На затворениот ирански режисер Џафар Панахи викендов му беше доделена Специјалната награда на жирито на филмскиот фестивал во Венеција за неговиот најнов филм „Без мечки“.
Инаку, 62 годишниот режисер Панахи беше затворен во јули, откако судот во Техеран пресуди дека тој мора да отслужи шестгодишна затворска казна што му беше изречена пред повеќе од една деценија за поддршка на антивладините демонстрации.
Иранскиот актер Реза Хејдари, по церемонијата на доделување на наградите, изјави за новинарите дека Панахи му испратил порака од затворот.
„Ми рече да не влегувам во неволја поради него“, рече Хејдари, еден од главните ликови во „Без мечки“.
„Наградата што ја доби носи порака -- уметник во затвор или надвор од затвор сè уште може да ја произведе својата порака затоа што ја сака уметноста и го сака киното“, додаде Хејдари.
Апсењето на Панахи беше дел од обновената акција на иранските власти против несогласувањето бидејќи антиестаблишментските чувства и речиси секојдневните протести низ исламската република ја потресуваат владата.
Неколку дена пред неговото апсење, Панахи беше меѓу повеќе од 300 ирански филмаџии и културни активисти кои објавија изјава во која ги осудуваат апсењата на активистите кинематографери Мохамад Расулоф и Мостафа ал-Ахмад.
Панахи првично отслужи два месеци затвор по неговата пресуда во 2010 година, пред да му биде одобрен условно отпуштање кое може да се отповика. Како дел од неговото ослободување, му беше забрането да режира или пишува сценарија и да патува во странство.
Режисерот има освоено голем број меѓународни награди за филмови кои го критикуваат модерен Иран, вклучувајќи ја и главната награда во Берлин за „Такси“ во 2015 година и најдоброто сценарио во Кан за неговиот филм „Три лица“ во 2018 година.