Со транспаренти „Профит за Усје, болести за нас“, „Дишеме отров“ и „Воздухот не е луксуз, туку наше право“, граѓани и еколошки активисти денеска протестираа пред Владата, барајќи затворање на цементарницата „Усје“ поради загадувањето на воздухот.
Учесниците на протестот порачаа дека економскиот профит не смее да биде над здравјето на граѓаните и оти институциите имаат обврска да понудат конкретни решенија за заштита на животната средина. Тие обвинија дека надлежните го штитат интересот на компанијата, наместо здравјето на жителите на Скопје.
Видете и ова: Усје - Мерни станици околу цементарницата нема да покажат дали загадувањето доаѓа од нас„Институциите го признаваат проблемот, но не нудат решение. Наместо да нè штитат нас, го штитат профитот. Ни ги трујат децата“, порача еден од активистите, по што насобраните извикуваа „Стоп за Усје“.
Протестот продолжи со марш кон Собранието, каде учесниците ги повикуваа минувачите да им се придружат, а потоа и пред зградата на Министерството за животна средина и просторно планирање. Дел од пораките беа насочени и кон мерењето на загадувањето, при што активистите оценија дека не се прикажува реалната состојба со квалитетот на воздухот.
Видете и ова: Државата може да иницира независен мониторинг на Цементарница УсјеВо врска со протестот, премиерот Христијан Мицкоски, одговарајќи на новинарско прашање од Тетово, изјави дека секој граѓанин има право јавно да го изрази своето незадоволство.
„Ние како Влада правиме сè за граѓаните да имаат здрава и чиста животна средина. Тоа што со децении ништо не е направено, немам што да кажам“, изјави Мицкоски.
Тој додаде дека Владата презела конкретни чекори за подобрување на квалитетот на воздухот преку изградба на когенеративни централи, системи за далечинско греење и набавка на електрични автобуси, кои нема да бидат наменети само за Скопје.