Британскиот премиер Борис Џонсон денеска изјави дека дефиницијата за целосно вакцинирани ќе треба да се прилагоди, за да ја вклучи трета или засилена доза од вакцината против Ковид-19.
За ваквиот потег тој сепак не даде временска рамка.
Сега, ако сте целосно вакцинирани, тоа значи дека сте примиле две вакцини против ковид. Секој над 40-годишна возраст во Британија сега има право на засилена доза, шест месеци по примањето на втората доза.
„Многу е јасно дека три дози ќе станат важен факт и дека ќе ви го олеснат животот на различни начини“, рече Џонсон на прес-конференција.
„Ќе мораме да го прилагодиме нашиот концепт за тоа што значи целосна вакцинација за да го земеме тоа предвид и мислам дека тоа станува се поочигледно“, рече Џонсон.
Над 36.000 нови инфекции и 63 смртни случаи беа регистрирани во Велика Британија на 14 ноември. Во моментов во земјата над 46 милиони жители се целосно вакцинирани.