Голем број граѓани, членови и симпатизери на најголемата македонска опозициска партија ВМРО-ДПМНЕ вечерва излегоа на протест пред Владата за да побараат распишување предвремени парламентарни избори, но и да го искажат своето незадоволство од актуелната влада предводена од премиерот и претседател на СДСМ, Димитар Ковачевски.
Присутните кои дојдоа од повеќе градови вееја македонски знамиња и скандираа „Македонија“ и „ВМРО-ДПМНЕ“.
Тие се упатија кон владината зграда од три зборни места - од пред зградата на МТВ, Трговскиот центар „Буњаковец“ и од Собранието, за протестот кој беше најавен во 20 часот.
Од ВМРО-ДПМНЕ ја обвинуваат власта за неспособност да се справи со криминалот, растечката инфлација, енергетската криза и сиромаштијата.
Протестот се организираше под мотото „Премногу е“, а од партијата го најавија како надпартиски и обединувачки.