Соединетите Држави ќе испратат уште четири ракетни системи со висока мобилност (HIMARS) во Украина, изјави американскиот секретар за одбрана Лојд Остин откако рускиот министер за надворешни работи Сергеј Лавров рече дека воените „задачи“ на Москва во Украина сега го надминуваат источниот регион Донбас. Остин им рече на новинарите во Пентагон дека Украина одлично го искористила овие ракетни системи. Тој рече дека Русија продолжува со своето „немилосрдно гранатирање“ и дека на Украина и треба огнена моќ и муниција за да го издржи овој бараж и да возврати.
Украинските сили тврдат дека успешно го користат ХИМАРС
ХИМАРС има подолг дострел и е попрецизен од артилеријата од советската ера во арсеналот на Украина, а украинските власти рекоа дека нивното распоредување било критично во борбата за одбивање на руските трупи и за удар на нивните линии за снабдување. Украинскиот министер за одбрана Олексеј Резников претходно побара од Вашингтон да испрати уште ХИМАРС системи, велејќи дека силите на Киев ги искористиле за уништување на околу 30 руски командни станици и складишта за муниција. Со новите четирите системи Украина ќе има 16. Американскиот генерал Марк Мили, претседател на Здружениот Генералштаб, рече дека ниту еден од системите испратени досега не бил уништен од руските сили.