиот заем од 6 милијарди евра, ќе кажеме за изолацијата од Европа и од Америка, поради корупцијата и пљачката, за предавството на националните интереси и безбедност, за мигрантите. Нека слушнат добро во Белата палата и во Владата, мислеа дека сме на колена, мислеа дека сме готови. Штотуку почнавме, СДСМ се разбуди, а кога СДСМ е буден, тираните не спијат мирно“, рече Филипче.
Конгресот на СДСМ е отчетен за резултатите од локалните избори, се состои од отворен и од затворен дел. Отворениот дел беше говорот на Филипче, а во затворениот дел, генералниот секретар и шеф на изборниот штаб Александар Саша Димитријевиќ ќе го презентира извештајот за изборите. Планирано е да се гласа и доверба на Централниот и на Надзорниот одбор, како и да се направат статутарни измени за воспоставување нови дигитални платформи за комуникација со членството и со гласачите.
На локалните избори во октомври СДСМ освои шест градоначалнички места. Кандидатите на владејачката ВМРО-ДПМНЕ победија во 54 општини.
По поразот, оставки поднесе речиси целото раководство на СДСМ освен Филипче - потпретседателите, генералниот секретар, организациските секретари, како и сите членови на Извршниот одбор на СДСМ. Тогаш од СДСМ соопштија дека оставаат простор за ново поглавје и следува период на кадровско освежување и зајакнување на партијата.
ВМРО-ДПМНЕ, пак, го повика Филипче да објасни зошто СДСМ е петта партија во Скопје и трета во Македонија и, меѓу другото, го прозва дека не се оградил од „неговиот ментор Зоран Заев“.
„Не објасни зошто СДС сервираше услуги кон Бугарија и Грција, го наметна францускиот предлог, склучи штетен договор со Бугарија.
Не објасни зошто ги напаѓаат САД, се во политичка војна со Обединетото Кралство. Не се огради од Артан Груби и неговиот криминал во „Лотарија“. Филипче самиот исто така не изостанува од криминалниот синџир на тендери, не кажа од каде му е службеното луксузно „Ауди“ и каква е неговата врска со Енис Колашинац кој ЕСМ го снабдуваше со јаглен за време на власт на СДС, соопштија од ВМРО-ДПМНЕ.
Руски воздушен напад врз Украина остави над милион објекти без струја
Русија почна уште еден огромен напад врз енергетскиот систем на Украина во раните утрински часови во саботата, потресувајќи го Киев со експлозии во текот на ноќта и оставајќи 1,2 милиони објекти без струја низ целата земја, јави Ројтерс.
Речиси шест илјади згради во главниот град останаа без греење на 24 јануари утрото, бидејќи температурите се движеа околу -10 целзиусови степени. Становите на многу жители веќе беа ладни и од прекините во централизираниот систем за дистрибуција на топлина во градот по претходните напади.
Москва нападна додека трилатералните разговори меѓу Русија и Украина со посредство на САД, продолжија втор ден во Абу Даби, без знаци за компромис во петокот, на 23 јануари.
Градоначалникот на Киев, Виталиј Кличко, изјави дека едно лице е убиено а четворица се повредени, додека 19 лица, вклучувајќи едно дете, се ранети во Харков.
Русија, која ја напаѓа електроенергетската мрежа на Украина од нејзината целосна инвазија во 2022 година , ја спроведува својата
најсилна кампања на бомбардирање на енергетските објекти
оваа зима, оставајќи ги луѓето низ Украина само со неколку часа струја дневно, а некои без греење или без вода, според Ројтерс.
Повеќе од 800.000 луѓе во главниот град на Украина и уште 400.000 во северниот регион Чернигов останаа без струја по последните напади, изјави вицепремиерот Олексиј Кулеба.
Воздухопловните сили на Украина соопштија дека Русија во овој ноќен напад лансирала 375 беспилотни летала и 21 ракета, вклучувајќи две од нејзините балистички ракети „Циркон“.
Тимур Ткаченко, шеф на воената администрација на Киев, пријави напади во најмалку четири области. Меѓу оштетените згради беше и медицинска установа.
Пред саботата, Киев веќе претрпе два масовни напади преку ноќ по Нова Година, што ги прекинаа електричната енергија и греењето на стотици станбени згради.
Во Харков, честа цел на 30 км од руската граница и многу поблиску до источните бојни фронтови, градоначалникот Игор Терехов рече дека 25 беспилотни летала погодиле неколку области.
Сопственикот на швајцарскиот бар ослободен со кауција по смртоносниот пожар на Нова Година
Сопственикот на швајцарски бар кој беше зафатен од смртоносен пожар на Нова Година на 23 јануари беше ослободен од притвор со кауција, соопштија судските власти, предизвикувајќи гнев кај семејствата на жртвите и кај италијанската премиерка, јави Ројтерс.
Жак Морети и неговата сопруга Џесика се под истрага за убиство од небрежност и други кривични дела поврзани со пожарот во бар во Кран - Монтана на Нова година, во кој загинаа 40 лица и повеќе од 100 беа повредени, многу од нив тинејџери.
Многу од преживеаните сè уште се хоспитализирани со тешки изгореници во болниците низ Европа.
Жак Морети беше приведен на 9 јануари. Кауцијата за него е 200.000 швајцарски франци (253.485 долари) и налог за секој ден да се јавува во полициска станица, соопшти судот.
Италијанската премиерка Џорџа Мелони ја нарече одлуката за негово ослободување „навреда кон сеќавањето на жртвите од новогодишната трагедија и навреда кон нивните семејства, кои страдаат од загубата на своите најблиски“.
„Италијанската влада ќе бара одговори од швајцарските власти за тоа што се случило“, напиша таа на мрежата Икс.
Шестмина од загинатите беа Италијанци, како и десет од повредените.
Адвокатите на жртвите и нивните семејства, исто така, рекоа дека се обидуваат да ја разберат судската одлука и рекоа дека нивните клиенти се загрижени дека ќе исчезнат доказите.
„Моите клиенти забележуваат дека уште еднаш не е земен во предвид ризикот од исчезнување на доказите - ризик што многу ги загрижува и го загрозува интегритетот на постапката“, рече Ромен Џордан, швајцарски адвокат на повеќе од 20 семејства на жртви.
Сопствениците на барот изразија жалење поради трагедијата и рекоа дека ќе соработуваат со обвинителите.
„Џесика и Жак Морети ќе продолжат да ги исполнуваат сите барања на властите“, соопштија нивните адвокати по наредбата за ослободување.
Обвинителите рекоа дека ги испрашувале сопствениците на барот „Ле Констелејшн“ за безбедносни прашања и за реновирањата на објектот во две рочишта кои траеле повеќе од десет часа.
Обвинителите рекоа дека исто така, наредиле претреси, обезбедиле докази и заплениле средства.
Двајцата сопственици и менаџерите на ноќниот клуб се под истрага поради сомнение за сторени кривични дела вклучително и убиство од небрежност.
Мултимедија
Најпосетени
Што треба да знаете