Украинскиот проруски политичар Виктор Медведчук, кој беше уапсен по обвинение за предавство, понуди да биде разменет за заробените цивили во Мариупол, украинскиот град кој е под руска опсада.
Во видеоснимката, која денеска ја објави украинската Служба за државна безбедност (СБУ), Медведчук ги повика претседателите на Русија и на Украина, Владимир Путин и Володимир Зеленски, да го разгледаат неговиот предлог за размена.
Истовремено, двајца Британци кои војуваа на украинска страна, и кои им се предадоа на руските сили во Мариупол, се појавија во руските медиуми, барајќи да бидат дел од размената.
Медведчук, кој е поранешен лидер на проруска опозициска партија и близок до Путин, беше уапсен во вторникот во специјална операција на СБУ. Неколку дена пред 24 февруари, кога Русија ја нападна Украина, 67-годишниот Медведчук избега од домашен притвор.
Нему му се заканува казна од 15 години до доживотен затвор под обвинение за предавство и помагање на терористичка организација поради посредувањето за купување јаглен за сепаратистичката република Доњецк на истокот на Украина, која е под контрола на проруските бунтовници.
Британците кои се појавуваат во руската снимка, се претставија како Шон Пинер и Ејден Еслин. Пинер имаше длабоки кругови под очите и делуваше исцрпено, но рече дека тој и Еслин не биле третирани на несоодветен начин. Нејасно е колку двајцата Британци можеле слободно да зборуваат.
Украинските претставници наведуваат дека Киев сака да му суди на Медведчук, а потоа да го размени за украински заробеници.