Достапни линкови

Притвор од 30 дена за поранешниот директор на УБК Атанасовски


Собрание на Македонија. 27.04.2017.

Судија на претходна постапка му одреди триесетдневен притвор на поранешниот директор на Управата за безбедност и контраразузнавање – УБК, Владимир Атанасовски, поради инволвираност во настаните од 27 април во Собранието на Македонија. Притворот му е одреден на предлог на обвинителството. Атанасовски синоќа бил приведен и однесен на распит во Кривичниот суд. Обвинителството за организиран криминал и корупција побарало притвор врз три основи: опасност од бегство, влијание врз сведоци и опасност од повторување на кривичното дело. Атанасовски беше посочен од обвинетите за „27 април“ Стефан и Михаил Младеновски и од Захарие Симовски, како еден од организаторите на упадот во Собранието и како нарачател на насилства врз припадници на тогашната опозиција. Владимир Атанасовски беше назначен за директор на УБК во септември 2016 година по оставката на Сашо Мијалков. На директорското место во тајната полиција остана до јуни 2017 година. Атанасовски досега не беше опфатен со истрагата и судската постапка за настаните од 27 април.

XS
SM
MD
LG