Достапни линкови

Самит „ЕУ - Балкан“ - седум проекти за шест земји


Шефот на делегациајата на ЕУ во Македонија Самуел Жбогар и италијанскиот амбасадор Карло Ромео. 10.07.2017

Премиерите на шест земји од регионот заедно со нивните колеги од шест земји членки на Европската унија на 12 јули на Самитот за Западен Балкан во Трст ќе одржат разговори на високо ниво и ќе потпишат договори за реализација на седум проекти.

На Самитот во Трст кој ќе биде четврти во рамките на таканаречениот Берлинскиот процес премиерите на шесте земји членки на Европската унија, Италија, Германија, Франција, Велика Британија, Словенија, Хрватска и Австрија од нивните колеги од Македонија, Србија, Косово, Црна Гора, Албанија и Босна и Херцеговина очекуваат потврда за силната посветеност на регионот кон евроинтегративните процеси, изјави денеска шефот на делегацијата на ЕУ во Македонија, Самуел Жбогар на заедничка прес-конференција со италијанскиот амбасадор Карло Ромео.

Жбогар истакна дека за таа цел на земјите од регионот ќе им бидат одобрени средства од 200 милиони евра за реализиација на седум проекти за поврзување. Тој посочи дека ЕУ и земјите од регионот ќе потпишат договор за создавање на транспортна заедница, а приоритети ќе бидат надградба на соработката во економската сфера преку усвојување на акциски план за зголемена соработка во трговијата, безбедноста, борбата против тероризмот, прашањата за миграцијата, соработката меѓу невладиниот сектор, сузбивањето на корупцијата.

„Европската унија планира на регионот да му додели грантови во вредност од 1,3 милијарди евра до 2020 година за проекти во енергетика, траспорт и животна средина. Градењето на патишта, мостови и поврзувањето на териториите длабоко ќе придонесат за развивање на добрососедски односи и за промовирање на мирот во насока на доведување на економски придобивки“, изјави Жбогар додавајќи:

„На Самитот во Трст треба да биде одобрен концептот за регионална економска област на Западен Балкан, треба да биде надграден постоечкиот договор за слободна трговија ЦЕФТА. Оваа област ја гледаме како важна пресвртница за подготовките за процесот на интеграцијата на регионот во ЕУ“, изјави Жбогар.

Италијанскиот амбасадор во Македонија Карло Ромео исто така се осврна на приоритетите на Самитот во Трст, а тоа се како што рече, посветеноста на регионот кон евроинтеграциските процеси, развојот на малите и средни претпријатија, можностите за младите, соработката меѓу граѓанските организации.

„Приоритети ќе бидат консолидација на демократиите, безбедноста, социјалната и економската стабилност, надминување на логиката на поделби од минатото, запирање на однесувањето диктирано од некои националистички реторики“, рече Ромео.

Во насока на заедничките предизвици, Ромео додаде дека приоритети се безбедноста, борбата против меѓународниот тероризам и радикализацијата, миграцијата и борбата против корупцијата, додека за економскиот развој треба да биде развиена транспортната мрежа на Балканот и поврзување со мрежата на ЕУ, енергетскиот сектор, иновациите, инвестициите и регионалната економска област, можностите за младите.

На самиотот во Трст, освен премиерите на земјите од ЕУ и Западен Балкан, ќе присуствуваат и министрите за надворешни работи, за економија и транспорт и врски на земјите, исто така и шефицата за надворешна политика и безбедност на ЕУ Федерика Могерини и еврокомесарот за проширување Јоханес Хан.

  • 16x9 Image

    Владимир Калински

    По завршувањето на студиите по новинарство започна да работи во А2 телевизија каде што известуваше за политички, економски и социјални теми. Потоа беше ангажиран во македонската редакција на Радио Дојче Веле во Бон. Во последниве неколку години работи во Радио Слободна Европа.

XS
SM
MD
LG