Достапни линкови

Грција бара отстранување на античко грчките симболи и картите на Голема Македонија од учебниците


Графит во Скопје: Картата на Голема Македонија и Сонцето од Вергина

Наставниците и професорите во предавањата да избегнуваат материјали што содржат иредентизам, од учебниците да се исфрлат античко грчките симболи и картите на Голема Македонија, биле трите барања на грчката страна на состанокот со колегите експерти од нашата земја, брифираат официјални грчки дипломатски извори, јави дописничката на МИА од Атина.

Првата средба на Заедничкиот интердисциплинарен комитет на експерти од Македонија и Грција за историски, археолошки и образовни прашања одржан во ноември во Солун поминал во многу позитивна клима, а грчките дипломатски извори велат дека македонските експерти на чело со поранешниот амбасадор Виктор Габер „беа во рамки на климата што е одредена од потпишувањето на договорот од двете држави и јасно ги обврзува земјите да не постојат иредентистички и ревизионистички аспирации во книгите”.

Втората средба ќе се одржи во текот на овој месец во Македонија, а на првиот состанок откако членовите на комитетот се договориле за правилата за водење на разговорите и процедурите, грчката страна на маса поставила три прашања.

Додаваат дека по првичниот договор и откако ќе се обезбедат трите барања ќе започне ред по ред ревизијата на учебниците.

Истите извори велат дека македонската страна немала конкретни барања од грчките колеги, „бидејќи грчките книги не содржат иредентизам, затоа што не е замисливо земја членка на ЕУ да има такво нешто во книгите“.

Грчките дипломатски извори, јави дописничката на МИА од Атина, потенцираат дека Грција самоиницијативно ќе направи промена во нивните карти за да ги усогласат со меѓународните правила, па наместо како досега за градот Битола да пишува Монастири како што е на грчки, ќе треба да стои Битола (Монастири) или за бугарскиот град Пловдив да пишува Пловдив (Филипуполи), а не само Филипуполи како што е сега.

Целта, според грчките дипломатски извори е книгите од следната година да бидат ослободени од иредентизам. Велат дека и да не постоеше конкретниот член во Договорот од Преспа, ревизијата ќе беше дел од поглавјата за членство во унијата.

XS
SM
MD
LG