„Ви посакувам подобра и помирна година што доаѓа,“ вели претседателот на државата Стево Пендаровски во новогодишната честитка до македонските граѓани. Тој истакнува дека државата е домот што можеме да го градиме само заедно, сплотени околу визијата за хумано, праведно и просперитетно општество во кое ќе има место за сите.
„Во годината што измина бевме сведоци на безбедносни, економски и енергетски предизвици кои ја зголемија нееднаквоста и го зголемија стравот за долгорочната стабилност. Сепак, изминатата година бевме сведоци и на хуманоста на луѓето со добра волја кои покрај за своите, се грижеа и за потребите на другите. Овие херои на солидарноста донираа храна, облека и лекови и го подарија своето време и внимание за да ги поткрепат оние на кои им е најпотребна помош. Многумина од нив активно се застапуваа за социјална правда и за општество со еднакви можности за сите. Враќајќи ни ја надежта во општото добро, тие нѐ потсетуваат дека сме си потребни едни на други и дека сме одговорни едни за други,“ се вели во честитката на претседателот Пендаровски.
Видете и ова: Подобра година ветија функционерите во честитките до граѓанитеШефот на државата порачува дека „за да ја достигнеме заедничката цел кон која се стремиме уште од почетокот на македонската независност, потребна ни е посветеност и надеж дека ќе биде подобро.“
Ветувања за подобрување на животниот стандард испрати и државниот врв во новогодишните честитки до граѓаните.
Премиерот Димитар Ковачевски порача дека државата во 2023 година ќе продолжи да напредува и да ги остварува целите и ќе биде подобра за граѓаните. Претседателот на Собранието, Талат Џафери во новогодишна честитка до граѓаните вели дека треба да се насочиме кон обединување на општеството.