Главните преговарачи на Косово и Србија, Бесник Бислими и Петар Петковиќ ќе се сретнат в понеделник во Брисел за да продолжат со разговорите за прашањето за српскиот динар, чија употреба на Косово е забранета од минатиот месец.
Средбата со посредство на специјалниот претставник на Европската Унија, Мирослав Лајчак, е продолжение на минатонеделната средба, кога двете страни се договорија да предложат решение за динарот.
Се очекува на средбата да се разговара за предлозите на секоја страна.
Употребата на динари за готовински плаќања во Косово е забранета од 1 февруари, кога Централната банка на Косово издаде декрет со кој го назначи еврото како единствена официјална валута во земјата.
Ова прашање, освен што ја налути Србија, предизвика и несогласувања меѓу Владата на Косово и меѓународната заедница, бидејќи српската заедница на Косово со години добива исплати во динари од српскиот буџет.
Западните дипломати побараа од Косово да го суспендира указот за да им се даде време на погодените граѓани да се прилагодат на новата практика.
Во неодамнешното интервју за Радио Слободна Европа, косовскиот премиер Албин Курти изјави дека нема да бидат прифатени предлозите за динарот кои се во спротивност со уредбата на Централната банка на Косово.
Видете и ова: Курти за РСЕ: Не прифаќаме предлози за динарот кои се спротивни на уредбата на Централната БанкаПортпаролот на Европската Унија, Петер Стано, по минатонеделната средба изјави дека очекува на средбата на 25 март да продолжат разговорите за изнаоѓање решение за проблемот со српскиот динар.
Стано рече дека минатонеделниот состанок „бил важен за да се разјаснат фактите и да се разјаснат некои прашања“.
„Партиите се договорија да продолжат разговорите за ова прашање во понеделник на 25 март, со цел да се разговара за конкретни предлози и да се најде краткорочно решение“, додаде тој.
Ова беше првпат претставници на Владата на Косово да учествуваат на вакви разговори по стапувањето во сила на регулативата на Централната банка на Косово.