Достапни линкови

Институциите највиновни за штетите од непогодите


Институциите кои во минатото се бавеле со проучување на природните непогоди и нивното спречување повеќе не постојат, а науката која се бави со нив е маргинализирана, посочуваат експертите.

Институциите ја сносат најголемата вина, а мала улога игра и човечкиот фактор за последиците од поплавите кои пред повеќе од еден месец го погодија скопско, е заклучокот на стручните лица кои учествуваа на трибината на Цивил - Градење на ефикасен систем за превенција и справување со ризици од природни непогоди во Македонија. Според нив, институциите кои во минатото се бавеле со проучување на природните непогоди и нивното спречување повеќе не постојат, а науката која се бави со нив е маргинализирана.

Професор Александар Трендафилов од Шумарскиот факултет во Скопје рече дека 90 отсто од проблемот го гледа кај институциите, а 10 отсто кај човекот и тој очекува природните непогоди да бидат зачестени во иднина.

„Во бесправни држави први на удар се природните ресурси, а тоа нам ни се случи и ќе ни се случува за жал“, вели тој.

Трендафилов додава дека клучно е и тоа што нема соодветни институции кои би се справиле со појавата на природни непогоди, кои ги имало во минатото, но биле затворени, а нема ни доволно стручни лица, ни проекти кои се бават со оваа тематика.

Неговиот колега од Шумарскиот факултет, професор Иван Блинков посочува и на ранливоста на теренот каде се случија поплавите и урбанизацијата која е направена без никакви стандарди.

„Ние имаме опасност, а тоа е количината на вода што доаѓа, а ризикот зависи колкав ќе биде и од ранливоста на теренот, која овде е огромна“, вели тој.

Професор Татјана Миткова од Земјоделскиот факултет во Скопје истакна дека последиците од поплавите се резултат на сплет на околности, како ровинската ерозија, оголувањето на шумите и немањето свест кај граѓаните. Таа информира дека од околу 3000 хектари површина, 1000 биле поплавени, при што инфраструктурата е целосно уништена и оние кои се бавеле со земјоделство сега ќе треба повторно да почнат до нула.

„Значи има потреба од вклучување на експерти кои ќе предложат мерки за борба против ерозија и уредување на порои затоа што сево ова што се случи и што го видовме на терен е непреземање според мене, правилни мерки. Понатаму потребно е пошумување на околните планини каде со уништување на шумите допринело за ерозија на земјиштето во вакви размери. Потоа спроведување на теренски и технички мелиорации“, вели таа.

Професор Ивица Милевски од Природно-математичкиот факултет посочи дека сè помалку се вложува во научни институции, сè помалку има и соодветен кадар, при што не се почитуваат и резултатите кои произлегуваат од истражувањата на стручните лица, а нема сериозен пристап ни кон донесените стратегии. Тој додава и дека има европски извештаи во кои е укажано дека во медитеранското подрачје, односно во југоисточна Европа ќе дојде до драстично зголемување на временските непогоди.

  • 16x9 Image

    Марија Митевска

    Новинарската кариера ја започна во 2008 година во А1 телевизија како репортер во информативната програма.  Родена е на 14.04 1984 година во Скопје. Од мај 2009-та работи како постојан дописник за Радио Слободна Европа од Скопје.

XS
SM
MD
LG