Вести
Русија предупредува на милитантите од Авганистан
Шефот на руската Федерална служба за безбедност Александар Бортников изјави дека милитантите од екстремистичката група Исламска држава се собираат во северен Авганистан, во близина на границата со поранешните советски републики во Централна Азија.
Тој за време на посетата на Таџикистан, која се граничи со Авганистан, изрази загриженост за како што го нарече, прераспоредувањето на околу 5000 милитанти и повика на поголема контрола на границите.
Американската војска проценува дека има околу 2000 борци на Исламската држава во Авганистан.
види ги сите денешни вести
Најмалку деветмина загинати во судири пред американскиот конзулат во Карачи
Најмалку девет лица загинаа, а 32 се повредени во судири откако стотици пакистански шиитски муслимани, поддржувачи на Иран, разгневени поради смртта на иранскиот врховен водач ајатолах Али Хамнеи, упаднаа во американскиот конзулат во пакистанскиот град.
Организацијата на студенти Имамија (ИСО), студентско крило на шиитските политички и верски групи, се упати кон конзулатот на 1 март, еден ден откако Хамнеи загина во американските и израелските воздушни напади.
Демонстрантите ги скршија прозорците и вратите на конзулатот во обид да ја преземат зградата. Тие го пробија надворешниот безбедносен појас, но не и самата зграда, додека пакистанските безбедносни сили интервенираа, што резултираше со смрт на девет демонстранти, изјавија спасувачките служби за Пакистанскиот сервис на Радио Слободна Европа.
Официјалните лица наведоа дека ситуацијата во Карачи останува многу напната, додека полицијата се бори да ги задржи демонстрантите, чиј број се проценува на околу 1.500, подалеку од таа област. Друга група, за која се проценува дека е двојно побројна, е видена како се движи кон конзулатот по друг пат во градот. И таму се пријавени судири со безбедносните сили.
Извори од градската администрација изјавија за РСЕ дека војската може да биде повикана во градот доколку бројот на демонстранти продолжи да расте.
Слична ситуација имаше и во други градови низ Пакистан, со протести на шиитски муслимани во Пешавар, Лахор и главниот град Исламабад. Шиитските муслимани сочинуваат околу 20 проценти од населението.
Во Исламабад, стотици демонстранти се соочија со интензивно испалување солзавец од полицијата додека се обидуваа да стигнат до американската амбасада.
Друга група, која според официјалните лица, брои околу 1.000 луѓе, започна протести неколку километри од амбасадата.
„Ги следиме информациите за тековните демонстрации во американските генерални конзулати во Карачи и Лахор, како и повиците за дополнителни демонстрации пред американската амбасада во Исламабад и генералниот конзулат во Пешавар“, соопшти амбасадата во Исламабад во објава на платформата X (Икс).
Славење и тага по смртта на иранскиот врховен лидер
Во обид да ги задушат немирите, пакистанските власти го применија Членот 144, со кој се забрануваат јавни собири и носење оружје, заедно со други рестрикции.
Во Пешавар се собраа стотици шиитски демонстранти и членови на ИСО, а нивниот број расте. Организаторите изјавија за РСЕ дека планираат марш кон американскиот конзулат. Околу конзулатот се распоредени големи полициски сили, а оклопни возила патролираат низ делови од градот.
Шиитските верски и политички групи исто така започнаа протестно седење пред американскиот конзулат во Лахор. Околу илјада лица, меѓу кои жени и деца, учествуваат во протестот.
Полицијата постави барикади за да ја обезбеди главната порта на конзулатот.
Сѐ повеќе граѓани се обраќаат за помош по ситуацијата на Блискиот Исток
Се зголемува бројот на македонски државјани кои пријавуваат дека се затечени во загрозените подрачја, соопшти Министерството за надворешни работи и надворешна трговија по случувањата на Блискиот Исток.
Министерството информира дека со сите нив се одржува постојан контакт и се преземаат подготвителни активности за евентуална асистенција и нивна безбедна евакуација.
- Министерството за надворешни работи и надворешна трговија, преку дежурниот телефонски број и преку дипломатско-конзуларните претставништва, и понатаму останува целосно на располагање на граѓаните. Уште еднаш ги повикуваме сите наши државјани кои се наоѓаат во земјите од регионот доследно да ги почитуваат упатствата и насоките на локалните надлежни безбедносни органи, велат од Министерството.
Поради ситуацијата на Блискиот Исток, претходно во Министерството за надворешни работи и надворешна трговија вчера беше формиран кризен штаб кој е на 24 часовно располагање на граѓаните за сите информации.
За дополнителни информации и помош, на располагање се:
СОС дежурен телефон (МНРНТ):
075/273-732
Амбасада на Република Северна Македонија во Доха
Тел: +974 50 173 111
Амбасада на Република Северна Македонија во Абу Даби
Тел: +971 56 441 7532
Амбасада на Република Северна Македонија во Тел Авив
Тел: +972 54 500 8566
Тел: +972 54 967 0546.
Израел започна нови напади откако Трамп изјави дека Хамнеи е мртов
Израел, по извештаите за смртта на иранскиот врховен водач ајатолах Али Хамнеи, продолжи да бомбардира локации во Иран на вториот ден од масовниот заеднички напад на Тел Авив и Вашингтон врз Исламската Република.
Рано в недела немаше информации за понатамошни американски воздушни напади, откако претседателот Доналд Трамп ден порано изјави дека Вашингтон започнал „големи борбени операции“ против Иран, во еден од најголемите западни напади врз таа блискоисточна земја.
Трамп рече дека „тешкото и прецизно бомбардирање“ ќе продолжи во текот на неделата или можеби подолго.
Шефот на Пентагон, Пит Хегсет напиша на X (Икс) дека „иранскиот режим имал своја шанса, но одбил да склучи договор, и сега трпи последици“.
Ударите го доведоа регионот на работ, додека сирените за воздушна опасност се огласија низ целиот Блиски Исток поради одмаздничките удари на Техеран врз Израел и арапските земји каде се наоѓаат американски воени ресурси.
Откако американските и израелските бомби паднаа врз иранските градови, на улиците на Техеран и неколку други градови, според извештаите, се славеше откако Трамп изјави дека Хамнеи е убиен во американско-израелските напади.
„Хамнеи, еден од најлошите луѓе во историјата, мртов е“, напиша Трамп на Truth Social во сабота. Тој не обезбеди никакви докази кои би ја поткрепиле таа изјава.
„Ова не е правда само за народот на Иран, туку и за сите големи Американци и луѓе од многу земји ширум светот кои беа убиени или осакатени од Хамнеи и неговата банда крвожедни насилници“, додаде Трамп.
Техеран директно не коментираше за изјавата на Трамп, но претходно во саботата издаде неколку деманти по повеќе извештаи вклучително и тврдењата на израелскиот премиер Бенјамин Нетанјаху, кои сугерираат дека 86-годишниот Хамнеи е мртов.
Рано во недела, иранската новинска агенција Фарс која е блиска до Исламска револуционерна гарда (ИРГЦ), не одговори на тие извештаи, но наведе дека членови на семејството на Хамнеи биле убиени во израелските напади.
Претходно се појавија извештаи дека биле убиени снаата и зетот на врховниот водач, но иранските медиуми ја демантираа таа вест неколку часа подоцна.
Агенцијата Ројтерс цитираше сведоци кои рекоа дека имало славење во неколку градови вклучително во Техеран, Караџ, Шахавар и Исфахан.
Непроверени видео снимки исто така прикажаа „славење во Шираз и Абданан“, каде се слушаа сирени од автомобили кои носеа фотографии на некои од илјадниците демонстранти убиени при гасењето на антивладините протести во јануари.
Голем удар за режимот
Доколку се потврди дека Хамнеи е мртов, тоа би претставувало голем удар за ослабеното лидерство на таа земја.
Хамнеи имаше речиси диктаторски овластувања откако стана врховен водач во 1989 година по смртта на основачот на Исламската Република, ајатолах Рухола Хомеини.
Како врховен водач, Хамнеи беше гласен противник на обидите на било кои потенцијални умерени лидери да ги подобрат односите со Западот. Тој исто така беше мета на омраза од многумина во Иран кои беа гневни поради репресијата на теократскиот режим во Техеран.
Израелската армија соопшти дека погодила повеќе области во главниот град каде што се собрале високи официјални лица, како и дека погодила ирански локации за лансирање ракети, вкупно 500 цели, со околу 200 воени авиони кои учествувале во првите бранови.
Трамп и Нетанјаху изјавија дека извештаите укажуваат дека во воздушните напади загинале и неколку други лидери.
Израел соопшти дека меѓу загинатите се и високиот советник на Хамнеи, Али Шамкан, и Мохамед Папор, командант на Исламската револуционерна гарда (ИРГЦ).
Рано во недела, израелската армија соопшти дека завршила уште еден круг воздушни напади насочени кон балистички ракети и противвоздушната одбрана во централниот и западниот дел на Иран. Деталите засега не се достапни.
Американската армија која ја нарече кампањата „Операција Епски бес“, соопшти дека нема американски жртви на првиот ден од нападите и дека евентуалната штета на американските објекти во регионот што ги погоди Иран е „минимална и не влијае на операциите“.
Иран го возврати ударот во регионот
Техеран возврати напад врз Израел и седум други земји, вклучувајќи ги државите од Персискиот Залив каде се наоѓаат американски воени објекти.
Бахреин, во кој е сместена Петтата флота на американската морнарица – огромен центар за поморски активности на Блискиот Исток, соопшти дека бил погоден со ракетен напад, додека Катар соопшти дека ги соборил сите ракети насочени кон таа мала земја, која дејствуваше како посредник во американско-иранските преговори за нуклеарниот програм на Техеран.
Трамп му се закануваше на Иран со воени удари доколку не постигне договор за својот нуклеарен програм.
Западот се сомнева дека Техеран сака да изработи нуклеарно оружје, додека Иран наведува дека програмот има исклучиво цивилни цели. Преговорите не успеаја да доведат до напредок.
Иранската новинска агенција Мизан, која е поврзана со иранското правосудство, соопшти дека 108 лица загинале во напад врз училиште за девојчиња во Минабу, обвинувајќи го Израел.
Западните новинари немаа дозвола за пристап до локацијата и таа тврдење не можеше да се потврди.
Експлозии се пријавени на неколку локации во Израел откако Иран лансираше проектили кон својот разгневен непријател.
Израелската служба за вонредни ситуации соопшти дека 40-годишна жена загинала во областа на Тел Авив и дека најмалку 21 лице е повредено на други локации. Засега не е јасно дали експлозиите биле предизвикани од директни погодоци на иранските проектили или од остатоци откако проектилите биле соборени.
Советот за безбедност на ОН се состана во сабота по повод последното насилство, а генералниот секретар Антонио Гутереш повика на итен прекин на непријателствата.
Трамп објави дека Хамнеи е мртов по американско - израелските воздушни напади
Американскиот претседател Доналд Трамп на социјалните мрежи објави дека иранскиот врховен лидер, ајатолахот Али Хамнеи, е мртов, повикувајќи се на повеќе извештаи според кои 86-годишниот тврдокорен лидер бил убиен во американски и израелски воздушни напади.
„Хамнеи, еден од најзлите луѓе во историјата, е мртов“, напиша Трамп.
„Ова не е само правда за народот на Иран, туку и за сите големи Американци и за луѓето од многу земји ширум светот кои биле убиени или осакатени од Хамнеи и неговата банда крволочни насилници.“
„Тој не успеа да ги избегне нашите разузнавачки и високо софистицирани системи за следење и, во тесна соработка со Израел, немаше ништо што тој, или другите лидери кои беа убиени заедно со него, можеа да направат“, додаде Трамп.
До вечерта на 28 февруари немаше официјална потврда од Техеран за смртта на 86-годишниот врховен лидер на Иран — што, доколку е точно, би претставувало сериозен удар за веќе притиснатото иранско раководство.
Иран по американско- израелскиот напад
Хамнеи има речиси апсолутни овластувања во Иран откако стана врховен лидер во 1989 година, по смртта на основачот на Исламската Република, ајатолахот Рухолах Хомеини.
Ројтерс претходно го цитираше израелскиот премиер Бенјамин Нетанјаху, кој изјави дека постојат „знаци“ дека врховниот лидер бил убиен во нападите.
„Утрово го уништивме комплексот на тиранинот Хамнеи“, рече Нетанјаху во видео-обраќање.
„Постојат многу знаци дека овој тиранин повеќе не е жив. Утрово елиминиравме високи функционери од режимот на ајатоласите, команданти на Револуционерната гарда, високи личности од нуклеарната програма — и ќе продолжиме. Во наредните денови ќе погодиме уште илјадници цели на терористичкиот режим“, додаде Нетанјаху.
Седница на Советот за безбедност поради случувањата на Блискиот Исток
По извршените консултации претседателката, Гордана Сиљановска-Давкова за денеска (1-ви март) закажа седница на Советот за безбедност.
Како што соопштија од Кабинетот на претседателката Сиљановска - Давкова, седницата ќе започне во 18:00 часот во Вилата Водно, а на дневен ред ќе биде безбедносната состојба во земјава по најновите случувања на Блискиот Исток.
Советот за безбедност е највисокото советодавно тело во државата, коешто ги разгледува прашањата сврзани со безбедноста и одбраната на Републиката и дава предлози на Собранието и на Владата.
Претседател на Советот за безбедност е претседателката, Гордана Сиљановска Давкова.
Членови на Советот за безбедност се: претседателот на Собранието Африм Гаши, претседателот на Владата Христијан Мицкоски, министерот за внатрешни работи Панче Тошковски, министерот за одбрана Владо Мисајловски и Тимчо Муцунски, министер за надворешни работи и надворешна трговија, како и Џевдет Хајредини, Малинка Ристевска Јорданова, и Владо Спиридонов.
Согласно последниот развој на безбедносната состојба на Блискиот Исток, претходно, на 28 февруари, Министерството за надворешни работи и надворешна трговија формираше кризен штаб кој како што соопштија оттаму, континуирано ја следи состојбата и е достапен 24 часа дневно за сите потреби поврзани со помош, поддршка и асистенција на македонските државјани.
Иран по американско- израелскиот напад
Министерството апелира до сите македонски државјани кои се наоѓаат во погодените подрачја внимателно да ги следат официјалните известувања на надлежните институции и строго да постапуваат согласно безбедносните протоколи.
Воедно, се препорачува одложување на сите ненeопходни патувања кон земјите од овој регион сè до подобрување на безбедносната состојба.
-Министерството, со сите свои капацитети и преку дипломатско-конзуларните претставништва, останува целосно на располагање на македонските државјани и ќе продолжи навремено да ја информира јавноста за сите релевантни информации и понатамошни насоки, наведуваат од Министерството.
Воедно, ги потсетуваат нашите државјани дека во случај на потреба од помош или дополнителни информации можат да се обратат на следните контакти:
Министерство за надворешни работи и надворешна трговија, Тел: +389 75 273 732 / +389 75 268 736
Е-пошта: globalsos@mfa.gov.mk .
Од Министерството информираа и дека 11 македонски државјани досега побарале евакуација од Израел.
Иран во дигитален мрак поради блокирање на интернетот среде нападите
Во Иран е на сила „речиси целосен“ прекин на интернетот додека Соединети Американски Држави и Израел спроведуваат координирана кампања на воздушни напади низ земјата.
Според податоците на организацијата за мониторинг на интернетот НетБлокс, интернет-поврзаноста е падната на само четири проценти, што сериозно го ограничува протокот на информации додека воените операции се засилуваат.
Дигиталното исклучување започна набргу откако неколку ирански новински веб-страници, вклучително и официјалната новинска агенција ИРНА, објавија дека се цел на сајбер-напади.
НетБлокс наведува дека тековното нарушување на интернетот „соодветствува на мерките“ што ги презеде иранската влада за време на 12-дневниот судир со Израел минатиот јуни, што сугерира дека прекинот на интернетот е државен напор.
Воената операција, која американскиот претседател Доналд Трамп ја опиша како „големи борбени операции“, е започната заедно со Израел со цел да се демонтира иранската ракетна и нуклеарна инфраструктура.
Во видео-обраќање, Трамп изјави дека целта е да се елиминираат „непосредните закани“ за американскиот народ и сојузниците.
Нападите во Техеран се насочени кон највисоките нивоа на раководството на Исламската Република.
Проектилите наводно погодиле станбени комплекси на врховниот водач, ајатолахот Али Хамнеи, и на претседателот Масуд Пезешкијан во центарот на градот. Новинските агенции, повикувајќи се на информирани извори, наведуваат дека двајцата лидери се преместени на безбедни локации и дека се наоѓаат на сигурно.
МНР: Единаесет македонски граѓани побарале евакуација од Израел
Единаесет македонски државјани досега побарале евакуација од Израел, соопшти денеска (28 февруари) Министерството за надворешни работи и надворешна трговија.
- Согласно последните информации, воздушниот простор останува затворен најмалку до понеделник. По неговото повторно отворање ќе бидат разгледани можностите и моделите за организирање евентуална евакуација, во согласност со околностите и безбедносната состојба - информира Министерството.
Оттаму додаваат дека во оваа фаза,препораката до македонските државјани е внимателно да ги следат официјалните известувања на израелските власти, да постапуваат согласно безбедносните протоколи и да останат во засолништа кога тоа е наложено.
Во однос на дипломатско-конзуларните претставништва во Доха и Абу Даби, заклучно со овој момент ниту еден македонски државјанин нема побарано евакуација, велат од ресорното министерство.
Министерството за надворешни работи и надворешна трговија, преку амбасадите во Тел Авив, Доха и Абу Даби, како и преку дежурните служби, е во континуирана комуникација и целосно на располагање на македонските државјани за потребна помош и координација – се додава во соопштението.
Министерството апелираше и македонските државјани кои се наоѓаат на територијата на Државата Катар и Обединетите Арапски Емирати внимателно да ги следат официјалните информации и да постапуваат согласно упатствата на надлежните институции на земјите домаќини.
-Истовремено, апелираме до сите наши државјани да се воздржат од патувања кон земјите од овој регион сè до стабилизирање на безбедносната состојба – посочуваат од Министерството.
Согласно информациите добиени од Амбасадата на Република Северна Македонија во Тел Авив, воздушниот простор над Израел е затворен за цивилни летови до понатамошно известување.
Сите комерцијални влезни и излезни летови се суспендирани, без конкретна најава за обновување на редовниот воздушен сообраќај.
Македонските државјани во случај на потреба од помош може да се обратат во Амбасадата на Република Северна Македонија во Тел Авив на тел. броеви +972 54 500 8566 и +972 54 967 0546 или по е-пошта telaviv@mfa.gov.mk
Муцунски: Стоиме зад нашите американски сојузници во справувањето со заканите на Блискиот Исток
Ние стоиме зад нашите американски сојузници во справувањето со дестабилизирачките закани на Блискиот Исток, објави министерот за надворешни работи и надворешна трговија Тимчо Муцунски.
- Соединетите Американски Држави јасно ставија до знаење дека дипломатијата е секогаш првата опција, но одвраќањето останува од суштинско значење кога постојат веродостојни ризици. Безбедноста, стабилноста и одговорноста одат рака под рака, се наведува во објавата на Муцунски на платформата „Х“.
-Во исто време, нашите амбасади и конзуларни тимови низ целиот регион се активно вклучени и работат на поддршка и помош на нашите граѓани, обезбедувајќи ја нивната безбедност и обезбедувајќи ја целата потребна конзуларна помош, се додава во објавата на налогот на министерот Муцунски на социјалната платформа „Х“.
Претседателот на САД, Доналд Трамп, потврди дека САД започнале напади врз Иран во осумминутно видео објавено на неговиот профил на „Truth Social“.
Во видеото, Трамп потврди дека САД започнале „големи борбени операции“ против Иран. Тој исто така вели дека целта на кампањата е да се „заштити американскиот народ“ и да се елиминираат непосредните закани што ги претставува иранскиот режим, кој го нарече „злобна група многу ужасни луѓе“.
Блискиот Исток на раб на криза откако Трамп почна „голема борбена операција“ против Иран
Американскиот претседател Доналд Трамп соопшти дека Вашингтон започнал „големи борбени операции“ против Иран, ставајќи го Блискиот Исток на работ на ескалација, додека сирени за воздушна опасност одекнуваа низ регионот по одмаздничките напади од Техеран.
Во видео-обраќање објавено на социјалните мрежи, Трамп на 28 февруари изјави дека неговата цел при наредбата за бомбардирање на Иран — извршено во координација со израелските сили — била „да го заштити американскиот народ со елиминирање на непосредните закани од иранскиот режим“.
„Оваа изјава не ја давам лесно. Иранскиот режим има намера да убива“, рече Трамп во видеото со кое ја најави операцијата, именувана од Пентагон како „Епска фурија“.
„Животите на храбрите американски херои може да бидат загубени и можеме да имаме жртви — тоа често се случува во војна — но ова не го правиме за сегашноста. Го правиме за иднината, и тоа е благородна мисија.“
Иранската Исламска револуционерна гарда (ИРГЦ) одговори на американските и израелските напади со лансирање во неколку наврати дронови и балистички ракети кон Израел. Израелските одбранбени сили (ИДФ) соопштија дека операциите за пресретнување се во тек и подоцна информираа дека нови бранови ракети се насочени кон Израел.
Иран, исто така, истрела ракети кон цели во Абу Даби, Дубаи и Бахреин. Државните медиуми во Обединетите Арапски Емирати објавија дека едно лице загинало во Абу Даби, но без дополнителни детали.
Иранските медиуми јавија за експлозии во неколку градови, вклучувајќи ги Техеран, Табриз, Исфахан, Ком, Лорестан и Чабахар.
Видео и фотографии покажуваат најмалку еден голем облак од чад што се издига над главниот град.
Армија во движење: Американско распоредување поради тензиите со Иран
Трамп го обвини Техеран дека се обидува повторно да ја обнови својата нуклеарна програма, откако Соединетите Држави бомбардираа клучни објекти за време на 12-дневната војна меѓу Иран и Израел минатиот јуни. Тој рече дека САД имаат цел да ги уништат иранските ракетни капацитети и да ја „уништат“ неговата морнарица.
„Часот на вашата слобода е на дофат“, додаде Трамп, во очигледна порака до иранската јавност.
Трамп претходно вети дека „помошта е на пат“ за време на смртоносните јануарски протести против иранското свештеничко раководство, во кои, според извештаи, биле убиени илјадници луѓе. Техеран ги задуши немирите и ги обвини Соединетите Држави и Израел дека стојат зад нивната организација.
Нападите претставуваат драматична ескалација на тензиите на Блискиот Исток и речиси целосно ги уништуваат надежите за дипломатско решение меѓу Техеран и Вашингтон во врска со иранската нуклеарна програма.
Американски и ирански претставници одржаа нова рунда нуклеарни разговори со посредство на Оман во Женева на 26 февруари, што беше оценето како последен обид да се избегне голем воен конфликт меѓу двете страни.
Оманскиот министер за надворешни работи Бадр ал-Бусаиди, кој има долгогодишно искуство во посредување меѓу двете страни, изјави дека видел „значителен напредок“ и најави дека следната недела во Виена ќе се одржат технички разговори.
Тој рече дека е „разочаран“ од нападите врз Иран и дека тие го „поткопале“ мировниот процес.
„Преговорите меѓу Вашингтон и Техеран очигледно не се одвиваа онака како што Трамп би сакал“, изјави за РСЕ/РЛ Мајкл Хоровиц, независен одбранбен експерт со седиште во Израел.
„Дури и во однос на нуклеарното досие, Иранците не беа подготвени да попуштат во одредени аспекти што ќе му помогнеа на Трамп да го ‘продаде’ новиот договор како подобар од оној од кој се повлече за време на неговиот прв мандат. Јазот едноставно е преголем за да се премости преку разговори.“
Иран по американско- израелскиот напад
Експлозии најпрво беа пријавени во центарот на Техеран, а на социјалните мрежи се појавија фотографии и видеа на кои се гледаат облаци од чад што се издигаат над градот.
Новинската агенција Фарс, поврзана со Исламската револуционерна гарда (ИРГЦ), соопшти дека „неколку ракети“ ги погодиле улиците Данешгах (Универзитетска) и Џомхури (Република).
Засега нема информации за жртви. Агенцијата Тасним, која е блиска до ИРГЦ, објави дека иранскиот воздушен простор е затворен.
По нападот се огласија сирени низ Израел, а израелските одбранбени сили (ИДФ) соопштија дека им наложиле на жителите да останат во близина на заштитени простории.
Воените власти наведоа дека предупредувањето е превентивна мерка за да се подготви јавноста за можноста од одмазднички ракетен напад.
Први реакции на ЕУ по нападот врз Иран
Високата претставничка на Европската Унија за надворешни работи и безбедносна политика, Каја Калас, ги оцени настаните на Блискиот Исток како „опасни“ откако американските сили започнаа воени операции во Иран.
„Иранскиот режим уби илјадници луѓе. Неговите балистички ракетни и нуклеарни програми, заедно со поддршката на терористички групи, претставуваат сериозна закана за глобалната безбедност. ЕУ усвои силни санкции против Иран и ја поддржа дипломатската резолуција, вклучувајќи го и нуклеарното прашање“, објави Калас на платформата X (Икс).
Таа потврди дека разговарала со израелскиот министер за надворешни работи Гидеон Саар и со други министри од овој регион, како и дека ЕУ тесно координира со арапските партнери за да разгледа дипломатски решенија.
Калас потврди дека се повлекува неесенцијалниот европски персонал од овој регион со помош на конзуларната мрежа. Таа ја подвлече потребата од заштита на цивилите и предупреди дека меѓународното хуманитарно право мора да биде приоритет.
Шефицата на европската дипломатија потврди дека одбранбената операција за поморска безбедност под водство на ЕУ, под името ASPIDES, останува во состојба на висока подготвеност во Црвеното Море и е подготвена да помогне во одржувањето на отворен морски коридор.
Претседателот на Франција, Емануел Макрон пак, оцени дека нападите врз Иран носат сериозни последици за меѓународниот мир и безбедност. Тој потврди дека Франција свикала итен состанок на Советот за безбедност на Обединетите Нации.
„Тековната ескалација е опасна за сите. Мора да запре. Иранскиот режим мора да разбере дека повеќе нема друг избор освен да се вклучи во преговори со добра волја за да ги заврши своите нуклеарни и балистички програми, како и своите акции за регионална дестабилизација. Ова е апсолутно неопходно за безбедноста на сите на Блискиот исток“, порача францускиот претседател.
Експлозии во Катар и Бахреин
Експлозии и сирени за воздушна тревога се слушнаа во Доха, главниот град на Катар. Катарското министерство за одбрана соопшти дека „успешно одбиле низа напади насочени кон територијата на земјата“, пренесува Би-Би-Си повикувајќи се на државните медиуми.
Катар е домаќин на воздухопловната база Ал Удеид, најголемиот американски воен објект во регионот.
Освен во Катар, експлозии се слушнаа и во Бахреин. Нивниот комуникациски центар соопшти дека сервисниот центар на Петтата флота на американската морнарица бил „изложен на ракетен напад“, според изјава цитирана од државната Бахреинска новинска агенција (BNA).
Во Бахреин се наоѓа седиштето на Петтата флота, чија зона на одговорност ги опфаќа Заливот, Црвеното Море, Арапското Море и делови од Индискиот Океан.
Немаше непосреден коментар од американската војска, иако американската амбасада претходно ги предупредила граѓаните да побараат засолниште поради пријавени закани од ракети и дронови над Бахреин.
Напад врз училиште за кој извести Иран
Сè уште се нејасни деталите околу наводниот американско-израелски напад врз училиште за девојчиња во Минаб, на југот на Иран.
Иранските официјални лица и државните медиуми тврдат дека во нападот загинале 40–85 лица, претежно млади девојчиња, додека објавените снимки прикажуваат урнатини и расфрлани училишни ранци.
Иранскиот претседател Масуд Пезешкијан го осуди, како што наведе, „варварскиот чин“ кој „предизвикал длабока болка во срцата на иранската нација“.
Меѓутоа, на интернет се појавија и спротивни тврдења, главно од иранската опозиција, според кои нападот всушност бил погрешно испукана ракета на Корпус на исламската револуционерна гарда (ИРГЦ).
Според некои медиумски извештаи, во Минаб се наоѓа база на Корпус на исламската револуционерна гарда.
Снимката споделена на X (Икс), која наводно ги прикажува последиците од нападот, всушност ги прикажува последиците од нападот на талибанците врз воено училиште во Пешавар, во Пакистан, во 2014 година.
Стојаноски: Годинава ќе се зголеми бројот на лекови за ретки болести
Едукацијата е клучот за ретките болести. Некои од ретките болести се гледаат еднаш во кариерата, а некои ниеднаш - изјави денеска претседателот на Комисијата за ретки болести, проф. д-р Злате Стојаноски.
Во пресрет на Меѓународниот ден на ретките болести, 28-ми Февруари тој рече дека на овие болести мора да се мисли за да бидат ставени во диференцијалната дијагноза, да се назначат соодветни анализи и да може да се постави прецизна и точна дијагноза.
„Пациентите со ретки болести се пациенти зад кои стојат тивка борба и семејство. Тоа се лица, а не дијагнози. Ние сме свесни за борбата на секое семејство. Државите се ценат и се оценуваат за нивната зрелост врз база на тоа како се однесуваат со најранливите, во овој случај тоа се пациентите со ретки болести“, рече д-р Стојаноски.
Тој потенцираше и дека лековите се важни, но пред сè, важна е дијагнозата.
„Навремено поставена дијагноза значи навремено аплицирана терапија. Средно просечно во европските држави поставувањето дијагноза трае 11 години. Овие болести не се само професионален, стручен, лекарски предизвик, тие се голем економски предизвик и за многу побогатите држави од нас“, изјави Стојаноски пред почетокот на настaнот во Европската куќа во Скопје.
Претседателот на Комисијата за ретки болести, Стојаноски, информира дека минатиот месец на Клиниката за педијатрија било донесено две и пол месечно доенче, на кое педијатрите му дијагностицирале спинална мускулна атрофија.
„МАНУ работеше и во саботата и во неделата, а во понеделникот се потврди дијагнозата. Нашата комисија за ретки болести во вторникот ја одобри терапијата. Во четвртокот детето веќе е поставено на терапија, што значи тој процес од дијагноза до терапија траеше седум дена, а кој порано можеше да трае и многу подолго. Јас ветив дека Комисијата ќе се состане и на 1 јануари ако имаме дијагноза на спинална мускулна атрофија затоа што за оваа болест многу се важни времето на дијагноза и почетокот со терапија“, истакна Стојаноски.
Тој информира дека месецот на ретки болести го почнале на 1 февруари, а ќе заврши утре со објавување поштенска марка со дете со спинална мускулна атрофија.
Одговорајќи на новинарско прашање, Стојаноски рече дека науката ќе напредува и ќе имаме сè повеќе дијагнози. Ќе има нови болести, а со тоа и потреба од нови лекови.
Тој изјави дека регистарот за ретки болести е формиран во 2009 година, тогаш со два пациента и со 250.000 денари.
- Од 2009 година до вчера имаме 1.100 регистрирани пациенти во регистарот за ретки болести. Од нив, половина се мажи, половина жени. 260 од регистрираните се починати, 180 луѓе припаѓаат на една ретка болест, која е генетски детерминирана, тоа е цистична фиброза. Поради бројот на пациенти, застапеноста, нејзината честота ја предадовме на ФЗО, со кој имаме извонредна соработка - истакна Стојаноски.
Посочи дека за мал дел паценти со ретки болести нема терапија, некои од нив бараат само регистрација во регистарот, а некои не се кандидати за терапија.
Најави дека годинава ќе се зголеми бројот на лекови и од бараните 16 нови лека, ќе се вклучат 12.
Полицијата во Подгорица ја опколи зградата каде што живее братот на црногорскиот експретседател Мило Ѓукановиќ
Полицијата опколи зграда во центарот на Подгорица каде што живее бизнисменот Ацо Ѓукановиќ, брат на поранешниот црногорски претседател и премиер Мило Ѓукановиќ.
Радио-телевизија Црна Гора објави дека специјалните полициски единици ја опколиле зградата, бидејќи во тек е претрес на имотот што го користи Ацо Ѓукановиќ, објави Срна.
Во зградата за која станува збор се наоѓаат канцелариите на Прва банка, во која Ѓукановиќ е мнозински сопственик.
На крајот на 2006 година, Ацо Ѓукановиќ купи акции во Никшиќка банка, која една година подоцна го смени името во Прва банка Црна Гора.
Од почетокот на своето работење до распуштањето на Демократската партија на социјалистите (ДПС) во август 2020 година, банката имала депозити од државни компании, бројни министерства и други државни институции, локални самоуправи и бизнисмени кои биле блиски до тогашната владејачка партија.
Анализа на работењето на Прва банка е спроведена и во 2012 година од страна на Мрежата за истражување на организиран криминал и корупција, чии извештаи наведуваат низа наводно нелегални активности на банката, кои, како што наведуваат, се „детално опишани на илјадници страници тајни банкарски документи“ во посед на мрежата.
„Документите откриваат корупција, алчност и некомпетентност. При склучувањето на овие трансакции, банката не го почитувала Законот за спречување на перење пари, сопствените правила, ниту пак ја следела добрата банкарска пракса“, се додава во извештаите.
Во овие написи, меѓу другото, се наведува дека обвинетиот нарко-бос Дарко Шариќ бил „доверлив клиент кој им дошол на помош за време на кризата правејќи депозит од милион долари во време кога банката едвај ги исполнувала наредбите на депонентите“.
Конечната пресуда против Дарко Шариќ од 14 години затвор за шверц на 5,7 тони кокаин од Јужна Америка во Европа од 2006 до 2009 година во мај 2022 година го заврши судењето во еден од најголемите случаи на организиран криминал досега водени во Србија.
Според пресудата, Шариќ водел криминална организација на глобално ниво.