Вести
Виена е можна локација за средба меѓу Путин и Трамп
Виена е еден од градовите каде е можно да биде остварена средба меѓу рускиот претседател Владимир Путин и америкаснкиот претседател Доналд Трамп, соопшти Кремљ.
Портпаролот на Кремљ Дмитриј Песков денеска пред новинарите изјави дека Путин и Трамп дискутирале за изгледите на нивната средба во телефонскиот разговор во март и зборувале за локациите и можноста тоа да биде австрискиот главен град.
Трамп во март рече дека двајцата лидери наскоро ќе се сретнат, но оттогаш врските меѓу Вашингтон и Москва дополнително се влошија поради конфликтот во Сирија и туењето на поранешниот руски шпион во Британија, за кое Западот ја обвини Москва.
види ги сите денешни вести
Мицкоски: Ова е победа на Македонија, Владата ќе се формира во најкраток рок
Ова е историска победа на Македонија и на народот во Македонија, оцени Христијан Мицкоски, претседател на ВМРО-ДПМНЕ, во обраќањето по денешните парламентарни и претседателски избори и најави декановата Влада ќе се формира во најкраток можен рок и во транспарентен процес.
„Победи Македонија која е на Македонците, Албанците, Турците, Ромите, Србите, Бошњаците, на гордиот народ кој покажа решителност и смиреност. Падна Владата во Македонија. Има причина за тоа. Криминалот, корупцијата, неспособноста, лажните вредности, одземената држава, тендерите, непотизмот и уште стотина други последици кои направија државата да страда, а народот да е разочаран“, рече Мицкоски.
Тој кажа дека е поразен и бојкотот од ДУИ, со што „народот покажа дека нема да дозволи поединци да создаваат кризи и преку институции да се штитат себе“.
„Време да одат задно со СДСМ во опозиција. Народот ја одржа најважната лекција кон власта и си ја спаси државата. Вечерва се покажа дека нема македонија на ДУИ, на СДСМ, на ВМРО-ДПМНЕ, нема лева или десна, источна или западна Македонија. Има само една единствена и вечна, независна, слободна Македонија“, рече Мицкоски.
Тој кажа дека резултатите од работата ќе се почувствуваат уште во првите сто дена од формирањето на владата и најави силен инвестициски пакет кој ќе ја поттикне економијата.
Мицкоски се обрати и до членството и идните функционери од коалицијата предводена од ВМРО-ДПМНЕ.
„Народот покажа дека ничија свеќа не гори до зори и порано или подоцна следува одговорност. Да го запомниме тоа затоа што од судот на народот никој не избегал, како ни од судот на Бога. Не ги заборавјте овие луѓе, оставете бел образ, бидете одговорни и чесни. Паметните учат од туѓуте грешки, немој ни на крај памет да ви падне да го потцените мудриот народ на Македонија. Имаме причина да се радуваме, да сме задоволни и длабоко благодарни, но и лекција да не влегуваме во еуфорија, ароганција и самобендисаност“, рече Мицкоски.
Лидерот на ВМРО-ДПМНЕ порача дека на земјава ѝ е потребна силна опозиција и рамнотежа во политиката. Најави дека ќе разговара и со сите опозициски партии што учествуваа на изборите и да видат што може да биде заедничка точка на поврзување.
По обраќањето, Мицкоски ги повика граѓаните на заедничка прослава на плоштадот „Македонија“ во Скопје и на плоштадите во другите градови.
Претходно, претседателот на СДСМ, Димитар Ковачевски и претседателскиот кандидат Стево Пендаровски им ја честитаа победата на ВМРО-ДПМНЕ и на претседателската кандидатка на оваа партија, Гордана Сиљановска-Давкова.
Во Северна Македонија денеска (8 мај) се одржуваат седми претседателски и единаесетти парламентарни избори.
Познат идниот состав на Парламентот
Од обработени 94.5 процент на гласовите Државната изборна комисија (ДИК) го објави распоредот на мандатите по партии и коалиции во идниот состав на македонското собрание. Така коалицијата предводена од ВМРО ДПМНЕ освоила вкупно 59 пратенички места и има убедливо водство пред останатите.
Следна е коалицијата на СДСМ и тоа со освоени 19 пратенички места, Европскиот фронт на ДУИ има освоено 18 мандати, коалицијата Вреди има освоено 13 пратенички места, Левица освоила 6 пратенички места и Знам е последна со 5.
По изборни единици распоредот на силите е следен:
ИЕ 1: ВМРО ДПМНЕ - 10, СДСМ – 3, Европски фронт – 2, Левица 2, Влен – 2, Знам – 1
ИЕ2: ВМРО ДПМНЕ – 9, Европски фронт - 4, Влен – 3, СДСМ – 2, Левица – 1, Знам – 1
ИЕ3: ВМРО ДПМНЕ – 14, СДСМ – 4, Левица -1, Знам - 1
ИЕ4: ВМРО ДПМНЕ – 13, СДСМ – 5 , Левица – 1, Знам – 1
ИЕ5: ВМРО ДПМНЕ – 10, СДСМ – 4, Европски фронт – 3, Левица – 1, Влен – 1, Знам – 1
ИЕ6: Европски фронт – 9, Влен – 7, ВМРО ДПМНЕ – 3, СДСМ – 1
Претседателот на ДИк, Александар Даштевски рече дека не очекува промени бидејќи се работи за мал процент необработени гласови.
Ковачевски: Резултатот е разочарувачки, повикувам на нови внатрешни избори во СДСМ
Денешниот резултат е разочарувачки. На СДСМ му е зададен тежок удар. Не само од граѓаните, туку и од симпатизерите и од поддржувачите на партијата, рече Димитар Ковачевски, претседател на СДСМ, на првата прес-конференција по затворањето на гласачките места на парламентарните и втор круг претседателски избори во Северна Македонија.
Тој ја честита победата на ВМРО-ДПМНЕ и на нивната претседателска кандидатка Гордана Сиљановска-Давкова, кои според првичните резултати се во водство пред СДСМ и претседателскиот кандидат Стево Пендаровски.
„Ја честитам победата на нашиот политички конкурент ВМРО-ДПМНЕ и нејзиниот претседател Христијан Мицкоски. Го честитам изборот на Гордана Сиљановска-Давкова за претседател на Републиката и се надевам и посакувам дека функцијата ќе ја извршува во согласност со дадените уставни овластувања и евроатланската посветеност на државата“, рече Ковачевски.
Тој кажа дека поддржувачите на СДСМ излегоа на изборите и придонесоа да се постигне цензусот, иако најлесно било да не го мобилизираат членството за гласање на претседателските избори.
Ковачевски повика на внатрешни избори сите органи и тела на СДСМ, на централно и локално ниво, почнувајќи од претседателот на партијата. Ќе биде свикан отчетен Конгрес на кој ќе се разгледаат причините за изборниот резултат и работењето на партијата во последните четири години.
Тој зборуваше и за „дефектите на системот што ја јаде и разорува државата и мора конечно да се промени“.
„Не се сомневам дека многу граѓани вечерва чувствуваат страв - страв од прекумерната моќ што ја има партија која е позната по злоупотребата на моќта. СДСМ мора да биде одговорна и државничка опозиција. Вистината со која живеам веќе две години е дека актуелниот систем во кој живееме види повеќе сметка за ПР отколку за суштината. И граѓаните со право не веруваат веќе во ништо. Корупцијата на секое ниво, личните интереси, долгата европска интеграција, нискиот просечен раст на економијата од само 1,9 отсто во минатите 30 години, непотизмот, клиентелизмот, бизнис интересите, етничкиот професионализам.. “, рече Ковачевски.
Тој рече дека местото на Македонија е во НАТО и во Европската унија.
„Ги предупредувам сите кои мислат дека денешното гласање било против Европа или ќе се обидат да ја искористат можноста да го спречат природниот пат на Македонија кој води до ЕУ, блокирањето на тој пат, не само што ќе донесе голем пад на животниот стандард туку ќе ги зголеми етничките тензии и ќе не изложи на безбедносен ризик кој никој од нас не може да разбере колку може да биде голем. За земја како Македонија нема средина, нема играње на две столчиња, тоа е или напред или назад“, рече Ковачевски.
Во Северна Македонија денеска (8 мај) се одржуваат седми претседателски и единаесетти парламентарни избори.
Сиљановска-Давкова: Ќе бидам претседател на сите граѓани
Кандидатката за претседател на државата предложена од ВМРО ДПМНЕ, Гордана Сиљановска Давкова на првата прес конференција после првичните резултати кои се во нејзина полза рече дека македонските граѓани се одважија да излезат стамено, достоинствено и гордо да го дадат гласот на оној кој што го сакаат. Според неа да повикувате на бојкот с е партиски притисок. Таа според првичните резултати има двојно поголема предност пред нејзиниот противкандидат на претседателските избори Стево Пендаровски кој веќе призна пораз.
Посочи дека ќе биде претседател на сите граѓани и дека почнува промена која ќе ја донесе жена претседател.
„Јас тврдам дека од овој момент овде јас ке се однесувам како претседателка на сите грагани, на сите етнички групи, на членови на партии, на оние кои не се во партии бидејќи не може еден претседател особено не ако е жена да обединува, да трага по единство ако држи партиски линии“, рече Сиљановска Давкова.
Се согласи со Пендаровски во критиката на бојкотот и на обидот да се киднапира гласачкото право на граѓаните за што рече дека е добра констатација. Не се согласувам со тезата дека гласовите сум ги добила со набој на национализам. Упати порака дека ќе соработува со соседите и дека не е време за ставање вето.
„Да се обидеме да ставиме крај на балканизацијата, да се обидеме да си помагаме едни на други и да бидеме политичари. Ние мораме да почнеме меѓу себе да се разбираме, да се помагаме, да не посегаме по вето туку да посегаме по поддршка. Моите патишта прво водат на Балканот, а се разбира Брисел тука е неизоставен“, рече Сиљановска Давкова
И честиташе на Државната изборна комисија и администрацијата за добро спроведените фер и демократски избори.
Пендаровски им честита на победниците на изборите
Стево Пендаровски, актуелен претседател на Северна Македонија и кандидат за втор мандат во вториот круг на претседателските избори, го призна поразот на двојните, претседателски и парламентарни избори на 8 мај.
„Резултатите се јасни и немам намера подетално да ги образложувам. Согласно резултатите што ги водовме досега, сакам да им честитам на победниците и да им посакам успешна работа во следните четири години, односно пет години“, рече Пендаровски во првото отворање по затворањето на гласачкото место.
Тој рече дека неговиот концепт „за мултиетничка Македонија, целосно интегрирана во евроатланските структури, денес за жал не доби мнозинска поддршка.
„Јас сум длабоко убеден дека само така Македонија може да биде демократска и просперитетна држава. Затоа мојата совест е мирна. Не сум сигурен дека совеста е мирна на оние кои не дозволија на граѓаните да го земат второто ливче и да гласаат на претседателските избори денеска“, рече Пендаровски.
На прашање дали смета дека неговиот пораз на изборите е поради политиките на СДСМ, Пендаровски одговори:
„Долги месеци пред да ја најавам втората кандидатура реков дека е важно да имате партиска поддршка, бидејќи живееме во држава која е силно партизирана. Ми беше важно да видам во каква кондиција ќе биде коалицијата. Уште пред Нова година знаев дека не се во онаа кондиција којашто биле пред пет години. Меѓутоа анкетите покажуваа дека мојот личен рејтинг е над партијата и над таа коалиција, а тоа ми даде надеж да се надевам повторно да бидам реизбран“, рече Пендаровски.
Пендаровски кажа дека ќе се врати да предава како професор на факултет каде што беше и претходно, пред да биде избран за претседател во 2019 година.
Во Северна Македонија денеска (8 мај) се одржуваат седми претседателски и единаесетти парламентарни избори.
Затвореници во Украина ќе служат војска
Украинскиот парламент одобри нацрт-закон со кој ќе се овозможи одредени категории затвореници да служат во вооружените сили на Украина во одбрана од руската инвазија.
Законот беше усвоен по второто читање на 8 мај и беше поддржан од 279 од вкупно 450 пратеници.
Предлог-законот треба да биде потпишан од претседателот на Украина, Володимир Зеленски, кој ја поддржа идејата.
Руската војска, исто така, регрутирала потенцијални војници од своите затвори да служат во Украина во замена за имунитет.
Олена Шулјак, шефот на партијата на украинскиот претседател, во објава на Фејсбук напиша дека нацрт-законот отвора можност одредени категории затвореници кои изразиле желба да ја бранат својата земја да се приклучат на одбранбените сили.
Таа рече дека воената служба ќе биде доброволна, а некои затвореници ќе бидат исклучени, вклучително и оние кои се осудени за одредени кривични дела како што се убиство на две или повеќе лица, сексуално насилство и сериозна корупција.
Во април Украина усвои закон за воена мобилизација со цел да го зголеми бројот на војници во војската.
Тој закон ги обврзува Украинците, на возраст меѓу 18 и 60 години, да ги информираат воените власти за нивните лични податоци за да можат полесно канцелариите за регрутирање да видат кој во кој регион може да се мобилизира.
Украина, исто така, ги ограничи конзуларните услуги во своите дипломатски претставништва за мажи на старосна граница кои можат да служат војска, но се наоѓаат во странство.
Русија, исто така, воведе строги мерки со цел да спречи да се избегнува служењето војска, откако илјадници млади мажи ја напуштија Русија во првите денови по инвазијата.
Првични резултати: Сиљановска-Давкова и ВМРО-ДПМНЕ водат на двојните избори
Кандидатката за претседател Гордана Сиљановска-Давкова, поддржана од ВМРО-ДПМНЕ и коалицијата „Твоја Македонија“, е во двојна предност пред ривалот Стево Пендаровски, поддржан од СДСМ и Коалицијата за европска иднина, во вториот круг од претседателските избори, покажуваат првичните податоци од Државната изборна комисија (ДИК).
Според обработени 44,8 отсто од гласовите, податоците на веб-страницата на ДИК покажуваат дека Сиљановска-Давкова досега има 214.695 гласа, а Пендаровски 103.144.
ВМРО-ДПМНЕ и коалицијата „Твоја Македонија“ се со голема предност и на парламентарните избори. На обработени 43,3 отсто од гласовите од ДИК, досегашната опозициска партија добила 153.993 гласа.
СДСМ и Коалицијата за европска иднина, пак, имаат 51.885.
Европскиот фронт предводен од ДУИ, пак, има 76.590 гласа, а коалицијата ВЛЕН 64.102.
Левица има 25.186, а движењето ЗНАМ 18.517.
Засега нема проекции како овие резултати ќе се одразат на пратенички мандати во новиот парламентарен состав.
Меџити: „Вреди“ е апсолутен победник во албанскиот кампус
Од денес „Вреди“(„Влен“) е новиот сериозен политички фактор кој достоинствено ќе ги застапува Албанците, рече лидерот на Демократското движење, Изет Меџити кој е дел од здружената албанска опозиција на прес-конференција во седиштето на партијата во Скопје.
Според него, „„Вреди“ е апсолутен победник во албанскиот кампус и од утре почнува промената на власта“.
„Денес драги Албанци партијата која владееше со институциите 22 години го покажа своето вистинско лице. Партијата која на изборите излезе под името Европски фронт, партијата која 22 години се фалеше како единствен проевропски субјект во државата, партијата која и во оваа кампања зборуваше како многу брзо ќе не интегрира во ЕУ, денес го бојкотираше изборниот процес. Јавно го прашуваме министерот за надворешни работи Бујар Османи кој својот најголем успех го прогласи претседавањето на ОБСЕ како ќе го оправда бојкотот на изборите и примитивното однесување на денот на изборите утре пред меѓународните партнери“, рече Меџити.
Со денешниот ден, според Меџити, лидерот на ДУИ Али Ахмети ја запечатил својата изолација од сите релевантни општествени и политички чинители и фактори во државата, како и од меѓународните партнери.
Меџити оцени дека изборниот ден не бил демократски затоа што „државни институции кои имаат задача да го гарантираат процесот повторно се ставија во служба на ДУИ“.
Здружената албанска опозиција слави на плоштадот „Скендербег“ во Скопје, а следната прес-конференција, како што најавија, ќе ја одржат во Тетово.
Даштевски: Постигнат е цензусот за претседателските избори
Имавме успешни, фер и демократски избори, цензусот за претседателските избори е исполнет, рече Александар Даштевски, претседател на Државната изборна комисија (ДИК), вечерва на прес-конференција.
За претседателските избори, до 18.30 часот од обработени податоци од 3.186 избирачки места одѕивот е 46,31 отсто, при што гласале 767. 715 граѓани.
Најголема излезност има во Новаци 72,76 отсто, а најмала во Липково 7, 35 отсто.
Одѕивот на парламентарните избори е 53,30 отсто од обработени 3.186 отсто од гласовите, односно на гласање излегле 887.767 граѓани.
Најголема излезност за парламентарните избори има во Новаци 74,85 отсто, а најмала во Центар Жупа 18,62 отсто.
„Еднакво право на глас е дадено на сите граѓани. Тие гласаа по сопствена волја“, рече Даштевски, заблагодарувајќи им се на сите изборни органи, на медиумите за позитивното известување и на сите учесници во изборите.
Според него, и денеска се потврдиле оценките на меѓународните и на домашните организации за беспрекорно организирани избори во услови кога се спроведуваат два вида избори.
Во текот на денот биле поднесени 490 приговори за избирачко право. Од нив 263 приговори се усвоени, 33 се отфрлени, 88 се одбиени, а другите се во обработка.
Гласањето, како што соопшти Даштевски, ќе биде продолжено во избирачко место во Зелениково, во Гази Баба, во Центар и во Кочани.
Се очекува ДИК да излезе со првични неофицијални резултати од изборите најдоцна до 23.30 часот.
Адеми: ДУИ остави поддржувачите сами да одлучи дали ќе гласаат за претседател
Европскиот фронт денеска оствари голема победа, како што победи и пред две недели и таа е одлучувачка за натамошното унапредување на демократијата, рече шефот на изборниот штаб на Европскиот фронт, Арбер Адеми на првата прес-конференција по затворањето на избирачките места.
Toj изрази очекување дека коалицијата Европски фронт ќе добие најмалку 20 пратеници.
„Процесот на изборите денеска се одвиваше мирно и без инциденти и верувам дека нема има проблеми. Изразуваме благодарност на секој гласач што ја избра европската иднина, но воедно ги осудуваме обидите од страна на опозицијата која со лажни вести сакаше да сее паника и страв“, рече Адеми.
На новинарско прашање дали Европскиот фронт повикуваше на бојкот на изборите, Адеми рече: „Имавме сооппштение дека Европскиот фронт остави на поддржувачите сами да изберат дали ќе гласаат за избор на претседател на државата. Тоа според бројките за излезноста се гледа, има помала излезност на претседателските во однос на парламентарните избори, но таа не е одлучувачка. Имало наши поддржувачи кои гласале, и има поддржувачи кои не гласале за претседателските избори“.
Тој наведе дека на изборите гласале лидерот на ДУИ, Али Ахмети, техничкиот премиер Талат Џафери, заменик министерот за внатрешни работи, без да каже дали тие гласале и на двојните избори.
На прашањето дали тој лично гласал за претседателските избори, Адеми одговори дека не гласал.
Во Северна Македонија денеска (8 мај) се одржуваат седми претседателски и единаесетти парламентарни избори.
Мултимедија
Најпосетени
Што треба да знаете