Достапни линкови

Неделен печат – Спорот за името и руското влијание


Посредникот на ОН во спорот за името Метју Нимиц

Неделникот Капитал го анализира оптимизмот за решавањето на спорот за името, додека Фокус пишува за руското влијание во регионот.

Капитал - Оптимизмот дека ќе се реши спорот за името влегува во критична фаза

„Оптимизмот дека ќе се реши спорот за името влегува во критична фаза“, ја насловува Капитал анализата за најактуелната и домашна и надворешно политичка тема и во првиов месец од оваа година во која прави опсежен преглед на раздвиженоста на политичко-дипломатскиот македонски и грчки естаблишмент и на нивните изјави, а во светлината на активирањето на посредникот Нимиц и посетата на генералниот секретар на НАТО, Столтенберг на Скопје, како и на импликациите врз пошироките геостратегиски американски и руски интереси на Балканот. Неделникот, покрај другото, го наведува и мислењето на професорот по меѓународно право и советник во правниот тим што ја застапуваше Македонија пред Меѓународниот суд на правдата во тужбата против Грција, Тони Дескоски: „Вистината е дека грчката Влада е свесна оти се ближи голем притисок од американската дипломатија, затоа што на САД им е од витална важност Република Македонија да се придружи на НАТО, па потоа да се посветат на решавање на вистинскиот проблем за мир на Балканот - Србија“. Професорот во исто време потсетува на новата американска стратегија за Балканот на Атлантскиот совет промовирана уште во почетокот на ноември минатата година во Вашингтон, во која српскиот иредентизам е идентификуван како главна закана за мирот на на овие простори и дека на САД им е јасно оти „само со Македонија во НАТО е можно да почне ’убедувањето‘ на Србија да се откаже од иредентистичките аспирации кон соседните земји и да се придружи на Алијансата, а со тоа и да ја истисне Русија од Балканот“. Дескоски наоѓа и поврзаност на Грција со руските интереси на Балканот и се сомнева во нејзините искрени намери за решение на спорот за името и смета дека Грција всушност работи на тоа да ја држи земјава надвор од НАТО (со тоа и Србија) и на тој начин да ѝ остави простор на Русија за дестабилизирање на Балканот.

Фокус - Очајнички обиди за дестабилизација

И во анализата во Фокус се наоѓа конекција на руските геостратегиски интереси на Балканот со однесувањето на Атина во врска со спорот за името. „Очајнички обиди за дестабилизација“ е насловена анализата во неделникот во која неодамнешното убиство на Оливер Ивановиќ, лидер на граѓанската иницијатива СДП, (Србија, демократија, правда) во Косовска Митровица се доведува во врска со моментот кога ЕУ и НАТО решија конечно да го интегрираат Западен Балкан. „Терористичкиот чин веројатно нема да ја загрози балканската безбедност... Дестабилизацијата ѝ одговара единствено на Москва, чиј министер за надворешни работи деновиве ѝ порача на Атина да биде непопустлива во спорот за името, за Македонија да остане надвор од НАТО!“ – пишува Фокус.

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG