Здружението на Украинци во земјава, „Лејса Украинка“ попладнево протестираше пред амбасадата на Руската Федерација во Скопје во знак на револт по денешните руски ракетни напади врз неколку локации во Украина.
„Тука сме да ви кажеме дека со тоа што го направивте денеска, со ваков терористички чин, се убивате сами себе, ја туркате својата земја кон изолација, сиромаштија и ја уназадувате. Овие ракети што денеска го убија невооруженото население во Украина, исто така, ги убиваат и вашите идни генерации“, порачаа од здружението „Лејса Украинка“.
Експлозии го потресоа Киев, Зеленски ја обвини Русија за „тероризам“
Тие оценија дека ваквите напади уште повеќе ја челичат украинската нација и се заблагодарија до македонската Влада за воена помош што ја пружа и побараа таа да не престане, туку да се засили се до целосно ослободување на Украина.
„Единствено што и преостанува на Русија е терор врз цивилното население. Подмолен напад врз големи украински градови, додека луѓето спиеле и утрото кога тргнале на работа, за да има што повеќе цивилни жртви, како и напад врз енергетски објекти, со цел населението да остане без струја и вода. Тоа е единствено за што сте способни, да се борите со деца и повозрасни лица, без оружје“, порачаа од Здружението.
Утрово врз неколку градови во Украина беа истрелани најмалку 75 проектили, од кои 41 биле соборени од воздушната одбрана на Украина. Најмалку 11 лица загинаа, а 64 се повредени во руските воздушни напади.