Во руски воздушен напад во близина на Киев загинале шест лица
Најмалку шест луѓе, меѓу кои и едно дете загинале во руски воздушен напад во селото Мархаливка во близина на Киев, соопшти денеска регионалната полиција. Во нападот се ранети и двајца возрасни и две деца. Тие итно се префрлени во болница, соопшти киевската регионална полиција.
САД во Советот за безбедност на ОН: За влакно спречена нуклеарна катастрофа
Соединетите Американски Држави и нивните сојузници жестоко ја критикуваа Русија во Советот за безбедност на ОН, поради гранатирањето и заземањето на украинската нуклеарна централа Запорожје, пренесува Ројтерс.
„Светот синоќа за влакно спречи нуклеарна катастрофа“, рече американската амбасадорка во ОН, Линда Томас-Гринфилд.
Русија го забранува Фејсбук
Русија го забранува Фејсбук, се наведува во извештајот на руската државна новинска агенција РИА Новости, пренесува Би-би-си.
Државниот регулатор на медиуми Роскомнадзор одлучил да го блокира пристапот до оваа социјална мрежа.
Извршниот директор на Фејсбук Ник Клег рече дека оваа социјална мрежа ќе направи „сè што може“ за да ги обнови услугите во Русија. Клег е поранешен британски вицепремиер.
Џачка - Во Украина нема албански платеници
Албанската министерка за Европа и надворешни работи, Олта Џачка, ги отфрли информациите дека албански платеници се упатуваат во Украина.
Според министерката, тоа е лага создадена од Москва, нагласувајќи дека Албанија стои до Украина и ќе продолжи да работи со сите сојузници и партнери за да помогне да се стави крај на руската агресија.
„Во Украина нема албански платеници“, вели Џачка.