Достапни линкови

Во Бразил бројот на починати поголем отколку во Италија


Илустрација - група доктори во Бразил кои работат со пациенти заразени од новиот коронавирус.

Бројот на починати во коронавирусот во Бразил го надмина бројот на жртви во Италија, додека во Мексико е регистриран рекорден број на заразени во еден ден во време кога лидерите во Латинска Америка ги олеснуваат мерките за забрани и повторно ги рестартираат економиите, јавува Ројтерс.

Овој дел од светот стана ново жариште на пандемијата на коронавирусот, а здравствените претставници преупредуваат дека економиите не треба да се отвораат премногу брзо за да се избегне поголемо собирање на луѓе.

Во Бразил во изминатите 24 часа забележани се 1.437 смртни случаи, што е нов рекорден број трет ден по ред. Заразени се над 30.925 луѓе, според податоците на бразилското Министерство за здравство.

Вкупниот број на жртви во оваа земја сега е 34.021, а повеќе починати од коронавирусот имаат само САД и Велика Британија.

Мексико регистрираше 816 нови смртни случаи, додека вкупниот број надмина 12.000.

Од почетокот на пандемиајта бразилскиот претседател Жаир Болсонаро ја намалува опасноста од пандемијата, критикувајќи ги мерките за социјално дистанцирање и апелира регионалните власти да ги укинат рестрикциите поради економијата.

Мексиканскиот претседател Андрес Мануел Лопез Обрадор предупреди на состојба на „психоза“ напоменувајќи дека во однос на вкупниот број на жители од 130 милиони луѓе, бројот на починати во Мексико е многу помал отколку во многу други земји.

Многумина во Латинска Америка живеат од заработки кои ги остваруваат од ден на ден во неформален економски сектор, па многу регионални лидери се подготвени да ги отворат локалните економии поради опасност од раст на глад и криза на јавните финансии, јавува Ројтерс.

XS
SM
MD
LG