Катастрофална состојба во медицинскиот отпад во државата

Ситуацијата со одлагањето на медицинскиот отпад во Битола и во многу други градови во државата е катастрофална, посочува професорот епидемиолог Снежана Стоилова. Иако има закон и правилник за ракување и уништување на ваквиот отпад упатствата доследно не се применуваат во повеќето болници, па дури и да се постапува по нив, на крајот сметот завршува во обични контејнери поставени во кругот на болниците, па на комуналните депонии. Со ова на удар на различни инфекции се вработени во болниците, пациенти како и случајни минувачи во близина на местата каде има медицински отпад.

„Отпадот е катастрофа. Медицинскиот отпад треба да има посебен дел во кругот на битолската болница, каде што целосно би се собирал. Се разбира, треба да има затворен дел, одвоен итн. Знаете дека тоа е едно собиралиште кое не одговара на тие стандарди, не е ниту оградено“, вели Стоилова.

Во државата има само една санитарна депонија, тоа е Дрисла, каде се уништува медицинскиот отпад од Скопје и Куманово на соодветен начин.

„Другите здравствени установи, иако го сепарираат, иако означуваат, пакуваат, заради немање постојка за уништување на медицинскиот отпад тој завршува на сметиштата“, вели Михаил Курчуловски од институрот за јавно здравство.

Решение за проблемот се гледа во изградба на регионални депонии кои по европски стандарди ќе треба да управуваат со уништување на сметот. До тогаш, една битолска фирма набави подвижна механизација за уништување на медицинскиот отпад.

„Моментално во Република Македонија е на многу ниско ниво третманот на медицинскиот отпад. За жал, тоа е така затоа што согорувањето се вршеше само во една печка на депонијата Дрисла. Од неодамна, имаме мобилен генератор, и може да работи на територијата на цела Македонија“, вели Сашо Јанковски од Еко Клуб Битола.