Вести
Законот за јазиците помина на Комисијата за политички систем
Предлог законот за употреба на јазиците денеска беше поддржан од собраниската Комисија за политички систем и односи меѓу заедниците.
Пратеникот Антонио Милошоски рече дека законот вака како што е предложен води кон целосна двојазичност и федерализација на Република македонија.
Независниот пратеник Ферид Мухиќ од рече дека овој Предлог-закон е уставен и се базира на амандманот 5 од Уставот. Тој притоа потенцира дека ставот 2 од амандманот 5 од Уставот предвидува јазикот што го зборуваат најмалку 20 проценти од граѓаните исто така да е службен јазик.
Африм Гаши од БЕСА рече дека ставот на неговата партија е оти употребата на законот треба да се усвои со консензус. - Да имаме заеднички заклучок од сите политички партии и ова прашање да се затвори еднаш и засекогаш, рече Гаши, додавајќи дека решавањето на овој проблем е од државен интерес.
Предлог законот за употреба на јазиците е на дневен ред на денешната 15. седница на Собранието на Република Македонија.
Минатата недела поддршка за законското решение даде и собраниската Комисија за европски прашања.
види ги сите денешни вести
Иран објави список на загинатите за време на протестите, организациите тврдат дека бројот на жртвите е поголем
Владата на иранскиот реформски претседател, Масуд Пезешкијан ги објави имињата и националните идентификациски броеви на 2.985 лица убиени за време на неодамнешните протести низ целата земја.
Објавувањето на официјалната владина листа на 2 февруари ги претвори киосците за весници во мрачни меморијали и отвори дебата дали овој потег претставува вистински исчекор кон транспарентност или пресметан обид да се ублажи размерот на далеку поголема трагедија.
Листата, објавена од администрацијата на Пезешкијан, идентификува речиси 3.000 жртви.
Медиумите блиски до државата ги истакнаа имињата на насловните страници, претставувајќи ја објавата како доказ за „храбрата транспарентност“ на владата.
Сепак, организациите за човекови права и активистите ја обвинуваат Исламската Република дека се обидува да „преземе контрола врз наративот“ и значително да ги намали вистинските размери на страдањето.
Кабинетот на претседателот официјално соопшти дека бројот на загинатите изнесува 3.117, наведувајќи дека разликата меѓу таа бројка и објавената листа се однесува на 131 неидентификувано тело.
Сепак, во интервју за Радио Фарда на Радио Слободна Европа, Махмуд Амири-Могадад, директор на организацијата Iran Human Rights (IHR) со седиште во Осло, изјави дека самиот обем на објавените имиња претставува признание за „масакр од огромни размери“ кој државата повеќе не можела да го сокрие.
„Не можеа да го задоволат јавното мислење со помала бројка“, рече Амири-Могадад.
„Ова е официјално признание на масовен покол. Дури и 3.000 е огромна бројка, но врз основа на нашето искуство, нивото на тајност и понатаму е многу високо.“
Организациите за човекови права наведуваат дека ваквите несогласувања се вообичаени и се во согласност со претходните обрасци. Така, IHR во 2024 година потврди 503 егзекуции поврзани со дрога во Иран, додека владата официјално призна само 15.
Американската организација за човекови права ХРАНА спроведе прелиминарна анализа на владината листа, опишувајќи ја како „набрзина изработена“ и преполна со правописни грешки, дуплирани записи и нецелосни идентификациски податоци, со целосно отсуство на контекстуални информации како што се времето, местото или причината за смртта.
Критичарите тврдат дека властите, не наведувајќи дали убиените биле демонстранти, случајни минувачи или припадници на безбедносните сили, го направиле речиси невозможно јавноста независно да ги провери податоците или да повика конкретни функционери на одговорност.
Јавниот гнев дополнително беше поттикнат од скандалот на државната телевизија Офог. На 1 февруари, водителот на емисијата „Khat-Khatti“ предизвика огорченост низ целата земја откако подбивно сугерираше дека телата на демонстрантите се чуваат во „замрзнувачи на супермаркети“ или „апарати за сладолед“.
Реформски ориентираниот новинар и поранешен градоначалник на Техеран, Голамхосеин Карбашчи, изјави дека овој инцидент ја разоткрил подлабоката трулеж на системот. Тој ја критикуваше владата поради зголемувањето на буџетот на државниот радиодифузер (IRIB), за кој рече дека го води „неписмена“ група луѓе, целосно одвоена од ожалостената јавност.
Додека владата и понатаму стои зад својата проценка од околу 3.100 загинати, бранителите на човековите права веруваат дека вистинскиот број на убиени за време на бранoт протести кој започна на 28 декември веројатно е значително поголем.
„Нашата проценка, заснована на сведоштва на очевидци и прецизни податоци, укажува дека бројките што се спомнуваат во медиумите, како 20.000 или 30.000, не делуваат нереално“, изјави Амири-Могадад.
Тој додаде дека дури и во тековниот процес на верификација на организацијата IHR, приближно половина од потврдените жртви не се наоѓаат на официјалната владина листа.
Во меѓувреме, ХРАНА, чии податоци Радио Слободна Европа редовно ги користи од почетокот на насилниот судир, наведува дека нејзиниот потврден број на загинати, вклучително и припадници на безбедносните сили, достигнал 6.842.
Дополнителни 11.280 смртни случаи се под истрага, додека повеќе од 49.000 лица се уапсени.
Случај „Пулс“: Пиротехника се користела и претходно, имало и контроли, но забавата не била прекинувана
Функционирањето на клубот „Пулс“, неговата внатрешност, издавањето карти при влез, па сѐ до моментот кога избувнал пожарот и кога димот и чадот ја зафатиле преполната дискотека, како и последиците што ги трпат до денес, беа дел од исказите на сведоци во судницата во Идризово на денешното продолжение на судењето за случајот во кој загинаа 63 лица, а над 200 беа повредени.
Прв сведочеше гостин во дискотеката „Пулс", којшто во пожарот се здобил со телесни повреди.
Тој бил на лекување во Словенија каде на отпусното писмо, како што рече, му стоело дека 100 отсто му биле црни белите дробови и изгорени дишните патишта.
Сведокот, на прашања од Обвинителството, одговараше за изгледот и уредувањето на дискотеката по нејзиното реновирање, како и за моментот на избувнување на пожарот и кога настанал „густ црн чад со мирис на пластика", но и за моментот на паника и стампедо кон излезот од дискотеката.
Од повредите со кои се стекнал чувствува последици и ден денеска, како намален капацитет на дишење. Тој најави имотно правно побарување и приклучување кон кривичното гонење.
Вториот сведок, кој работел хонорарно во дискотеката како шанкер од нејзиното отворање во 2012 година, рече дека договор немал потпишано и работел како неосигуран, сѐ до 2023 кога бил пријавен на пола работно време.
Овој сведок предизвика многу полемика во судницата со своите одговори.
Најпрво тој беше испрашан од Обвинителството, а потоа одговараше на вкрстени прашања од одбраната, за потоа да биде сослушан и како сведок на дел од обвинетите, па потоа повторно да одговара на вкрстени прашања од Обвинителството. На крајот, неколку прашања му постави и судот.
На прашање од Обвинителството, сведокот рече дека кобната вечер работел како шанкер.
- Деко е газда и тој даваше наредби. На крајот од денот, кога ќе завршеше ни се плаќаше дневница од 1 500 денари, рече сведокот.
Одговарајќи на прашања од Обвинителството, сведокот рече дека во дискотеката имал видено два или три пп - апарати, како и ознаки за хидранти, но такви не видел. Како вработен во дискотеката, рече дека немал обука за заштита при работа.
- Дискотеката има два, односно три влеза, но едниот е преку билетарата. Едниот е на главниот влез, па мало ходниче, другиот е една стандардна врата лево од бината. Вратата е во функција, но не знам дали некој влегувал или не вечерта. Таа вечер не знам, но друг пат сум видел кога имало многу гужва да се отвора за да се проветри, кажа сведокот.
„Луѓето не го сфатија огнот многу сериозно“
Кобната вечер, тој бил на работа, но не видел кој ја активирал пиротехниката.
- Вечерта околу 500 луѓе имаше, по моја проценка. Сите 82 маси, колку што има дискотеката, беа полни, изјави сведокот, посочувајќи дека имало и малолетници.
Вечерта околу 2 и 35 часот, според сведокот, бендот извикал дека гори и го видел газдата Деко како зема пп апарат и оди да гаси.
Пиритехника во дискотеката, сведокот рече дека се користела и претходно, а за тоа Деко ангажирал човек од Скопје.
- Тој доаѓаше со возило бел пикап на кој пишувало пиротехника, рече сведокот.
Контроли во дискотеката, според сведокот имало, но забавата не била прекинувана.
- Огнот се ширеше многу брзо. Луѓето не го сфатија многу сериозно. Имаше што стоеја на вратата и снимаа. Јас бев до вратата, ама не можев да излезам. Јас веднаш се префрлив во вецето. Имаше пет девојчиња, три излегоа порано и од вратата влезе многу час. Ние останавме до прозорецот дур не се расчисти до кај 3 и 15, рече сведокот.
Тој посочи дека од пожарот имал последици со дишењето и намалена сатурација и бил на лекување во Грац. Најави дека бара оштета, но не се приклучува на кривичен прогон.
Третиот сведок, рече дека вечерта на пожарот бил излезен во друг кафич, а бил во дискотеката „Пулс“ на кратко за да се види со еден од членовите на бендот.
- Кога бев таму не видов да поставуваат пиротехника или нешто такво. Од таму се вратив во кафичот Гинис, и откако заврши тоа таму, пак околу 2 часот се вратив во дискотеката со пријател и неговите две деца, рече сведокот.
Кога се вратил во дискотеката, сведокот рече дека не купил карта, додека за тие со него не е сигурен.
- Обезбедувањето потоа на влез мислам не праша за билет, ама јас му реков во ред е и продолжив. Влегов не ме застана. За другите не знам, рече сведокот.
Прашан дали децата на неговиот пријател биле легитимирани на влез, сведокот рече, не се сеќава, ама мисли дека не, зошто, како што рече, „беа со родител".
- Кратко откако влеговме на една од песните беа активирани, мислам две, ама не сум сигурен, прскалки. После забележавме дека нешто гори и тој на микрофон рече "Дејан, Дејан, овде нешто се запали", но огнот брзо се рашири и мислам по две-три, па и пет минути Панчо во паника на микрофонот пак рече да се повлечеме надвор и дека ќе се вратиме за десет минути, појасни сведокот.
Прашан дали некој од присутните се обидел да го изгаси огнот, сведокот рече првично не, но потоа на снимки го видел Виктор Јорданов како го гаси пожарот со ПП апарат.
Според него, повеќето гости не многу сериозно ја сфатиле ситуацијата и многу бавно се движиле.
- Освен Панчо не сум слушнал некој друг да рече да излеземе. Сите се упативме кон излезот, ама јас не можев да излезам зошто имаше толпа. Мене ми беше заглавена ногата. Го видов другарот Петар, исто заглавен позади мене. Тогаш не, ама после ми кажа дека тој своите деца ги спасил така што ги истуркал напред. Јас не се сеќавам како точно излегов, дали сам или некој почна да ги вади луѓето, па се одглавив, изјави сведокот.
Кога излегол сведокот, рече дека бил свесен, по што со автомобил се упатил во болницата во Кочани.
Сведокот преднајави оштетено побарување и дека се приклучува кон кривичниот прогон.
Одбраната на обвинетите службени лица за пожарот во дискотеката „Пулс“ на почетокот на денешното судење побараа ЈО да ја преиспита околноста изнесена од ОЈО ГОКК минатата недела за запирање на постапката за гонењето за седум полициски службеници по член 292 - Тешки дела против општата безбедност, нагласувајќи дека за дел од сега обвинетите може да се поистоветат и повлечат обвиненијата.
Обвинителот Борче Јанев укажа дека ЈО ги нема одлуките од брифингот на ОЈО ГОКК за запирање на постапката за полициските службеници, посочувајќи дека таквите одлуки подлежат на оценка од повисоките ЈО и дека со оглед на краткиот рок не се конечни.
- Обвинителниот акт напоменувам не опфаќа полициски службеници, а ЈО за нив опфаќа исти дела. Денеска во судницата сме по одобрен и стапен во сила обвинителен акт. ЈО ги нема овие одлуки на ОЈО ГОКК и со тоа нема увид дали се таму наведени оштетени лица и причините за штета, изјави Јанев.
Предметниот јавен обвинител од Специјализирано одделение за гонење на кривични дела сторени од лица со полициски овластувања и припадници на затворската полиција при ОЈО ГОКК, на брифинг на 30 јануари информираше дека по спроведени истражни постапки во кои биле опфатени 27 полициски службеници до Основниот кривичен суд Скопје е поднесен Обвинителен акт против 13 полициски службеници.
Во однос на уште седум полициски службеници, јавниот обвинител донел Наредба за запирање на истражната постапка.
Случајот го води судијката, Дијана Груевска Илиевски и се наоѓа во доказна постапка со сослушување на сведоци предложени од Обвинителството.
Следното рочиште е закажано за 5 февруари.
На 16 март 2025 година, за време на настап на групата „ДНК“ во дискотеката „Пулс“ во Кочани, избувна пожар во кој загинаа 63 лица, а над 200 беа повредени. Во објектот имало над дозволениот број посетители, меѓу кои и малолетници, а пиротехнички средства биле активирани без дозвола. Објектот работел незаконски повеќе од една деценија, без минимално-технички услови, со реконструкции без дозволи и без систем за противпожарна заштита.
Обвинителството во Северна Македонија оформило предмет за петте тони марихуана запленети во Србија
Обвинителството во Северна Македонија има оформено предмет во врска со запленетите пет тони марихуана во Србија, за којашто српските медиуми првично информираа дека била набавена од македонска територија.
„Обвинителството има оформено предмет и веќе се преземаат конкретни, насочени и координирани дејствија за целосно утврдување на сите факти и околности за поврзаноста на Република Северна Македонија со овој случај, со цел обезбедување целосна кривично-правна одговорност“, велат од Обвинителството за Радио Слободна Европа (РСЕ).
Оттаму посочуваат дека уште во петокот (30 јануари) биле навремено и целосно информирани за акцијата во Србија и „без одлагање презеле активности во рамки на законските надлежности“.
„Веднаш е воспоставена интензивна и континуирана комуникација со надлежните органи на Република Србија, со активна размена на релевантни информации и координација на дејствијата, со цел целосно и сеопфатно откривање на сите инволвирани лица и евентуални организирани структури поврзани со случајот на заплена на пет тони марихуана“, наведува Обвинителството во одговорот до РСЕ.
Претходно од Министерството за внатрешни работи на Северна Македонија кратко посочија дека се преземаат „соодветни оперативно технички мерки и активности согласно полициските овластувања“.
Петте тони марихуана беа запленети на 29 јануари во регионот на селото Коњух кај Крушевац, централна Србија.
Српската полиција ја оцени заплената како најголема во историјата на земјата, а вредноста на наркотикот се проценува на седум до десет милиони евра.
Вишиот суд во Белград одреди притвор за три лица.
Српското обвинителство предложи издавање налог за апсење, вклучително и меѓународен, за осомничениот Александар Мијајловиќ, кој е означен како организатор на организирана криминална група и е во бегство.
Меѓу опфатените во истрагата е и лице со иницијали И.Д., кое, како што беше посочено во медиумските извештаи, е косопственик на компанијата „Алфафарм“ во скопскиот регион, која е регистрирана за производство и преработка на медицински канабис.
Пезешкијан нареди разговори со САД, Трамп се надева на договор
Иранскиот претседател Масуд Пезешкијан нареди почеток на нуклеарни разговори со Соединетите Држави, објавија локалните медиуми во понеделник, 2 февруари откако американскиот лидер Доналд Трамп изјави дека се надева на договор за спречување на воена акција против Исламската република.
По смртоносниот одговор на иранските власти на антивладините протести што кулминираа минатиот месец, Трамп се закани со воена акција и нареди испраќање на група носачи на авиони на Блискиот Исток.
Иако врши притисок врз Иран, Трамп изјави дека се надева на договор, а Техеран, исто така, инсистираше дека сака дипломатија, ветувајќи неограничен одговор на каква било агресија.
„Претседателот Пезешкијан нареди почеток на разговори со САД“, објави новинската агенција Фарс, повикувајќи се на неименуван владин извор, а пренесе АФП.
„Иран и САД ќе одржат разговори за нуклеарното досие“, објави Фарс, без да прецизира датум.
Извештајот го објавија и владиниот весник Иран и реформистичкиот дневен весник Шарг.
Иран претходно во понеделник соопшти дека работи на метод и рамка за преговори што ќе бидат подготвени во наредните денови, а пораките меѓу двете страни ќе бидат пренесени преку регионалните играчи.
„Одговорени се неколку точки и ги испитуваме и финализираме деталите за секоја фаза во дипломатскиот процес, кои се надеваме дека ќе ги завршиме во наредните денови“, изјави портпаролот на Министерството за надворешни работи, Есмаил Бакаеи, без да даде детали за содржината на какви било преговори.
Трамп предупреди дека „времето истекува“ за Иран да постигне договор за својата нуклеарна програма, за која Западот верува дека има за цел да направи атомска бомба.
Но, Бакаеи рече дека Техеран „никогаш не прифаќа ултиматуми“ и дека не може да потврди дека е примена таква порака.
Регионалните играчи инсистираат на дипломатија за смирување на тензиите.
Иранскиот министер за надворешни работи, Абас Арагчи, беше во Турција минатата недела и имаше дополнителни разговори со своите египетски, саудиски и турски колеги, рече тој на Телеграм.
„Претседателот Трамп рече дека нема нуклеарно оружје и ние целосно се согласуваме. Целосно се согласуваме со тоа. Тоа би можело да биде многу добар договор“, изјави Арагчи за Си-Ен-Ен во неделата.
„Секако, за возврат, очекуваме укинување на санкциите. Значи, тој договор е можен. Ајде да не зборуваме за невозможни работи.“
Бакаеи рече дека обединувањето на соседните држави околу дипломатско решение покажува страв дека секој напад на САД би го вовлекол регионот во конфликт, повторувајќи го иранскиот врховен лидер ајатолахот Али Хамнеи, кој во неделата предупреди дека нападот на САД би предизвикал „регионална војна“.
Штрајкови го блокираа јавниот превоз во Германија
Вработените во јавниот превоз штрајкуваат низ цела Германија барајќи подобри услови за работа, предизвикувајќи значителни прекини за патниците кои се соочуваат со замрзнати патишта.
Еднодневниот индустриски штрајк, свикан од синдикатот Верди, значи дека автобусите, трамваите и метрото не сообраќаат од 3 часот наутро. Сите освен една од 16-те федерални покраини на Германија беа погодени од штрајковите, при што околу 5.000 работници во јавниот превоз во северната покраина Долна Саксонија беа обврзани со договор што ги спречува да се приклучат на штрајковите, соопшти Верди.
Штрајкот не влијае на услугите на долги релации и регионалните и приградските возови за патување што ги управува државната железничка компанија Дојче Бан. Колективните преговори се водат со локалните здруженија на работодавачи низ 16-те покраини.
Верди бара значително подобри услови за работа за работниците во јавниот превоз, вклучувајќи пократко неделно работно време и смени, подолги периоди за одмор, но и повисоки бонуси за ноќни и викенд смени. Според синдикатот, во покраините Баварија, Бранденбург, Сарланд и Тирингија, како и во метрото во Хамбург, повисоките плати се исто така на маса во преговорите.
„Наш приоритет е да постигнеме напредок на преговарачката маса. Нашите колеги можат да смислат подобри работи отколку да штрајкуваат во ова време“, изјави за ДПА шефот на преговарачкиот тим на Верди, Серат Канјурт.
Делови од Германија се погодени и од продолжено зимско време, вклучувајќи температури под нулата и снег, што доведе до прекини во јавниот превоз, вклучително и во Берлин.
А патниците во некои региони ќе мора да се подготват за понатамошен замрзнат дожд и заледени патишта во наредните денови, според Германската метеоролошка служба.
„Ако не штрајкуваме за подобри услови за работа, работните места ќе останат толку непривлечни што, како што видовме во последниве години, нема доволно луѓе да бидат спремни да работат во јавниот превоз“, изјави за јавниот радиодифузен сервис ЗДФ, Андреас Шакерт, функционер на Верди, одговорен за автобуси и возови.
Тој истакна дека работата во смени, особено, е извор на притисок за работниците во јавниот превоз. Шакерт рече дека ако не се преземе ништо за да се направи работата попривлечна, „тогаш на долг рок нема да можеме да ги задржиме луѓето“.
Преминот Рафа делумно отворен по две години војна
Клучниот граничен премин Рафа во Газа беше повторно отворен за Палестинците во понеделник, 2 февруари, изјави израелски безбедносен претставник, но египетските државни медиуми објавија дека само на 50 лица ќе им биде дозволено да преминат во двата правци во првите денови.
Продолжувањето на операциите доаѓа откако израелските сили ја презедоа контролата врз влезот во Египет во мај 2024 година за време на војната со Хамас, која САД и ЕУ ја прогласија за терористичка организација.
Делумното продолжување на операциите започна во недела во строго ограничена пилот-фаза што не вклучуваше патување на луѓе, по месеци апели од групите за помош.
„Од овој момент, и по пристигнувањето на тимовите на ЕУБАМ во име на Европската Унија, преминот Рафа сега е отворен за движење на жителите, и за влез и за излез“, рече израелскиот претставник, осврнувајќи се на европската мисија за помош на границите.
Египетските државни медиуми објавија дека се очекува 50 лица да преминат во двата правци во првите денови од повторното отворање.
АлКахера њуз, која е поврзана со државната разузнавачка служба, повикувајќи се на неименуван извор објави дека „педесет лица ќе го напуштат Египет за Газа, а педесет лица ќе дојдат од Газа, во првите денови од операцијата“.
Извор на границата за АФП изјави дека неколку десетици луѓе пристигнале на египетската страна во понеделник чекајќи влез во Газа.
Сепак, израелскиот државен радиодифузер Кан објави дека се очекува околу 150 луѓе да ја напуштат Газа за Египет во понеделник, вклучувајќи 50 пациенти.
Во извештајот се вели дека се очекува уште околу 50 други да влезат на територијата, додавајќи дека преминот ќе биде отворен околу шест часа дневно.
„Преминот Рафа е спас“, рече Мохамед Насир, Палестинец на кого му е ампутирана ногата откако бил повреден на почетокот на војната.
„Треба да се подложам на операција која не е достапна во Газа, но може да се изврши во странство.“
Сликите на АФП од неделата покажаа амбулантни возила во ред на египетската страна, подготвувајќи се да примат медицински евакуирани лица, за кои се очекуваше да бидат првите групи на кои ќе им биде дозволено да излезат.
Службеник во Министерството за здравство на Газа, кое работи под власт на Хамас, изјави дека околу 200 пациенти чекаат дозвола да ја напуштат територијата.
АлКахера њуз, повикувајќи се на египетското Министерство за здравство, објави дека 150 болници и 300 амбулантни возила се подготвени да примат палестински пациенти.
Се вели дека 12 000 лекари и 30 тимови за брзо распоредување се распоредени да работат со префрлените Палестинци.
Рафа се смета за клучна точка за влез на помош во Газа, каде што хуманитарните услови остануваат ужасни по две години војна и покрај прекинот на огнот што е во сила од 10 октомври.
Преминот е затворен откако израелските сили ја презедоа контролата врз него во мај 2024 година за време на војната со Хамас, освен краткото и ограничено повторно отворање на почетокот на 2025 година.
Повеќе од 20 убиени во руски напади врз Украина
Повеќе од дваесетина луѓе се убиени во руски напади со беспилотни летала врз Украина, а во Запорожје е уништена и породилна болница. Во меѓувреме, за следната недела е најавена нова рунда разговори меѓу Киев и Москва.
Два одделни напади со беспилотни летала убија најмалку 17 лица во регионот Дњепропетровск, а најмалку седум беа повредени, соопштија украинските власти на 1 февруари.
Петнаесет лица беа убиени кога руски дрон погоди автобус област во близина на Павлоград, додека уште две лица загинаа откако дрон погоди приватна куќа во регионалниот главен град Дњепар претходно истиот ден.
Во соседниот град Запорожје, нападите започнаа по полноќ, а регионалниот гувернер Иван Федоров рече дека најмалку шест лица се повредени во нападот врз породилната болница.
Нападите се случија откако украинскиот претседател Володимир Зеленски објави дека нова рунда разговори за ставање крај на речиси четиригодишната војна ќе продолжи во Абу Даби, Обединетите Арапски Емирати, на 4 и 5 февруари.
„Заинтересирани сме за исходот што ќе нè приближи до вистински и достоинствен крај на војната“, напиша Зеленски на Телеграм откако беше информиран од преговарачкиот тим во Киев.
Претходната рунда разговори се одржа на истата локација на 23 и 24 јануари. Првично во трилатерален формат, во неа учествуваа претставници од Украина, Русија и САД.
Американските претставници ги опишаа разговорите како „конструктивни“, а подоцна се чини дека доведоа до кратко затишје во нападите врз енергетската инфраструктура од двете страни.
Сепак, и покрај она што американските претставници го сметаа за позитивен моментум во обновените дипломатски напори, руските воздушни напади продолжија да ја погодуваат цивилната инфраструктура и логистиката низ цела Украина.
Украинските воздухопловни сили соопштија дека на 1 февруари, најмалку 90 руски беспилотни летала биле лансирани во региони низ целата земја, додека Русија користела повеќе од 6.000 беспилотни летала, 5.500 водени бомби и 158 ракети во јануари, според Зеленски.
Скопје на чекор до првата подземна сообраќајница – започна изградбата на булеварот „Македонија“
Започна со реализација на првата фаза од изградбата на булеварот „Македонија“, во рамки на кој е предвидено главниот да ја добие својата прва подземна сообраќајница, изјави скопскиот градоначалник Орце Ѓорѓиевски на настанот за означување на почетокот на градежните активности кај хотел „Лимак“ во центарот на градот.
„Ова е првата фаза од вкупно пет, преку кои овој комплексен капитален зафат конечно ќе биде реализиран. Иако третата фаза, подземната сообраќајница, е веќе изградена, нејзиното целосно ставање во функција е можно само со реализација на сите фази, а првата почнува токму денеска“, изјави Ѓорѓиевски.
Првата фаза, рече Георгиевски, вклучува реконструкција и рехабилитација на постоечкиот коловоз, како и проширување на одделни ленти, со цел да се подобри проточноста и функционалноста на сообраќајот.
Проектот опфаќа делови од булеварот „Борис Трајковски“ (кај Рампа), улиците „11 Октомври“ и „Пролет“, како и крак од булеварот „Македонија“ до влезот во „Борис Трајковски“.
На потегот од улицата „Пролет“ кон полициската станица и „Тутунскиот комбинат“ ќе се прошири коловозот со дополнителна лента, а раскрсницата ќе биде уредена со триаголни и солзни острови. Движењето од „Пролет“ кон хотел „Лимак“ и кон булеварот „Борис Трајковски“ ќе биде еднонасочно, изјави Георгиевски.
Во наредните фази се предвидува изградба на кружен тек кај поранешната зграда на „Нова Македонија“, дополнителни кружни текови меѓу булеварот „Кочо Рацин“ и улицата „Јордан Мијалков“, како и проширување на булеварот „Св. Кирил и Методиј“.
Подземната сообраќајница, кога ќе биде целосно пуштена во употреба, ќе има шест ленти – четири за двосмерен автомобилски сообраќај и две наменети за јавен превоз, како и дополнителни пешачки патеки.
„Со нејзиното пуштање во употреба се очекува намалување на сообраќајниот метеж и побрзо движење низ центарот на градот“, истакна Ѓорѓиевски.
Рокот за завршување на првата фаза е 90 дена, а од следната недела ќе започне тендерската постапка и за втората фаза од проектот.
Мицкоски подготвен за средба со синдикатот и потпишување на договорот за државните службеници
Премиерот Христијан Мицкоски денеска потврди дека е подготвен за средба со синдикатот и финализирање на колективниот договор за државните службеници. Тој нагласи дека услов за преговорите е отстранување на делот за плати од Општиот колективен договор, кој, како што посочи, е збунувачки и бара дополнителни преговори.
„Јас сум секогаш подготвен за средба. Можеме да договориме средба и немаше потреба од јавни коментари, бидејќи ова јас го предложив уште минатата година. Сега, бидејќи 2025 е зад нас, остануваат три години, односно до април 2026, 2027 и 2028 година. Условот е да се согласи синдикатот да се тргне делот за плати кој е збунувачки и да се финализира договорот“, изјави Мицкоски.
Премиерот посочи дека оваа понуда е на маса веќе една година и дека неговиот став не се променил.
„Со тоа Владата ги регулира односите со своите колеги, односно со административните службеници. Со сите останати имаме договор, додаде Мицкоски, по означувањето на почетокот на изградба на булеварот „Македонија“ кај хотелот Лимак во Скопје.
Мицкоски претходно повтори дека Владата е подготвена да ги зголеми платите за околу 7.800 државни службеници и административци за 40 отсто во период од две години и два месеци, со цел да се реши долгогодишниот проблем со ниските примања во јавната администрација.
Тој истакна дека оваа понуда е на маса веќе една година и дека Владата е отворена за средба со синдикатот и потпишување на колективниот договор, но со услов да се тргне делот за плати од Општиот колективен договор кој, според него, е збунувачки и бара дополнителни преговори.
Од друга страна, претседателот на Синдикатот на работниците од управата, правосудните органи и здруженијата на граѓани (УПОЗ), Трпе Деаноски, потврди дека ова е нивно барање уште од 2025 година и дека предлогот за покачување на платите бил прифатлив уште тогаш.
Тој нагласи дека нема да се чека повеќе и дека синдикатот е подготвен да се потпише договорот кога ќе им одговара на премиерот и министрите.
Пет тони марихуана од Северна Македонија запленети во Србија, тројца се во притвор
Вишиот суд во Белград одреди притвор за три лица по заплената на пет тони марихуана во регионот на селото Коњух кај Крушевац, во централна Србија, пренесуваат српските медиуми. Во извештаите се вели дека според истрагата, марихуаната била набавена во јануари оваа година на територијата на Северна Македонија, а истата ја транспортирала организирана криминална група што дејствувала на меѓународно ниво.
Српската полиција ја оцени заплената како најголема во историјата на земјата, а вредноста на наркотикот се проценува на седум до десет милиони евра.
Обвинителството предложи издавање налог за апсење, вклучително и меѓународен, за осомничениот Александар Мијајловиќ, кој е означен како организатор на организирана криминална група и е во бегство.
Судот во Србија одредил притвор за лицата Н.С., Р.С. и И.Д., кои како што е наведено се осомничени за неовластено производство и дистрибуција на наркотични дроги, поради опасност од бегство, влијание врз сведоци, повторување на кривичното дело и нарушување на јавниот ред и мир.
Претседателот на опозициското Народно движење на Србија, Мирослав Алексиќ, објави на социјалната мрежа X тврдење дека еден од уапсените за време на заплената на дрога бил советник на владејачката Српска напредна партија во Крушевац.
Алексиќ изјави дека уапсеното лице е „пријател и близок соработник“ на семејството на министерот за одбрана Братислав Гашиќ.
Министерот за одбрана Братислав Гашиќ не ги коментираше директно обвинувањата на опозицијата, ниту го спомена името на уапсеното лице.
Во соопштението објавено од весникот Курир, тој им честиташе на членовите на полицијата и другите безбедносни служби за операцијата, наведувајќи дека таа покажува дека „нема заштитени луѓе во Србија“.
Потпретседателката на Градскиот комитет на СНС Крушевац, Невена Ѓуриќ Никитовиќ, исто така издаде соопштение во кое наведува дека „државата е јасна и безмилосна во борбата против криминалот и корупцијата“.
Српскиот претседател Александар Вучиќ денеска изјави дека државата нема никаква врска со аферата што беше отворена со запленувањето на пет тони марихуана на имотот на локален функционер на владејачката Српска напредна партија (СНС).
Тој додаде дека полицијата „уапсила луѓе“ и дека неговите политички противници „сè превртуваат наопаку“ и тврдат дека зад тоа стои државата.
„Луѓето од Управата за криминалистичка полиција пронајдоа пет тони некаква дрога. А сега дали само синот знаел за тоа или и синот и таткото, тоа е друго прашање, нека утврдат надлежните органи, нема да претпоставам ништо. Ние ја спроведовме таа операција“, изјави Вучиќ за ТВ Пинк.
Јавното обвинителство за организиран криминал претходно објави дека во истрагата се опфатени А.М., Н.С., Р.С., И.Д. и У.М. Според српските медиуми, осомничените го искористиле своето законско право да молчат за време на сослушувањето.
Во извештаите се вели дека осомничениот А.М., кој бил организатор на групата, се наоѓа во бегство, по што судијата издаде потерница, вклучително и меѓународна.
Организираната криминална група дејствувала на меѓународно ниво, а во јануари оваа година набавила повеќе од пет тони марихуана на територијата на Северна Македонија. Според истрагата, И.Д. ја транспортирал дрогата до магацините на семејствата Н.С. и Р.С., од каде што У.М. ја продавал понатаму.
Во извештаите се вели дека И.Д. е косопственик на компанијата „Алфафарм“ во Скопскиот Регион, која е регистрирана за производство и преработка на медицински канабис.
Српската полиција соопшти дека заплената била извршена на 29 јануари во реонот на селото Коњух кај Крушевац. Министерот за внатрешни работи на Србија, Ивица Дачиќ, ја оцени како најголема заплена на дрога во земјата, со проценета вредност од седум до десет милиони евра.