Достапни линкови

Вести

Теренска проверка на спорните гласачи

Државната изборна комисија денеска започна со теренска проверка на над 89 илјади спорни гласачи во Избирачкиот список. Теренската проверка ја вршат анкетари на ДИК за кои беше спроведена обука. Заедно со нив има и набљудувачи од четирите политички партии, кои смеат само да набљудуваат, но не и да се мешаат. Анкетарите ќе ги посетуваат граѓаните на домашна адреса. Доколку не бидат пронајдени дома, анкетарите ќе ги посетат уште еднаш, а доколку и тогаш не бидат најдени, на граѓаните ќе им биде доставено известување да дојдат во подрачното одделение на ДИК. Теренската проверка би требало да заврши до 3 април. ДИК денеска одржува седница на која на дневен ред е Извештајот за прогресот во спроведувањето на теренските проверки на Избирачкиот список. На седницата ќе стане збор и за можноста за објавување на неконзистентните записи од вкрстените проверки на интернет, како и за барањата на Мисијата на ОБСЕ, МОСТ и Синергија за набљудување на теренските проверки.

види ги сите денешни вести

Зеленски во посета на Шпанија

Украинскиот претседател Володомир Зеленски
Украинскиот претседател Володомир Зеленски

Претседателот на Украина, Володимир Зеленски денеска во Мадрид ќе се сретне со премиерот на Шпанија, Педро Санчез и со шпанскиот крал Фелипе Шести.

Тоа е прва официјална посета на Зеленски на Шпанија. Санчез претходно најави дека на средбата со Зеленски ќе биде потпишан договор за билатерална соработка.

Украина такви договори склучи со Германија, Франција, Италија и други земји.

Зеленски требаше да престојува во Шпанија во средината на месецот, но посетата беше откажана поради новата руска офанзива во северна Украина.

Грузиската претседателка апелира за радикални реформи во земјата

 Саломе Зурабишвили
Саломе Зурабишвили

Претседателката на Грузија, Саломе Зурабишвили вчера побара радикални реформи пред клучните парламентарни избори, кои се одржуваат во услови на политичка криза поради контроверзниот закон за „странско влијание“, на кој таа стави вето.

„Грузија мора да создаде нова политичка реалност“, изјави Зурабишвили во говорот по повод Денот на независноста на Грузија и ги повика сите проевропски политички партии да се приклучат на нејзината иницијатива и да формираат обединет опозициски фронт пред парламентарните избори во октомври.

Зурабишвили ги критикуваше и неколкуте закони донесени од владејачката партија Грузиски сон „кои се штетни за европскиот курс на Грузија“.

„Мора да бидеме способни да ги почнеме преговорите за членство во ЕУ што е можно поскоро“, истакна Зурабишвили.

Неколку опозициски партии ја поддржаа иницијативата на претседателката Зурабишвили, кој се соочува со Грузискиот сон, партија обвинета дека го опструира членството на Грузија во ЕУ и го враќа Тбилиси во руската орбита.

Владејачката партија Грузиски сон, која е на власт од 2012 година има големо мнозинство во Парламентот и се очекува следната недела да го отфрли ветото на претседателката на законот за „странско влијание“.

Од декември 2023 година, Грузија е официјален кандидат за членство во ЕУ. Иако Грузиски сон, официјално ја поддржува уставната цел, земјата да биде членка на ЕУ и на НАТО, изминатите последните години презеде повеќе мерки за приближување на земјата до Москва.

Законот за странско влијание предвидува бара медиумите и невладините организации кои повеќе од 20 отсто се финансираат од странство да се регистрираат како „агенти на странско влијание“. Според критичарите, законот е премногу сличен на законодавството што го користи Кремљ за да ги замолчи противниците и дека ќе ја попречи кандидатурата на Грузија за членство во ЕУ.

ВМРО-ДПМНЕ: Се уште нема конечен договор со ЗНАМ

Средба на Движењето ЗНАМ со потпретседателите на ВМРО ДПМНЕ
Средба на Движењето ЗНАМ со потпретседателите на ВМРО ДПМНЕ

На само два дена пред одржување на конститутивната седница во Собранието, партијата ВМРО-ДПМНЕ која освои 58 пратенички мандати седна на преговарачка маса со Движењето Знам кое на парламентарните избори освои 6 пратенички мандати.

На вчерашната прва официјална средба во просториите на Знам, претставници од ВМРО-ДПМНЕ биле потпретседателите на партијата Владо Мисајловски и Тимчо Муцунски наспроти генералниот секретар Горан Минчев и потпретседателите Весна Бендевска и Павле Арсоски од другата страна.

Ни ВМРО-ДПМНЕ ни Знам не соопштија никаки детали од средбата или исходот од преговорите.

„Се уште нема конечен договор, тоа што можам да го споделам е дека разговорите се одвиваат во позитивен дух, изјави портпарол на ВМРО-ДПМНЕ Наум Стоилковски, одговарајќи на новинарско прашање дали Движењето ЗНАМ станува дел од Владата и кои ресори би ги добиле.

Од Движењето ЗНАМ, кое го предводи кумановскиот градоначалник Максим Димитриевски, кусо информираа дека на средбата се разговарало за стратешките определби, политичките начела и политичката платформа за соработка.

Претходно вчера, од ВМРО-ДПМНЕ информираа дека преговорите меѓу коалициските партнери за идната Влада се во напредна фаза, но оти се уште нема конечен договор со Коалицијата „Вреди“ и се до официјално моментот кога ќе може да се соопшти нема да соопштуваат никакви детали.

ВМРО-ДПМНЕ, претходно излезе со став дека имаат консолидирано 61 пратеник, без при тоа да посочи кои се дополнителните три пратеници кои ќе им се приклучат. Новата влада, како што претходно најавија од ВМРО-ДПМНЕ се очекува да биде формирана до 20-ти јуни.

За вторник, 28 мај, е закажана конститутивната седница на новиот парламентарен состав. Во новиот парламентарен состав најмногу пратеници има коалицијата „Твоја Македонија“ предводена од ВМРО-ДПМНЕ - 58, коалицијата„ За европска иднина“ предводена од СДСМ има 18 пратеници, коалицијата Европски фронт предводена од ДУИ има исто 18 пратеници, коалицијата ВЛЕН 14, Левица шест и ЗНАМ шест пратеници.

Французинката Ле Пен се обидува да се „обедини“ со Италијанката Мелони

Лидери на десницата во Европскиот Парламент
Лидери на десницата во Европскиот Парламент

Француската крајнодесничарска политичарка Марин Ле Пен вели дека би сакала поблиску да соработува со италијанската премиерка Џорџа Мелони.

„Сега е моментот да се обединиме“, рече Ле Пен за италијанскиот весник „Кориере дела сера“ во ек на предизборната кампања.

Партијата на Ле Пен се очекува да освои повеќе гласови од партијата на францускиот претседател Емануел Макрон на изборите за Европскиот парламент кои ќе се одржат за нешто помалку од две недели. Ваквите очекувања се дел од поширокиот бран на крајната десница кој ги зафати неколку земји членки на Европската Унија.

“ Ќе бидеме успешни, можеме да станеме втората по големина група во Европскиот парламент, мислам дека таквата можност не треба да се пропушти“, рече Ле Пен во коментарите објавени во неделата.

Според Ле Пен, таа и Мелони се согласуваат за клучни прашања а сојузот може да биде корисен .

Двете политичарки припаѓаат на две различни политички групи во Европскиот парламент. Партијата на Ле Пен учествува со десничарската група „Идентитет и демократија“ (ИД), додека „Браќата на Мелони“ од Италија, кои имаат неофашистички корени, им припаѓаат на европските конзервативци и реформисти (ЕЦР).

Неодамна се отвори голем јаз во групата „Идентитет и Демократија“ поради германската партија „Алтернатива за Германија“ Проблемот го предизвика водечкиот кандидат на Алтернатива за Германија за изборите, Максимилијан Кра, велејќи дека не сите членови на СС, нацистичка паравоена група, се криминалци.

Таквата изјава ја предизвика Ле Пен која ја исфрли партијата Алтернатива за Германија од групата „Идентитет и Демократија“, затоа што се обидува да се исчисти од антисемитска репутација. Набљудувачите веруваат дека Ле Пен сака да се приближи до Мелони и нејзината партија со цел да создаде нови сојузи во Европа по расколот во групата ИД.

Најмалку 14 луѓе загинаа при руски напад врз Харкив

Архивска фотографија
Архивска фотографија

Украинските спасувачи ги пребаруваа јагленосаните остатоци од трговскиот центар во Харкив за тела, бидејќи официјалните лица соопштија дека бројот на загинати од руски ракетен напад се искачи на најмалку 14.

Речиси четириесетина луѓе беа ранети во нападот на 25 мај, кој ја погоди продавницата додека голем број купувачи ја посетуваа продавницата „Епицентар“.


Гувернерот на регионот Харкив, Олех Синјехубов, рече дека билансот изнесувал 14 загинати до пладне на 26 мај, но поради стравувањата дека бројката ќе порасне, спасувачите користеле тешка опрема за да ги преберат остатоците.

Најмалку 43 лица се ранети, изјави Ихор Терехов, градоначалник на Харкив.

„Нападот беше насочен кон трговскиот центар, каде што имаше многу луѓе. Ова е очигледно тероризам“,напиша Техеров на социјалната платформа Телеграм.

Министерот за внатрешни работи Ихор Клименко, пак, рече дека 16 лица се уште се водат како исчезнати по нападот.

Хамас истрела ракети кон Тел Авив за прв пат по неколку месеци

Илустрација, Газа
Илустрација, Газа

Палестинската исламистичка група Хамас, која САД и Европската унија ја сметаат за терористичка, истрела ракети кон Тел Авив за прв пат по четири месеци, активирајќи предупредувачки сирени во израелскиот град.

Неколку експлозии се слушнаа во центарот на Тел Авив, а се огласија и ракетни аларми во неколку градови во пошироката област.

Одговорноста за нападите ја презеде военото крило на Хамас, организација која САД и Европската унија ја сметаат за терористичка.

Според здравствените власти две жени биле полесно повредени додека брзале кон засолништата.

Израелски воени извори за новинската агенција ДПА изјавија дека осум ракети биле истрелани од градот Рафа во јужниот дел на Газа, каде што Израел ја продолжува својата воена операција и покрај неодамнешната одлука на Меѓународниот суд на правдата (МСП) која нареди да престане.

Неколкуте проектили, наводно, биле пресретнати од израелскиот противракетен одбранбен систем, јавува германската новинска агенција ДПА.

Последен пат Тел Авив беше нападнат со ракети од Појасот Газа на 29 јануари.

Најмалку 10 луѓе загинаа при поплава во Авганистан

Илустрација
Илустрација

Поплавите од обилните врнежи зафатија село во североисточен Авганистан, при што загинаа 10 членови на едно семејство. Локалните талибански претставници во провинцијата Бадакшан изјавија за Радио Азади на Рaдио Слободна Европа дека четири тела се извлечени, а спасувачите трагаат по повеќе по поплавите на 26 мај во текот на ноќта.

Шефот на провинцискиот Оддел за борба против катастрофи, Мохамад Акрам Акбари, рече дека голем број села биле погодени од поплавите.

Во Баглан, околу 300 километри северно од Кабул, талибанските власти соопштија дека 40 куќи биле уништени од поплавите.

Минатата недела поројните поплави предизвикани од обилните дождови опустошија села во северен Авганистан, при што загинаа 315 луѓе, а повеќе од 1.600 беа повредени, соопштија властите.

Авганистан е земја во која често има природни катастрофи и Обединетите нации ја сметаат за една од земјите најранливи на климатските промени.

Авганистан се соочи со недостиг на странска помош откако Талибанците ја презедоа власта во 2021 година по повлекувањето на меѓународните сили.

Камиони со хуманитарна помош влегуваат во Газа

Илустрација, Газа
Илустрација, Газа

Камиони со хуманитарна помош влегоа во Газа од јужен Израел на 26 мај, според новиот договор за заобиколување на преминот Рафа со Египет, откако израелските сили ја зазедоа палестинската страна на преминот.

Сепак, не е јасно дали хуманитарните групи ќе можат да пристапат до камиооните поради тековните борби во областа.

Египет одбива повторно да ја отвори својата страна на преминот Рафа додека на Палестинците не им се врати контролата на страната Газа. Египет се согласи привремено да го пренасочи сообраќајот преку израелскиот премин Керем Шалом, главниот карго терминал во Газа, по разговорите меѓу американскиот претседател Џо Бајден и египетскиот претседател Абдел-Фатах ел-Сиси.

Но, тој премин беше главно недостапен поради борбите поврзани со израелската офанзива во блискиот град Рафа. Израел тврди дека дозволил да влезат стотици камиони, но хуманитарците од ОН тврдат дека е премногу опасно да се земе помош од другата страна.

Во осуммесечната војна меѓу Израел и палестинската група Хамас, која САД и Европската унија ја сметаат за терористичка, според податоците на Хамас, загинале повеќе од 35.900 Палестинци, без да се прецизира колку цивили и борци.

Околу 80 отсто од 2,3 милиони жители ги напуштиле своите домови, силна глад е широко распространета, а претставници на ОН велат дека делови од територијата доживува глад.

Хамас ја започна војната со нападот врз Израел на 7 октомври, во кој палестинските милитанти убија околу 1.200 луѓе, главно цивили, а земаа околу 250 заложници. Хамас сè уште држи околу 100 заложници и останките на околу 30 други, откако повеќето од другите беа ослободени за време на прекинот на огнот минатата година.

Доцна на 25 мај, Хамас тврдеше дека заробил израелски војник за време на борбите во северниот дел на Газа и објави видео на кое се гледа како ранетиот е влечен низ тунел. Израелската армија негираше дека некој од нејзините војници бил заробен, а Хамас не обезбеди други докази за да го поткрепи своето тврдење.

Европски фронт достави приговор за прегласувањето во Желино

Илустрација
Илустрација

Коалицијата „Европски фронт“ доставила приговор до Државната изборна комисија (ДИК) за прегласувањето на Изборното место 2101 во село Ларце во Општина Желино, велат од ДИК. Со прегласувањето на ова избирачко место, коалцијата „Европски фронт “ предводена од ДУИ изгуби едно пратеничко место, а едно повеќе доби нејзниот опонент коалицијата Влен.

Други приговори за прегласувањето на 22 мај во седум изборни места во петата и шестата изборна единица до ДИК нема пристигнато.

Според изборните правила ДИК за приговорот дали го прифаќа или не, треба да донесе одлука во рок од 72 часа по приемот на приговорот. На решението од ДИК кандидатите имаат право на тужба до Управниот суд кој, пак треба да одлучи во рок од 48 часа по приемот на тужбата.


Според првичните резултати по прегласувањето во седум избирачки места во изборните единици пет и шест на парламентарните избори коалицијата „Твоја Македонија“ предводена од ВМРО-ДПМНЕ останува со 58 пратенички мандати, додека Коалицијата „Европски фронт“ предводена од ДУИ загуби еден пратеник и има 18 пратенички мандати, исто колку и Коалицијата за европска иднина предводена од СДСМ. Коалицијата „Вреди“ по прегласувањето доби еден пратеник повеќе и сега има 14, додека Движење ЗНАМи Левица остануваат со по шест пратенички мандати.

Режисерот кој избега од Иран доби 12-минутни овации на канскиот фестивал

Иранскиот филмски режисер Мохамад Расулоф,
Иранскиот филмски режисер Мохамад Расулоф,

Иранскиот филмски режисер Мохамад Расулоф, кој побегна од затвор и казна од камшик во својата земја, беше награден со специјална награда од жирито на Канскиот филмски фестивал за неговата приказна за судски истражител чиј семеен живот е растргнат за време на антивладините протести.

При прифаќањето на наградата во францускиот туристички град, 51-годишниот Расулоф рече дека неговото срце е со неговата филмска екипа, која „се уште била под притисок на тајните служби во Иран“.

Специјалната награда на жирито му беше доделена на Расулоф за „привлекување внимание кон неодржлива неправда“ во Иран, соопштија организаторите по проекцијата на филмот „Семето на светата смоква“, што доведе до 12-минутни овации.


Главната награда на фестивалот, пак, отиде во рацете на филмот „Анора“, сензуална драма и комедија за егзотична танчерка која се вплеткува со син на руски олигарх.

Претходно на прес-конференција, Расулоф потсети како во рок од неколку часа морал да одлучи дали да оди во егзил или да одлежи затворска казна, велејќи дека сè уште е тешко да се зборува за тоа.

„Морав да си кажам, добро, дали сакам да бидам во затвор или да го напуштам Иран, географски Иран и да се приклучам на културниот Иран што постои надвор од неговите граници?“, рече Расулоф, кој е отворен критичар на репресијата во Иран и двапати одлежа затворски казни.

Иранското правосудство го осуди Расулоф на камшикување и осум години затвор, откако беше осуден за „дејствија против националната безбедност“, рече неговиот адвокат Бабак Пакнија на 8 мај.

Деталите за неговото бегство од Иран не се целосно познати. Тој рече дека акцијата била измислена со користење на контакти што ги остварил за време на неговиот престој во затвор.

„Колку повеќе поминувате време со испрашувачите, тајната полиција, толку повеќе учите како да ги спречите“, изјави тој за новинската агенција АФП во Кан.

„Тие ви ги покажуваат вашите мејлови, па учите како да ги пишувате.

Расулоф рече дека и дошол до идејата за „Семето на светата смоква“ додека бил во затвор.

Западните застапници за заштита на човековите права и луѓето од филмската индустрија ги осудија дејствијата на Иран против Расулоф и побараа негово ослободување.

Расулоф ја доби главната награда на Берлинскиот филмски фестивал во 2020 година за неговиот филм Нема зло, кој раскажува четири приказни слабо поврзани со темите на смртната казна во Иран и личните слободи под угнетување.

Вчитај повеќе

XS
SM
MD
LG