Достапни линкови

Вести

Стејт департмент – Сеприсутна корупција и нецелосно владеење на правото во Македонија

Логото на американскиот Стејт департмент

Најзначајните проблеми со човековите права во Македонија произлегуваат од сеприсутната корупција и од неуспехот на владата целосно да го почитува владеењето на правото, вклучително и постојаните напори за ограничување на слободата на медиумите, мешањето во судството, попречувањето на работата на Специјалното јавно обвинителство, како и селективното спроведување на правдата, се наведува во делот за Македонија од извештајот за човекови права во 2016 што денеска го објави американскиот Стејт департмент. Во извештајот се наведува дека судскиот систем во Македонија го карактеризираат политички мешања, неефикасност, фаворизирање на добро позиционираните личности, пролонгирани процеси, кршење на правото на јавно судење и корупцијата.

„Пријавени се и физичко малтретирање притвореници и затвореници од страна на полицијата и затворските чувари, лоши услови и пренатрупаност во некои од затворите и психијатриските установи, одложен пристап до правна помош за притворениците и обвинетите, ограничување на правото на Ромите да ја напуштат земјата и да ги добијат уставно гарантираните здравствени, особено гинеколошки услуги, ограничување на пристапот до азил, намалена превенција и заштита на жртвите од трговија со луѓе, семејно насилство кон жените и децата, дискриминација на луѓето со попречености, институционална и социјална дискриминација на Ромите и другите етнички малцинска и на ЛГБТИ луѓето, како и детски труд, вклучувајќи и принудно питачење“, се наведува во извештајот.

Стејт департментот исто така наведува дека владата презела ограничени чекори во истражување, процесирање и казнување на официјалните претставници кои направиле прекршувања, вклучително и полициските службеници виновни за прекумерна употреба на сила, но неказнивоста продолжува да биде широко распространет проблем.

види ги сите денешни вести

Наставнички пленум бара пократки часови во наставата со физичко присуство

Наставничкиот пленум бара од Министерството за образование и наука скратување на времетраењето на часовите во наставата со физичко присуство од 45 на 30 минути бидејќи, како што наведува во соопштение, наставниците имаат големи потешкотии да ја реализираат наставата во затворен простор и почитување на сите протоколи утврдени од Комисијата за заразни болести.

Пленумот од МОН бара и во училишта во кои има повеќе од 15 ученици во паралелка да се премине на комбинирано учење односно физичко присуство и онлајн-настава.

„Итно да се реши проблемот со обезбедување на училиштата и општините кои се надлежни и задолжени за овој проблем тоа итно да го решат. Да се ослободат наставниците од секојдневните дежурства предвидени за период на учење со физичко присуство за време на пандемија“, наведува Наставничкиот пленум во барањата пратени до МОН и министерката Мила Царовска.

Министерката Царовска пак денеска изјави дека процентот на новозаразени во училиштата вчера бил 0,01, како и во двата дена претходно, а од 1 септември досега вкупните случаи не надминувааат 0,2 отсто. Според министерката Мила Царовска, тоа укажува на стабилност со вирусот во училиштата, но доколку Комисијата за заразни болести предложи промена на моделот, МОН ќе го примени.

„Министерството за образование и наука е во дневна координација со сите здравствени служби и неделно информира на состаноци на Главниот координативен штаб за состојбите во училиштата. Многу е значајно училиштата последни да се затворат, а први да се отворат и ова не е паушална изјава што ја посочувам како министерка, туку тоа е став на меѓународните организации УНИЦЕФ и ОЕЦД кои се грижат за квалитетот на образованието во сите држави во развој, меѓу кои е и нашата, изјави Царовска“, додавајќи дека Владата одговорно ги следи сите инструкции, искуствата од другите држави и дека се утврдени и антиковид-протоколи.

Државен завод за ревизија реагира за пренесување на сопственост на стварите на општините

Илустрација

Државниот завод за ревизија денеска соопшти дека со носење на одлуки во делот на движните и недвижните ствари во сопственост на општините потребно е да обезбедат законитост на истите и владеење на правото.

„Имено, Државниот завод за ревизија со вршење на ревизии на единиците на локалната самоуправа, во континуитет констатира несоодветно постапување на Советите на општините носејќи одлуки за пренесување на сопственост на преносни компјутери и мобилни телефони (движни ствари) на членовите на Советот без надомест, притоа оштетувајќи го имотот на општината, за остварување на лични цели“, наведуваат од ревизија.

Според ревизија, таквото постапување не e во согласност со одредбите од Законот за располагање со ствари во државна сопственост и со стварите во општинска сопственост, со член 64 и 66 од Законот за локална самоуправа каде е утврдено дека Општината со сопственоста располага како добар домаќин и стварите во сопственост на општината може да се продаваат по пат на електронско јавно наддавање, со цел чување и соодветно користење на имотот на единиците на локалната самоуправа.

Од ревизија наведуваат и дека таквото постапување не е во согласност со член 54 од Законот за спречување на корупцијата и судирот на интереси согласно кој секое службено лице е должно да ги чува државните средства што му се доверени и со нив да располага на најекономичен начин и за однапред определените намени.

„Забрането е средствата да се користат за приватни цели или да се даваат на друг на користење. Во овој контекст Државниот завод за ревизија упатува на законито, етичко, одговорно и транспарентно работење од страна на сите службени лица“, се додава во соопштението.

Општина Центар предложи советниците на кои им завршува мандатот да си ги задржат службените лаптопи, но под притисок ја јавноста предлогот беше тргнат од дневен ред.

Кампања за ослободување на активисти за човекови права во Белорусија

Хју Вилијамсон, директор за Европа и Централна Азија на Хјуман Рајтс Воч

Група од 23 меѓународни и белоруски невладини организации започнуваат кампања со која се бара ослободување на седум членови на белорускиот центар за човекови права „Вјасна“, кои беа приведени како дел од пошироката акција против граѓанското општество по претседателските избори минатата година.

Според соопштението, кампањата „СлободаВјасна“ е иницирана на истиот ден кога групите за човекови права ја одбележуваат годишнината од започнувањето на „бесрамниот лов на вештерки“ од страна на белоруските власти против Вјасна со приведување на координаторката на организацијата Марфа Рабков.

„Во следните месеци, шест други членови на организацијата за човекови права беа ставени зад решетки и обвинети за „неосновани“ кривични дела за извршување на нивната легитимна работа за човекови права“, се вели во заедничката изјава.

Кампањата, како штос е наведува, има за цел да ја истакне и маката на стотици други луѓе кои беа „гонети и затворени исклучиво за остварување на нивните права за мирно собирање и слобода на изразување“, откако на спорните претседателски избори во август 2020 година авторитарниот лидер Александар Лукашенко го доби шести мандат.

Владата на Лукашенко води војна против граѓанското општество и безмилосно ги потиснува сите форми на несогласување, рече Хју Вилијамсон, директор за Европа и Централна Азија на Хјуман Рајтс Воч.

„Клучните меѓународни актери треба да ги здружат силите за да побараат итно и безусловно ослободување на членовите на Вјасна и другите затворени активисти и да дадат се од себе за да помогнат и заштитат белоруското граѓанско општество“, порача тој.

Организациите за човекови права ги повикаа луѓето да се приклучат на кампањата.

Филипче: Од октомври ќе се бара сертификат за целосна имунизација

Министерот за здравство Венко Филипче

Министерот за здравство Венко Филипче денеска најави дека од октомври онаму каде се барало потврда за само една доза вакцина, ќе се бара сертификат за целосна имунизација, со две дози. Според него, за други рестрикции засега не се размислува.

„Единствено нешто на што засега размислуваме е да биде дозволен влез со целосна имунизација таму каде што досега се бараше една доза вакцина. Но, ќе оставиме доволно време, две или три недели, за граѓаните, затоа и најверојатно оваа мерка ќе се воведе во октомври. За задолжителна вакцинација е се уште рано, но не ја исклучувам можноста. Некои земји можеби идната година ќе воведат и таква мерка, но засега граѓаните треба да се свесни и да одговорат на апелите да се вакцинираат, зашто тоа е единствен начин за борба против пандемијата, истакна Филипче.

Според него, каде што е најголем опфатот со вакцинацијата, Охрид, Ресен, Вевчани, Неготино, Кавадарци, најмал е притисокот врз болниците, а онаму каде што има најмалку вакцинирани, како во Тетово и Гостивар, притисокот е огромен.

Филипче порача и дека не бега од одговорност и од прашањата и дека секогаш е достапен и обид за дефокус нема, но здравствениот систем е комплексен и мора да се менаџира. Одговорајќи на новинарски прашања во врска со трагедијата во Тетово, Филипче рече дека модуларната болница била пуштена откако надлежните потврдиле дека се проверени сите инсталации, струјата, канализацијата и дали персоналот се однесува согласно упатствата.

„Модуларните болници се модел без кој ниту една земја не ќе можеше да ја менаџира кризата. Направивме 700 болнички кревети за помалку од два месеца. Алтернатива на тоа ќе беше италијанското сценарио, да нема луѓето каде да се сместат и да не може да им се помогне. Во ситуација на пандемија само модуларна болница е решение. За модуларната болница во Тетово не известија дека се проверени сите инсталации, струјата, канализацијата и дали персоналот се однесува согласно упатствата. Сите потврдија дека се е во најдобар ред“, рече

Триесет затвореници имале статус на лице кое е во отворено или полуотворено одделение

Министерот за правда Бојан Маричиќ

Министерот за правда Бојан Маричиќ денеска изјави дека 30 лица кои се на издржување на затворска казна оваа година имале статус на лице кое е во отворено или полуотворено одделение и имаат можност да работат коментирајќи ја ситуацијата со осуденикот Зоран Милевски Кичеец. Според него, целосна будност и одговорност треба да покажат Управата за извршување на санкции и директорите на затворите.

„Директорите на затворите правата проценка и даваат мислење околу некое лице, а Судот одлучува каков статус ќе има, меѓутоа мислам дека во сите овие случаи присуството и ограниченоста на овие лица е гарантирана. Секој од нив има конкретен статус. Тој што го спомнавте, Зоран Милески Кичеец е повторно на продолжување на издржување на казната затвор во Затворот во Струга, со одземени сите погодности кои ги имал претходно од Судот“, изјави Маричиќ.

Во однос на случајот со поранешниот генерален секретар на Владата, Драги Рашковски, тој рече, дека ако по одобрение на Судот бил на лекар, тоа е случај со многу други притвореници и затвореници.

„Ниту се случило некое бегство, ниту пак некој бил под таква опасност. Во секој од тие случаи, Судот треба да цени и постапува, исто како и Обвинителството и директорите на затворите, затоа што тие се надлежни за обезбедување на овие лица. Никогаш не треба притворот да биде казна, но мора да биде превентивна мерка против влијаење на сведоци, бегство и повторување на делото и треба системот ефикасно да ги спречува сите овие лица за кои има индиции“, изјави Маричиќ.

На Зоран Милевски Кичеец му беше дозволен прекин на отслужување на затворската казна од 30 дена поради тахикардија, а Рашковски беше фотографиран како слободно е движи низ Скопје, иако е во домашен притвор.

Симовски до утре очекува да бидат попишани милион граѓани

Директорот на Државниот завод за статистика, Апостол Симовски

Директорот на Државниот завод за статистика , Апостол Симовски денеска изјави дека пописот се одвива со посакуваниот интензитет и без проблеми. Тој порача и дека е убеден оти пописот успешно ќе заврши во планираниот рок.

„До вчера попишани се точно 800.008 граѓани, а до утре очекуваме бројка од милион попишани граѓани. Бројот на оние кои одбиваат е незначителен, а по разговорите, кај нив повеќе нема двоумење се попишуваат. Оние кои повикуваат на бојкот, главно преку социјалнте мрежи не и мислат добро на државата. Повторувам дека пописот е статистичка, а не политичка операција“, рече Симовски кој денеска престојуваше во Дебар.

Тој заедно со соработниците тој имаше средба со пописната комисија, како и со градоначалникот на Дебар, Хекуран Дука. Според него, на тоа подрачје до сега не е регистриран случај на одвивање за попишување. Истата оценка ја изнесе и за општина Маврово и Ростуше, каде бил во посета пред Дебар.

И претседателот на пописната изборна комисија Решат Ќормемети искажа идентична оценка околу текот на пописот во општините Дебар и Центар Жупа, каде досега се попишани над осум илјади граѓани.

Ивановска: За граѓаните корупцијата е препознатлива, но мал дел пријавуваат

Претседателката на Државната комисија за спречување корупција, Билјана Ивановска

Директорката на Државна комисија за спречување на корупцијата Биљана Ивановска денеска изјави дека се е подготвено за локалните избори. Во функција, како што рече, е веб-апликација за пријавување на нерегуларности, како и апликација од регистарот на службени возила, со која се набљудува нивната злоупотреба.

„Имаме обезбедено набљудувачи, кои ќе бидат распоредени во неколку градови. Првпат оваа година имаме тројца аналитичари, економисти кои ќе ги сумираат резултатите од набљудувачите“, рече таа за време на гостувањето во Утрински Брифинг.

Таа додаде и дека во рамки на ИПА проект е обезбедена програма, преку која граѓаните ќе можат да пријават корупција.

„Голем дел од граѓаните, на анкетни прашања одговорија дека корупцијата е препознатлива и луѓето не сакаат да ја има. Но, многу мал процент од луѓето би се охрабриле да пријават“, додаде Ивановска и ги охрабри сите кои имаат свои забелешки да пријават, но и да се придржуваат до Законот за укажувачи.

Според неа, со цел да биде овозможено дискретен начин на пријава потребна е соработка и со Народниот правобранител и Министерството за внатрешни работи.

Во однос на оставката на министерот за здравство Венко Филипче, Ивановска порача дека во јавноста се прави забуна меѓу оставка од морален аспект и професионална одговорност.

„Можеби затоа оставката на министерот за здравство, Венко Филипче ни се чини задоцнета, меѓутоа е понудена и треба да се прифати“, рече Ивановска.

Филипче понесе пишана оставка до премиерот Зоран Заев по пожарот во модуларната болница во Тетово во кој загинаа 14 лица. Заев рече дека ќе почека да заврши истрагата па потоа ќе донесе одлука дали ќе ја прифати истрагата.

Маричиќ: Власта не се меша во истрагата за пожарот во Тетово

Министерот за правда Бојан Маричиќ

Министерот за правда Бојан Маричиќ изјави денеска дека власта воопшто не се меша во истрагата за пожарот во модуларната болница во Тетово во кој загинаа 14 лица.

„Да сакаше да се меша, немаше да повика германски истражители од највисок ранг, кои што треба да ги испитаат сите околности“, рече Маричиќ.

Германските истражители кои пристигнаа вчера, а, како што порача тој, сите институции се ставиле на располагање да помогнат во истрагата. Според него, вчера бил свикан Кризниот штаб и сите документи се предадени на надлежните институции.

„Обезбедено е местото на настанот и сите предуслови за брза и успешна истрага ги имаат институциите, а ние како Влада сме заинтересирани час поскоро да излезат институциите со фактите, кои ќе помогнат за понатамошно постапување и извлекување научени лекции од овој трагичен настан“, изјави Маричиќ.

Основното јавно обвинителство за гонење на организиран криминал и корупција ја добило целосната документација за набваката на модуларната болница во Тетово, а од денеска истражителите почнале со првично разгледување на истата.

Апликацијата на Навални за „Паметно гласање“ исчезна од интернет

Апликацијата „Паметно гласање“ повеќе не е достапна за симнување од интернет.

Апликација „Паметно гласање“ креирана од рускиот опозициски активист Алексеј Навални која има за цел да ја урне доминацијата на владејачката партија Единствена Русија, исчезнала од Епл и Гугл на истиот ден кога Русите почнаа да гласаат на националните парламентарни избори.

Сојузниците на Навални, кој моментално се наоѓа во затвор источно од Москва, рекоа дека апликацијата „Паметно гласање“ повеќе не е видлива во онлајн продавниците на двата технолошки гиганти, во моментот кога започнаа тридневното гласање за Државната Дума.

Апликацијата, која можеше да се преземе и надвор од Русија, претходно беше достапна и покрај зголемените закани од страна на руските власти кои побараа од Епл и Гугл да ја укинат.

Ниту Епл, ниту Гугл веднаш не одговорија на барањето на РСЕ за коментар.
Апликацијата „Паметно гласање“ е дизајнирана да ја прошири и поедностави иницијативата „Паметно гласање“, на која Навални и неговиот тим беа пионери во 2018 година.

Стратегијата ги идентификува кандидатите кои имаат најголеми шанси да го победат кандидатот на Единствена Русија, дури и ако тој алтернативен кандидат доаѓа од една од другите главни етаблирани политички партии.

Единствена Русија во моментов има големо мнозинство во Државната дума, при што Комунистичката партија има најмногу места во малцинството, следена од Либерално -демократската партија и Праведна Русија.

Албанскиот парламент ја одобри новата влада на Рама

Албанскиот премиер Еди Рама

Албанскиот парламент ја одобри новата влада во која доминираат жени по пет месеци од одржувањето на парламентарните избори и убедливата победа на Социјалистичката партија која му овозможи на премиерот Еди Рама трет мандат. Дванаесет од 17 министри и државни секретари се жени, со што земјата се искачи на врвот на глобалната ранг листа според процентот на жени кои се на функции во кабинетот.

По 20-часовна дебата, 77 пратеници во парламентот од 140 гласаа за одобрување на новиот кабинет и програма на Рама, чија цел е економскиот раст фокусиран на туризмот и земјоделството, инфраструктурата и енергијата. Педесет и три гласаа против, а еден беше воздржан.

Со 74 пратенички места, социјалистите освоија апсолутно мнозинство на парламентарните избори во април, што им овозможи да управуваат сами. Главната опозициска десноцентристичка Демократска партија доби 59 места.

Главните предизвици на владата ќе бидат завршување на процесот на реконструкција по разорниот земјотрес кон крајот на 2019 година, како и справување со пандемијата на коронавирус и нејзиното влијание врз економијата.

57-годишниот Рама рече дека борбата против криминалот и корупцијата ќе бидат приоритет во неговиот трет мандат. Новата влада предвидува економски раст од околу 4 проценти годишно, откако во 2020 година падна за 3,3 проценти, како резултат на пандемијата.

Рама ја предводи Социјалистичката партија од 2005 година и ја извршува функцијата премиер од 2013 година. Тој беше градоначалник на главниот град Тирана, од 2000 до 2011 година.

Попишани над 800 илјади граѓани

Илустрација

Државниот завод за статистика информираше денеска дека вкупно 800.008 лица, 249.500 домаќинства и 336.109 станови се попишани заклучно со 20 часот вчера. Можноста за самопопишување на лица во странство, според статистика, досега ја искористиле 193 168 лица.

Пописот на населението, домаќинствата и становите во Република Северна Македонија, кој официјално започна на 5 септември ќе трае до 30 септември.

Донација од 50 илјади вакцини „Фајзер“ од Бугарија

Илустрација

Министерот за надворешни работи Бујар Османи информираше дека земјата вчера ја примила донацијата од над 50.000 вакцини „Фајзер“ од Бугарија,

„Вакцините веќе се дистрибуирани и подготвени да се употребат. Важен гест на пријателство и солидарност“, напиша Османи на Твитер.

Бугарското Собрание на 8 септември ја одобри донацијата од над 50.000 вакцини за Северна Македонија. Бугарскиот министер за здравство, Стојчо Кацаров тогаш појасни дека донацијата требало да се изврши во јуни, но поради проблеми со процедурите не било тогаш извршена.

Средба на Шангајската организација за соработка за ситуацијата во Авганистан

Рускиот претседател Владимир Путин на виде врска со останатите лидери од Шангајската организација за соработка

Лидерите на Шангајската организација за соработка предводена од Русија и Кина се на средба во главниот град на Таџикистан, а во фокусот не разговорите се регионалните последици од меѓународното воено повлекувања од Авганистан и враќањето на Талибанците на власт.

Основан пред 20 години за борба против она што го нарекуваат „три зла“ на сепаратизмот, екстремизмот и тероризмот, евроазискиот безбедносен блок првично го сочинуваа Кина, Русија, Киргистан, Казахстан, Таџикистан и Узбекистан пред Индија и Пакистан да се приклучат во 2017 година.

Не е јасно како лидерите ќе најдат заеднички јазик во Душанбе, бидејќи имаат различни ставови за тоа како да се справат со новите владетели во Авганистан.

Самитот е по еден ден откако лидерите на друг регионален безбедносен блок-Организацијата за колективна безбедност предводена од Русија, исто така, разговараа во главниот град на Таџикистан.

Дводневните преговори доаѓаат додека Москва и Пекинг сакаат да се наметнат како клучни играчи во регионот по брзиот колапс на владата во Кабул, поддржана од Западот, на крајот на 20-годишната воена мисија предводена од САД во Авганистан. И двете безбедносни групи се сметаат за противници на Москва и Пекинг за геополитичката доминација на САД.

Рускиот претседател Владимир Путин се приклучи на разговорите во Душанбе преку видео конференција по самоизолација поради близок контакт со неколку луѓе кои биле позитивни на Ковид-19. Кинескиот претседател Си Џинпинг и индискиот премиер Нарендра Моди, исто така, учествуваат на состанокот.

Почнаа парламентарните избори во Русија, ќе траат до недела

Парламентарни избори во Русија

Во Русија денеска почнаа тридневните парламентарни избори, на кои се очекува да доминира владејачката Единствена Русија, поддржана од претседателот Владимир Путин, по ударот зададен врз критичарите на Кремљ.

Русите на Далечниот Исток го започнаа гласањето изутринава во огромната земја која опфаќа 11 временски зони, додека московјаните се уште спиеја.

На изборите што ќе траат до недела, ќе бидат избрани пратеници за 450 места во долниот дом на парламентот, односно Државната дума.

Покрај гласањето за Думата, се одржуваат и локални избори во десетици региони, вклучително и за регионално собрание и гувернерски избори.

Анкетите пред изборите на независниот центар Левада покажуваат дека мнозинството Руси не биле задоволни од тоа како функционира Думата. Анкетите покажуваат уште подлабок презир кон Единствена Русија, номинално независна партија, која всушност е тесно поврзана со насоките од Кремљ и моќната претседателска администрација.

Единствена Русија има супериорно мнозинство во парламентот, но нејзината популарност во моментов е најниска во речиси дведецениското постоење. Наспроти тоа, Путин, кој формално не е член на оваа партија, има рејтинг на одобрување од околу 60 проценти и нема вистински политички ривал.

Повеќе од милијарда Кинези целосно вакцинирани против Ковид-19

Кинеските здравствени власти соопштија дека повеќе од милијарда жители на оваа земја се целосно вакцинирани против Ковид-19, што претставува околу 72 насто од вкупно 1,4 милијарди луѓе.

Во меѓувреме, Кина се бори со избивањето на инфекцијата во југоисточната провинција Фуџијан, каде што во последните 6 дена се потврдени 200 случаи на позитивни на коронавирусот.

Властите ги затворија погодените населби, училишта и места за забави и ги ограничија патувањата надвор од тие провинции.

Кина го запре ширењето на вирусот со воведување ограничувања и со масовно тестирање кога ќе се откријат нови случаи. Освен тоа, воведе ограничување за влез во земјата и задолжителен карантин од најмалку две недели.

Меркел во проштална посета на Франција и средба со Макрон

Ангела Меркел и Емануел Макрон

Францускиот претседател Емануел Макрон ја прими вчера во проштална посета германската канцеларка Ангела Меркел, со која разговараше за европските прашања и за кризата во Авганистан.

Макрон изјави дека ќе продолжи да работи заедно со Меркел се додека не се формира нова германска влада, по изборите закажани за 26 септември. Тој истакна дека за некои прашања ќе понудат заедничко француско- германско решение, на пример за кризата во Авганистан и за борбата против тероризмот.

Од своја страна, Меркел изрази надеж дека нема многу да се одолговлекува формирањето нова германска влада.

Според западни медиуми, Меркел би можело да биде се уште на фунцијата на 6 октомври, кога во Љубљана треба да биде одржан самит меѓу ЕУ и Западен Балкан.

Во Скопје почнува дводневниот уличен фестивал „Статуафест“

На улица „Македонија“ во центарот на Скопје денеска и утре од 18:30 до 21.30 часот ќе се одржува петтиот уличен уметнички фестивал за живи статуи „Статуафест – Скопје на улица“, во организација на Зружението на граѓани ТимТеатросК, со поддршка од Театар за деца и младинци и под покровителство на Град Скопје.

Организаторот најави дека годинава, како и минатата година, на фестивалот ќе настапуваат исклучиво домашни артисти, зашто основна цел на театарската компанија за улична уметност е да создаде пообемна домашна продукција каква што ја има насекаде по светските фестивали.

Темата на годинашниот фестивал е „Скопје на улица“. Како што наведува организаторот, во преносна смисла „Статуафест“ ќе биде огледало на самите нас, односно „што се прават скопјани во текот на едно деноноќие движејки се забрзано или, пак, бавно низ улиците на нашиот град“.

Франција суспендира околу 3 илјади здравствени работници зашто не се вакцинирани

Околу 3 илјади француски здравствени работници се суспендирани затоа што не се вакцинирале против коронавирусот, изјави министерот за здравство Оливие Веран.

Во средата стапи во сила задолжителното вакцинирање за 2, 7 милиони вработени во болниците, домовите за пензионери, итната помош, негувателите.

Според министерот Веран, неколку десетици медицински работници дале отказ поради задолжителното вакцинирање. Повеќето од оние што не се вакцинирале се во службите за поддршка и не се медицински персонал, истакна тој.

Суспендираните работници нема да примаат плата, но ниеден од нив нема да биде отпуштен од работа.

Во Скопје конференција за борба против организираниот криминал и корупцијата

Коалицијата „Сите за правично судење“ во соработка со Асоцијацијата за демократски иницијативи, денеска организира завршна конференција насловена „Напредокот во борбата против организираниот криминал и корупцијата во контекст на планот на Владата за борба против корупцијата“.

Завршната конференција е активност која се спроведува во рамки на проектот „Мониторинг и подобрување на капацитетите на институциите во справување со организираниот криминал и корупцијата“, финансиран од Делегацијата на Европска Унија, преку ИПА програмата.

Целта на оваа конференција, според Коалицијата „Сите за правично судење“, е да се промовираат активностите и резултатите постигнати со имплементација на проектот „Мониторинг и подобрување на капацитетот на институциите во справување со организиран криминал и корупција“, како и да се иницира дискусија за напредокот во справувањето со организираниот криминал и корупција во контекст на планот на Владата за борба против корупцијата.

Времето натпросечно топло, вечер локален пороен дожд

Времето денеска ќе биде сончево и натпросечно топло со умерена облачност.

Ќе дува умерен ветер од југозападен, а во западните делови засилен ветер од западен правец (на места со брзина и над 70 км/час).

Во текот на ноќта во северозападните делови ќе има локален пороен дожд.

Максималните температури ќе се движат од 26 степени во Маврово, до 37 во Гевгелија.

Германските експерти вршеа увид во опожарената модуларна болница во Тетово

Германските експерти денеска започнаа со увидот во опожарената модуларна болница во Тетово. Нивната истрага треба да ги открие причините зад пожарот во кој животот го загубија 14 лица.

Германски тим од Федералната криминалистичка служба донесе своја опрема и е составен од двајца крим техничари за истражување пожари и двајца крим техничари и форензичари за ласерско мерење на простории и за фотографирање.

Изгоре ковид-центарот во Тетово, потврдени 14 починати

Германските експерти ќе работат заедно со крим техничарите на МВР како поддршка на Основното јавно обвинителство.

Нови 557 случаи на Ковид-19, починаа 28 лица

Модуларна ковид болница во Гостивар

Во последните 24 часа регистрирани се нови 557 случаи на Ковид-19, од направени 3.885 тестирања. Во изминатото деноноќие се евидентирани починаа 28 лица. Од починатите најмногу се од Скопје- вкупно 11, потоа по 3 починати лица од Струмица и Тетово, по 2 починати лица од Гостивар и Куманово, по едно починато лице од Битола, Кичево, Валандово, Кавадарци, Гевгелија, Охрид и Струга.

Од пријавените 28 лица, 26 се починати во болнички услови, а две лица се починати во домашни услови. Досега во земјата се направени вкупно 1.238.106 тестирање на Ковид-19. Вкупната бројка на КОВИД-дијагностицирани лица во земјава од почетокот на епидемијата изнесува 185.450 бројката на оздравени пациенти е 166.099, на починати е 6.367, а бројот на активни случаи изнесува 12.984.

Иран дозволи употреба на американската вакцина на „Џонсон и Џонсон“

Иранските власти ја одобрија употребата на вакцината против коронавирус, произведена од американскиот фармацевтски гигант „Џонсон и Џонсон“, додека Иран се соочува со петтиот бран на инфекции со ковид-19. Одлуката на Иран да ја одобри вакцината на фирмата „Џонсон и Џонсон“ доаѓа осум месеци откако врховниот лидер Ајатолахот Али Хамнеи ги забрани вакцините произведени во Велика Британија и САД, велејќи дека тие земји се „недоверливи“.

Иранскиот претседател Ебрахим Раиси, кој ја презеде функцијата во август, вети дека ќе даде приоритет во борбата против пандемијата.

До сега Иран користеше сопствена вакцина позната како КовИран Баракат, потоа рускиот „Спутник Ве“ , идниската „Коваксин“.

Иранското Министерство за здравство соопшти дека околу 13 милиони луѓе од 83 милиони жители на земјата се целосно вакцинирани.

Според ресурсниот центар за коронавирус Џонсон Хопкинс, Иран регистрирал повеќе од 5.378.000 заразени со ковид-19 и 116.072 смртни случаи од коронавирусот од почетокот на пандемијата, што ја прави најтешко погодената земја на Блискиот Исток. Иран регистрираше скоро 16,000 смртни случаи од ковид-19 во последните 28 дена.

Рама: Никој не може да и држи лекции на Албанија

Албанскиот премиер Еди Рама

Албанскиот премиер Еди Рама, чиј нов, трет по ред владин кабинет треба да биде изгласан денеска, при презентацијата на владината програма, задржувајќи се на иницијативата „Отворен Балкан“ повторно ја критикуваше Приштина што не се приклучила на иницијативата. Тој одлуката на Приштина ја оцени како избрзана. Според Рама Косово си игра со незнаење и порача да стане дел од оваа иницијатива, затоа што од неа корист имаат сите Албанци.

Рама вели дека сагата за конфликтот Косово-Србија никогаш не се затвора со изолација, туку само со отворање, пристапување кон проблемот, дискусија.

„Отворен Балкан не е игра на Србија. Отворен Балкан не е руски или кинески заговор за заживување на Југославија. Тоа не е отстапување од интеграцијата. Сето ова се приказни на гугл, со непријател кого Косово, Албанија, конечно го победија како непријател во вистинската војна со топови и пушки, благодарение на САД и најголемите европски сојузници. Секому треба да биде јасно дека Отворен Балкан не е „српска игра“, туку „ пород на Берлинскиот процес“, изјави денеска Рама.

Тој на критичарите на оваа иницијатива им порача дека на Албанија не може да и се држат предавања и за нејзините суверени одлуки не може да се преговара никаде, а времето ќе покаже кој е во право.

„Косовските власти треба да ја донесат одлуката, додека наше е само да ги почитуваме. Сепак, албанските власти одлучуваат за Албанија и тие мора да ги почитуваат нашите одлуки. Ако не ни се допаѓаат одлуките, треба да разговараме за нив, но никогаш да не ги прогласуваме за предавници, проруси и просрби, оние кои размислуваат поинаку, играјќи со незнаење“, истакна во својот говор Рама.

Европските пратеници сметаат дека санкции за Либан и натаму се опција

ИЛустрација Либан

Европската унија треба и натаму да размислува за воведување санкции против либанските политичари кои го блокираат напредокот на новата влада, се вели во соопштението на парламентот на ЕУ. Претходно еврокомесарот за надворешна политика на ЕУ, Жозеп Борел изјави пред Европскиот парламент дека моментот за санкции помина бидејќи политичарите во таа земја формираа влада на 10 септември.

Либан по повеќе од една година политички ќорсокак пред една недела го направи првиот чекор кон формирање на влада.

Парламентот „ги повикува либанските лидери да ги исполнат своите ветувања и да бидат функционална влада“, се вели во резолуцијата на парламентот. Таа не е обврзувачка за новата либанска влада, која вети дека ќе се справи со едно од најлошите економски кризи во историјата во светот.

Пратениците од ЕУ предупредија дека воведувањето на целни санкции за попречување или поткопување на демократскиот политички процес останува како опција.

ЕУ се согласи во јуни да подготви забрани за патување и замрзнување на имотот за либанските политичари обвинети за корупција и попречување на напорите за формирање влада, финансиски малверзации и кршење на човековите права.

Но, досега имињата на политичарите не се официјално идентификувани. Дополнително со финансискиот колапс, хиперинфлацијата, прекини на електрична енергија и недостаток на храна што ја уништуваат земјата, Парламентот се надева дека овој повик ќе ги фокусира умовите на либанските политичари, од кои многумина имаат имот во ЕУ.

Вчитај повеќе

XS
SM
MD
LG