Достапни линкови

Протестна нота од Србија за македонската поштенска марка со грешна карта на Хрватска


Архивска фотографија- министерот за надворешни работи на Србија Ивица Дачиќ

Српското Министерството за надворешни работи денеска му врачи протестна нота на амбасадорот на Република Северна Македонија во Белград, по повод печатењето и објавувањето на поштенска марка на која се наоѓа географска карта на фашистичката Независна држава Хрватска (НДХ), соопштија од министерството за надворешни работи на Србија.

Како што јави дописникот на МИА од Белград, српското МНР побара спорната поштенска марка веднаш да се повлече од оптек и нејзинот печатење и објавување да биде осудено од Владата на Република Северна Македонија, а во спротивно, Министерството за надворешни работи ќе преземе понатамошни чекори за да ги заштити интересите на Република Србија.

„Министерството за надворешни работи на Република Србија го искажува својот најостар протест против печатењето и објавувањето на поштенска марка со географска карта на фашистичката Независна држава Хрватска, во која се вклучени делови од Република Србија се до Белград, делови од Црна Гора и цела Босна и Херцеговина, а чие споменување евоцира спомени на граѓаните на Република Србија и на српскиот народ како целина во најтемниот период во поновата историја. Ваквите обиди за историски ревизионизам грубо ги нарушуваат билатералните односи меѓу Република Србија и Република Северна Македонија, како и соработката и стабилноста во целиот регион“, се наведува во протестната нота на српското МНР.

Во нотата се додава дека објавувањето на ова марка, на Денот на победата над фашизмот, се сфаќа како непријателска провокација насочена против територијалниот интегритет и суверенитет на Република Србија, како и навреда за целиот српски народ, кој во концентрационите логори на истата НДХ, страдаше со стотици илјади за време на Втората светска војна.

Министерството за надворешни работи на Република Србија бара спорната поштенска марка веднаш да се повлече од оптек, како и нејзиното печатење и објавување најостро да се осуди од страна на Владата на Република Северна Македонија.

Македонската пошта по грешка , издаде пригодната поштенската марка од серијата „Северна Македонија во ЕУ“ на која беше прикажана карта на Хрватска, во која спаѓаат и териториите на денешните Босна и Херцеговина, Србија и Црна Гора. Од акционерското друштво изразија жалење за пропустот, се извинија, најавија дека ја повлекуваат поштенската марка, а дека одлучиле да го разрешат раководителот на Бирото за филателија и Советот за поштенски марки.

XS
SM
MD
LG