Вести
Сиљановска - Давкова: Пендаровски победи, ама јас не ја изгубив битката
Вечерва знам дека победи противкандидатот, но не мислам дека јас како кандидат на ВМРО-ДПМНЕ и како поединец ја загубив битката, рече Гордана Сиљановска Давкова на прес-конференција по вториот круг од претседателските избори.
„Велат дека ние жените приметуваме се. Ми велат дека сум се подмладила откако почна кампањата. Се подмладив од вас граѓаните. Денешниот ден ми личеше на Вивалди и „Четирите годишни времиња“. Да добиете 370.ооо е голема благодарност, а да станете позната по улиците како Гога е нешто ново во политиката во Македонија“, изјави Сиљановска - Давкова.
Таа додаде не се срами што учествувала во изборите и дека овие избори биле школо за неа и додаде дека би сакала политиката во Македонија да биде уметност, но, како што рече, тоа не е така, бидејќи „контингенти од гласовите во вториот круг се пренеле кај оние кои преговарале“ и тоа покажало дека политиката во Македонија се уште е рацете на партиите.
„Прашањето дали резултатот на победникот во однос на победениот води кон помирување или означува една поделба внатре во државата по повеќе основи, поделба која има карактер на интраетничка и прашање е дали синтагмата Одиме напред навистина го ветува тоа“, рече Сиљановска - Давкова.
види ги сите денешни вести
Швајцарскиот изведувач Немо е победник на Евровизија
Швајцарскиот изведувач Немо е победник на изборот за песна на Евровизија што се одржа на 11 мај во шведскиот град Малме. Со песната „Код“ (The Code) Немо освои вкупно 591 поен.
Второто место по бројот на гласови го зазеде хрватската претставничка Бејби Лазања со песната „Рим тим таги дим“ која беше фаворит на годинашното натпреварување за најдобра евровизиска песна.
Немо од Швајцарија ѝ ја донесе на земјата третата победа на Евровизија. Финалето на натпреварувањето остана во сенка на дисквалификацијата на репрезентативецот на Холандија, Јост Клајн, неколку часа пред почетокот на програмата, во која настапија претставници на 25 земји.
Финалето за песна на Евровизија беше обележано и со протест на десетици илјади пропалестински демонстранти кои излегоа на улиците на Малме за да протестираат против учеството на Израел на натпреварот.
Демонстрантите носеа транспаренти на кои пишуваше „Во Газа се убиваат деца“, „Стоп за геноцидот“ и „Палестина засекогаш“ и извикуваа „Слободна Палестина“.
Агенцијата АФП јави дека полицијата ги растерала демонстрантите собрани околу Арената во Малме, каде што се одржуваше финалето за песна на Евровизија.
Протестот беше организиран во услови на зголемени тензии во таа скандинавска земја поради учеството на Израел на Евровизија, во време кога Израел продолжува со нападите врз Појасот Газа, каде од почетокот на октомври минатата година беа убиени речиси 35.000 Палестинци.
Сиљановска-Давкова денеска ќе ја преземе функцијата претседателка на државата
Денеска точно напладне со свечена изјава во Собранието професорката Гордана Силјановска-Давкова и официјално ќе биде инаугурирана како претседателка на државата, откако победи во вториот круг претседателски избори во Северна Македодонија на 8 мај.
Со свечениот чин на положување заклетва почнува да тече нејзиниот петгодишен претседатлски мандат во вилата „Водно“, како шести претседател на Северна Македонија.
Силјановска-Давкова на функцијата ќе го наследи досегашниот претседател Стево Пендаровски, чиј мандат истекува денеска.
Инаугурацијата на новизбраната претседателка ќе биде во рамките на 151. Седница на Собранието, на која давањето свечена заклетва ќе биде единствената точка на дневниот ред.
По свеченоста во Собранието, според најавата, во Кабинетот на претседателот ќе се одржи официјална церемонија на примопредавање на функцијата претседател со највисоки државни и воени почести.
По церемонијата, новоизбраната претседателката Гордана Силјановска-Давкова и претседателот Стево Пендаровски, кој беше и нејзин противкандидат во трката за шеф на државата ќе имаат тет-а-тет средба.
Државната изборна комисија(ДИК) ги објави конечните резултати од изборите, соред кои Силјановска-Давкова победи со мнозинство од гласовите, односно 561. 000 глас, додека нејзиниот противкандидат, професорот Стево Пендаровски освои 251. 899 гласови.
По седницата, претседателот на ДИК, Александар Даштевски на Силјановска-Давкова ѝ го предаде уверението за избор на претседател на државата и во име на Комисијата ѝпосака успешен мандат.
Гордана Сиљановска Давкова, универзитетска професорка по уставно право и политички систем, е прва жена претседателка на Северна Македонија.
Денеска сончево време, со умерена облачност
Времето денеска претпладне ќе биде сончево со умерена облачност. Попладне претежно во северните и источните делови ќе има зголемена променлива облачност и услови за краткотраен пороен дожд и ретки грмежи, соопштиј од Управата за хидрометеролошки работи (УХМР).
Ќе дува слаб до умерен ветер од северен правец. Максималната температура ќе биде во интервал од 19 до 26 степени.
Во текот на ноќта времето беше малку до умерено облачно. Изутринава е сончево со мала до умерена облачност, а само во североисточниот дел има зголемена облачност која брзо се преместува кон југ. Понекаде дува слаб променлив ветер.
Во Скопје времето сончево со умерена облачност, а попладне во делови од котлината ќе има зголемена облачност со услови за краткотраен дожд. Ќе дува слаб до умерен ветер од северен правец. Максималната температура ќе достигне 24 степени.
Прва средба меѓу ВМРО-ДПМНЕ и „Вреди“, работни групи ќе преговараат за евентуална коалиција
Претставници на ВМРО-ДПМНЕ, предводени од партискиот претседател и мандатар Христијан Мицкоски и лидерите на коалицијата „Вреди“ на денешната средба ги договориле општите начела за соработка во идната влада.
Од ВМРО - ДПМНЕ соопштија дека соработката ќе се темели на три постулати: евроинтеграции, забрзан економски развој, борба против криминалот и корупцијата и владеење на правото.
„Заклучено е дека двете страни ќе формираат работни групи, на кое ниво ќе продолжат разговорите до нивно финализирање“, се вели во соопштението од ВМРО - ДПМНЕ.
Од страна на ВМРО-ДПМНЕ на средбата покрај Мицкоски биле присутни потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски.
Од страна на „Вреди“ биле Арбен Таравари, Изет Меџити, Биљал Касами и Африм Гаши.
Претходно, од „Вреди“ изјавија дека според нив, првичната средба и разговори оделе во позитивна насока.
Според Мицкоски, коалицијата „Вреди“ со резултатот од 107.000 гласови на парламентарните избори на 8 мај е кредибилиен партнер во идната Влада.
Но, Мицкоски има и друга математика - тој очекува до 28 мај(до кога треба да се конститурира Собранието) да консолидираат 61 пратеник. Некои избрани пратеници во Собранието, поединци од други коалиции, веќе пратиле „сигнали“ дека сакаат да се приклонат кон ВМРО-ДПМНЕ.
На тој начин, коалициите на ВМРО-ДПМНЕ и на „Вреди“ заедно би имале 74 или 75 пратеници во Собранието.
Според роковите во Уставот, Владата би требало да биде предложена најдоцна до крајот на јуни. Таа треба да биде изгласана со мнозинство од 61 пратеник од вкупно 120 пратеници во Собранието.
Ахмети тврди дека е потпишана заедничка декларација со челниците на „Вреди“ за уставни измени
Лидерот на коалицијата „Европски фронт“ и претседател на ДУИ, Али Ахмети на денешниот собир на претставниците и членството на коалицијата објави, како што рече, заедничка политичка декларација што, според него, заедно со лидерите на „Вреди“ ја потпишале на 13 јануари годинава, а во којатврди дека се обврзале да соработуваат само со политички чинители кои се согласни да ги спроведат уставните измени за вметнување на Бугарите во Уставот.
Според документот што го прочита Ахмети, потписници на декларацијата заедно со него, како што рече тој, се Арбен Таравари, Африм Гаши, Билал Касами и Изет Меџити, лидери на опозициските партии на Албанците здружени во коалицијата „Вреди“.
„Имајќи ја во предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ“,
стои во документот што го презентираше Ахмети.
„На 13 јануари заедно со господинот Таравари го потпишав овој договор. Ние сме многу рационални и сме убедени дека повеќе од било кога треба стабилност, мир, добри односи меѓу заедниците, потребни се нула проблеми со соседите и целосно членство во Европската унија“, рече Ахмети.
Во декларацијата меѓудругото се вели дека предложените уставни измени имаат создадени ситуација која бара внимателно разгледување, отворен дијалог и заедничка посветеност за изнаоѓање на трајно и сеопфатно решение.
– Во овој дух на единство и колективна одговорност jа претставуваме оваа заедничка политичка изјава, согледувајќи ја итноста и тежината на предизвиците со кои се соочува Северна Македонија, стои во договорот.
Ахмети го објави документот во ист дека кога мандатарот Христијан Мицкоски се сретна со лидерите на „Вреди“, со кои разговара за нивно учество во новата Влада на Северна Македонија.
Во предизборните програми и настапи, ВМРО-ДПМНЕ и „Вреди“ имаат различни ставови за уставните измени.
„Одложената примена на уставните измени претставува валидна алтернатива која е целосно во согласност со досегашната практика на сите држави, кои пред самиот чин на нивно пристапување во полноправно членство вообичаено ги прават неопходните или условени уставни измени, или во таа фаза истите влегуваат во сила“, пишува во програмата на ВМРО-ДПМНЕ.
Ставот на „Вреди“ беше дека Северна Македонија нема друга алтернатива за европскиот пат на Северна Македонија и дека измените во Уставот мора да се направат.
Северна Македонија ја одржа првата меѓувладина конференција со ЕУ, но за одржување на втората односно за отворање на кластерите во процесот на преговори, потребно е да се направат уставни измени со кои бугарската и други заедници ќе се внесат во Преамбулата од Уставот.
На 8 мај во Северна Макенија имаше парламентарни избори и втор круг избори за претседател на државата. По парламентарните избори, течат роковите да се формира новата Влада, чиј мандатар е Христијан Мицкоски, претседател на ВМРО - ДПМНЕ.
Повеќе од 150 лица загинаа во поплавите во северен Авганистан
Поплавите во северен Авганистан предизвикани од обилните сезонски дождови, оставија десетици мртви и повредени, соопштија претставници на владата предводена од Талибанците на 11 мај.
Портпаролот на Министерството за внатрешни работи изјави дека бројот на загинати се искачи на 151, што е речиси три пати повеќе од цифрата дадена од провинциски функционер еден ден претходно.
Портпаролот на Министерството, Абдул Матин Кани, изјави за „Ројтерс“ дека најмалку 135 лица се повредени.
Провинцијата Баглан е една од најтешко погодените области, но авганистанските власти на листата ги додадоа провинциите Бадакшан, Гор и Херат.
Портпаролот на талибанската влада Забихула Муџахид потврди дека покрај жртвите се забележани и големо пустошења и финансиски загуби.
Министерството за одбрана на Талибанците на 11 мај објави дека воздухопловните сили ги евакуираат заглавените жители во Баглан и дека некои од нив ги пренеле во воени болници.
Израел нареди нова евакуација во јужниот дел на Газа
Израел нареди нова евакуација во Рафа, јужна Газа, принудувајќи десетици илјади луѓе да се иселат додека се подготвува да ја прошири својата операција.
Израел најави дека се движи кон областите во северниот дел на Газа каде што Хамас, група која САД и Европската унија ја сметаат за терористичка, се прегрупирала.
Наредбата за евакуација доаѓа и покрај силното меѓународно противење и критики.
Американскиот претседател Џозеф Бајден изјави дека нема да му дава оружје на Израел за Рафа, а во петокот Соединетите Американски Држави(САД) објавија дека Израел во Газа можеби го прекршил меѓународното право за заштита на цивилите.
Обединетите нации(ОН) и другите агенции со недели предупредуваат дека израелскиот напад на Рафа, кој граничи со Египет, ќе им наштети на хуманитарните напори и ќе предизвика катастрофално зголемување на цивилните жртви.
Повеќе од 1,4 милиони Палестинци, или половина од населението на Газа, побараа засолниште во Рафа бегајќи од израелската офанзива.
Рафа се смета за последно прибежиште во Појасот Газа, а новите евакуации го принудуваат населението да се врати на север, кој беше уништен од претходните израелски напади. Хуманитарните агенции проценуваат дека 110.000 луѓе биле евакуирани пред саботната наредба.
Агенцијата на Обединетите нации за помош и работа за Газа соопшти дека околу 300.000 луѓе се погодени од наредбите за евакуација, но бројките би можеле да бидат поголеми бидејќи станува збор за густо населени области, пренесе „Асошиејтед Прес“.
Израелските војници окупираа и дел од граничниот премин Рафа меѓу Газа и Египет, принудувајќи го да се затвори, а тој беше главната влезна точка за гориво.
Хуманитарните организации предупредија дека горивото исто така наскоро ќе се потроши, што ќе ги принуди болниците да престанат со работа.
Борбите не престануваат и во северниот дел на Газа, каде што се чини дека Хамас уште еднаш се прегрупира.
Северна Газа беше првата цел на копнената офанзива, а Израел на крајот на минатата година објави дека во голема мера го уништил Хамас во таа област.
Војната во Појасот Газа почна откако милитантите од Хамас, група која САД и Европската унија ја сметаат за терористичка група, го нападнаа Израел на 7 октомври 2023 година, убивајќи околу 1.200 луѓе.
Во таа прилика милитантите киднапирале 252 лица, од кои 128 се заложници во Газа, а 36 се прогласени за мртви, според последните израелски податоци.
Сиљановска-Давкова го доби Уверението од ДИК за нова претседателка
Гордана Сиљановска-Давкова до добивањето на Уверението за избор на претседател на државата од Државната изборна комисија, во изјава за МИА кажа дека до членовите на ДИК ги пренела заклучоците од набљудувачката мисија и Парламентарното Собрание на ОБСЕ.
„Уверението секогаш претходи на прогласувањето што ќе се случи утре во Собранието за изборот за претседател на државата. Формална круна или формално финале на изборите. Јас со должно внимание им се заблагодарив на членовите на Државната изборна комисија, им го кажав она што го чув и од набљудувачката мисија и на Парламентарното Собрание на ОБСЕ, дека се задоволни од нивната работа, дека имало инциденти, меѓутоа и во поглед на роковите и во поглед на постапувањето дека Државната изборна комисија ја спровела работата согласно законот“, изјави Сиљановска-Давкова.
Таа потенцираше дека досега не сме чуле формулацијата „фер и демократски“ е израз долгоочекуван да се чуе од ОБСЕ и ОДИХР.
Уверението на Сиљановска - Давкова ѝ го врачи претседателот на ДИК, Александар Даштевски откако претходно ДИК на седница објави конечност на изборните резултати и констатираше дека таа е избрана за претседател со мнозинство гласови од избирачите кои гласале. Сиљановска - Давкова освои 561.000 гласови, наспроти нејзиниот противкандидат Стево Пендаровски за кого гласале 251.899 избирачи.
ДИК треба да достави извештај за резултатите до Собранието за да биде закажана седница за инаугурација на новата претседателка која ќе се одржи утре напладне.
Универзитетската професорка Гордана Сиљановска - Давкова ќе биде шестиот претседател на Северна Македонија и прва жена која е избрана на оваа позиција.
Туск: Полска нема да штеди на зајакнување на источната граница
Полскиот премиер Доналд Туск изјави дека зајакнувањето на полската граница е започнато, нагласувајќи дека неговата земја нема да штеди пари за тоа, како и дека самата Европска унија ќе мора да инвестира во безбедноста на својата источна граница.
„Нема сомнеж за се поагресивните намери на Белорусија кон Полска. Преземаме чекори за зајакнување на границата поради зголемениот притисок на режимот на Александар Лукашенко и зголемените закани од војната поради руската агресија во Украина“ рече Туск на 11 мај.
По разговорот со претставниците на граничната стража, армијата и полицијата, во градот Каракула на границата со Белорусија, полскиот премиер рече дека Европа ќе мора да инвестира во својата надворешна граница во Полска, бидејќи тоа е „инвестиција и во европската безбедност“.
„Како што рековме дека нема да штедиме на оружје и армиска опрема, нема да штедиме на обезбедување на границата, не само кога станува збор за инфраструктурата, туку и за опремата за секој војник“, рече Туск.
Полскиот премиер предупреди дека се засилува притисокот на илегалната миграција од Белорусија, која како дел од хибридната војна против Полска ја организира режимот на таа соседна земја.
„Се зголемуваат обидите за илегално преминување на границата, како што очекувавме“, рече Туск.
Туск вети дека неговата влада ќе подготви измени на законот со цел граничарите, војниците и полицајците да имаат чувство на правна сигурност.
Полскиот министер за одбрана Владислав Кошњак-Камиш претходно оваа недела рече дека земјата треба да има план за изградба на систем на „ровови и бункери“ на источната граница.
Белорусија, најблискиот сојузник на Русија, забележа влошување на односите со нејзините западни соседи и Украина во последниве години, особено откако Москва ја искористи белоруската територија како база за нејзината инвазија на Украина во февруари 2022 година.
Белорускиот лидер Лукашенко ја поддржа руската инвазија на Украина и им дозволи на руските вооружени сили да користат воена инфраструктура и воздушен простор за време на инвазијата.
САД најавија пакет помош за Украина вреден 400 милиони долари
Соединетите Американски Држави(САД) најавија нов пакет воена помош од 400 милиони долари за Украина, додека Киев се бори да го запре напредувањето на руските трупи во североисточниот регион Харков.
Ова е трета транша од помошта за Украина откако американскиот Конгрес одобри дополнително финансирање на крајот на април, што вклучува 61 милијарда долари помош за Украина, по неколку месеци застој.
Украинскиот претседател Володимир Зеленски предупреди еден ден претходно дека неговата земја се соочува со тешка ситуација во источните региони, но рече дека пристигнува ново снабдување со американско оружје и дека руските напади може да се запрат.
По повеќе од две години инвазија, Москва зема замав на бојното поле, а Украина се соочува со недостиг од работна сила и резерви на артилериски гранати и противвоздушни ракети.
На 10 мај, руските сили започнаа копнен напад со оклопни возила на североисточниот регион Харков во Украина, напредувајќи еден километар во близина на пограничниот град Вовчанск.
Украина ги истера руските војници од поголемиот дел од регионот Харков во 2022 година, првата година од војната, но откако издржаа контраофанзива од Киев минатата година, руските сили се вратија во офанзива и полека напредуваат во регионот на Доњецк.
Стравувањата се зголемија во март во врска со намерите на Кремљ кон регионот Харков, кога рускиот претседател Владимир Путин повика на создавање тампон зона внатре во украинската територија, за која рече дека е потребна за заштита на Русија.
Оттогаш, Харков, кој е особено ранлив поради неговата близина до Русија, е цел на воздушни напади кои предизвикаа голема штета на енергетската инфраструктура во регионот.
Мултимедија
Најпосетени
Што треба да знаете