Достапни линкови

Вести

Џолев: Новиот кривичен суд ќе создава убавина одвнатре

Иван Џолев, претседател на Кривичниот суд.

Кривичниот суд во Скопје денеска е пуштен во употреба по осум години изградба.

Новата барокна зграда на Кривичен суд има 25 нови судници, преку 100 канцеларии, подземна гража и современ систем за надзор и компјутерска техника.

Претседателот на Основен суд Скопје 1, Иван Џолев рече дека покрај бројните критики за надворешниот изглед на зградата, тој сепак е убеден дека како кај човекот, така и кај се другото , убавината доаѓа од внатре.

"Зградата која надворешно беше завршена во 2013 година, различни луѓе различно ја доживуваа. Но, јас едно ќе кажам, како што би рекол и за човекот. Убавината доаѓа одвнатре, а не однадвор. Новиот Кривичен суд убавината ќе ја креира одвнатре. Ние вработените во судот треба да ја смениме сегашната перцепција за судот и граѓаните да го посочуваат како суд на правдата. На невините да им биде овозможена правдата, а да му се суди на криминалот. Кривичниот суд поседува луѓе со интегритет. Имаме нова зграда, за нов почеток" – изјави Џолев.

види ги сите денешни вести

Времето денеска: сончево со умерена облачност

Наутро студено, преку денот сончево со мала, а во западните делови со умерена облачност. Ќе дува слаб до умерен ветер претежно од западен правец. Дневната температура ќе биде од 0 до 11 степени. Во Скопје и околината слично време. Дневната температура ќе биде 5 степени.

МВР-Лажна е пријавата за бомба во МНТ

Со полициски возила беше затворен пристапот од Музејот на македонската борба до Македонскиот народен театар додека полицијата постапуваше по пријавата за напад

Лажна пријава за поставена бомба во Македонскиот народен театар го блокираше центарот на Скопје на кратко. Од Министерството за внатрешни работи соопштија дека откако полицијата ги извршила потребните проверки во зградата и околината на театарот, утврдила дека станува збор за лажна пријава за напад.

„Се преземаат мерки за утврдување на пријавата и преземање на соодветни мерки и санкции против личноста која лажно пријавила, “ се вели во одговорот на МВР.

По речиси два часа блокиран сообраќај и забрането движење низ центарот на градот, повторно е дозволено слободно минување. Пред затворените врати на театарот останаа да чекаат неколку посетители, кои пристигнаа откако полицијата замина. Тие велат дека се надеваат дека денешната претстава за која купиле карти „ Работи за кои не зборуваме“ , сепак ќе се изведе.

Македонски народен театар по лажна дојава за бомба,
Македонски народен театар по лажна дојава за бомба,

Претходно полицијата ги евакурираше вработените во неколку околни институции.

МВР претходно соопшти дека денеска во 16 и 45 часот едно лице се јавило во билетарата на МНТ и пријавило дека има бомба.

Путин размислува да се кандидира за нов мандат во 2024 година

Рускиот претседател Владимир Путин денеска изјави дека допрва треба да одлучи дали ќе се кандидира повторно кога ќе му заврши актуелниот мандат во 2024 година. Оваа опција е отворена откако Кремљ ги протурка контроверзните уставни амандмани минатата година. 69 годишниот Путин е на власт како претседател или премиер од 1999 година. Критичарите велат дека контроверзните уставни амандмани му го отворија патот да остане на претседателската функција до 2036 година, што според нив е обид да се задржи на власт доживотно.

Путин одговарајќи на новинарско прашање на инвестицискиот форум во Москва денеска изјави дека амандманите „ја стабилизираат ситуацијата во земјата“.

„Според уставот имам право да бидам избран во нов мандат. Дали ќе го направам тоа или не, допрва треба да одлучам. Но, постоењето на такво право веќе ја стабилизира внатрешно-политичката ситуација, што е сосема доволно во овој момент“, изјави тој.

Пред изгласувањето на новите уставни амандмани на на руските претседатели им беше забрането да бараат трет последователен шестгодишен мандат. Путин засега го тера својот втор последователен претседателски мандат, односно четврти севкупен мандат од 1999 година.

Референдумот за амандманите одржан минатата година предизвика протести во Москва кои брзо беа задушени. По минатогодишните протести Кремљ продолжи да ги задушува опозициските протести и да врши репресија врз независните медиуми.

Критичарите велат дека Путин ги ослабнал демократските институции, ги прогонувал политичките противници, ги задушил критиките и дозволил да цвета корупцијата.

Полицијата постапува по пријава за напад во МНТ

МНТ

Полицијата постапува по пријава за напад, велат од МВР откако дел од македонските медиуми јавија дека се блокирани сите патишта кои водат до Македонскиот народен театар поради пријава за поставен екплозив. Од МВР велат дека добиле дојава за напад денеска во 16 часот и 45 минути.

„Станува збор за стандардни мерки на МВР после ваква добиена пријава и дека веднаш штом ги завршиме проверките и веродостојноста на информацијата ќе ја известиме јавноста“ се вели во одговорот на МВР.

Полицијата апелира до граѓаните да останат смирени, а медиумите да ги пренесуваат официјалните податоци.

Полицијата го евакуираше просторот околу Театарот и Министерството за надворешни работи. На овој простор е забележано засилено присуство на полициски сили, додека за кратко време патот што води кон МНР бил блокиран за сообраќај.

Уапсени деветмина Срби осомничени за воени злосторства во БиХ

Илустрација, Поточани, Меморијален центар Сребреница

Деветмина Срби, поранешни припадници на Војската на Република Српска, се уапсени денеска во БиХ под сомнение дека извршиле воени злосторства врз припадници на бошњачката и хрватската националност во 1992 година во областа Босански Нови.

Според Државната агенција за истраги и заштита (СИПА), сите уапсени сè уште живеат во областа Босански Нови и неговата околина, а се товарат за злосторства против човештвото.

Во соопштението на СИПА се наведува дека осомничените се уапсени за сторени повеќе убиства и незаконско заробување, како и за злосторства извршени над неколку стотини лица во кампот Огнен дом, со кој управувала воената полиција.
Апсењата се извршени по налог на Посебниот оддел за воени злосторства во Обвинителството на БиХ.

Приведени родители кои сексуално ја злоставувале и продале својата ќерка

На тројца осомничени за силување и трговија со дете им е одредена мерка притвор од 30 дена, соопшти јавното обвинителство. Татко на шест малолетни деца е првоосомничен дека извршувал „обљуба“ врз една од своите малолетни ќерки. Второосомничената е мајка која се товари дека ја подведувала својата малолетна ќерка за пари да има сексуални односи со третоосомничениот.

Во полициска акција се приведени тројцата осомничени за кои постои основано сомнение дека првоосомничениот сторил две продолжени кривични дела и тоа кривично дело „родосквернавење“ и кривично дело „трговија со дете“, додека останатите двајца осомничени сториле продолжено кривично дело „трговија со дете“, велат од ЈО.

„Првоосомничениот, татко на шест деца, од кои на три малолетни девојчиња, искористувајќи исти прилики во подолг временски период извршувал обљуба со една од своите малолетни ќерка. Во исто време второосомничената злоупотребувајќи ја својата положба, како мајка на детето кое не наполнило 14 години, го подведувала девојчето да врши полови дејствија за паричен надомест со третоосомничениот. Таа му го носела девојчето на третоосомничениот, во неговата куќа и за паричен надомест од по 2.000 денари, а понекогаш од по 500 денари, ја принудувала да се соблекува и да има сексуални односи со него. Доколку детето одбиело, мајката употребувала физичка сила“, објаснуваат од Обвинителство.

Во соопштението е наведено дека таткото ја продал својата ќерка, на маж од Косово кој го пронашол преку интернет.

„Откако бил исплатен паричен надомест од 3.000 евра, девојчето било однесено во Косово заради склучување на присилен брак. По два месеци тоа дошло на гости кај нејзините родители, а првоосомничениот со оправдување дека било многу далеку не ја вратил во Косово и продолжил да врши обљуба врз својата малолетна ќерка“, додаваат од Обвинителство.

Семејно насилство - „Нема каде да одам“
please wait

No media source currently available

0:00 0:07:52 0:00

Малолетничките се згрижени во Меѓуопштински центар за социјални работи – Скопје. За кривичните дела за кои се товарат осомничените е предвидена казна затвор во траење од најмалку 10 години, односно 12 години за дејствијата за кои се товари третоосомничениот.

Бугарија очекува јасни гаранции од Македонија

Бугарскиот министер за надворешни работи Светлан Стоев на билатерални средби со еврокомесарот за соседство и проширување Оливер Вархеји

Софија очекува јасни гаранции од Скопје по однос на правата на граѓаните со бугарско национално чувство и исполнувањето на Договорот за пријателство од 2017 година. Ова го изјавил бугарскиот министер за надворешни работи Светлан Стоев на билатерални средби со еврокомесарот за соседство и проширување Оливер Вархеји и со шпанскиот министер за надворешни работи, ЕУ и соработка Хозе Мануел Албарез Буено, јавува новинската агенција БГНЕС.

Средбите, на кои станало збор за перспективите за почеток на преговори на Северна Македонија за членство во ЕУ, се одржале во Барселона во рамките на Шестиот регионален форум на Унијата за Медитеранот и министерскиот состанок на ЕУ и земјите партнери од јужното соседство, јавува БГНЕС.

„Бугарската страна ги истакна своите проактивни напори во последните месеци за решавање на отворените прашања со Скопје, со цел да се гарантираат правата на граѓаните со бугарски идентитет и спроведувањето на Договорот за пријателство, добрососедство и соработка од 2017 година. Очекуваме јасни гаранции од Република Северна Македонија за ова“, соопшти бугарското МНР.

Стоев денеска и утре престојува во Рига каде учествува на состанокот на министрите за надворешни работи на земјите членки на НАТО, на кои учествува и шефот на македонската дипломатија Бујар Османи.

Во рамки на министерскиот состанок на НАТО, како што соопшти бугарското МНР, ќе се одржи и средба со високиот претставник на ЕУ за надворешна политика и безбедност Жосеп Борел и партнерите Шведска и Финска за актуелните случувања на Западен Балкан.

Претходно бугарскиот претседател Румен Радев при телефонски разговор со со еврокомесарот за проширување Оливер Вархеји, изјавил дека Софија очекува дијалогот со Северна Македонија да доведе до конкретни резултати. Радев посочил дека главен акцент во тој дијалог е ставен на почитувањето на правата на Бугарите во Северна Македонија, трајно искоренување на јазикот на омразата и почитување на бугарската историја и културно наследство во Македонија.
Бугарија една година го блокира почетокот на преговори на Македонија со ЕУ.

Словенија месецов забележа највисока инфлација во последниве 13 години

Илустрација, пазар

Словенија овој месец ја регистрираше највисоката инфлација во изминативе 13 години. Потрошувачките цени во Словенија во ноември 2021 година се зголемени за 4,6 отсто во однос на истиот месец лани. Тоа е највисока инфлација од октомври 2008 година, кога изнесуваше 4,9 отсто, објави денеска словенечкиот државен завод за статистика.

Централната банка во Словенија посочува дека ова е еднократен ефект врз инфлацијата во Словенија, главно поради порастот на цените на енергијата на меѓународните пазари, каде што се очекува смирување следната година. Централната банка очекува раст на инфлацијата во Словенија во наредните месеци, додека не се смири ситуацијата во светските синџири на снабдување и на енергетските пазари.

Сегашниот раст е последица на високите цени на нафтата и природниот гас на меѓународните пазари, а растат и цените на купоните за емисија.

Според официјалната статистика, во ноември цените на стоките во Словенија биле во просек за 6,2 отсто повисоки од претходната година, додека цените на услугите се повисоки за 1,5 отсто.

Најмалку 14 загинати и двајца повредени при пад на хеликоптер во Азербејџан

Илустрација, урнат хеликоптер

Воен хеликоптер на Државната гранична служба на Азербејџан се урна, при што загинаа 14 членови на екипажот, а две воени лица се повредени. Двајца полковници, пет мајори, тројца капетани, еден капетан од воената медицинска служба, двајца поручници и еден изведувач загинаа во несреќата, се вели во соопштението на граничната служба. Во него е посочено дека еден полковник и еден капетан ја преживеале несреќата и дека тие се хоспитализирани.

Граничната служба и Канцеларијата на генералниот обвинител во јужнокавкаскиот регион соопштија во заедничко соопштение дека хеликоптер се урнал денеска за време на воени маневри во близина на аеродромот Карахејбат во источната област Ксизи.

Двете надлежни институции во претходно соопштение посочија дека е започната заедничка истрага за несреќата.

Група од 43 Авганистанци замина од Македонија

Илустација, пристигнување на дел од бегалците од Авганистан на скопскиот аеродром, архивска фотографија

Нова група од 43 авганистански граѓани замина од Македонија откако за нив беше подготвена потребната документација за влез во трета земја како нивно трајно прибежиште, соопшти владината прес служба.

Во соопштението е наведено дека согласно планираната спасувачка мисија, македонските институции, во текот на нивниот привремен престој во земјава им ја овозможиле потребната поддршка, а трошоците биле покриени од меѓународните организации.

„Овие цивили беа спасени во големата меѓународна операција за помош на вработени во хуманитарните, демократски и миротворни меѓународни мисии, активисти од организациите за човекови права, преведувачи, студенти и стипендисти и нивни семејства, а се под закана на новиот талибански режим во Авганистан“ се вели во владиното соопштение.

Засега во земјава престојуваат 505 авганистански граѓани, а досега од Северна Македонија заминаа 128-мина на кои траен престој им обезбедија Франција, Грција, Ирска, Португалија, Бразил и САД.

Седум починати и нови 460 случаи со ковид-19

Во изминатото деноноќие евидентиратни се нови 460 заболени со ковид-19 од направени 2.424 тестирања. Во изминативе 24 часа седум пациенти ја загубиле битката со ковид-19. Институтот за јавно здравје регистрирал и 543 оздравени пациенти. Најголем број од новозаболените доаѓаат од Скопје - 185, потоа Прилеп – 54 и Битола – 45.

Од седумте починати лица три се од Скопје (63г, 67г и 83г), две од Битола ( 66г и 83г), и по едно починато лице од Куманово (79г), и Берово (69г). Сите пријавени лица се починати во болнички услови. Дополнително, согласно регистарот на умрени лица со дијагноза Ковид-19 од „Мој Термин“, се пријавени пет починати лица со датум на смрт од 02.10.2021 до 27.11.2021 и сите пријавени лица се починати во домашни услови.

Досега во земјата се направени вкупно 1.471.420 тестирања на Ковид-19. Вкупниот број Ковид-дијагностицирани лица во земјава од почетокот на епидемијата изнесува 215.585, бројот на оздравени пациенти е 200.003, на починати е 7.581, а на активни случаи изнесува 8.001.

Белоруски новинар осуден на 10 дена затвор

Белорускиот новинар Андреј Кузнечик кој хонорарно работи како дописник за белорускиот сервис на Радио Слободна Европа

Белорускиот новинар Андреј Кузнечик кој хонорарно работи како дописник за белорускиот сервис на Радио Слободна Европа е осуден на 10 дена затвор поради обвинение за нарушување на јавен ред и мир, додека властите на авториратниот лидер Александар Лукашенко и натаму ја спроведуваат хајката и акцијата против независните медиуми во земјата.

Роднините на Кузнечик за РСЕ изјавија дека денеска дознале дека пред четири дена била донесена пресудата против него. Тие посочија дека Кузнечик тврдел дека е невин и дека засега сенаоѓа во озлогласениот притвор во Минск Акрештина. Жителите на озогласениот притвор во Минск честопати се жалат на тортура од властите во притворот.

Сопругата на Кузнечик, Алексија Рак изјавила дека тој на 25 ноември излегол од дома за да вози велосипед, но набрзо се вратил во придружба на четворица мажи облечени во цивилна облека кои не приложиле никаква идентификација , но извршиле претрес во нивниот дом. Потоа Кузнечик бил изнесен од домот од четворицата цивили кои не и соопштиле која е причината за неговиот протвор.

Тензиите во Белорусија растат откако Лукашенко, кој е на власт од 1994 година, беше прогласен за победник на претседателските избори во август 2020 година, за кои белоруската опозиција и Западот тврдат дека се наместени.

По августовските избори многу западни земји одбија да го признаат Лукашенко како легитимен лидер на Белорусија, оставајќи го белорускиот моќник позависен од кога било од Русија. Многу аналитичарите сметаат дека Русија ја користи неговата ослабена позиција за да ја зајакне својата контрола над својот помал сосед.

Десетици илјади луѓе се приведени, а активистите за човекови права тврдат дека повеќе од 800 луѓе сега се во затвор како политички затвореници. Мета беа и независните медиуми и опозициските социјални медиуми. Претседателот на РСЕ Џејми Флај на денот на приведувањето на Кузнечик изјави дека режимот на Лукашенко продолжува со напорите да ги уништи сите независни медиуми во Белорусија.

„Андреј беше киднапиран од агенти на режимот за ништо повеќе од тоа што е новинар. Режимот исто така таргетираше една од нашите профили на социјалните мрежи, обидувајќи се да пресече повеќе канали за информации за белорускиот народ. Андреј треба веднаш да биде ослободен и да му се дозволи да се врати на сопругата и малите деца.Не сторил кривично дело“, изјави претседателот на РСЕ Флај.

За шест проценти намален бројот на заболени од ковид-19 на неделно ниво

Помалку тестирања за ковид, но и помал број за нови случаи регистрира Институтот за јавно здравје во периодот од 22 ноември до 28 ноември. Бројот на тестирања во однос на неделата претходно е намален за 5,1 отсто, а бројот на нови случаи за 6,1 проценти.

Процентот на позитивност се движи од 9,5 до 17,5 отсто или просечно 14,3 проценти. Најголем дел од регистрираните случаи се од Скопје. Највисока неделна инциденца е регистрирана во Берово, се наведува во Извештајот објавен на веб страницата на Институтот за јавно здравје.

Се забележува намалување на бројот на заболени кај сите возрасни групи, освен кај возрасната група до девет години, каде има за 14,4 отсто повеќе случаи. Најзабележително е намалувањето кај возрасната група на лица од 10 до 19 години (-10,7 отсто).

Нејаснотии со Омикрон сојот на коронавирусот
please wait

No media source currently available

0:00 0:02:31 0:00

Минатата недела има повеќе заболени женски лица, отколку машки. Во текот на мината недела вкупно се пријавени 44 реинфекции, што е за 10,2 отсто помалку во однос на претходната недела.

Пријавени се 98 смртни случаи во 24 градови во текот на изминатата недела, во однос на 91 смртни завршетоци во 21 град во претходната недела. Во однос на возраста, најголем број од починатите припаѓаат на возрасната група над 60 години, а регистрирани се починати лица и кај возрасната група од 50 до 59 години (шест), од 40 до 49 години (три) и 30 до 39 години (три).

Бислимоски – Струјата може да поевтини од април, но повторно ќе биде поскапа од досегашната

Електрична централа

Намалување на цените на електричната енергија на светските пазари може да се очекува од втората половина на април следната година, но тоа намалување е во однос на денешните, поскапени цени, а не во однос на цените од минатата година, вели во разговор со дописничката на МИА од Атина претседателот на Регулаторната комисија за енергетика и водни услуги (РКЕ) Марко Бислимоски.

Тој е во Атина прусуствува на 50-тиот Борд на регулатори на Енергетската заедница, на кој по втор пат беше избран за претседател на Бордот.

Бислимоски посочува дека тоа подразбира цени за најмалку два пати повисоки отколку што ги имавме во првиот дел од годинава.

„Тоа намалување е, да не биде 220-230 евра, туку да падне на 110 -120 евра. За такво намалување станува збор, но тоа 110-120 евра за мегават час што го нарекуваме намалување, всушност претставува зголемување во однос на минатата година за повеќе од два пати, за жал. Но, верувам дека сега ќе ги чуеме и искуствата од другите земји, а во некои од нив, сигурно ќе бидат вклучени и Владите со цел да се стабилизира колку што може ситуацијата во енергетскиот сектор“, истакнува Бислимоски.

Анализирајќи ја ситуацијата во регионот, тој вели дека особено е лоша ситуацијата кај земјите што се увознички на електрична енергија и природен гас, а тоа се Македонија, Молдавија, Косово, во одреден дел и Црна Гора зашто цените се драстично зголемени.

Дел од Енергетската заедница, освен Македонија, се и Србија, Косово, Црна Гора, Босна и Херцеговина, Молдавија, Грузија, Украина и Албанија.

Блинкен -Сериозни последици за Русија ако има нова агресија кон Украина

Американскиот државен секретар Ентони Блинкен

Американскиот државен секретар Ентони Блинкен ја предупреди Москва дека секоја повторна агресија на Украина ќе предизвика „сериозни последици“, во услови на зголемена загриженост на Западот поради трупањето руски војници на границата со Украина.

Зборувајќи на прес-конференција во Рига, каде што учествува на состанок на министрите за надворешни работи од НАТО, Блинкен денеска оцени дека трупањето на руски војници е „необично“ и дека „секоја ескалациска постапка од страна на Русија ќе биде од голема загриженост за САД“.

Дополнителната поддршка за украинската војска и потенцијалот на НАТО за зајакнување на силите распоредени долж источната граница се очекува да бидат темите на дневниот ред на дводневниот состанок во главниот град на Летонија.

Алијансата се обидува да му покаже на Кремљ дека ќе се соочи со сериозни последици ако ѝ и се заканува на Украина.

Русија, која го анектираше Крум од Украина во 2014 и ги поддржува проруските сепаратисти во конфликтот во источна Украина, негира дека планира напад и го обвини НАТО дека ги подгрева тензиите.

Британската министерка за надворешни работи Лиз Трус рече дека секоја сугестија дека НАТО ја провоцира Русија е лажна.

Украина, која претендира да стане членка на НАТО, го испрати шефот на дипломатијата Дмитро Кулеба на разговорите во Рига. Тој вчера рече дека Русија распоредила 115 илјади војници и тешко вооружување во близина на границата со Украина, во окупираниот Крим и во делови од источна Украина кои се под контрола на проруските бунтовници.


Вчитај повеќе

XS
SM
MD
LG