Достапни линкови

Вести

Состанок за Авганистан во Истанбул

Лидери од земјите кои се граничат со Авганистан денеска треба да се сретнат во Истанбул, Турција. Тема на лидерската среба е како да се помогне за Авганистан да оствари мир и стабилност. На средбата би требало да се сретнат авганистанскиот претседател Хамид Карзаи, претседателот на Пакистан Азиф Али Зардари и претставници од Иран, Кина, Таџикистан и Туркменстан.

види ги сите денешни вести

Ахмети - фракции во ДУИ не се дозволени

Лидерот на ДУИ Али Ахемти.

Претседателот на ДУИ, Али Ахмети денеска по средбата на Централното претседателство кој се одржа во седиштето на партијата во Мала Речица изјави дека фракции во ДУИ не се дозволени, откако членовите на „Огнената група“ претходно најавија дека ќе делуваат како фракција во партијата.

„Фракција врз основа на статутот на ДУИ и одлуките на Конгресот, не се дозволени. Да го почекаме Конгресот, на Конгресот јас повторно ќе предложам, со најдобра цел да победи мојот предлог за непризнавање на фракции во ДУИ. Секоја постапка надвор од Статутот е анархија. А анархијата е најголемиот непријател на демократијата“, вели Ахмети.

Тој додава дека начелото е малцинството да се придружи на мислењето на мнозинството и дека најдемократското начело.

„Во спротивно да направиме анархична партија и да работиме кој како сака“, вели Ахмети.

Членовите на Демократската унија за интеграција (ДУИ) кои се дел од таканаречената „Огнена група“ денеска го напуштија денешниот состанок на Централното претседателство кој се одржа во седиштето на партијата во Мала Речица и најавија дека ќе функционираат како фракција во ДУИ.

Актуелниот организациски секретар во ДУИ Блерим Беџети по четири часа од почетокот на состанокот, изјави дека разликите се големи и од организационен аспект внатре во ДУИ, но и од аспект на дебатата за програмските определби врз основа на кои ја добиле довербата од граѓаните.

„За жал немаме можност од реална дебата и се користат двојни или тројни аршини во однос на одредени исти и слични прашања и затоа од денеска ние ќе имаме наши ставови бидејќи ќе делуваме како фракција во рамки на ДУИ“, изјави Беџети.

Членовите на „Огнената група“ смеаат дека актуелните министри во Владата од ДУИ ја узурпирале партијата со своите одлуки.

„Тоа што е надлежност на партијата преминува во надлежност на членовите Владата и тука да се разбереме не се само кадровските прашања, тоа се релевантни и значајни, зборуваме за проргамските определби на ДУИ, рече Беџети.

На новинарските прашања дали и натаму ќе бидат дел од органите на партијата, Беџети изјави дека се избрани од друг партиски орган и дека не се разрешени.

Иако во моментов фракции не се дозволени, Ахмети изјави дека не се зборувало за исклучување на членови од партијата кои се определиле да дејствуваат фракционерски.

На седницата имало извештај за работата на партиските функционери во Владата, за кој мнозиснтвото гласало позитивно, додаде Ахмети.

За поделеноста меѓу двете групи во ДУИ јавно се зборува изминативе неколку месеци. „Огнената група“ е составена од поранешни министри, сегашни пратеници и градоначалници и е предводена од Изет Меџити, Муса Џафери и Блерим Беџети. Тие сметаат дека цел владин состав потфрлил и треба да се смени со свеж кадар. Во другата група се владините функционери Артан Груби и Бујар Османи кои имаат поддршка од претседателот на партијата Али Ахмети.

„Огнените“ од ДУИ ќе делуваат како фракција

Организациски секретар во ДУИ, Блерим Беџети.

Членовите на Демократската унија за интеграција (ДУИ) кои се дел од таканаречената „Огнена група“ го напуштија денешниот состанок на Централното претседателство кој се одржа во седиштето на партијата во Мала Речица и најавија дека ќе функционираат како фракција во ДУИ.

Актуелниот организациски секретар во ДУИ Блерим Беџети по четири часа од почетокот на состанокот, изјави дека разликите се големи и од организационен аспект внатре во ДУИ, но и од аспект на дебатата за програмските определби врз основа на кои ја добиле довербата од граѓаните.

„За жал немаме можност од реална дебата и се користат двојни или тројни аршини во однос на одредени исти и слични прашања и затоа од денеска ние ќе имаме наши ставови бидејќи ќе делуваме како фракција во рамки на ДУИ“, изјави Беџети.

Членовите на „Огнената група“ смеаат дека актуелните министри во Владата од ДУИ ја узурпирале партијата со своите одлуки.

„Тоа што е надлежност на партијата преминува во надлежност на членовите Владата и тука да се разбереме не се само кадровските прашања, тоа се релевантни и значајни, зборуваме за проргамските определби на ДУИ, рече Беџети.

На новинарските прашања дали и натаму ќе бидат дел од органите на партијата, Беџети изјави дека се избрани од друг партиски орган и дека не се разрешени.

За поделеноста меѓу двете групи во ДУИ јавно се зборува изминативе неколку месеци. „Огнената група“ е составена од поранешни министри, сегашни пратеници и градоначалници и е предводена од Изет Меџити, Муса Џафери и Блерим Беџети. Тие сметаат дека цел владин состав потфрлил и треба да се смени со свеж кадар. Во другата група се владините функционери Артан Груби и Бујар Османи кои имаат поддршка од претседателот на партијата Али Ахмети.

Пред почетокот на денешниот состанок, Османи изјави дека на седницата ќе дебатираат за сите прашања кои останале неразговарани на претходната седница, кои што ќе бидат покренати од членовите на претседателството.

ДУИ како политичка партија беше основана во 2002 година, по укинувањето на таканаречената Ослободителна народна армија (ОНА) во конфликтот во Македонија во 2001 година.

Тогаш стана најголема политичка партија од албанскиот блок и трета најголема во државата, по ВМРО-ДПМНЕ и СДСМ, и повеќе од 18 години е дел од власта, а само две години беше во опозиција.

Откако претходно повеќе од осум години беше дел од владината коалиција со ВМРО-ДПМНЕ во периодот од 2008 до 2016 година, ДУИ сега е дел од владината коалиција заедно со СДСМ.

Старешината на Киевско-печерската лавра осомничен дека ја одобрил руската агресија

Митрополитот Павло, на денот кога беше објавено дека е под сомнение за наводно оправдување на руската инвазија на Украина, Киев, 1 април 2023 година.

Украинската агенција за безбедност денеска известила еден од најважните православни свештеници дека е осомничен дека ја оправдувал руската агресија, во услови на голем спор за познат православен манастир.

Митрополитот Павло, игумен на манастирот Киевско-Печерска лавра што е најсветото православно светилиште во Украина, се спротивставува на наредбите од властите да го напушти комплексот. Претходно оваа недела тој го проколна украинскиот претседател Володимир Зеленски.

Соочен со сослушување пред судот во Киев, митрополитот ги отфрли тврдењата на Службата за безбедност на Украина, позната како СБУ, дека ја одобрува руската инвазија. Тој вели дека обвинувањата се политички мотивирани.

СБУ, која упадна во неговиот дом, побара од судот да му одреди домашен притвор додека истрагата е во тек.

Монасите во манастирот припаѓаат на Украинската православна црква, која е обвинета за врски со Русија. Спорот за имотот, познат како Пештерскиот манастир, е дел од поширок верски конфликт што се одвива заедно со војната.

Украинските власти вршат остри мерки против Украинската православна црква поради нејзините историски врски со Руската православна црква, чиј лидер, патријархот Кирил, го поддржува рускиот претседател Владимир Путин и неговата инвазија на Украина.

Украинската црква инсистира дека е лојална на Украина и од самиот почеток ја осудува руската инвазија. Црквата прогласи независност од Москва.

Но, украинските безбедносни агенции тврдат дека некои во црквата сè уште имаат блиски врски со Москва. Тие упаднаа во неколку свети места на црквата, а подоцна објавија фотографии со рубли, руски пасоши и летоци со пораки од московскиот патријарх, како доказ дека некои црковни функционери и понатаму се лојални на Русија.

Пакистанската армија тврди дека „терористи“ од Иран убиле четворица војници

Илустративна фотографија - пакистански војник

Пакистанската армија денеска соопшти дека напаѓачи од Иран убиле четворица нејзини војници на граничната патрола.

„Група терористи кои оперираат од иранска страна нападнаа рутинска гранична патрола на пакистанските безбедносни сили кои оперираат долж пакистанско-иранската граница“, се вели во соопштението на армијата.

Инцидентот се случил во областа Кеч во југозападната провинција Белучистан, која дели долга беззаконска граница со Авганистан и Иран.

Армијата соопшти дека пакистанските власти воспоставуваат контакт со Иран за да побараат начини за спречување на такви инциденти во иднина.

Никој засега не презеде одговорност.

Русија претседава со Советот за безбедност на ОН и покрај противењето на Украина

Дебата во Советот за безбедност на Обединетите нации за годишнината од руската инвазија на Украина, Њујорк, САД, 24 февруари 2023 година.

Русија денеска го презеде претседавањето со Советот за безбедност на Обединетите нации (ОН), и покрај барањето на Украина другите членови на телото да го блокираат овој потег.

Секој од 15-те членови на Советот, ротирачки го презема претседателството на еден месец.

Последен пат кога Русија претседаваше со Советот беше во февруари 2022 година, кога започна инвазија врз Украина.

Тоа значи дека Советот за безбедност е предводен од земја чиј претседател е под меѓународна потерница за наводни воени злосторства.

Меѓународниот кривичен трибунал, кој не е институција на ОН, ја издаде наредбата минатиот месец.

И покрај приговорите на Украина, САД рекоа дека не можат да ја блокираат Русија која е постојана членка на Советот, да ја преземе водечка улога.

Други постојани членки на Советот за безбедност на ОН се Велика Британија, САД, Франција и Кина.

Улогата е главно процедурална, но московскиот амбасадор во ОН, Василиј Небензија за руската новинска агенција Тасс изјави дека планира да започне неколку дебати, вклучително и една за контролата на оружјето.

Тој изјави дека ќе разговараат за „новиот светски поредок“ кој, како што посочи, доаѓа да го „замени униполарниот“.

Украинскиот министер за надворешни работи Дмитро Кулеба го нарече руското претседателство „најлошата шега досега, дури и за први април“, и дека тоа е „потсетник дека нешто не е во ред во функционирањето на меѓународната безбедносна архитектура“.

Мицкоски - нема да има уставни измени во овој парламентарен состав

Претседателот на ВМРО ДПМНЕ, Христијан Мицкоски.

Во овој парламентарен состав промена на Устав нема да има, изјави денеска претседателот на ВМРО-ДПМНЕ Христијан Мицкоски. Тој зборуваше за можноста дали уставните измени би можело да се направат по примерот на Хрватска, при што рече дека е подготвен за такво нешто, како што наведе, „ако тоа е формулата за успех, уште утре да ја почнеме процедурата да биде Македонија држава на еден народ и на малцинствата во нејзе“.

„Еве ако сакаат (СДСМ и ДУИ) уште утре да ја отвориме Преамбулата на македонскиот Устав и да го направиме тоа според хрватскиот терк, но само да не се каат, па да не речат некои други етнички заедници, а не било така како што ни кажуваат. Ако сакаат според Преамбулата на хравтскиот Устав веднаш да, не знам дали ја прочитале, ја виделе или така на памет си кажуваат, но еве ние како ВМРО-ДПМНЕ одма прифаќаме. Таква уставна измена одма прифаќаме“, изјави Мицкоски.

Лидерот на опозицијата изјавата ја даде во Штип одговарајќи на новинарско прашање за тезите на СДСМ и ДУИ дека уставните измени би можеле да се направат по примерот на Хрватска каде во Уставот има широко набројување на етничките заедници.

Инаку, Министерството за правда најави дека до крајот на следната недела ќе биде формирана работната група за уставните измени, која треба да го подготви текстот на уставните амандмани, вклучително и текстот на Преамбулата за внесување на Бугарите и други помали заедници во државата, неопходни за Македонија да почне со отворање на поглавјата во преговорите со Европската унија.

Откако ќе бидат подготвени уставните амандмани во работната група, ќе бидат испратени во Собранието, каде за промената на Уставот е потребно да гласаат најмалку 80 пратеници.

Опозициската ВМРО-ДПМНЕ засега е со став дека нема да учествува во оваа работна група, бидејќи ваквиот процес го смета за нелегитимен.

Иако приоритет во работата на работната група ќе биде Преамбулата, како што велат од Министерството за правда, измените на Уставот може да значат отворање на пакет други прашања. Меѓу нив промена на формулацијата „јазикот кој го зборуваат 20 проценти од граѓаните“ со „албански јазик“, што ја поддржа и претседателот на Алијанса за Албанците Арбен Таравари.

Меѓу другите измени за кои се зборуваше беа за регулирање на вакуум просторот во работата на институциите при распуштање на Собранието и измени според кои министерот за правда не треба да биде член на Судскиот совет, како што изјави на новинарски брифинг новиот министер за правда Кренар Лога. Но, сепак Лога ден потоа се предомисли и изјави дека приоритет е промена на Преамбулата.

Шефот на иранското правосудство: Без милост ќе ги гониме жените кои не носат хиџаб

Две млади Иранки без задолжителен хиџаб на гробот на Кир Велики во Пасаргард во провинцијата Фарс, март 2023 година.

Соочен со зголемениот број жени кои му пркосат на задолжителниот кодекс на облекување, шефот на правдата во Иран се закани дека „безмилосно“ ќе ги гони жените кои се појавуваат во јавноста без превез, објавија денеска иранските медиуми.

Предупредувањето на Голам-Хосеин Мохсени Еџеи доаѓа по соопштението за печатот од Министерството за внатрешни работи во четвртокот, во кое се нагласува задолжителното спроведување на законот за хиџаб.

„Откривањето е еднакво на противење на нашите вредности“, неколку сајтови го цитираа Еџеи. Оние „кои ќе направат такви дела ќе бидат казнети“ и ќе бидат „гони без милост“, рече тој, без да објасни какви ќе бидат казните.

Еџеи е шеф на иранското правосудство и рече дека службениците за спроведување на законот имаат „обврска да го пријават на судските власти секој очигледен престап и какви било абнормалности што се против религиозните закони што се случуваат на јавен простор“.

Сè повеќе жени во Иран ги отфрлаат превезите по смртта на Махса Амини, 22-годишната која почина во морален полициски притвор во септември минатата година. Таа беше приведена поради наводно прекршување на правилата за носење хиџаб.

Месечните национални протести предизвикани од нејзината смрт беа насилно прекинати од властите.

Сепак, ризикувајќи апсење поради пркосење на задолжителниот кодекс на облекување, жените можат да се видат без превез во трговските центри, рестораните и на улиците низ земјата. Социјалните мрежи се преполни со видеа на забулени жени кои и пркосат на моралната полиција.

Според шеријатскиот закон на Исламската Република, наметнат по револуцијата во 1979 година, жените се обврзани да ја покриваат косата и да носат долга, широка облека за покривање на нивните фигури. Оние кои ќе го прекршат законот се соочуваат со јавна опомена, парични казни или апсење.

Опишувајќи го превезот како „еден од цивилизациските основи на иранската нација“ и „еден од практичните принципи на Исламската Република“, во соопштението на Министерството во четвртокот се вели дека „нема толеранција или повлекување“ по ова прашање.

Тие ги повикаа обичните граѓани да се соочат со жените без превез. Ваквите директиви во минатото дозволуваа поконзервативните граѓани неказнето да ги напаѓаат жените.

Пронајдени двете тинејџерки кои беа исчезнати

МВР

Пронајдени се двете тинејџерки на возраст од 12 и 15 години кои цели два дена не се вратиле дома, соопшти денеска Министерството за внатрешни работи (МВР).

Според полицијата, тинејџерките биле пронајдени денеска во 13.30 часот на улицата „Џон Кенеди“, кај продажен објект во паркот, од страна на полициски службеници од ЕВР Центар и Бит Пазар.

„Пронајдени се малолетничките М.К.(15) и А.А.(12), за кои на 30.03.2023 во вечерните часови беше пријавено дека се оддалечиле“, се вели во соопштението на МВР.

Од МВР велат дека откако ќе го документираат случајот, малолетничките ќе им бидат предадени на родителите.

Исчезнувањето на двете тинејџерки го пријавија нивните родители во полициската станица Бит Пазар дека не се вратиле дома.

Во кусото полициско соопштение за исчезнувањето беше наведено дека 15 годишното девојче и претходно, во повеќе наврати се оддалечувало од домот и била враќана дома со полициска придружба.

Таткото на 12 годишното девојче јавно преку дел од медиумите упати апел за помош во нејзиното пронаоѓање. Тој за ТВ 21 изјави дека последен пат ја видел ќерка си вчера во 7 часот наутро пред да ја испрати во училиште.

Изборниот молк во Црна Гора почнува на полноќ

Гласање на претседателските избори во Црна Гора

Во Црна Гора на полноќ почнува изборниот молк, во пресрет на вториот круг од претседателските избори, што ќе се одржи во недела на 2 април.

Изборниот молк е на сила до затворање на гласачките места во недела во 20 часот.

Во тој период се забранува медиумско претставување на претседателските кандидати, политичко рекламирање, објавување оценки на резултатите од гласањето, пароли или симболи на кандидатите и резултати од испитување на јавното мислење.

Во изборната трка има двајца претседателски кандидати, кои освоија најмногу гласови во првиот изборен круг на 19 март - кандидатот на Демократската партија на социјалистите на Црна Гора Мило Ѓукановиќ и Јаков Милатовиќ, кандидатот на Движењето Европа сега.

Ова се четврти претседателски избори од обновувањето на независноста на Црна Гора и седми од воведувањето на повеќепартискиот систем.

Право на глас во вториот круг за претседател на Црна Гора имаат 542.154 граѓани, што е исто толку гласачи како и во првиот круг. Најмногу гласачи има во Подгорица 143.608, а најмалку во Шавник 1.777 на северот од државата.

Победник во вториот изборен круг од претседателските избори е кандидатот кој освоил најмногу гласови од гласачите кои излегле. Мандатот на претседателот трае пет години.

Регуларноста на изборниот процес ќе ја следат набљудувачките мисии на ОДИХР, европратениците и Советот на Европа и невладините организации Мониторинг центар и Центарот за демократска транзиција.

Папата Франциск денеска излезе од болница

Папата Франциск мафта од автомобил додека ја напушта римската болница Гемели. Италија, 1 април 2023 година.

Папата Франциск денеска ја напушти болницата за да се врати во Ватикан, откако беше лекуван од бронхитис, мавтајќи им на добронамерниците и медиумите кои го чекаа додека заминуваше.

„Не се исплашив, сè уште сум жив“, им рече тој на новинарите во краткиот коментар пред болницата пред да замине.

Папата кој има 86 години, беше пренесен во болница пред три дена откако се пожали на тешкотии со дишењето.

Тој добро реагираше на инфузијата на антибиотиците, рече неговиот медицински тим.

Папата, кој во март ја одбележа 10-годишнина од неговиот понтификат, претрпе неколку болести во последните години.

Утре Бугарија гласа на петти парламентарни избори за две години

Избори во Бугарија - илустративна фотографија.

На 2 април во Бугарија ќе се одржат парламентарни избори. Ова се петти избори во последните 2 години и се одржуваат во услови на тековни политички превирања во земјата.

Овие избори следуваат по четири други на кои ниту една партија не можеше да обезбеди изборно мнозинство или да состави одржлива владина коалиција.

Без мнозинство или стабилна коалиција, претседателот Румен Радев назначи преодни влади, вклучувајќи ја и сегашната влада предводена од привремениот премиер Галаб Донев.

Недостигот на стабилна влада резултираше со парламентарна блокада, при што партиите не можат да ги унапредат своите политички приоритети или да ги спроведат многу потребните реформи за да се решат широко распространетата загриженост за корупцијата.

Две партии -- ГЕРБ и реформистичката Продолжуваме со промените -- завршија на првото и второто место на последните парламентарни избори на 2 октомври, но тие не успеаја да состават коалициска влада.

Борби беснеат на исток, Зеленски вети дека руските војници ќе бидат казнети

Украинските војници со тенкови Т64 се движат кон правецот Бахмут, во регионот на Доњецката област, на 20 март 2023 година.

Украинските сили одбија десетици руски напади во источниот регион Доњецк во текот на изминатиот ден, соопшти денеска војската, додека претседателот Володимир Зеленски ги предупреди московските војници кои се осомничени дека извршиле злосторства дека ќе бидат изведени пред лицето на правдата.

Покрај градот Бахмут, централната точка на офанзивата на Москва на исток во изминатите неколку месеци, Генералштабот на украинската војска во своето редовно дневно ажурирање соопшти дека руските сили сега го засилиле нападот врз градовите Авдијевка и Мариинка во Регионот Доњецк и на Билохоривка, во регионот Луганск.

Вкупно 70 напади се регистрирани во изминатите 24 часа на четирите локации, каде што се водат тешки борби, соопшти војската.

Шест беспилотни летала Шахед од иранско производство беа соборени од воздушната одбрана на Украина, соопшти војската.

Кога Украина на 31 март одбележа една година од повлекувањето на руските сили од Буча, претседателот Володимир Зеленски ја искористи годишнината за да ги предупреди оние руски војници осомничени за масакрот на стотици цивили во градот, каде што беа стотина тела на убиени цивили оставени на улица, дека на крајот ќе бидат изведени пред лицето на правдата.

„Руските џелати и убијци ќе добијат правични казни. Сто проценти“, рече Зеленски.

Препукувања на Русија и САД во ОН поради тактичкото нуклеарно оружје во Белорусија

Архивска фотографија - состанок на Советот за безбедност во седиштето на Обединетите нации во Њујорк

Русија и САД се судрија во Обединетите нации поради плановите на Москва да распореди тактичко нуклеарно оружје во Белорусија.

Рускиот амбасадор во ОН Василиј Небензија на 31 март рече дека Москва не пренесува нуклеарно оружје, туку „оперативни тактички ракетни комплекси“, кои ќе бидат под руска контрола.

Небензија, исто така, ги обвини Соединетите држави за уништување на договорите за контрола на оружјето и го повтори рускиот приговор за тактичкото нуклеарно оружје распоредено во земјите на НАТО.

Заменик-амбасадорот на САД Роберт Вуд возврати дека Вашингтон ништо не слушнал од Русија сè до нејзиното преземање на украинскиот Кримски Полуостров во 2014 година.

Рускиот претседател Владимир Путин минатата недела изјави дека Москва постигнала договор за стационирање на тактичко нуклеарно оружје на територијата на блискиот сојузник Белорусија, која граничи и со Русија и со Украина.

Руската државна новинска агенција ТАСС на 25 март го цитираше Путин како тврди дека нема „ништо необично“ во потегот и дека тој не ги прекршил постојните договори за неширење нуклеарно оружје.

ММФ одобри заем од 15,6 милијарди долари за Украина

Меѓународниот монетарен фонд (ММФ)

Меѓународниот монетарен фонд (ММФ) објави дека неговиот одбор на директори одобрил четиригодишен заем од 15,6 милијарди долари за Украина, како дел од глобалниот пакет од 115 милијарди долари за поддршка на економијата на земјата која се бори со руската инвазија од минатиот февруари.

Одлуката го отвори патот за итна исплата на околу 2,7 милијарди долари на Киев, но бара Украина да направи амбициозни реформи, особено во енергетскиот сектор, се вели во соопштението.

Таканаречениот проширен аранжман (ЕФФ) е првата голема конвенционална програма за финансирање одобрена од ММФ за земја во војна од значителни размери.

Претходната програма на ММФ од 5 милијарди долари беше откажана во март 2022 година, кога фондот обезбеди 1,4 милијарди долари вонредно финансирање со многу малку услови. Тие обезбедија уште 1,3 милијарди во октомври минатата година.

Претставникот на ММФ рече дека новиот пакет вклучува заем, 80 милијарди залог за грантови и повластени заеми од мултилатерални институции и други земји, како и 20 милијарди за отплата на долгови.

Украина мора да исполни одредени услови во следните две години, кои вклучуваат чекори за зголемување на даночните приходи, одржување стабилен девизен курс, зачувување на независноста на централната банка и зајакнување на борбата против корупцијата.

ММФ наведува дека во втората фаза ќе бидат потребни подлабоки реформи, за зајакнување на стабилноста и повоена реконструкција, враќање на земјата во предвоената рамка на фискалната и монетарната политика, зајакнување на конкурентноста и справување со слабостите на енергетскиот сектор. .

Висок претставник на американското Министерство за финансии рече дека тоа е „навистина солидна“ програма, која ги обврзува украинските власти да постигнат 19 цели само во следната година.

Намалени и замрзнати цените на дел хигиенски производи

Тоалетна хартија и хигиенски производи во маркет.

Од денеска се замрзнуваат цените на тоалетната хартија, хигиенските влошки, влажните марамчиња и пелените за деца и возрасни.

Одлуката беше донесена минатата недела, а ќе биде во сила од 1 април до 31 мај 2023 година, како што најави министерот за економија Крешник Бектеши.

Намалувањето ќе биде 13 отсто од цените кои ги имале тоалетната хартија, влажните марамчиња, пелените за деца и возрасни (дајперси) и хигиенските влошки во трговијата на мало на 20 март годинава.

Владата ја донесе оваа Одлука по предлог на Министерството за економија, согласно направените анализи и податоците од Царинската управа, изјави Бектеши.

Претходно, со одлука на Владата, беа замрзнати и цените на тестенините и млечните производи кои се намалени за 15, односно за 10 проценти, како и цените на јајцата и оризот кои останаа на нивото од 15-ти овој месец.

Цената на белиот и на полубелиот леб од 450 грама е замрзната на 33 денари.

Вчитај повеќе

XS
SM
MD
LG