Достапни линкови

logo-print

По предупредувањето од САД, зголемена безбедноста во Европа


Безбедноста во поголемите градови во Европа е зголемена, особено на таканаречените Божиќни пазари во Германија и Франција. До ова дојде откако Стејт департментот издаде предупредување за зголемен ризик од терористички напади во Европа за време на претстојната сезона на празници.

„Државјаните на САД треба да бидат претпазливи, бидејќи имало веродостојни информации дека милитанти на Исламската држава, Ал Каеда и нивните филијали продолжуваат со плановите за напади во Европа“, се наведува во соопштението на Стејт департментот.

Во Берлин, организаторите на традиционалниот божиќен пазар велат дека направиле се што е можно за да се избегне опасноста. Чувари во црни униформи ги претресуваат торбите на луѓето.

Мајкл Лир професор од Албани, Њујорк престојува како турист во Берлин и вели:

„Мислам дека веројатноста за да се случи нешто такво е многу мала“.

Во Минхен, една продавачка на дрвените тезги поставени на плоштадот во центарот на градот исто така вели дека не се плаши. Беа Левенлајн прашува: „Каде сум сигурна?, додавајќи:

„Ако ние самите ги ограничуваме нашите движења, тоа е токму она што тие го сакаат, никој да не го напушта својот дом повеќе“.

Портпаролот на полицијата во Минхен Свен Милер вели дека бројот на службениците за Божиќ е зголемен во споредба со претходните години.

„Ние немаме конкретни индикации за каква било непосредна опасност, па ние дефинитивно може да им кажеме на луѓето: посетете ги Божиќните пазари и забавувајте се, ние се грижиме за вас“.

Во источниот францускиот град Стразбур, каде што во текот на изминатиот викенд во антитерористичка операција беа уапсени неколку лица, војници облечени во панцирни елеци патролираат околу дрвените тезги што се поставуваат за Божиќ.

Во ноември 2015 година, вооружени лица и бомбаши самоубијци извршија неколку напади во Париз во кои загинаа 129 лица.

Францускиот министер за внатрешни работи Бернар Казнев деновиве изјави дека има целосна мобилизација на службата за борба против тероризмот во земјата.

„Никогаш терористичката закана не била толку висока на нашата територија“, рече тој.

Казнев додаде дека се преземени сите мерки за да се спречи најлошото, но сепак додаде дека не постои стопроцентна гаранција и оти она што го тврди тоа го лаже францускиот народ.

Инаку, предупредувањето на Стејт департментот за зголемен ризик од терористички напади во Европа важи до 20 февруари идната година.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

Покажи ги коментарите

XS
SM
MD
LG