Економско-социјалниот совет, како што најави деновиве министерката за труд и социјална политика Јована Тренчевска по средбата со Организацијата на работодавачи на Македонија, на денешната седница на кој ќе присуствуваат и работодавачите како трета страна на социјалниот дијалог треба да го отвори прашањето за промена на критериумите за минималната плата. Синдикатот бара зголемување на минималната плата на 18.000 денари веднаш и спирално зголемување на сите останати плати, а доколку не биде исполнето ова нивно барање, најавуваат штрајк, но не се исклучени и други форми на изразување незадоволство како протести и блокирање улици. Од Владата велат дека минималната плата ќе расте, но сметаат дека системското решение треба да се најде низ дијалог со сите социјални партнери.
Ни со две минимални плати не може да се прехрани четиричлено семејство
Минималната плата се усогласува секој март во годината, но синдикатот бара зголемување веднаш. Смета дека ваквото барање е егзистенцијално имајќи го предвид зголемувањето на трошоците за живот, економската и енергетската криза. Како аргумент плус го посочуваат и тоа дека две минимални плати не се доволни да ги задоволат минималните трошоци на едно семејство.
Како од први до први со ценовниот удар и минималните плати
Минималната плата беше воведена во јануари 2012 година, кога беше донесен Законот за минимална плата. Тогаш минималната плата изнесуваше 8.050 денари. Последната законски утврдена минимална плата беше во 2019 година, кога беше утврдена на 14.500 денари. Во меѓувреме со усогласувањето со трошоците на живот таа се искачи на околу 15 илјади денари. Висината на минималната плата во 2019 година беше усогласена по неколкумесечно преговарање преку социјален дијалог со сите социјални партнери, во договор и со синдикатите и работодавачите.