Достапни линкови

ВМРО-ДПМНЕ бара истрага за амандманите пронајдени во контејнер до Собранието


Илустрација-седиштето на ВМРО-ДПМНЕ во Скопје

ВМРО-ДПМНЕ денеска на прес конференција побара да се истражи случајот со амадманите за Законот за јазиците најдени во контејнер во близина на Собранието. Партијата вчера поднесе повеќе од 30 000 амадмани за законот, а вечерта се појавија снимки во дел медиуми на кои се гледа како дел од амандманите се во контејнер.

“Истрага за овој срамен недемократски инцидент мора да започне и истрага мора да има, а одговорните мора да бидат откриени и санкционирани. Не смее никому да му се дозволи да ја понижува демократијата на овој начин” рече Дарко Костовски од ВМРО-ДПМНЕ.

Тој рече дека ваквите постапки нема да ја спречеле партијата и понатаму да стоела во одбрана на законите и Уставот на државата.

“Овој закон ја уназадува употребата на македонскиот јазик како кохезивно средство за комуникација на сите заедници во земјата, а неговото вештачко наметнување носи сериозни финансиски импликации” рече Костовски.

Инаку Собранието на Република Македонија утре во 11 часот треба да ја почне 32. седница на која на дневен ред е Законот за употреба на јазиците. До третото читање на законот доаѓа откако претседателот на државата Ѓорге Иванов не го потпиша указот за законот и испрати забелешки до Собранието.

Законот за употреба на јазиците беше донесен на 11 јануари од парламентарното мнозинство во отсуство на опозицијата. Претседателот на државата Ѓорге Иванов не го потпиша указот за негово прогласување и го врати назад во Собранието со забелешки на текстот на законот.

XS
SM
MD
LG